၁. သာဓုသုတ္တံ

၁၃၄. [အ. နိ. ၁၀.၁၇၈] ‘‘သာဓုဉ္စ ဝေါ၊ ဘိက္ခဝေ၊ ဒေသေဿာမိ အသာဓုဉ္စ. တံ သုဏာထ၊ သာဓုကံ မနသိ ကရောထ၊ ဘာသိဿာမီ’’တိ. ‘‘ဧဝံ၊ ဘန္တေ’’တိ ခေါ တေ ဘိက္ခူ ဘဂဝတော ပစ္စဿောသုံ. ဘဂဝါ ဧတဒဝေါစ –

‘‘ကတမဉ္စ၊ ဘိက္ခဝေ၊ အသာဓု? မိစ္ဆာဒိဋ္ဌိ၊ မိစ္ဆာသင်္ကပ္ပေါ၊ မိစ္ဆာဝါစာ၊ မိစ္ဆာကမ္မန္တော၊ မိစ္ဆာအာဇီဝေါ၊ မိစ္ဆာဝါယာမော၊ မိစ္ဆာသတိ၊ မိစ္ဆာသမာဓိ၊ မိစ္ဆာဉာဏံ၊ မိစ္ဆာဝိမုတ္တိ – ဣဒံ ဝုစ္စတိ၊ ဘိက္ခဝေ၊ အသာဓု. ကတမဉ္စ၊ ဘိက္ခဝေ၊ သာဓု? သမ္မာဒိဋ္ဌိ၊ သမ္မာသင်္ကပ္ပေါ၊ သမ္မာဝါစာ သမ္မာကမ္မန္တော၊ သမ္မာအာဇီဝေါ၊ သမ္မာဝါယာမော၊ သမ္မာသတိ၊ သမ္မာသမာဓိ၊ သမ္မာဉာဏံ၊ သမ္မာဝိမုတ္တိ – ဣဒံ ဝုစ္စတိ၊ ဘိက္ခဝေ၊ သာဓူ’’တိ. ပဌမံ.