၉. ဓမ္မကထိကသုတ္တံ

၁၃၉. ‘‘စတ္တာရောမေ၊ ဘိက္ခဝေ၊ ဓမ္မကထိကာ. ကတမေ စတ္တာရော? ဣဓ၊ ဘိက္ခဝေ၊ ဧကစ္စော ဓမ္မကထိကော အပ္ပဉ္စ ဘာသတိ အသဟိတဉ္စ၊ ပရိသာ စဿ [ပရိသာ စ (သီ. သျာ. ကံ. ပီ.) ပု. ပ. ၁၅၆] န ကုသလာ ဟောတိ သဟိတာသဟိတဿ. ဧဝရူပေါ၊ ဘိက္ခဝေ၊ ဓမ္မကထိကော ဧဝရူပါယ ပရိသာယ ဓမ္မကထိကောတွေဝ သင်္ခံ ဂစ္ဆတိ.

‘‘ဣဓ ပန၊ ဘိက္ခဝေ၊ ဧကစ္စော ဓမ္မကထိကော အပ္ပဉ္စ ဘာသတိ သဟိတဉ္စ၊ ပရိသာ စဿ ကုသလာ ဟောတိ သဟိတာသဟိတဿ. ဧဝရူပေါ၊ ဘိက္ခဝေ၊ ဓမ္မကထိကော ဧဝရူပါယ ပရိသာယ ဓမ္မကထိကောတွေဝ သင်္ခံ ဂစ္ဆတိ.

‘‘ဣဓ ပန၊ ဘိက္ခဝေ၊ ဧကစ္စော ဓမ္မကထိကော ဗဟုဉ္စ ဘာသတိ အသဟိတဉ္စ၊ ပရိသာ စဿ န ကုသလာ ဟောတိ သဟိတာသဟိတဿ. ဧဝရူပေါ၊ ဘိက္ခဝေ၊ ဓမ္မကထိကော ဧဝရူပါယ ပရိသာယ ဓမ္မကထိကောတွေဝ သင်္ခံ ဂစ္ဆတိ.

‘‘ဣဓ ပန၊ ဘိက္ခဝေ၊ ဧကစ္စော ဓမ္မကထိကော ဗဟုဉ္စ ဘာသတိ သဟိတဉ္စ၊ ပရိသာ စဿ ကုသလာ ဟောတိ သဟိတာသဟိတဿ. ဧဝရူပေါ၊ ဘိက္ခဝေ၊ ဓမ္မကထိကော ဧဝရူပါယ ပရိသာယ ဓမ္မကထိကောတွေဝ သင်္ခံ ဂစ္ဆတိ. ဣမေ ခေါ၊ ဘိက္ခဝေ၊ စတ္တာရော ဓမ္မကထိကာ’’တိ. နဝမံ.