၃. ပဌမကောဓဂရုသုတ္တံ

၄၃. ‘‘စတ္တာရောမေ၊ ဘိက္ခဝေ၊ ပုဂ္ဂလာ သန္တော သံဝိဇ္ဇမာနာ လောကသ္မိံ. ကတမေ စတ္တာရော? ကောဓဂရု န သဒ္ဓမ္မဂရု၊ မက္ခဂရု န သဒ္ဓမ္မဂရု၊ လာဘဂရု န သဒ္ဓမ္မဂရု၊ သက္ကာရဂရု န သဒ္ဓမ္မဂရု. ဣမေ ခေါ၊ ဘိက္ခဝေ၊ စတ္တာရော ပုဂ္ဂလာ သန္တော သံဝိဇ္ဇမာနာ လောကသ္မိံ.

‘‘စတ္တာရောမေ၊ ဘိက္ခဝေ၊ ပုဂ္ဂလာ သန္တော သံဝိဇ္ဇမာနာ လောကသ္မိံ. ကတမေ စတ္တာရော? သဒ္ဓမ္မဂရု န ကောဓဂရု၊ သဒ္ဓမ္မဂရု န မက္ခဂရု၊ သဒ္ဓမ္မဂရု န လာဘဂရု၊ သဒ္ဓမ္မဂရု န သက္ကာရဂရု. ဣမေ ခေါ၊ ဘိက္ခဝေ၊ စတ္တာရော ပုဂ္ဂလာ သန္တော သံဝိဇ္ဇမာနာ လောကသ္မိ’’န္တိ.

‘‘ကောဓမက္ခဂရူ ဘိက္ခူ၊ လာဘသက္ကာရဂါရဝါ၊

န တေ ဓမ္မေ ဝိရူဟန္တိ၊ သမ္မာသမ္ဗုဒ္ဓဒေသိတေ.

‘‘ယေ စ သဒ္ဓမ္မဂရုနော၊ ဝိဟံသု ဝိဟရန္တိ စ၊

တေ ဝေ ဓမ္မေ ဝိရူဟန္တိ၊ သမ္မာသမ္ဗုဒ္ဓဒေသိတေ’’တိ. တတိယံ၊