൧൨. വിനയവാരോ

൩൦൨. വിനയോ സമ്മുഖാവിനയോ, സമ്മുഖാവിനയോ വിനയോ? വിനയോ യേഭുയ്യസികാ, യേഭുയ്യസികാ വിനയോ? വിനയോ സതിവിനയോ, സതിവിനയോ വിനയോ? വിനയോ അമൂള്ഹവിനയോ, അമൂള്ഹവിനയോ വിനയോ? വിനയോ പടിഞ്ഞാതകരണം, പടിഞ്ഞാതകരണം വിനയോ? വിനയോ തസ്സപാപിയസികാ, തസ്സപാപിയസികാ വിനയോ? വിനയോ തിണവത്ഥാരകോ, തിണവത്ഥാരകോ വിനയോ?

വിനയോ സിയാ സമ്മുഖാവിനയോ സിയാ ന സമ്മുഖാവിനയോ. സമ്മുഖാവിനയോ വിനയോ ചേവ സമ്മുഖാവിനയോ ച.

വിനയോ സിയാ യേഭുയ്യസികാ, സിയാ ന യേഭുയ്യസികാ. യേഭുയ്യസികാ വിനയോ ചേവ യേഭുയ്യസികാ ച.

വിനയോ സിയാ സതിവിനയോ, സിയാ ന സതിവിനയോ. സതിവിനയോ വിനയോ ചേവ സതിവിനയോ ച.

വിനയോ സിയാ അമൂള്ഹവിനയോ, സിയാ ന അമൂള്ഹവിനയോ. അമൂള്ഹവിനയോ വിനയോ ചേവ അമൂള്ഹവിനയോ ച.

വിനയോ സിയാ പടിഞ്ഞാതകരണം, സിയാ ന പടിഞ്ഞാതകരണം. പടിഞ്ഞാതകരണം വിനയോ ചേവ പടിഞ്ഞാതകരണഞ്ച.

വിനയോ സിയാ തസ്സപാപിയസികാ, സിയാ ന തസ്സപാപിയസികാ. തസ്സപാപിയസികാ വിനയോ ചേവ തസ്സപാപിയസികാ ച.

വിനയോ സിയാ തിണവത്ഥാരകോ, സിയാ ന തിണവത്ഥാരകോ. തിണവത്ഥാരകോ വിനയോ ചേവ തിണവത്ഥാരകോ ച.

വിനയവാരോ നിട്ഠിതോ ദ്വാദസമോ.