၇. ကာကသုတ္တံ

၇၇. ‘‘ဒသဟိ၊ ဘိက္ခဝေ၊ အသဒ္ဓမ္မေဟိ သမန္နာဂတော ကာကော. ကတမေဟိ ဒသဟိ? ဓံသီ စ၊ ပဂဗ္ဘော စ၊ တိန္တိဏော [နိလ္လဇ္ဇော (က.) တိန္တိဏောတိ တိန္တိဏံ ဝုစ္စတိ တဏှာ။ (သီ. သျာ. အဋ္ဌ.) အဘိဓမ္မေ ခုဒ္ဒကဝတ္ထုဝိဘင်္ဂေ တိန္တိဏပဒနိဒ္ဒေသေ ပဿိတဗ္ဗံ] စ၊ မဟဂ္ဃသော စ၊ လုဒ္ဒေါ စ၊ အကာရုဏိကော စ၊ ဒုဗ္ဗလော စ၊ ဩရဝိတာ စ၊ မုဋ္ဌဿတိ စ၊ နေစယိကော [နေရသိကော (သီ.) တဒဋ္ဌကထာယံ ပန ‘‘နေစယိကော’’ တွေဝ ဒိဿတိ] စ – ဣမေဟိ ခေါ၊ ဘိက္ခဝေ၊ ဒသဟိ အသဒ္ဓမ္မေဟိ သမန္နာဂတော ကာကော. ဧဝမေဝံ ခေါ၊ ဘိက္ခဝေ၊ ဒသဟိ အသဒ္ဓမ္မေဟိ သမန္နာဂတော ပါပဘိက္ခု. ကတမေဟိ ဒသဟိ? ဓံသီ စ၊ ပဂဗ္ဘော စ၊ တိန္တိဏော စ၊ မဟဂ္ဃသော စ၊ လုဒ္ဒေါ စ၊ အကာရုဏိကော စ၊ ဒုဗ္ဗလော စ၊ ဩရဝိတာ စ၊ မုဋ္ဌဿတိ စ၊ နေစယိကော စ – ဣမေဟိ ခေါ၊ ဘိက္ခဝေ၊ ဒသဟိ အသဒ္ဓမ္မေဟိ သမန္နာဂတော ပါပဘိက္ခူ’’တိ. သတ္တမံ.