၂၃. ရာဂပေယျာလံ

၂၃၇. ‘‘ရာဂဿ၊ ဘိက္ခဝေ၊ အဘိညာယ ဒသ ဓမ္မာ ဘာဝေတဗ္ဗာ. ကတမေ ဒသ? အသုဘသညာ၊ မရဏသညာ၊ အာဟာရေ ပဋိကူလသညာ၊ သဗ္ဗလောကေ အနဘိရတသညာ၊ အနိစ္စသညာ၊ အနိစ္စေ ဒုက္ခသညာ၊ ဒုက္ခေ အနတ္တသညာ၊ ပဟာနသညာ၊ ဝိရာဂသညာ၊ နိရောဓသညာ – ရာဂဿ၊ ဘိက္ခဝေ၊ အဘိညာယ ဣမေ ဒသ ဓမ္မာ ဘာဝေတဗ္ဗာ’’တိ.

၂၃၈. ‘‘ရာဂဿ၊ ဘိက္ခဝေ၊ အဘိညာယ ဒသ ဓမ္မာ ဘာဝေတဗ္ဗာ. ကတမေ ဒသ? အနိစ္စသညာ၊ အနတ္တသညာ၊ အာဟာရေ ပဋိကူလသညာ၊ သဗ္ဗလောကေ အနဘိရတသညာ၊ အဋ္ဌိကသညာ၊ ပုဠဝကသညာ [ပုလဝကသညာ (သီ.) ပုဠုဝကသညာ (က.)]၊ ဝိနီလကသညာ၊ ဝိပုဗ္ဗကသညာ၊ ဝိစ္ဆိဒ္ဒကသညာ၊ ဥဒ္ဓုမာတကသညာ – ရာဂဿ၊ ဘိက္ခဝေ၊ အဘိညာယ ဣမေ ဒသ ဓမ္မာ ဘာဝေတဗ္ဗာ’’တိ.

၂၃၉. ‘‘ရာဂဿ၊ ဘိက္ခဝေ၊ အဘိညာယ ဒသ ဓမ္မာ ဘာဝေတဗ္ဗာ. ကတမေ ဒသ? သမ္မာဒိဋ္ဌိ၊ သမ္မာသင်္ကပ္ပေါ၊ သမ္မာဝါစာ၊ သမ္မာကမ္မန္တော၊ သမ္မာအာဇီဝေါ၊ သမ္မာဝါယာမော၊ သမ္မာသတိ၊ သမ္မာသမာဓိ၊ သမ္မာဉာဏံ၊ သမ္မာဝိမုတ္တိ – ရာဂဿ၊ ဘိက္ခဝေ၊ အဘိညာယ ဣမေ ဒသ ဓမ္မာ ဘာဝေတဗ္ဗာ’’တိ.

၂၄၀-၂၆၆. ‘‘ရာဂဿ၊ ဘိက္ခဝေ၊ ပရိညာယ။ပေ။ ပရိက္ခယာယ။ ပဟာနာယ။ ခယာယ။ ဝယာယ။ ဝိရာဂါယ။ နိရောဓာယ။ ( ) [(ဥပသမာယ) (သီ. သျာ. ပီ.) အညေသံ ပန နိပါတာနံ ပရိယောသာနေ ဣဒံ ပဒံ န ဒိဿတိ] စာဂါယ။ ပဋိနိဿဂ္ဂါယ။ပေ။ ဣမေ ဒသ ဓမ္မာ ဘာဝေတဗ္ဗာ.

၂၆၇-၇၄၆. ‘‘ဒေါသဿ ။ပေ။ မောဟဿ။ ကောဓဿ။ ဥပနာဟဿ။ မက္ခဿ။ ပဠာသဿ။ ဣဿာယ။ မစ္ဆရိယဿ။ မာယာယ။ သာဌေယျဿ။ ထမ္ဘဿ။ သာရမ္ဘဿ။ မာနဿ။ အတိမာနဿ။ မဒဿ။ ပမာဒဿ ပရိညာယ။ပေ။ ပရိက္ခယာယ။ ပဟာနာယ ။ ခယာယ။ ဝယာယ။ ဝိရာဂါယ။ နိရောဓာယ။ ( ) [(ဥပသမာယ) (သီ. သျာ. ပီ.) အညေသံ ပန နိပါတာနံ ပရိယောသာနေ ဣဒံ ပဒံ န ဒိဿတိ] စာဂါယ။ ပဋိနိဿဂ္ဂါယ။ပေ။ ဣမေ ဒသ ဓမ္မာ ဘာဝေတဗ္ဗာ’’တိ.

ရာဂပေယျာလံ နိဋ္ဌိတံ.