൮. സംസട്ഠവാരോ

൩൫൧. സമ്മുഖാവിനയോതി വാ സതിവിനയോതി വാ – ഇമേ ധമ്മാ സംസട്ഠാ ഉദാഹു വിസംസട്ഠാ? ലബ്ഭാ ച പനിമേസം ധമ്മാനം വിനിബ്ഭുജിത്വാ വിനിബ്ഭുജിത്വാ നാനാകരണം പഞ്ഞാപേതും? സമ്മുഖാവിനയോതി വാ അമൂള്ഹവിനയോതി വാ…പേ… സമ്മുഖാവിനയോതി വാ പടിഞ്ഞാതകരണന്തി വാ… സമ്മുഖാവിനയോതി വാ യേഭുയ്യസികാതി വാ… സമ്മുഖാവിനയോതി വാ തസ്സപാപിയസികാതി വാ… സമ്മുഖാവിനയോതി വാ തിണവത്ഥാരകോതി – ഇമേ ധമ്മാ സംസട്ഠാ ഉദാഹു വിസംസട്ഠാ? ലബ്ഭാ ച പനിമേസം ധമ്മാനം വിനിബ്ഭുജിത്വാ വിനിബ്ഭുജിത്വാ നാനാകരണം പഞ്ഞാപേതും?

സമ്മുഖാവിനയോതി വാ സതിവിനയോതി വാ – ഇമേ ധമ്മാ സംസട്ഠാ, നോ വിസംസട്ഠാ; ന ച ലബ്ഭാ ഇമേസം ധമ്മാനം വിനിബ്ഭുജിത്വാ വിനിബ്ഭുജിത്വാ നാനാകരണം പഞ്ഞാപേതും. സമ്മുഖാവിനയോതി വാ അമൂള്ഹവിനയോതി വാ…പേ… സമ്മുഖാവിനയോതി വാ പടിഞ്ഞാതകരണന്തി വാ… സമ്മുഖാവിനയോതി വാ യേഭുയ്യസികാതി വാ… സമ്മുഖാവിനയോതി വാ തസ്സപാപിയസികാതി വാ… സമ്മുഖാവിനയോതി വാ തിണവത്ഥാരകോതി വാ – ഇമേ ധമ്മാ സംസട്ഠാ, നോ വിസംസട്ഠാ; ന ച ലബ്ഭാ ഇമേസം ധമ്മാനം വിനിബ്ഭുജിത്വാ വിനിബ്ഭുജിത്വാ നാനാകരണം പഞ്ഞാപേതും.