൧. ഉക്കോടനഭേദാദി

൩൪൦. [ചൂളവ. ൨൧൫; പരി. ൨൭൫] ചത്താരി അധികരണാനി. വിവാദാധികരണം, അനുവാദാധികരണം, ആപത്താധികരണം, കിച്ചാധികരണം – ഇമാനി ചത്താരി അധികരണാനി.

ഇമേസം ചതുന്നം അധികരണാനം കതി ഉക്കോടാ? ഇമേസം ചതുന്നം അധികരണാനം ദസ ഉക്കോടാ. വിവാദാധികരണസ്സ ദ്വേ ഉക്കോടാ, അനുവാദാധികരണസ്സ ചത്താരോ ഉക്കോടാ, ആപത്താധികരണസ്സ തയോ ഉക്കോടാ, കിച്ചാധികരണസ്സ ഏകോ ഉക്കോടോ – ഇമേസം ചതുന്നം അധികരണാനം ഇമേ ദസ ഉക്കോടാ.

വിവാദാധികരണം ഉക്കോടേന്തോ കതി സമഥേ ഉക്കോടേതി? അനുവാദാധികരണം ഉക്കോടേന്തോ കതി സമഥേ ഉക്കോടേതി? ആപത്താധികരണം ഉക്കോടേന്തോ കതി സമഥേ ഉക്കോടേതി? കിച്ചാധികരണം ഉക്കോടേന്തോ കതി സമഥേ ഉക്കോടേതി?

വിവാദാധികരണം ഉക്കോടേന്തോ ദ്വേ സമഥേ ഉക്കോടേതി. അനുവാദാധികരണം ഉക്കോടേന്തോ ചത്താരോ സമഥേ ഉക്കോടേതി. ആപത്താധികരണം ഉക്കോടേന്തോ തയോ സമഥേ ഉക്കോടേതി. കിച്ചാധികരണം ഉക്കോടേന്തോ ഏകം സമഥം ഉക്കോടേതി.

൩൪൧. കതി ഉക്കോടാ? കതിഹാകാരേഹി ഉക്കോടനം പസവതി? കതിഹങ്ഗേഹി സമന്നാഗതോ പുഗ്ഗലോ അധികരണം ഉക്കോടേതി? കതി പുഗ്ഗലാ അധികരണം ഉക്കോടേന്താ ആപത്തിം ആപജ്ജന്തി?

ദ്വാദസ ഉക്കോടാ. ദസഹാകാരേഹി ഉക്കോടനം പസവതി. ചതൂഹങ്ഗേഹി സമന്നാഗതോ പുഗ്ഗലോ അധികരണം ഉക്കോടേതി. ചത്താരോ പുഗ്ഗലാ അധികരണം ഉക്കോടേന്താ ആപത്തിം ആപജ്ജന്തി?

കതമേ ദ്വാദസ ഉക്കോടാ? അകതം കമ്മം, ദുക്കടം കമ്മം, പുന കാതബ്ബം കമ്മം, അനിഹതം, ദുന്നിഹതം, പുന നിഹനിതബ്ബം, അവിനിച്ഛിതം, ദുവിനിച്ഛിതം, പുന വിനിച്ഛിതബ്ബം, അവൂപസന്തം, ദുവൂപസന്തം, പുന വൂപസമേതബ്ബന്തി – ഇമേ ദ്വാദസ ഉക്കോടാ.

കതമേഹി ദസഹാകാരേഹി ഉക്കോടനം പസവതി? തത്ഥ ജാതകം അധികരണം ഉക്കോടേതി, തത്ഥ ജാതകം വൂപസന്തം അധികരണം ഉക്കോടേതി, അന്തരാമഗ്ഗേ അധികരണം ഉക്കോടേതി, അന്തരാമഗ്ഗേ വൂപസന്തം അധികരണം ഉക്കോടേതി, തത്ഥ ഗതം അധികരണം ഉക്കോടേതി, തത്ഥ ഗതം വൂപസന്തം അധികരണം ഉക്കോടേതി, സതിവിനയം ഉക്കോടേതി, അമൂള്ഹവിനയം ഉക്കോടേതി, തസ്സപാപിയസികം ഉക്കോടേതി, തിണവത്ഥാരകം ഉക്കോടേതി – ഇമേഹി ദസഹാകാരേഹി ഉക്കോടനം പസവതി.

കതമേഹി ചതൂഹങ്ഗേഹി സമന്നാഗതോ പുഗ്ഗലോ അധികരണം ഉക്കോടേതി? ഛന്ദാഗതിം ഗച്ഛന്തോ അധികരണം ഉക്കോടേതി, ദോസാഗതിം ഗച്ഛന്തോ അധികരണം ഉക്കോടേതി, മോഹാഗതിം ഗച്ഛന്തോ അധികരണം ഉക്കോടേതി, ഭയാഗതിം ഗച്ഛന്തോ അധികരണം ഉക്കോടേതി – ഇമേഹി ചതൂഹങ്ഗേഹി സമന്നാഗതോ പുഗ്ഗലോ അധികരണം ഉക്കോടേതി.

കതമേ ചത്താരോ പുഗ്ഗലാ അധികരണം ഉക്കോടേന്താ ആപത്തിം ആപജ്ജന്തി? തദഹുപസമ്പന്നോ ഉക്കോടേതി ഉക്കോടനകം പാചിത്തിയം, ആഗന്തുകോ ഉക്കോടേതി ഉക്കോടനകം പാചിത്തിയം, കാരകോ ഉക്കോടേതി ഉക്കോടനകം പാചിത്തിയം, ഛന്ദദായകോ ഉക്കോടേതി ഉക്കോടനകം പാചിത്തിയം – ഇമേ ചത്താരോ പുഗ്ഗലാ അധികരണം ഉക്കോടേന്താ ആപത്തിം ആപജ്ജന്തി.