൪. അധികരണപച്ചയാപത്തി

൩൪൪. വിവാദാധികരണം ആപത്താനാപത്തീതി? വിവാദാധികരണം ന ആപത്തി. കിം പന വിവാദാധികരണപച്ചയാ ആപത്തിം ആപജ്ജേയ്യാതി? ആമ, വിവാദാധികരണപച്ചയാ ആപത്തിം ആപജ്ജേയ്യ. വിവാദാധികരണപച്ചയാ കതി ആപത്തിയോ ആപജ്ജതി? വിവാദാധികരണപച്ചയാ ദ്വേ ആപത്തിയോ ആപജ്ജതി. ഉപസമ്പന്നം ഓമസതി, ആപത്തി പാചിത്തിയസ്സ; അനുപസമ്പന്നം ഓമസതി, ആപത്തി ദുക്കടസ്സ – വിവാദാധികരണപച്ചയാ ഇമാ ദ്വേ ആപത്തിയോ ആപജ്ജതി.

താ ആപത്തിയോ ചതുന്നം വിപത്തീനം കതി വിപത്തിയോ ഭജന്തി? ചതുന്നം അധികരണാനം കതമം അധികരണം? സത്തന്നം ആപത്തിക്ഖന്ധാനം കതിഹി ആപത്തിക്ഖന്ധേഹി സങ്ഗഹിതാ? ഛന്നം ആപത്തിസമുട്ഠാനാനം കതിഹി സമുട്ഠാനേഹി സമുട്ഠന്തി? കതിഹി അധികരണേഹി കതിസു ഠാനേസു കതിഹി സമഥേഹി സമ്മന്തി?

താ ആപത്തിയോ ചതുന്നം വിപത്തീനം ഏകം വിപത്തിം ഭജന്തി – ആചാരവിപത്തിം. ചതുന്നം അധികരണാനം, ആപത്താധികരണം. സത്തന്നം ആപത്തിക്ഖന്ധാനം ദ്വീഹി ആപത്തിക്ഖന്ധേഹി സങ്ഗഹിതാ – സിയാ പാചിത്തിയാപത്തിക്ഖന്ധേന, സിയാ ദുക്കടാപത്തിക്ഖന്ധേന. ഛന്നം ആപത്തിസമുട്ഠാനാനം തീഹി സമുട്ഠാനേഹി സമുട്ഠന്തി. ഏകേന അധികരണേന – കിച്ചാധികരണേന; തീസു ഠാനേസു – സങ്ഘമജ്ഝേ, ഗണമജ്ഝേ, പുഗ്ഗലസ്സ സന്തികേ; തീഹി സമഥേഹി സമ്മന്തി – സിയാ സമ്മുഖാവിനയേന ച പടിഞ്ഞാതകരണേന ച, സിയാ സമ്മുഖാവിനയേന ച തിണവത്ഥാരകേന ച.

൩൪൫. അനുവാദാധികരണം ആപത്താനാപത്തീതി? അനുവാദാധികരണം ന ആപത്തി. കിം പന അനുവാദാധികരണപച്ചയാ ആപത്തിം ആപജ്ജേയ്യാതി? ആമ, അനുവാദാധികരണപച്ചയാ ആപത്തിം ആപജ്ജേയ്യ. അനുവാദാധികരണപച്ചയാ, കതി ആപത്തിയോ ആപജ്ജതി? അനുവാദാധികരണപച്ചയാ തിസ്സോ ആപത്തിയോ ആപജ്ജതി. ഭിക്ഖും അമൂലകേന പാരാജികേന ധമ്മേന അനുദ്ധംസേതി, ആപത്തി സങ്ഘാദിസേസസ്സ; അമൂലകേന സങ്ഘാദിസേസേന അനുദ്ധംസേതി, ആപത്തി പാചിത്തിയസ്സ; അമൂലികായ ആചാരവിപത്തിയാ അനുദ്ധംസേതി, ആപത്തി ദുക്കടസ്സ – അനുവാദാധികരണപച്ചയാ ഇമാ തിസ്സോ ആപത്തിയോ ആപജ്ജതി.

താ ആപത്തിയോ ചതുന്നം വിപത്തീനം കതി വിപത്തിയോ ഭജന്തി? ചതുന്നം അധികരണാനം കതമം അധികരണം? സത്തന്നം ആപത്തിക്ഖന്ധാനം കതിഹി ആപത്തിക്ഖന്ധേഹി സങ്ഗഹിതാ? ഛന്നം ആപത്തിസമുട്ഠാനാനം കതിഹി സമുട്ഠാനേഹി സമുട്ഠന്തി? കതിഹി അധികരണേഹി കതിസു ഠാനേസു കതിഹി സമഥേഹി സമ്മന്തി?

താ ആപത്തിയോ ചതുന്നം വിപത്തീനം ദ്വേ വിപത്തിയോ ഭജന്തി – സിയാ സീലവിപത്തിം, സിയാ ആചാരവിപത്തിം. ചതുന്നം അധികരണാനം, ആപത്താധികരണം. സത്തന്നം ആപത്തിക്ഖന്ധാനം തീഹി ആപത്തിക്ഖന്ധേഹി സങ്ഗഹിതാ – സിയാ സങ്ഘാദിസേസാപത്തിക്ഖന്ധേന, സിയാ പാചിത്തിയാപത്തിക്ഖന്ധേന, സിയാ ദുക്കടാപത്തിക്ഖന്ധേന. ഛന്നം ആപത്തിസമുട്ഠാനാനം തീഹി സമുട്ഠാനേഹി സമുട്ഠന്തി. യാ താ ആപത്തിയോ ഗരുകാ താ ആപത്തിയോ ഏകേന അധികരണേന – കിച്ചാധികരണേന; ഏകമ്ഹി ഠാനേ – സങ്ഘമജ്ഝേ; ദ്വീഹി സമഥേഹി സമ്മന്തി – സമ്മുഖാവിനയേന ച പടിഞ്ഞാതകരണേന ച. യാ താ ആപത്തിയോ ലഹുകാ താ ആപത്തിയോ ഏകേന അധികരണേന – കിച്ചാധികരണേന; തീസു ഠാനേസു – സങ്ഘമജ്ഝേ ഗണമജ്ഝേ പുഗ്ഗലസ്സ സന്തികേ; തീഹി സമഥേഹി സമ്മന്തി – സിയാ സമ്മുഖാവിനയേന ച പടിഞ്ഞാതകരണേന ച, സിയാ സമ്മുഖാവിനയേന ച തിണവത്ഥാരകേന ച.

൩൪൬. ആപത്താധികരണം ആപത്താനാപത്തീതി? ആപത്താധികരണം ആപത്തി. കിം പന ആപത്താധികരണപച്ചയാ ആപത്തിം ആപജ്ജേയ്യാതി? ആമ, ആപത്താധികരണപച്ചയാ ആപത്തിം ആപജ്ജേയ്യ. ആപത്താധികരണപച്ചയാ കതി ആപത്തിയോ ആപജ്ജതി? ആപത്താധികരണപച്ചയാ ചതസ്സോ ആപത്തിയോ ആപജ്ജതി. ഭിക്ഖുനീ ജാനം പാരാജികം ധമ്മം [പാരാജികം ധമ്മം അജ്ഝാപന്നം (സ്യാ.)] പടിച്ഛാദേതി, ആപത്തി പാരാജികസ്സ; വേമതികാ പടിച്ഛാദേതി, ആപത്തി ഥുല്ലച്ചയസ്സ; ഭിക്ഖു സങ്ഘാദിസേസം പടിച്ഛാദേതി, ആപത്തി പാചിത്തിയസ്സ; ആചാരവിപത്തിം പടിച്ഛാദേതി, ആപത്തി ദുക്കടസ്സ – ആപത്താധികരണപച്ചയാ ഇമാ ചതസ്സോ ആപത്തിയോ ആപജ്ജതി.

താ ആപത്തിയോ ചതുന്നം വിപത്തീനം കതി വിപത്തിയോ ഭജന്തി? ചതുന്നം അധികരണാനം കതമം അധികരണം? സത്തന്നം ആപത്തിക്ഖന്ധാനം കതിഹി ആപത്തിക്ഖന്ധേഹി സങ്ഗഹിതാ? ഛന്നം ആപത്തിസമുട്ഠാനാനം കതിഹി സമുട്ഠാനേഹി സമുട്ഠന്തി? കതിഹി അധികരണേഹി കതിസു ഠാനേസു കതിഹി സമഥേഹി സമ്മന്തി?

താ ആപത്തിയോ ചതുന്നം വിപത്തീനം ദ്വേ വിപത്തിയോ ഭജന്തി – സിയാ സീലവിപത്തിം സിയാ ആചാരവിപത്തിം. ചതുന്നം അധികരണാനം – ആപത്താധികരണം. സത്തന്നം ആപത്തിക്ഖന്ധാനം ചതൂഹി ആപത്തിക്ഖന്ധേഹി സങ്ഗഹിതാ – സിയാ പാരാജികാപത്തിക്ഖന്ധേന, സിയാ ഥുല്ലച്ചയാപത്തിക്ഖന്ധേന, സിയാ പാചിത്തിയാപത്തിക്ഖന്ധേന, സിയാ ദുക്കടാപത്തിക്ഖന്ധേന. ഛന്നം ആപത്തിസമുട്ഠാനാനം ഏകേന സമുട്ഠാനേന സമുട്ഠന്തി – കായതോ ച വാചതോ ച ചിത്തതോ ച സമുട്ഠന്തി. യാ സാ ആപത്തി അനവസേസാ സാ ആപത്തി ന കതമേന അധികരണേന, ന കതമമ്ഹി ഠാനേ, ന കതമേന സമഥേന സമ്മതി. യാ താ ആപത്തിയോ ലഹുകാ താ ആപത്തിയോ ഏകേന അധികരണേന – കിച്ചാധികരണേന; തീസു ഠാനേസു – സങ്ഘമജ്ഝേ, ഗണമജ്ഝേ, പുഗ്ഗലസ്സ സന്തികേ; തീഹി സമഥേഹി സമ്മന്തി – സിയാ സമ്മുഖാവിനയേന ച പടിഞ്ഞാതകരണേന ച, സിയാ സമ്മുഖാവിനയേന ച തിണവത്ഥാരകേന ച.

൩൪൭. കിച്ചാധികരണം ആപത്താനാപത്തീതി? കിച്ചാധികരണം ന ആപത്തി. കിം പന കിച്ചാധികരണപച്ചയാ ആപത്തിം ആപജ്ജേയ്യാതി? ആമ, കിച്ചാധികരണപച്ചയാ ആപത്തിം ആപജ്ജേയ്യ. കിച്ചാധികരണപച്ചയാ കതി ആപത്തിയോ ആപജ്ജതി? കിച്ചാധികരണപച്ചയാ പഞ്ച ആപത്തിയോ ആപജ്ജതി. ഉക്ഖിത്താനുവത്തികാ ഭിക്ഖുനീ യാവതതിയം സമനുഭാസനായ ന പടിനിസ്സജ്ജതി, ഞത്തിയാ ദുക്കടം; ദ്വീഹി കമ്മവാചാഹി ഥുല്ലച്ചയാ; കമ്മവാചാപരിയോസാനേ ആപത്തി പാരാജികസ്സ; ഭേദകാനുവത്തകാ ഭിക്ഖൂ യാവതതിയം സമനുഭാസനായ ന പടിനിസ്സജ്ജന്തി, ആപത്തി സങ്ഘാദിസേസസ്സ; പാപികായ ദിട്ഠിയാ യാവതതിയം സമനുഭാസനായ ന പടിനിസ്സജ്ജന്തി, ആപത്തി പാചിത്തിയസ്സ – കിച്ചാധികരണപച്ചയാ ഇമാ പഞ്ച ആപത്തിയോ ആപജ്ജതി.

താ ആപത്തിയോ ചതുന്നം വിപത്തീനം കതി വിപത്തിയോ ഭജന്തി? ചതുന്നം അധികരണാനം കതമം അധികരണം? സത്തന്നം ആപത്തിക്ഖന്ധാനം കതിഹി ആപത്തിക്ഖന്ധേഹി സങ്ഗഹിതാ? ഛന്നം ആപത്തിസമുട്ഠാനാനം കതിഹി സമുട്ഠാനേഹി സമുട്ഠന്തി? കതിഹി അധികരണേഹി കതിസു ഠാനേസു കതിഹി സമഥേഹി സമ്മന്തി?

താ ആപത്തിയോ ചതുന്നം വിപത്തീനം ദ്വേ വിപത്തിയോ ഭജന്തി – സിയാ സീലവിപത്തിം സിയാ ആചാരവിപത്തിം. ചതുന്നം അധികരണാനം – ആപത്താധികരണം. സത്തന്നം ആപത്തിക്ഖന്ധാനം പഞ്ചഹി ആപത്തിക്ഖന്ധേഹി സങ്ഗഹിതാ – സിയാ പാരാജികാപത്തിക്ഖന്ധേന, സിയാ സങ്ഘാദിസേസാപത്തിക്ഖന്ധേന, സിയാ ഥുല്ലച്ചയാപത്തിക്ഖന്ധേന, സിയാ പാചിത്തിയാപത്തിക്ഖന്ധേന, സിയാ ദുക്കടാപത്തിക്ഖന്ധേന. ഛന്നം ആപത്തിസമുട്ഠാനാനം ഏകേന സമുട്ഠാനേന സമുട്ഠന്തി – കായതോ ച വാചതോ ച ചിത്തതോ ച സമുട്ഠന്തി. യാ സാ ആപത്തി അനവസേസാ സാ ആപത്തി ന കതമേന അധികരണേന, ന കതമമ്ഹി ഠാനേ, ന കതമേന സമഥേന സമ്മതി. യാ സാ ആപത്തി ഗരുകാ സാ ആപത്തി ഏകേന അധികരണേന – കിച്ചാധികരണേന; ഏകമ്ഹി ഠാനേ – സങ്ഘമജ്ഝേ; ദ്വീഹി സമഥേഹി സമ്മതി – സമ്മുഖാവിനയേന ച പടിഞ്ഞാതകരണേന ച. യാ താ ആപത്തിയോ ലഹുകാ താ ആപത്തിയോ ഏകേന അധികരണേന – കിച്ചാധികരണേന; തീസു ഠാനേസു – സങ്ഘമജ്ഝേ, ഗണമജ്ഝേ, പുഗ്ഗലസ്സ സന്തികേ; തീഹി സമഥേഹി സമ്മന്തി – സിയാ സമ്മുഖാവിനയേന ച പടിഞ്ഞാതകരണേന ച, സിയാ സമ്മുഖാവിനയേന ച തിണവത്ഥാരകേന ച.