൭. സാധാരണവാരോ

൨൯൭. കതി സമഥാ വിവാദാധികരണസ്സ സാധാരണാ? കതി സമഥാ വിവാദാധികരണസ്സ അസാധാരണാ? കതി സമഥാ അനുവാദാധികരണസ്സ സാധാരണാ? കതി സമഥാ അനുവാദാധികരണസ്സ അസാധാരണാ? കതി സമഥാ ആപത്താധികരണസ്സ സാധാരണാ? കതി സമഥാ ആപത്താധികരണസ്സ അസാധാരണാ? കതി സമഥാ കിച്ചാധികരണസ്സ സാധാരണാ? കതി സമഥാ കിച്ചാധികരണസ്സ അസാധാരണാ?

ദ്വേ സമഥാ വിവാദാധികരണസ്സ സാധാരണാ – സമ്മുഖാവിനയോ, യേഭുയ്യസികാ. പഞ്ച സമഥാ വിവാദാധികരണസ്സ അസാധാരണാ – സതിവിനയോ, അമൂള്ഹവിനയോ, പടിഞ്ഞാതകരണം, തസ്സപാപിയസികാ, തിണവത്ഥാരകോ.

ചത്താരോ സമഥാ അനുവാദാധികരണസ്സ സാധാരണാ – സമ്മുഖാവിനയോ; സതിവിനയോ, അമൂള്ഹവിനയോ, തസ്സപാപിയസികാ. തയോ സമഥാ അനുവാദാധികരണസ്സ അസാധാരണാ – യേഭുയ്യസികാ, പടിഞ്ഞാതകരണം, തിണവത്ഥാരകോ.

തയോ സമഥാ ആപത്താധികരണസ്സ സാധാരണാ – സമ്മുഖാവിനയോ, പടിഞ്ഞാതകരണം, തിണവത്ഥാരകോ. ചത്താരോ സമഥാ ആപത്താധികരണസ്സ അസാധാരണാ – യേഭുയ്യസികാ, സതിവിനയോ, അമൂള്ഹവിനയോ, തസ്സപാപിയസികാ.

ഏകോ സമഥോ കിച്ചാധികരണസ്സ സാധാരണോ – സമ്മുഖാവിനയോ. ഛ സമഥാ കിച്ചാധികരണസ്സ അസാധാരണാ – യേഭുയ്യസികാ, സതിവിനയോ, അമൂള്ഹവിനയോ, പടിഞ്ഞാതകരണം, തസ്സപാപിയസികാ, തിണവത്ഥാരകോ.

സാധാരണവാരോ നിട്ഠിതോ സത്തമോ.