၉. အာဃာတဝတ္ထုသုတ္တံ

၇၉. [အ. နိ. ၉.၂၉] ‘‘ဒသယိမာနိ၊ ဘိက္ခဝေ၊ အာဃာတဝတ္ထူနိ. ကတမာနိ ဒသ? ‘အနတ္ထံ မေ အစရီ’တိ အာဃာတံ ဗန္ဓတိ၊ ‘အနတ္ထံ မေ စရတီ’တိ အာဃာတံ ဗန္ဓတိ၊ ‘အနတ္ထံ မေ စရိဿတီ’တိ အာဃာတံ ဗန္ဓတိ၊ ‘ပိယဿ မေ မနာပဿ အနတ္ထံ အစရီ’တိ။ပေ။ ‘အနတ္ထံ စရတီ’တိ။ပေ။ ‘အနတ္ထံ စရိဿတီ’တိ အာဃာတံ ဗန္ဓတိ၊ ‘အပ္ပိယဿ မေ အမနာပဿ အတ္ထံ အစရီ’တိ။ပေ။ ‘အတ္ထံ စရတီ’တိ။ပေ။ ‘အတ္ထံ စရိဿတီ’တိ အာဃာတံ ဗန္ဓတိ၊ အဋ္ဌာနေ စ ကုပ္ပတိ – ဣမာနိ ခေါ၊ ဘိက္ခဝေ၊ ဒသ အာဃာတဝတ္ထူနီ’’တိ. နဝမံ.