൩. സഞ്ചരിത്തസമുട്ഠാനം

൨൬൦. സഞ്ചരീ കുടി വിഹാരോ, ധോവനഞ്ച പടിഗ്ഗഹോ;

വിഞ്ഞത്തുത്തരി അഭിഹട്ഠും, ഉഭിന്നം ദൂതകേന ച.

കോസിയാ സുദ്ധദ്വേഭാഗാ, ഛബ്ബസ്സാനി നിസീദനം;

രിഞ്ചന്തി രൂപികാ ചേവ, ഉഭോ നാനപ്പകാരകാ.

ഊനബന്ധനവസ്സികാ, സുത്തം വികപ്പനേന ച;

ദ്വാരദാനസിബ്ബാനി [ദ്വാരദാനസിബ്ബിനീ (സീ. സ്യാ.)] ച, പൂവപച്ചയജോതി ച.

രതനം സൂചി മഞ്ചോ ച, തൂലം നിസീദനകണ്ഡു ച;

വസ്സികാ ച സുഗതേന, വിഞ്ഞത്തി അഞ്ഞം ചേതാപനാ.

ദ്വേ സങ്ഘികാ മഹാജനികാ, ദ്വേ പുഗ്ഗലലഹുകാ ഗരു;

ദ്വേ വിഘാസാ സാടികാ ച, സമണചീവരേന ച.

സമപഞ്ഞാസിമേ ധമ്മാ, ഛഹി ഠാനേഹി ജായരേ;

കായതോ ന വാചാചിത്താ, വാചതോ ന കായമനാ.

കായവാചാ ന ച ചിത്താ [ന ചിത്തതോ (സീ. സ്യാ.)], കായചിത്താ ന വാചികാ [ന വാചതോ (സീ. സ്യാ.)];

വാചാചിത്താ ന കായേന, തീഹി ദ്വാരേഹി [തീഹി ഠാനേഹി (സ്യാ.)] ജായരേ.

ഛസമുട്ഠാനികാ ഏതേ, സഞ്ചരിത്തേന സാദിസാ.

സഞ്ചരിത്തസമുട്ഠാനം നിട്ഠിതം.