അത്ഥാപത്തിസമുട്ഠാനം

൧. പാരാജികം

൪൭൦. അത്ഥാപത്തി അചിത്തകോ ആപജ്ജതി, സചിത്തകോ വുട്ഠാതി. അത്ഥാപത്തി സചിത്തകോ ആപജ്ജതി, അചിത്തകോ വുട്ഠാതി. അത്ഥാപത്തി അചിത്തകോ ആപജ്ജതി, അചിത്തകോ വുട്ഠാതി. അത്ഥാപത്തി സചിത്തകോ ആപജ്ജതി, സചിത്തകോ വുട്ഠാതി. അത്ഥാപത്തി കുസലചിത്തോ ആപജ്ജതി, കുസലചിത്തോ വുട്ഠാതി. അത്ഥാപത്തി കുസലചിത്തോ ആപജ്ജതി, അകുസലചിത്തോ വുട്ഠാതി. അത്ഥാപത്തി കുസലചിത്തോ ആപജ്ജതി, അബ്യാകതചിത്തോ വുട്ഠാതി. അത്ഥാപത്തി അകുസലചിത്തോ ആപജ്ജതി, കുസലചിത്തോ വുട്ഠാതി. അത്ഥാപത്തി അകുസലചിത്തോ ആപജ്ജതി, അകുസലചിത്തോ വുട്ഠാതി. അത്ഥാപത്തി അകുസലചിത്തോ ആപജ്ജതി, അബ്യാകതചിത്തോ വുട്ഠാതി. അത്ഥാപത്തി അബ്യാകതചിത്തോ ആപജ്ജതി, കുസലചിത്തോ വുട്ഠാതി. അത്ഥാപത്തി അബ്യാകതചിത്തോ ആപജ്ജതി, അകുസലചിത്തോ വുട്ഠാതി. അത്ഥാപത്തി അബ്യാകതചിത്തോ ആപജ്ജതി, അബ്യാകതചിത്തോ വുട്ഠാതി.

പഠമം പാരാജികം കതിഹി സമുട്ഠാനേഹി സമുട്ഠാതി? പഠമം പാരാജികം ഏകേന സമുട്ഠാനേന സമുട്ഠാതി. കായതോ ച ചിത്തതോ ച സമുട്ഠാതി, ന വാചതോ.

ദുതിയം പാരാജികം കതിഹി സമുട്ഠാനേഹി സമുട്ഠാതി? ദുതിയം പാരാജികം തീഹി സമുട്ഠാനേഹി സമുട്ഠാതി – സിയാ കായതോ ച ചിത്തതോ ച സമുട്ഠാതി, ന വാചതോ; സിയാ വാചതോ ച ചിത്തതോ ച സമുട്ഠാതി, ന കായതോ; സിയാ കായതോ ച വാചതോ ച ചിത്തതോ ച സമുട്ഠാതി.

തതിയം പാരാജികം കതിഹി സമുട്ഠാനേഹി സമുട്ഠാതി? തതിയം പാരാജികം തീഹി സമുട്ഠാനേഹി സമുട്ഠാതി – സിയാ കായതോ ച ചിത്തതോ ച സമുട്ഠാതി, ന വാചതോ; സിയാ വാചതോ ച ചിത്തതോ ച സമുട്ഠാതി, ന കായതോ; സിയാ കായതോ ച വാചതോ ച ചിത്തതോ ച സമുട്ഠാതി.

ചതുത്ഥം പാരാജികം കതിഹി സമുട്ഠാനേഹി സമുട്ഠാതി? ചതുത്ഥം പാരാജികം തീഹി സമുട്ഠാനേഹി സമുട്ഠാതി – സിയാ കായതോ ച ചിത്തതോ ച സമുട്ഠാതി, ന വാചതോ; സിയാ വാചതോ ച ചിത്തതോ ച സമുട്ഠാതി, ന കായതോ; സിയാ കായതോ ച വാചതോ ച ചിത്തതോ ച സമുട്ഠാതി.

ചത്താരോ പാരാജികാ നിട്ഠിതാ.

൨. സങ്ഘാദിസേസം

൪൭൧. ഉപക്കമിത്വാ അസുചിം മോചേന്തസ്സ സങ്ഘാദിസേസോ കതിഹി സമുട്ഠാനേഹി സമുട്ഠാതി? ഉപക്കമിത്വാ അസുചിം മോചേന്തസ്സ സങ്ഘാദിസേസോ ഏകേന സമുട്ഠാനേന സമുട്ഠാതി – കായതോ ച ചിത്തതോ ച സമുട്ഠാതി, ന വാചതോ.

മാതുഗാമേന സദ്ധിം കായസംസഗ്ഗം സമാപജ്ജന്തസ്സ സങ്ഘാദിസേസോ കതിഹി സമുട്ഠാനേഹി സമുട്ഠാതി? മാതുഗാമേന സദ്ധിം കായസംസഗ്ഗം സമാപജ്ജന്തസ്സ സങ്ഘാദിസേസോ ഏകേന സമുട്ഠാനേന സമുട്ഠാതി – കായതോ ച ചിത്തതോ ച സമുട്ഠാതി, ന വാചതോ.

മാതുഗാമം ദുട്ഠുല്ലാഹി വാചാഹി ഓഭാസേന്തസ്സ സങ്ഘാദിസേസോ കതിഹി സമുട്ഠാനേഹി സമുട്ഠാതി? മാതുഗാമം ദുട്ഠുല്ലാഹി വാചാഹി ഓഭാസേന്തസ്സ സങ്ഘാദിസേസോ തീഹി സമുട്ഠാനേഹി സമുട്ഠാതി – സിയാ കായതോ ച ചിത്തതോ ച സമുട്ഠാതി ന വാചതോ; സിയാ വാചതോ ച ചിത്തതോ ച സമുട്ഠാതി, ന കായതോ; സിയാ കായതോ ച വാചതോ ച ചിത്തതോ ച സമുട്ഠാതി.

മാതുഗാമസ്സ സന്തികേ അത്തകാമപാരിചരിയായ വണ്ണം ഭാസന്തസ്സ സങ്ഘാദിസേസോ കതിഹി സമുട്ഠാനേഹി സമുട്ഠാതി? മാതുഗാമസ്സ സന്തികേ അത്തകാമപാരിചരിയായ വണ്ണം ഭാസന്തസ്സ സങ്ഘാദിസേസോ തീഹി സമുട്ഠാനേഹി സമുട്ഠാതി…പേ….

സഞ്ചരിത്തം സമാപജ്ജന്തസ്സ സങ്ഘാദിസേസോ കതിഹി സമുട്ഠാനേഹി സമുട്ഠാതി? സഞ്ചരിത്തം സമാപജ്ജന്തസ്സ സങ്ഘാദിസേസോ ഛഹി സമുട്ഠാനേഹി സമുട്ഠാതി – സിയാ കായതോ സമുട്ഠാതി, ന വാചതോ ന ചിത്തതോ; സിയാ വാചതോ സമുട്ഠാതി, ന കായതോ ന ചിത്തതോ; സിയാ കായതോ ച വാചതോ ച സമുട്ഠാതി, ന ചിത്തതോ; സിയാ കായതോ ച ചിത്തതോ ച സമുട്ഠാതി, ന വാചതോ; സിയാ വാചതോ ച ചിത്തതോ ച സമുട്ഠാതി, ന കായതോ; സിയാ കായതോ ച വാചതോ ച ചിത്തതോ ച സമുട്ഠാതി.

സഞ്ഞാചികായ കുടിം കാരാപേന്തസ്സ സങ്ഘാദിസേസോ കതിഹി സമുട്ഠാനേഹി സമുട്ഠാതി? സഞ്ഞാചികായ കുടിം കാരാപേന്തസ്സ സങ്ഘാദിസേസോ ഛഹി സമുട്ഠാനേഹി സമുട്ഠാതി…പേ….

മഹല്ലകം വിഹാരം കാരാപേന്തസ്സ സങ്ഘാദിസേസോ കതിഹി സമുട്ഠാനേഹി സമുട്ഠാതി? മഹല്ലകം വിഹാരം കാരാപേന്തസ്സ സങ്ഘാദിസേസോ ഛഹി സമുട്ഠാനേഹി സമുട്ഠാതി…പേ….

ഭിക്ഖും അമൂലകേന പാരാജികേന ധമ്മേന അനുദ്ധംസേന്തസ്സ സങ്ഘാദിസേസോ കതിഹി സമുട്ഠാനേഹി സമുട്ഠാതി? ഭിക്ഖും അമൂലകേന പാരാജികേന ധമ്മേന അനുദ്ധംസേന്തസ്സ സങ്ഘാദിസേസോ തീഹി സമുട്ഠാനേഹി സമുട്ഠാതി…പേ….

ഭിക്ഖും അഞ്ഞഭാഗിയസ്സ അധികരണസ്സ കിഞ്ചി ദേസം ലേസമത്തം ഉപാദായ പാരാജികേന ധമ്മേന അനുദ്ധംസേന്തസ്സ സങ്ഘാദിസേസോ കതിഹി സമുട്ഠാനേഹി സമുട്ഠാതി? ഭിക്ഖും അഞ്ഞഭാഗിയസ്സ അധികരണസ്സ കിഞ്ചി ദേസം ലേസമത്തം ഉപാദായ പാരാജികേന ധമ്മേന അനുദ്ധംസേന്തസ്സ സങ്ഘാദിസേസോ തീഹി സമുട്ഠാനേഹി സമുട്ഠാതി…പേ….

സങ്ഘഭേദകസ്സ ഭിക്ഖുനോ യാവതതിയം സമനുഭാസനായ ന പടിനിസ്സജ്ജന്തസ്സ സങ്ഘാദിസേസോ കതിഹി സമുട്ഠാനേഹി സമുട്ഠാതി? സങ്ഘഭേദകസ്സ ഭിക്ഖുനോ യാവതതിയം സമനുഭാസനായ ന പടിനിസ്സജ്ജന്തസ്സ സങ്ഘാദിസേസോ ഏകേന സമുട്ഠാനേന സമുട്ഠാതി – കായതോ ച വാചതോ ച ചിത്തതോ ച സമുട്ഠാതി.

ഭേദകാനുവത്തകാനം ഭിക്ഖൂനം യാവതതിയം സമനുഭാസനായ ന പടിനിസ്സജ്ജന്താനം സങ്ഘാദിസേസോ കതിഹി സമുട്ഠാനേഹി സമുട്ഠാതി? ഭേദകാനുവത്തകാനം ഭിക്ഖൂനം യാവതതിയം സമനുഭാസനായ ന പടിനിസ്സജ്ജന്താനം സങ്ഘാദിസേസോ ഏകേന സമുട്ഠാനേന സമുട്ഠാതി – കായതോ ച വാചതോ ച ചിത്തതോ ച സമുട്ഠാതി.

ദുബ്ബചസ്സ ഭിക്ഖുനോ യാവതതിയം സമനുഭാസനായ ന പടിനിസ്സജ്ജന്തസ്സ സങ്ഘാദിസേസോ കതിഹി സമുട്ഠാനേഹി സമുട്ഠാതി? ദുബ്ബചസ്സ ഭിക്ഖുനോ യാവതതിയം സമനുഭാസനായ ന പടിനിസ്സജ്ജന്തസ്സ സങ്ഘാദിസേസോ ഏകേന സമുട്ഠാനേന സമുട്ഠാതി – കായതോ ച വാചതോ ച ചിത്തതോ ച സമുട്ഠാതി.

കുലദൂസകസ്സ ഭിക്ഖുനോ യാവതതിയം സമനുഭാസനായ ന പടിനിസ്സജ്ജന്തസ്സ സങ്ഘാദിസേസോ കതിഹി സമുട്ഠാനേഹി സമുട്ഠാതി? കുലദൂസകസ്സ ഭിക്ഖുനോ യാവതതിയം സമനുഭാസനായ ന പടിനിസ്സജ്ജന്തസ്സ സങ്ഘാദിസേസോ ഏകേന സമുട്ഠാനേന സമുട്ഠാതി – കായതോ ച വാചതോ ച ചിത്തതോ ച സമുട്ഠാതി.

തേരസ സങ്ഘാദിസേസാ നിട്ഠിതാ.

൪൭൨. …പേ… അനാദരിയം പടിച്ച ഉദകേ ഉച്ചാരം വാ പസ്സാവം വാ ഖേളം വാ കരോന്തസ്സ ദുക്കടം കതിഹി സമുട്ഠാനേഹി സമുട്ഠാതി? അനാദരിയം പടിച്ച ഉദകേ ഉച്ചാരം വാ പസ്സാവം വാ ഖേളം വാ കരോന്തസ്സ ദുക്കടം ഏകേന സമുട്ഠാനേന സമുട്ഠാതി – കായതോ ച ചിത്തതോ ച സമുട്ഠാതി, ന വാചതോ.

സേഖിയാ നിട്ഠിതാ.

൩. പാരാജികാദി

൪൭൩. ചത്താരോ പാരാജികാ കതിഹി സമുട്ഠാനേഹി സമുട്ഠന്തി? ചത്താരോ പാരാജികാ തീഹി സമുട്ഠാനേഹി സമുട്ഠന്തി – സിയാ കായതോ ച ചിത്തതോ ച സമുട്ഠന്തി, ന വാചതോ; സിയാ വാചതോ ച ചിത്തതോ ച സമുട്ഠന്തി, ന കായതോ; സിയാ കായതോ ച വാചതോ ച ചിത്തതോ ച സമുട്ഠന്തി.

തേരസ സങ്ഘാദിസേസാ കതിഹി സമുട്ഠാനേഹി സമുട്ഠന്തി? തേരസ സങ്ഘാദിസേസാ ഛഹി സമുട്ഠാനേഹി സമുട്ഠന്തി – സിയാ കായതോ സമുട്ഠന്തി, ന വാചതോ ന ചിത്തതോ; സിയാ വാചതോ സമുട്ഠന്തി, ന കായതോ ന ചിത്തതോ; സിയാ കായതോ ച വാചതോ ന സമുട്ഠന്തി, ന ചിത്തതോ; സിയാ കായതോ ച ചിത്തതോ ച സമുട്ഠന്തി, ന വാചതോ; സിയാ വാചതോ ച ചിത്തതോ ച സമുട്ഠന്തി, ന കായതോ; സിയാ കായതോ ച വാചതോ ച ചിത്തതോ ച സമുട്ഠന്തി.

ദ്വേ അനിയതാ കതിഹി സമുട്ഠാനേഹി സമുട്ഠന്തി? ദ്വേ അനിയതാ തീഹി സമുട്ഠാനേഹി സമുട്ഠന്തി – സിയാ കായതോ ച ചിത്തതോ ച സമുട്ഠന്തി, ന വാചതോ; സിയാ വാചതോ ച ചിത്തതോ ച സമുട്ഠന്തി, ന കായതോ; സിയാ കായതോ ച വാചതോ ച ചിത്തതോ ച സമുട്ഠന്തി.

തിംസ നിസ്സഗ്ഗിയാ പാചിത്തിയാ കതിഹി സമുട്ഠാനേഹി സമുട്ഠന്തി? തിംസ നിസ്സഗ്ഗിയാ പാചിത്തിയാ ഛഹി സമുട്ഠാനേഹി സമുട്ഠന്തി – സിയാ കായതോ സമുട്ഠന്തി, ന വാചതോ ന ചിത്തതോ; സിയാ വാചതോ സമുട്ഠന്തി, ന കായതോ ന ചിത്തതോ; സിയാ കായതോ ച വാചതോ ച സമുട്ഠന്തി, ന ചിത്തതോ; സിയാ കായതോ ച ചിത്തതോ ച സമുട്ഠന്തി, ന വാചതോ; സിയാ വാചതോ ച ചിത്തതോ ച സമുട്ഠന്തി, ന കായതോ; സിയാ കായതോ ച വാചതോ ച ചിത്തതോ ച സമുട്ഠന്തി.

ദ്വേനവുതി പാചിത്തിയാ കതിഹി സമുട്ഠാനേഹി സമുട്ഠന്തി? ദ്വേനവുതി പാചിത്തിയാ ഛഹി സമുട്ഠാനേഹി സമുട്ഠന്തി – സിയാ കായതോ സമുട്ഠന്തി, ന വാചതോ ന ചിത്തതോ; സിയാ വാചതോ സമുട്ഠന്തി, ന കായതോ ന ചിത്തതോ; സിയാ കായതോ ച വാചതോ ച സമുട്ഠന്തി, ന ചിത്തതോ; സിയാ കായതോ ച ചിത്തതോ ച സമുട്ഠന്തി ന വാചതോ; സിയാ വാചതോ ച ചിത്തതോ ച സമുട്ഠന്തി, ന കായതോ; സിയാ കായതോ ച വാചതോ ച ചിത്തതോ ച സമുട്ഠന്തി.

ചത്താരോ പാടിദേസനീയാ കതിഹി സമുട്ഠാനേഹി സമുട്ഠന്തി? ചത്താരോ പാടിദേസനീയാ ചതൂഹി സമുട്ഠാനേഹി സമുട്ഠന്തി – സിയാ കായതോ സമുട്ഠന്തി, ന വാചതോ ന ചിത്തതോ; സിയാ കായതോ ച വാചതോ ച സമുട്ഠന്തി, ന ചിത്തതോ; സിയാ കായതോ ച ചിത്തതോ ച സമുട്ഠന്തി, ന വാചതോ; സിയാ കായതോ ച വാചതോ ച ചിത്തതോ ച സമുട്ഠന്തി.

പഞ്ചസത്തതി സേഖിയാ കതിഹി സമുട്ഠാനേഹി സമുട്ഠന്തി? പഞ്ചസത്തതി സേഖിയാ തീഹി സമുട്ഠാനേഹി സമുട്ഠന്തി – സിയാ കായതോ ച ചിത്തതോ ച സമുട്ഠന്തി, ന വാചതോ; സിയാ വാചതോ ച ചിത്തതോ ച സമുട്ഠന്തി, ന കായതോ; സിയാ കായതോ ച വാചതോ ച ചിത്തതോ ച സമുട്ഠന്തി.

സമുട്ഠാനം നിട്ഠിതം.