၁၀. ကမ္ဗောဇသုတ္တံ

၈၀. ဧကံ သမယံ ဘဂဝါ ကောသမ္ဗိယံ ဝိဟရတိ ဃောသိတာရာမေ. အထ ခေါ အာယသ္မာ အာနန္ဒော ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ. ဧကမန္တံ နိသိန္နော ခေါ အာယသ္မာ အာနန္ဒော ဘဂဝန္တံ ဧတဒဝေါစ –

‘‘ကော နု ခေါ၊ ဘန္တေ၊ ဟေတု ကော ပစ္စယော၊ ယေန မာတုဂါမော နေဝ သဘာယံ နိသီဒတိ၊ န ကမ္မန္တံ ပယောဇေတိ၊ န ကမ္ဗောဇံ ဂစ္ဆတီ’’တိ? ‘‘ကောဓနော၊ အာနန္ဒ၊ မာတုဂါမော၊ ဣဿုကီ၊ အာနန္ဒ၊ မာတုဂါမော၊ မစ္ဆရီ၊ အာနန္ဒ၊ မာတုဂါမော၊ ဒုပ္ပညော၊ အာနန္ဒ၊ မာတုဂါမော – အယံ ခေါ၊ အာနန္ဒ၊ ဟေတု အယံ ပစ္စယော၊ ယေန မာတုဂါမော နေဝ သဘာယံ နိသီဒတိ၊ န ကမ္မန္တံ ပယောဇေတိ၊ န ကမ္ဗောဇံ ဂစ္ဆတီ’’တိ. ဒသမံ.

အပဏ္ဏကဝဂ္ဂေါ တတိယော.