၁. ကိမတ္ထိယသုတ္တံ

၁. [အ. နိ. ၁၀.၁] ဧဝံ မေ သုတံ – ဧကံ သမယံ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. အထ ခေါ အာယသ္မာ အာနန္ဒော ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ. ဧကမန္တံ နိသိန္နော ခေါ အာယသ္မာ အာနန္ဒော ဘဂဝန္တံ ဧတဒဝေါစ – ‘‘ကိမတ္ထိယာနိ၊ ဘန္တေ၊ ကုသလာနိ သီလာနိ ကိမာနိသံသာနီ’’တိ? ‘‘အဝိပ္ပဋိသာရတ္ထာနိ ခေါ၊ အာနန္ဒ၊ ကုသလာနိ သီလာနိ အဝိပ္ပဋိသာရာနိသံသာနီ’’တိ.

‘‘အဝိပ္ပဋိသာရော ပန၊ ဘန္တေ၊ ကိမတ္ထိယော ကိမာနိသံသော’’? ‘‘အဝိပ္ပဋိသာရော ခေါ၊ အာနန္ဒ၊ ပါမောဇ္ဇတ္ထော ပါမောဇ္ဇာနိသံသော’’.

‘‘ပါမောဇ္ဇံ ပန၊ ဘန္တေ၊ ကိမတ္ထိယံ ကိမာနိသံသံ’’? ‘‘ပါမောဇ္ဇံ ခေါ၊ အာနန္ဒ၊ ပီတတ္ထံ ပီတာနိသံသံ’’.

‘‘ပီတိ ပန၊ ဘန္တေ၊ ကိမတ္ထိယာ ကိမာနိသံသာ’’? ‘‘ပီတိ ခေါ၊ အာနန္ဒ၊ ပဿဒ္ဓတ္ထာ ပဿဒ္ဓါနိသံသာ’’.

‘‘ပဿဒ္ဓိ ပန၊ ဘန္တေ၊ ကိမတ္ထိယာ ကိမာနိသံသာ’’? ‘‘ပဿဒ္ဓိ ခေါ၊ အာနန္ဒ၊ သုခတ္ထာ သုခါနိသံသာ’’.

‘‘သုခံ ပန၊ ဘန္တေ၊ ကိမတ္ထိယံ ကိမာနိသံသံ’’? ‘‘သုခံ ခေါ၊ အာနန္ဒ၊ သမာဓတ္ထံ သမာဓာနိသံသံ’’.

‘‘သမာဓိ ပန၊ ဘန္တေ၊ ကိမတ္ထိယော ကိမာနိသံသော’’? ‘‘သမာဓိ ခေါ၊ အာနန္ဒ၊ ယထာဘူတဉာဏဒဿနတ္ထော ယထာဘူတဉာဏဒဿနာနိသံသော’’.

‘‘ယထာဘူတဉာဏဒဿနံ ပန၊ ဘန္တေ၊ ကိမတ္ထိယံ ကိမာနိသံသံ’’? ‘‘ယထာဘူတဉာဏဒဿနံ ခေါ၊ အာနန္ဒ၊ နိဗ္ဗိဒတ္ထံ နိဗ္ဗိဒါနိသံသံ’’.

‘‘နိဗ္ဗိဒါ၊ ပန၊ ဘန္တေ၊ ကိမတ္ထိယာ ကိမာနိသံသာ’’? ‘‘နိဗ္ဗိဒါ ခေါ၊ အာနန္ဒ၊ ဝိရာဂတ္ထာ ဝိရာဂါနိသံသာ ’’.

‘‘ဝိရာဂေါ ပန၊ ဘန္တေ၊ ကိမတ္ထိယော ကိမာနိသံသော’’? ‘‘ဝိရာဂေါ ခေါ၊ အာနန္ဒ၊ ဝိမုတ္တိဉာဏဒဿနတ္ထော ဝိမုတ္တိဉာဏဒဿနာနိသံသော.

‘‘ဣတိ ခေါ၊ အာနန္ဒ၊ ကုသလာနိ သီလာနိ အဝိပ္ပဋိသာရတ္ထာနိ အဝိပ္ပဋိသာရာနိသံသာနိ၊ အဝိပ္ပဋိသာရော ပါမောဇ္ဇတ္ထော ပါမောဇ္ဇာနိသံသော၊ ပါမောဇ္ဇံ ပီတတ္ထံ ပီတာနိသံသံ၊ ပီတိ ပဿဒ္ဓတ္ထာ ပဿဒ္ဓါနိသံသာ၊ ပဿဒ္ဓိ သုခတ္ထာ သုခါနိသံသာ၊ သုခံ သမာဓတ္ထံ သမာဓာနိသံသံ၊ သမာဓိ ယထာဘူတဉာဏဒဿနတ္ထော ယထာဘူတဉာဏဒဿနာနိသံသော၊ ယထာဘူတဉာဏဒဿနံ နိဗ္ဗိဒတ္ထံ နိဗ္ဗိဒါနိသံသံ၊ နိဗ္ဗိဒါ ဝိရာဂတ္ထာ ဝိရာဂါနိသံသာ၊ ဝိရာဂေါ ဝိမုတ္တိဉာဏဒဿနတ္ထော ဝိမုတ္တိဉာဏဒဿနာနိသံသော. ဣတိ ခေါ၊ အာနန္ဒ၊ ကုသလာနိ သီလာနိ အနုပုဗ္ဗေန အဂ္ဂါယ ပရေန္တီ’’တိ. ပဌမံ.