അത്ഥവസപകരണം

൩൩൪. [അ. നി. ൧൦.൩൩൪; പരി. ൨൨] ദസ അത്ഥവസേ പടിച്ച തഥാഗതേന സാവകാനം സിക്ഖാപദം പഞ്ഞത്തം – സങ്ഘസുട്ഠുതായ, സങ്ഘഫാസുതായ, ദുമ്മങ്കൂനം പുഗ്ഗലാനം നിഗ്ഗഹായ, പേസലാനം ഭിക്ഖൂനം ഫാസുവിഹാരായ, ദിട്ഠധമ്മികാനം ആസവാനം സംവരായ, സമ്പരായികാനം ആസവാനം പടിഘാതായ, അപ്പസന്നാനം പസാദായ, പസന്നാനം ഭിയ്യോഭാവായ, സദ്ധമ്മട്ഠിതിയാ വിനയാനുഗ്ഗഹായ.

യം സങ്ഘസുട്ഠു തം സങ്ഘഫാസു. യം സങ്ഘഫാസു തം ദുമ്മങ്കൂനം പുഗ്ഗലാനം നിഗ്ഗഹായ. യം ദുമ്മങ്കൂനം പുഗ്ഗലാനം നിഗ്ഗഹായ തം പേസലാനം ഭിക്ഖൂനം ഫാസുവിഹാരായ. യം പേസലാനം ഭിക്ഖൂനം ഫാസുവിഹാരായ തം ദിട്ഠധമ്മികാനം ആസവാനം സംവരായ. യം ദിട്ഠധമ്മികാനം ആസവാനം സംവരായ തം സമ്പരായികാനം ആസവാനം പടിഘാതായ. യം സമ്പരായികാനം ആസവാനം പടിഘാതായ തം അപ്പസന്നാനം പസാദായ. യം അപ്പസന്നാനം പസാദായ തം പസന്നാനം ഭിയ്യോഭാവായ. യം പസന്നാനം ഭിയ്യോഭാവായ തം സദ്ധമ്മട്ഠിതിയാ. യം സദ്ധമ്മട്ഠിതിയാ തം വിനയാനുഗ്ഗഹായ.

യം സങ്ഘസുട്ഠു തം സങ്ഘഫാസു. യം സങ്ഘസുട്ഠു തം ദുമ്മങ്കൂനം പുഗ്ഗലാനം നിഗ്ഗഹായ. യം സങ്ഘസുട്ഠു തം പേസലാനം ഭിക്ഖൂനം ഫാസുവിഹാരായ. യം സങ്ഘസുട്ഠു തം ദിട്ഠധമ്മികാനം ആസവാനം സംവരായ. യം സങ്ഘസുട്ഠു തം സമ്പരായികാനം ആസവാനം പടിഘാതായ. യം സങ്ഘസുട്ഠു തം അപ്പസന്നാനം പസാദായ. യം സങ്ഘസുട്ഠു തം പസന്നാനം ഭിയ്യോഭാവായ. യം സങ്ഘസുട്ഠു തം സദ്ധമ്മട്ഠിതിയാ. യം സങ്ഘസുട്ഠു തം വിനയാനുഗ്ഗഹായ.

യം സങ്ഘഫാസു തം ദുമ്മങ്കൂനം പുഗ്ഗലാനം നിഗ്ഗഹായ. യം സങ്ഘഫാസു തം പേസലാനം ഭിക്ഖൂനം ഫാസുവിഹാരായ. യം സങ്ഘഫാസു തം ദിട്ഠധമ്മികാനം ആസവാനം സംവരായ. യം സങ്ഘഫാസു തം സമ്പരായികാനം ആസവാനം പടിഘാതായ. യം സങ്ഘഫാസു തം അപ്പസന്നാനം പസാദായ. യം സങ്ഘഫാസു തം പസന്നാനം ഭിയ്യോഭാവായ. യം സങ്ഘഫാസു തം സദ്ധമ്മട്ഠിതിയാ. യം സങ്ഘഫാസു തം വിനയാനുഗ്ഗഹായ. യം സങ്ഘഫാസു തം സങ്ഘസുട്ഠു.

യം ദുമ്മങ്കൂനം പുഗ്ഗലാനം നിഗ്ഗഹായ…പേ… യം പേസലാനം ഭിക്ഖൂനം ഫാസുവിഹാരായ… യം ദിട്ഠധമ്മികാനം ആസവാനം സംവരായ… യം സമ്പരായികാനം ആസവാനം പടിഘാതായ… യം അപ്പസന്നാനം പസാദായ… യം പസന്നാനം ഭിയ്യോഭാവായ… യം സദ്ധമ്മട്ഠിതിയാ… യം വിനയാനുഗ്ഗഹായ തം സങ്ഘസുട്ഠു. യം വിനയാനുഗ്ഗഹായ തം സങ്ഘഫാസു. യം വിനയാനുഗ്ഗഹായ തം ദുമ്മങ്കൂനം പുഗ്ഗലാനം നിഗ്ഗഹായ. യം വിനയാനുഗ്ഗഹായ തം പേസലാനം ഭിക്ഖൂനം ഫാസുവിഹാരായ. യം വിനയാനുഗ്ഗഹായ തം ദിട്ഠധമ്മികാനം ആസവാനം സംവരായ. യം വിനയാനുഗ്ഗഹായ തം സമ്പരായികാനം ആസവാനം പടിഘാതായ. യം വിനയാനുഗ്ഗഹായ തം അപ്പസന്നാനം പസാദായ. യം വിനയാനുഗ്ഗഹായ തം പസന്നാനം ഭിയ്യോഭാവായ. യം വിനയാനുഗ്ഗഹായ തം സദ്ധമ്മട്ഠിതിയാതി.

അത്ഥസതം ധമ്മസതം, ദ്വേ ച നിരുത്തിസതാനി;

ചത്താരി ഞാണസതാനി, അത്ഥവസേ പകരണേതി.

അത്ഥവസപകരണം നിട്ഠിതം.

മഹാവഗ്ഗോ നിട്ഠിതോ.

തസ്സുദ്ദാനം –

പഠമം അട്ഠപുച്ഛായം, പച്ചയേസു പുനട്ഠ ച;

ഭിക്ഖൂനം സോളസ ഏതേ, ഭിക്ഖുനീനഞ്ച സോളസ.

പേയ്യാലഅന്തരാ ഭേദാ, ഏകുത്തരികമേവ ച;

പവാരണത്ഥവസികാ, മഹാവഗ്ഗസ്സ സങ്ഗഹോതി.

അത്ഥവസപകരണം നിട്ഠിതം.