၈. နိဂဏ္ဌသုတ္တံ

၇၈. ‘‘ဒသဟိ၊ ဘိက္ခဝေ၊ အသဒ္ဓမ္မေဟိ သမန္နာဂတာ နိဂဏ္ဌာ. ကတမေဟိ ဒသဟိ? အဿဒ္ဓါ၊ ဘိက္ခဝေ၊ နိဂဏ္ဌာ၊ ဒုဿီလာ၊ ဘိက္ခဝေ၊ နိဂဏ္ဌာ၊ အဟိရိကာ၊ ဘိက္ခဝေ၊ နိဂဏ္ဌာ၊ အနောတ္တပ္ပိနော၊ ဘိက္ခဝေ၊ နိဂဏ္ဌာ၊ အသပ္ပုရိသသမ္ဘတ္တိနော၊ ဘိက္ခဝေ၊ နိဂဏ္ဌာ၊ အတ္တုက္ကံသကပရဝမ္ဘကာ၊ ဘိက္ခဝေ၊ နိဂဏ္ဌာ၊ သန္ဒိဋ္ဌိပရာမာသာ အာဓာနဂ္ဂါဟီ ဒုပ္ပဋိနိဿဂ္ဂိနော၊ ဘိက္ခဝေ၊ နိဂဏ္ဌာ၊ ကုဟကာ၊ ဘိက္ခဝေ၊ နိဂဏ္ဌာ၊ ပါပိစ္ဆာ၊ ဘိက္ခဝေ၊ နိဂဏ္ဌာ၊ ပါပမိတ္တာ၊ ဘိက္ခဝေ၊ နိဂဏ္ဌာ – ဣမေဟိ ခေါ၊ ဘိက္ခဝေ၊ ဒသဟိ အသဒ္ဓမ္မေဟိ သမန္နာဂတာ နိဂဏ္ဌာ’’တိ. အဋ္ဌမံ.