၂. ပဉှဗျာကရဏသုတ္တံ

၄၂. ‘‘စတ္တာရိမာနိ၊ ဘိက္ခဝေ၊ ပဉှဗျာကရဏာနိ [ပဉှာဗျာကရဏာနိ (က.)]. ကတမာနိ စတ္တာရိ? အတ္ထိ၊ ဘိက္ခဝေ၊ ပဉှော ဧကံသဗျာကရဏီယော၊ အတ္ထိ၊ ဘိက္ခဝေ၊ ပဉှော ဝိဘဇ္ဇဗျာကရဏီယော၊ အတ္ထိ၊ ဘိက္ခဝေ၊ ပဉှော ပဋိပုစ္ဆာဗျာကရဏီယော၊ အတ္ထိ၊ ဘိက္ခဝေ၊ ပဉှော ဌပနီယော. ဣမာနိ ခေါ၊ ဘိက္ခဝေ၊ စတ္တာရိ ပဉှဗျာကရဏာနီ’’တိ.

‘‘ဧကံသဝစနံ ဧကံ၊ ဝိဘဇ္ဇဝစနာပရံ၊

တတိယံ ပဋိပုစ္ဆေယျ၊ စတုတ္ထံ ပန ဌာပယေ.

‘‘ယော စ တေသံ [နေသံ (သီ. သျာ. ကံ.)] တတ္ထ တတ္ထ၊ ဇာနာတိ အနုဓမ္မတံ၊

စတုပဉှဿ ကုသလော၊ အာဟု ဘိက္ခုံ တထာဝိဓံ.

‘‘ဒုရာသဒေါ ဒုပ္ပသဟော၊ ဂမ္ဘီရော ဒုပ္ပဓံသိယော၊

အထော အတ္ထေ အနတ္ထေ စ၊ ဥဘယဿ ဟောတိ ကောဝိဒေါ [ဥဘယတ္ထဿ ကောဝိဒေါ (သျာ. ကံ.)].

‘‘အနတ္ထံ ပရိဝဇ္ဇေတိ၊ အတ္ထံ ဂဏှာတိ ပဏ္ဍိတော၊

အတ္ထာဘိသမယာ ဓီရော၊ ပဏ္ဍိတောတိ ပဝုစ္စတီ’’တိ. ဒုတိယံ၊