൬. ഛക്കവാരോ

൩൨൬. [ദീ. നി. ൩.൩൨൪] ഛ അഗാരവാ. ഛ ഗാരവാ. ഛ വിനീതവത്ഥൂനി. ഛ സാമീചിയോ. ഛ ആപത്തിസമുട്ഠാനാ. ഛച്ഛേദനകാ ആപത്തിയോ. ഛഹാകാരേഹി ആപത്തിം ആപജ്ജതി. ഛാനിസംസാ വിനയധരേ. ഛ പരമാനി. ഛാരത്തം തിചീവരേന വിപ്പവസിതബ്ബം. ഛ ചീവരാനി. ഛ രജനാനി. ഛ ആപത്തിയോ കായതോ ച ചിത്തതോ ച സമുട്ഠന്തി ന വാചതോ. ഛ ആപത്തിയോ വാചതോ ച ചിത്തതോ ച സമുട്ഠന്തി ന കായതോ. ഛ ആപത്തിയോ കായതോ ച വാചതോ ച ചിത്തതോ ച സമുട്ഠന്തി. ഛ കമ്മാനി. ഛ വിവാദമൂലാനി. ഛ അനുവാദമൂലാനി. ഛ സാരണീയാ ധമ്മാ ദീഘസോ. ഛ വിദത്ഥിയോ, സുഗതവിദത്ഥിയാ, തിരിയം ഛ വിദത്ഥിയോ. ഛ നിസ്സയപടിപ്പസ്സദ്ധിയോ ആചരിയമ്ഹാ. ഛ നഹാനേ അനുപഞ്ഞത്തിയോ – വിപ്പകതചീവരം ആദായ പക്കമതി, വിപ്പകതചീവരം സമാദായ പക്കമതി.

[മഹാവ. ൮൫ ആദയോ] ഛഹങ്ഗേഹി സമന്നാഗതേന ഭിക്ഖുനാ ഉപസമ്പാദേതബ്ബം നിസ്സയോ ദാതബ്ബോ സാമണേരോ ഉപട്ഠാപേതബ്ബോ – അസേക്ഖേന സീലക്ഖന്ധേന സമന്നാഗതോ ഹോതി, അസേക്ഖേന സമാധിക്ഖന്ധേന സമന്നാഗതോ ഹോതി, അസേക്ഖേന പഞ്ഞക്ഖന്ധേന സമന്നാഗതോ ഹോതി, അസേക്ഖേന വിമുത്തിക്ഖന്ധേന സമന്നാഗതോ ഹോതി, അസേക്ഖേന വിമുത്തിഞാണദസ്സനക്ഖന്ധേന സമന്നാഗതോ ഹോതി, ദസവസ്സോ വാ ഹോതി അതിരേകദസവസ്സോ വാ.

അപരേഹിപി ഛഹങ്ഗേഹി സമന്നാഗതേന ഭിക്ഖുനാ ഉപസമ്പാദേതബ്ബം നിസ്സയോ ദാതബ്ബോ സാമണേരോ ഉപട്ഠാപേതബ്ബോ – അത്തനാ അസേക്ഖേന സീലക്ഖന്ധേ സമന്നാഗതോ ഹോതി, പരം അസേക്ഖേ സീലക്ഖന്ധേ സമാദപേതാ; അത്തനാ അസേക്ഖേന സമാധിക്ഖന്ധേന സമന്നാഗതോ ഹോതി, പരം അസേക്ഖേ സമാധിക്ഖന്ധേ സമാദപേതാ; അത്തനാ അസേക്ഖേന പഞ്ഞക്ഖന്ധേന സമന്നാഗതോ ഹോതി, പരം അസേക്ഖേ പഞ്ഞക്ഖന്ധേ സമാദപേതാ; അത്തനാ അസേക്ഖേന വിമുത്തിക്ഖന്ധേന സമന്നാഗതോ ഹോതി, പരം അസേക്ഖേ വിമുത്തിക്ഖന്ധേ സമാദപേതാ; അത്തനാ അസേക്ഖേന വിമുത്തിഞാണദസ്സനക്ഖന്ധേന സമന്നാഗതോ ഹോതി, പരം അസേക്ഖേ വിമുത്തിഞാണദസ്സനക്ഖന്ധേ സമാദപേതാ; ദസവസ്സോ വാ ഹോതി അതിരേകദസവസ്സോ വാ.

അപരേഹിപി ഛഹങ്ഗേഹി സമന്നാഗതേന ഭിക്ഖുനാ ഉപസമ്പാദേതബ്ബം നിസ്സയോ ദാതബ്ബോ സാമണേരോ ഉപട്ഠാപേതബ്ബോ – സദ്ധോ ഹോതി, ഹിരിമാ ഹോതി, ഓത്തപ്പീ ഹോതി, ആരദ്ധവീരിയോ ഹോതി, ഉപട്ഠിതസ്സതി ഹോതി, ദസവസ്സോ വാ ഹോതി അതിരേകദസവസ്സോ വാ.

അപരേഹിപി ഛഹങ്ഗേഹി സമന്നാഗതേന ഭിക്ഖുനാ ഉപസമ്പാദേതബ്ബം നിസ്സയോ ദാതബ്ബോ സാമണേരോ ഉപട്ഠാപേതബ്ബോ – ന അധിസീലേ സീലവിപന്നോ ഹോതി, ന അജ്ഝാചാരേ ആചാരവിപന്നോ ഹോതി, ന അതിദിട്ഠിയാ ദിട്ഠിവിപന്നോ ഹോതി, ബഹുസ്സുതോ ഹോതി, പഞ്ഞവാ ഹോതി, ദസവസ്സോ വാ ഹോതി അതിരേകദസവസ്സോ വാ.

അപരേഹിപി ഛഹങ്ഗേഹി സമന്നാഗതേന ഭിക്ഖുനാ ഉപസമ്പാദേതബ്ബം നിസ്സയോ ദാതബ്ബോ സാമണേരോ ഉപട്ഠാപേതബ്ബോ – പടിബലോ ഹോതി അന്തേവാസിം വാ സദ്ധിവിഹാരിം വാ ഗിലാനം ഉപട്ഠാതും വാ ഉപട്ഠാപേതും വാ, അനഭിരതം വൂപകാസേതും വാ വൂപകാസാപേതും വാ [അനഭിരതിം (ക.)], ഉപ്പന്നം കുക്കുച്ചം ധമ്മതോ വിനോദേതും [വിനോദേതും വാ വിനോദാപേതും വാ (സ്യാ.) മഹാവ. ൮൫], ആപത്തിം ജാനാതി, ആപത്തിവുട്ഠാനം ജാനാതി, ദസവസ്സോ വാ ഹോതി അതിരേകദസവസ്സോ വാ.

അപരേഹിപി ഛഹങ്ഗേഹി സമന്നാഗതേന ഭിക്ഖുനാ ഉപസമ്പാദേതബ്ബം നിസ്സയോ ദാതബ്ബോ സാമണേരോ ഉപട്ഠാപേതബ്ബോ – പടിബലോ ഹോതി അന്തേവാസിം വാ സദ്ധിവിഹാരിം വാ ആഭിസമാചാരികായ സിക്ഖായ സിക്ഖാപേതും, ആദിബ്രഹ്മചാരിയകായ സിക്ഖായ വിനേതും, അഭിധമ്മേ വിനേതും, അഭിവിനയേ വിനേതും, ഉപ്പന്നം ദിട്ഠിഗതം ധമ്മതോ വിവേചേതും, ദസവസ്സോ വാ ഹോതി അതിരേകദസവസ്സോ വാ.

അപരേഹിപി ഛഹങ്ഗേഹി സമന്നാഗതേന ഭിക്ഖുനാ ഉപസമ്പാദേതബ്ബം നിസ്സയോ ദാതബ്ബോ സാമണേരോ ഉപട്ഠാപേതബ്ബോ – ആപത്തിം ജാനാതി, അനാപത്തിം ജാനാതി, ലഹുകം ആപത്തിം ജാനാതി, ഗരുകം ആപത്തിം ജാനാതി, ഉഭയാനി ഖോ പനസ്സ പാതിമോക്ഖാനി വിത്ഥാരേന സ്വാഗതാനി ഹോന്തി സുവിഭത്താനി സുപ്പവത്തീനി സുവിനിച്ഛിതാനി സുത്തസോ അനുബ്യഞ്ജനസോ, ദസവസ്സോ വാ ഹോതി അതിരേകദസവസ്സോ വാ.

ഛ അധമ്മികാനി പാതിമോക്ഖട്ഠപനാനി, ഛ ധമ്മികാനി പാതിമോക്ഖട്ഠപനാനീതി.

ഛക്കം നിട്ഠിതം.

തസ്സുദ്ദാനം –

അഗാരവാ ഗാരവാ ച, വിനീതാ സാമീചിപി ച;

സമുട്ഠാനാ ഛേദനാ ചേവ, ആകാരാനിസംസേന ച.

പരമാനി ച ഛാരത്തം, ചീവരം രജനാനി ച;

കായതോ ചിത്തതോ ചാപി, വാചതോ ചിത്തതോപി ച.

കായവാചാചിത്തതോ ച, കമ്മവിവാദമേവ ച;

അനുവാദാ ദീഘസോ ച, തിരിയം നിസ്സയേന ച.

അനുപഞ്ഞത്തി ആദായ, സമാദായ തഥേവ ച;

അസേക്ഖേ സമാദപേതാ, സദ്ധോ അധിസീലേന ച;

ഗിലാനാഭിസമാചാരീ, ആപത്താധമ്മധമ്മികാതി.