၂. စေတနာကရဏီယသုတ္တံ

၂. [အ. နိ. ၁၁.၂] ‘‘သီလဝတော၊ ဘိက္ခဝေ၊ သီလသမ္ပန္နဿ န စေတနာယ ကရဏီယံ – ‘အဝိပ္ပဋိသာရော မေ ဥပ္ပဇ္ဇတူ’တိ. ဓမ္မတာ ဧသာ၊ ဘိက္ခဝေ၊ ယံ သီလဝတော သီလသမ္ပန္နဿ အဝိပ္ပဋိသာရော ဥပ္ပဇ္ဇတိ. အဝိပ္ပဋိသာရိဿ၊ ဘိက္ခဝေ၊ န စေတနာယ ကရဏီယံ – ‘ပါမောဇ္ဇံ မေ ဥပ္ပဇ္ဇတူ’တိ. ဓမ္မတာ ဧသာ၊ ဘိက္ခဝေ၊ ယံ အဝိပ္ပဋိသာရိဿ ပါမောဇ္ဇံ ဇာယတိ. ပမုဒိတဿ၊ ဘိက္ခဝေ၊ န စေတနာယ ကရဏီယံ – ‘ပီတိ မေ ဥပ္ပဇ္ဇတူ’တိ. ဓမ္မတာ ဧသာ၊ ဘိက္ခဝေ၊ ယံ ပမုဒိတဿ ပီတိ ဥပ္ပဇ္ဇတိ. ပီတိမနဿ၊ ဘိက္ခဝေ၊ န စေတနာယ ကရဏီယံ – ‘ကာယော မေ ပဿမ္ဘတူ’တိ. ဓမ္မတာ ဧသာ၊ ဘိက္ခဝေ၊ ယံ ပီတိမနဿ ကာယော ပဿမ္ဘတိ. ပဿဒ္ဓကာယဿ၊ ဘိက္ခဝေ၊ န စေတနာယ ကရဏီယံ – ‘သုခံ ဝေဒိယာမီ’တိ. ဓမ္မတာ ဧသာ၊ ဘိက္ခဝေ၊ ယံ ပဿဒ္ဓကာယော သုခံ ဝေဒိယတိ. သုခိနော၊ ဘိက္ခဝေ၊ န စေတနာယ ကရဏီယံ – ‘စိတ္တံ မေ သမာဓိယတူ’တိ. ဓမ္မတာ ဧသာ၊ ဘိက္ခဝေ၊ ယံ သုခိနော စိတ္တံ သမာဓိယတိ. သမာဟိတဿ၊ ဘိက္ခဝေ၊ န စေတနာယ ကရဏီယံ – ‘ယထာဘူတံ ဇာနာမိ ပဿာမီ’တိ. ဓမ္မတာ ဧသာ၊ ဘိက္ခဝေ၊ ယံ သမာဟိတော ယထာဘူတံ ဇာနာတိ ပဿတိ. ယထာဘူတံ၊ ဘိက္ခဝေ၊ ဇာနတော ပဿတော န စေတနာယ ကရဏီယံ – ‘နိဗ္ဗိန္ဒာမိ ဝိရဇ္ဇာမီ’တိ. ဓမ္မတာ ဧသာ၊ ဘိက္ခဝေ၊ ယံ ယထာဘူတံ ဇာနံ ပဿံ နိဗ္ဗိန္ဒတိ ဝိရဇ္ဇတိ. နိဗ္ဗိန္နဿ [နိဗ္ဗိန္ဒဿ (သီ. က.)]၊ ဘိက္ခဝေ၊ ဝိရတ္တဿ န စေတနာယ ကရဏီယံ – ‘ဝိမုတ္တိဉာဏဒဿနံ သစ္ဆိကရောမီ’တိ. ဓမ္မတာ ဧသာ၊ ဘိက္ခဝေ၊ ယံ နိဗ္ဗိန္နော [နိဗ္ဗိန္ဒော (သီ. က.)] ဝိရတ္တော ဝိမုတ္တိဉာဏဒဿနံ သစ္ဆိကရောတိ.

‘‘ဣတိ ခေါ၊ ဘိက္ခဝေ၊ နိဗ္ဗိဒါဝိရာဂေါ ဝိမုတ္တိဉာဏဒဿနတ္ထော ဝိမုတ္တိဉာဏဒဿနာနိသံသော၊ ယထာဘူတဉာဏဒဿနံ နိဗ္ဗိဒါဝိရာဂတ္ထံ နိဗ္ဗိဒါဝိရာဂါနိသံသံ၊ သမာဓိ ယထာဘူတဉာဏဒဿနတ္ထော ယထာဘူတဉာဏဒဿနာနိသံသော၊ သုခံ သမာဓတ္ထံ သမာဓာနိသံသံ၊ ပဿဒ္ဓိ သုခတ္ထာ သုခါနိသံသာ၊ ပီတိ ပဿဒ္ဓတ္ထာ ပဿဒ္ဓါနိသံသာ၊ ပါမောဇ္ဇံ ပီတတ္ထံ ပီတာနိသံသံ၊ အဝိပ္ပဋိသာရော ပါမောဇ္ဇတ္ထော ပါမောဇ္ဇာနိသံသော၊ ကုသလာနိ သီလာနိ အဝိပ္ပဋိသာရတ္ထာနိ အဝိပ္ပဋိသာရာနိသံသာနိ. ဣတိ ခေါ၊ ဘိက္ခဝေ၊ ဓမ္မာ ဓမ္မေ အဘိသန္ဒေန္တိ၊ ဓမ္မာ ဓမ္မေ ပရိပူရေန္တိ အပါရာ ပါရံ ဂမနာယာ’’တိ. ဒုတိယံ.