၈. ဒုတိယပစ္စောရောဟဏီသုတ္တံ

၁၂၀. ‘‘အရိယံ ဝေါ၊ ဘိက္ခဝေ၊ ပစ္စောရောဟဏိံ ဒေသေဿာမိ. တံ သုဏာထ။ ကတမာ စ၊ ဘိက္ခဝေ၊ အရိယာ ပစ္စောရောဟဏီ? ဣဓ၊ ဘိက္ခဝေ၊ အရိယသာဝကော ဣတိ ပဋိသဉ္စိက္ခတိ – ‘မိစ္ဆာဒိဋ္ဌိယာ ခေါ ပါပကော ဝိပါကော – ဒိဋ္ဌေ စေဝ ဓမ္မေ အဘိသမ္ပရာယဉ္စာ’တိ. သော ဣတိ ပဋိသင်္ခါယ မိစ္ဆာဒိဋ္ဌိံ ပဇဟတိ၊ မိစ္ဆာဒိဋ္ဌိယာ ပစ္စောရောဟတိ. မိစ္ဆာသင်္ကပ္ပဿ ခေါ ပါပကော ဝိပါကော။ မိစ္ဆာဝါစာယ ခေါ။ မိစ္ဆာကမ္မန္တဿ ခေါ။ မိစ္ဆာအာဇီဝဿ ခေါ။ မိစ္ဆာဝါယာမဿ ခေါ။ မိစ္ဆာသတိယာ ခေါ။ မိစ္ဆာသမာဓိဿ ခေါ။ မိစ္ဆာဉာဏဿ ခေါ။ မိစ္ဆာဝိမုတ္တိယာ ခေါ ပါပကော ဝိပါကော – ဒိဋ္ဌေ စေဝ ဓမ္မေ အဘိသမ္ပရာယဉ္စာတိ. သော ဣတိ ပဋိသင်္ခါယ မိစ္ဆာဝိမုတ္တိံ ပဇဟတိ၊ မိစ္ဆာဝိမုတ္တိယာ ပစ္စောရောဟတိ. အယံ ဝုစ္စတိ၊ ဘိက္ခဝေ၊ အရိယာ ပစ္စောရောဟဏီ’’တိ. အဋ္ဌမံ.