၂. ပဌမဝိဝါဒမူလသုတ္တံ

၄၂. ‘‘ကတိ နု ခေါ၊ ဘန္တေ၊ ဝိဝါဒမူလာနီ’’တိ? ‘‘ဒသ ခေါ၊ ဥပါလိ၊ ဝိဝါဒမူလာနိ. ကတမာနိ ဒသ? ဣဓုပါလိ၊ ဘိက္ခူ အဓမ္မံ ဓမ္မောတိ ဒီပေန္တိ၊ ဓမ္မံ အဓမ္မောတိ ဒီပေန္တိ၊ အဝိနယံ ဝိနယောတိ ဒီပေန္တိ၊ ဝိနယံ အဝိနယောတိ ဒီပေန္တိ၊ အဘာသိတံ အလပိတံ တထာဂတေန ဘာသိတံ လပိတံ တထာဂတေနာတိ ဒီပေန္တိ၊ ဘာသိတံ လပိတံ တထာဂတေန အဘာသိတံ အလပိတံ တထာဂတေနာတိ ဒီပေန္တိ၊ အနာစိဏ္ဏံ တထာဂတေန အာစိဏ္ဏံ တထာဂတေနာတိ ဒီပေန္တိ၊ အာစိဏ္ဏံ တထာဂတေန အနာစိဏ္ဏံ တထာဂတေနာတိ ဒီပေန္တိ၊ အပညတ္တံ တထာဂတေန ပညတ္တံ တထာဂတေနာတိ ဒီပေန္တိ၊ ပညတ္တံ တထာဂတေန အပညတ္တံ တထာဂတေနာတိ ဒီပေန္တိ. ဣမာနိ ခေါ၊ ဥပါလိ၊ ဒသ ဝိဝါဒမူလာနီ’’တိ. ဒုတိယံ.