၂. ပါတိမောက္ခဋ္ဌပနာသုတ္တံ

၃၂. ‘‘ကတိ နု ခေါ၊ ဘန္တေ၊ ပါတိမောက္ခဋ္ဌပနာ’’တိ? ‘‘ဒသ ခေါ၊ ဥပါလိ၊ ပါတိမောက္ခဋ္ဌပနာ. ကတမေ ဒသ? ပါရာဇိကော တဿံ ပရိသာယံ နိသိန္နော ဟောတိ၊ ပါရာဇိကကထာ ဝိပ္ပကတာ ဟောတိ၊ အနုပသမ္ပန္နော တဿံ ပရိသာယံ နိသိန္နော ဟောတိ၊ အနုပသမ္ပန္နကထာ ဝိပ္ပကတာ ဟောတိ၊ သိက္ခံ ပစ္စက္ခာတကော တဿံ ပရိသာယံ နိသိန္နော ဟောတိ၊ သိက္ခံ ပစ္စက္ခာတကကထာ ဝိပ္ပကတာ ဟောတိ၊ ပဏ္ဍကော တဿံ ပရိသာယံ နိသိန္နော ဟောတိ၊ ပဏ္ဍကကထာ ဝိပ္ပကတာ ဟောတိ၊ ဘိက္ခုနိဒူသကော တဿံ ပရိသာယံ နိသိန္နော ဟောတိ၊ ဘိက္ခုနိဒူသကကထာ ဝိပ္ပကတာ ဟောတိ – ဣမေ ခေါ၊ ဥပါလိ၊ ဒသ ပါတိမောက္ခဋ္ဌပနာ’’တိ. ဒုတိယံ.