ദുതിയഗാഥാസങ്ഗണികം
൧. കായികാദിആപത്തി
൪൭൪. കതി ആപത്തിയോ കായികാ, കതി വാചസികാ കതാ.
ഛാദേന്തസ്സ കതി ആപത്തിയോ, കതി സംസഗ്ഗപച്ചയാ.
ഛാപത്തിയോ കായികാ, ഛ വാചസികാ കതാ;
ഛാദേന്തസ്സ തിസ്സോ ആപത്തിയോ, പഞ്ച സംസഗ്ഗപച്ചയാ.
അരുണുഗ്ഗേ കതി ആപത്തിയോ, കതി യാവതതിയകാ;
കതേത്ഥ അട്ഠ വത്ഥുകാ, കതിഹി സബ്ബസങ്ഗഹോ.
അരുണുഗ്ഗേ തിസ്സോ ആപത്തിയോ, ദ്വേ യാവതതിയകാ;
ഏകേത്ഥ അട്ഠ വത്ഥുകാ, ഏകേന സബ്ബസങ്ഗഹോ.
വിനയസ്സ കതി മൂലാനി, യാനി ബുദ്ധേന പഞ്ഞത്താ;
വിനയഗരുകാ കതി വുത്താ, ദുട്ഠുല്ലച്ഛാദനാ കതി.
വിനയസ്സ ദ്വേ മൂലാനി, യാനി ബുദ്ധേന പഞ്ഞത്താ;
വിനയഗരുകാ ദ്വേ വുത്താ, ദ്വേ ദുട്ഠുല്ലച്ഛാദനാ.
ഗാമന്തരേ കതി ആപത്തിയോ, കതി നദിപാരപച്ചയാ;
കതിമംസേസു ഥുല്ലച്ചയം, കതിമംസേസു ദുക്കടം.
ഗാമന്തരേ ചതസ്സോ ആപത്തിയോ, ചതസ്സോ നദിപാരപച്ചയാ;
ഏകമംസേ ഥുല്ലച്ചയം, നവമംസേസു ദുക്കടം.
കതി വാചസികാ രത്തിം, കതി വാചസികാ ദിവാ;
ദദമാനസ്സ കതി ആപത്തിയോ, പടിഗ്ഗണ്ഹന്തസ്സ കിത്തകാ.
ദ്വേ വാചസികാ രത്തിം, ദ്വേ വാചസികാ ദിവാ;
ദദമാനസ്സ തിസ്സോ ആപത്തിയോ, ചത്താരോ ച പടിഗ്ഗഹേ.
൨. ദേസനാഗാമിനിയാദിആപത്തി
൪൭൫. കതി ദേസനാഗാമിനിയോ, കതി സപ്പടികമ്മാ കതാ;
കതേത്ഥ അപ്പടികമ്മാ വുത്താ, ബുദ്ധേനാദിച്ചബന്ധുനാ.
പഞ്ച ദേസനാഗാമിനിയോ, ഛ സപ്പടികമ്മാ കതാ;
ഏകേത്ഥ അപ്പടികമ്മാ വുത്താ, ബുദ്ധേനാദിച്ചബന്ധുനാ.
വിനയഗരുകാ കതി വുത്താ, കായവാചസികാനി ച;
കതി വികാലേ ധഞ്ഞരസോ, കതി ഞത്തിചതുത്ഥേന സമ്മുതി.
വിനയഗരുകാ ദ്വേ വുത്താ, കായവാചസികാനി ച;
ഏകോ വികാലേ ധഞ്ഞരസോ, ഏകാ ഞത്തിചതുത്ഥേന സമ്മുതി.
പാരാജികാ കായികാ കതി, കതി സംവാസകഭൂമിയോ;
കതിനം രത്തിച്ഛേദോ, പഞ്ഞത്താ ദ്വങ്ഗുലാ കതി.
പാരാജികാ കായികാ ദ്വേ, ദ്വേ സംവാസകഭൂമിയോ;
ദ്വിന്നം രത്തിച്ഛേദോ, പഞ്ഞത്താ ദ്വങ്ഗുലാ ദുവേ.
കതത്താനം വധിത്വാന, കതിഹി സങ്ഘോ ഭിജ്ജതി;
കതേത്ഥ പഠമാപത്തികാ, ഞത്തിയാ കരണാ കതി.
ദ്വേ അത്താനം വധിത്വാന, ദ്വീഹി സങ്ഘോ ഭിജ്ജതി;
ദ്വേത്ഥ പഠമാപത്തികാ, ഞത്തിയാ കരണാ ദുവേ.
പാണാതിപാതേ കതി ആപത്തിയോ, വാചാ പാരാജികാ കതി;
ഓഭാസനാ കതി വുത്താ, സഞ്ചരിത്തേന വാ കതി.
പാണാതിപാതേ തിസ്സോ ആപത്തിയോ;
വാചാ പാരാജികാ തയോ;
ഓഭാസനാ തയോ വുത്താ;
സഞ്ചരിത്തേന വാ തയോ.
കതി പുഗ്ഗലാ ന ഉപസമ്പാദേതബ്ബാ, കതി കമ്മാനം സങ്ഗഹാ;
നാസിതകാ കതി വുത്താ, കതിനം ഏകവാചികാ.
തയോ പുഗ്ഗലാ ന ഉപസമ്പാദേതബ്ബാ, തയോ കമ്മാനം സങ്ഗഹാ;
നാസിതകാ തയോ വുത്താ, തിണ്ണന്നം ഏകവാചികാ.
അദിന്നാദാനേ കതി ആപത്തിയോ, കതി മേഥുനപച്ചയാ;
ഛിന്ദന്തസ്സ കതി ആപത്തിയോ, കതി ഛഡ്ഡിതപച്ചയാ.
അദിന്നാദാനേ തിസ്സോ ആപത്തിയോ, ചതസ്സോ മേഥുനപച്ചയാ;
ഛിന്ദന്തസ്സ തിസ്സോ ആപത്തിയോ, പഞ്ച ഛഡ്ഡിതപച്ചയാ.
ഭിക്ഖുനോവാദകവഗ്ഗസ്മിം, പാചിത്തിയേന ദുക്കടാ;
കതേത്ഥ നവകാ വുത്താ, കതിനം ചീവരേന ച.
ഭിക്ഖുനോവാദകവഗ്ഗസ്മിം, പാചിത്തിയേന ദുക്കടാ കതാ;
ചതുരേത്ഥ നവകാ വുത്താ, ദ്വിന്നം ചീവരേന ച.
ഭിക്ഖുനീനഞ്ച അക്ഖാതാ, പാടിദേസനിയാ കതി;
ഭുഞ്ജന്താമകധഞ്ഞേന, പാചിത്തിയേന ദുക്കടാ കതി.
ഭിക്ഖുനീനഞ്ച അക്ഖാതാ, അട്ഠ പാടിദേസനീയാ കതാ;
ഭുഞ്ജന്താമകധഞ്ഞേന, പാചിത്തിയേന ദുക്കടാ കതാ.
ഗച്ഛന്തസ്സ കതി ആപത്തിയോ, ഠിതസ്സ ചാപി കിത്തകാ;
നിസിന്നസ്സ കതി ആപത്തിയോ, നിപന്നസ്സാപി കിത്തകാ.
ഗച്ഛന്തസ്സ ചതസ്സോ ആപത്തിയോ, ഠിതസ്സ ചാപി തത്തകാ;
നിസിന്നസ്സ ചതസ്സോ ആപത്തിയോ, നിപന്നസ്സാപി തത്തകാ.
൩. പാചിത്തിയം
൪൭൬. കതി പാചിത്തിയാനി, സബ്ബാനി നാനാവത്ഥുകാനി;
അപുബ്ബം അചരിമം, ആപജ്ജേയ്യ ഏകതോ.
പഞ്ച പാചിത്തിയാനി, സബ്ബാനി നാനാവത്ഥുകാനി;
അപുബ്ബം അചരിമം, ആപജ്ജേയ്യ ഏകതോ.
കതി പാചിത്തിയാനി, സബ്ബാനി നാനാവത്ഥുകാനി;
അപുബ്ബം അചരിമം, ആപജ്ജേയ്യ ഏകതോ.
ന പാചിത്തിയാനി, സബ്ബാനി നാനാവത്ഥുകാനി;
അപുബ്ബം അചരിമം, ആപജ്ജേയ്യ ഏകതോ.
കതി പാചിത്തിയാനി, സബ്ബാനി നാനാവത്ഥുകാനി;
കതി വാചായ ദേസേയ്യ, വുത്താ ആദിച്ചബന്ധുനാ.
പഞ്ച പാചിത്തിയാനി, സബ്ബാനി നാനാവത്ഥുകാനി;
ഏകവാചായ ദേസേയ്യ, വുത്താ ആദിച്ചബന്ധുനാ.
കതി പാചിത്തിയാനി, സബ്ബാനി നാനാവത്ഥുകാനി;
കതി വാചായ ദേസേയ്യ, വുത്താ ആദിച്ചബന്ധുനാ.
നവ പാചിത്തിയാനി, സബ്ബാനി നാനാവത്ഥുകാനി;
ഏകവാചായ ദേസേയ്യ, വുത്താ ആദിച്ചബന്ധുനാ.
കതി പാചിത്തിയാനി, സബ്ബാനി നാനാവത്ഥുകാനി;
കിഞ്ച കിത്തേത്വാ ദേസേയ്യ, വുത്താ ആദിച്ചബന്ധുനാ.
പഞ്ച പാചിത്തിയാനി, സബ്ബാനി നാനാവത്ഥുകാനി;
വത്ഥും കിത്തേത്വാ ദേസേയ്യ, വുത്താ ആദിച്ചബന്ധുനാ.
കതി പാചിത്തിയാനി, സബ്ബാനി നാനാവത്ഥുകാനി;
കിഞ്ച കിത്തേത്വാ ദേസേയ്യ, വുത്താ ആദിച്ചബന്ധുനാ.
നവ പാചിത്തിയാനി, സബ്ബാനി നാനാവത്ഥുകാനി;
വത്ഥും കിത്തേത്വാ ദേസേയ്യ, വുത്താ ആദിച്ചബന്ധുനാ.
യാവതതിയകേ കതി ആപത്തിയോ, കതി വോഹാരപച്ചയാ;
ഖാദന്തസ്സ കതി ആപത്തിയോ, കതി ഭോജനപച്ചയാ.
യാവതതിയകേ തിസ്സോ ആപത്തിയോ, ഛ വോഹാരപച്ചയാ;
ഖാദന്തസ്സ തിസ്സോ ആപത്തിയോ, പഞ്ച ഭോജനപച്ചയാ.
സബ്ബാ യാവതതിയകാ, കതി ഠാനാനി ഗച്ഛന്തി;
കതിനഞ്ചേവ ആപത്തി, കതിനം അധികരണേന ച.
സബ്ബാ യാവതതിയകാ, പഞ്ച ഠാനാനി ഗച്ഛന്തി;
പഞ്ചന്നഞ്ചേവ ആപത്തി, പഞ്ചന്നം അധികരണേന ച.
കതിനം വിനിച്ഛയോ ഹോതി, കതിനം വൂപസമേന ച;
കതിനഞ്ചേവ അനാപത്തി, കതിഹി ഠാനേഹി സോഭതി.
പഞ്ചന്നം വിനിച്ഛയോ ഹോതി, പഞ്ചന്നം വൂപസമേന ച;
പഞ്ചന്നഞ്ചേവ അനാപത്തി, തീഹി ഠാനേഹി സോഭതി.
കതി കായികാ രത്തിം, കതി കായികാ ദിവാ;
നിജ്ഝായന്തസ്സ കതി ആപത്തി, കതി പിണ്ഡപാതപച്ചയാ.
ദ്വേ കായികാ രത്തിം, ദ്വേ കായികാ ദിവാ;
നിജ്ഝായന്തസ്സ ഏകാ ആപത്തി, ഏകാ പിണ്ഡപാതപച്ചയാ.
കതാനിസംസേ സമ്പസ്സം, പരേസം സദ്ധായ ദേസയേ;
ഉക്ഖിത്തകാ കതി വുത്താ, കതി സമ്മാവത്തനാ.
അട്ഠാനിസംസേ സമ്പസ്സം, പരേസം സദ്ധായ ദേസയേ;
ഉക്ഖിത്തകാ തയോ വുത്താ, തേചത്താലീസ സമ്മാവത്തനാ.
കതി ഠാനേ മുസാവാദോ, കതി പരമന്തി വുച്ചതി;
കതി പാടിദേസനീയാ, കതിനം ദേസനായ ച.
പഞ്ച ഠാനേ മുസാവാദോ, ചുദ്ദസ പരമന്തി വുച്ചതി;
ദ്വാദസ പാടിദേസനീയാ, ചതുന്നം ദേസനായ ച.
കതങ്ഗികോ മുസാവാദോ, കതി ഉപോസഥങ്ഗാനി;
കതി ദൂതേയ്യങ്ഗാനി, കതി തിത്ഥിയവത്തനാ.
അട്ഠങ്ഗികോ മുസാവാദോ, അട്ഠ ഉപോസഥങ്ഗാനി;
അട്ഠ ദൂതേയ്യങ്ഗാനി, അട്ഠ തിത്ഥിയവത്തനാ.
കതിവാചികാ ഉപസമ്പദാ, കതിനം പച്ചുട്ഠാതബ്ബം;
കതിനം ആസനം ദാതബ്ബം, ഭിക്ഖുനോവാദകോ കതിഹി.
അട്ഠവാചികാ ഉപസമ്പദാ, അട്ഠന്നം പച്ചുട്ഠാതബ്ബം;
അട്ഠന്നം ആസനം ദാതബ്ബം, ഭിക്ഖുനോവാദകോ അട്ഠഹി.
കതിനം ഛേജ്ജം ഹോതി, കതിനം ഥുല്ലച്ചയം;
കതിനഞ്ചേവ അനാപത്തി, സബ്ബേസം ഏകവത്ഥുകാ.
ഏകസ്സ ഛേജ്ജം ഹോതി, ചതുന്നം ഥുല്ലച്ചയം;
ചതുന്നഞ്ചേവ അനാപത്തി, സബ്ബേസം ഏകവത്ഥുകാ.
കതി ആഘാതവത്ഥൂനി, കതിഹി സങ്ഘോ ഭിജ്ജതി;
കതേത്ഥ പഠമാപത്തികാ, ഞത്തിയാ കരണാ കതി.
നവ ആഘാതവത്ഥൂനി, നവഹി സങ്ഘോ ഭിജ്ജതി;
നവേത്ഥ പഠമാപത്തികാ, ഞത്തിയാ കരണാ നവ.
൪. അവന്ദനീയപുഗ്ഗലാദി
൪൭൭. കതി പുഗ്ഗലാ നാഭിവാദേതബ്ബാ, അഞ്ജലിസാമിചേന ച;
കതിനം ദുക്കടം ഹോതി, കതി ചീവരധാരണാ.
ദസ പുഗ്ഗലാ നാഭിവാദേതബ്ബാ, അഞ്ജലിസാമിചേന ച;
ദസന്നം ദുക്കടം ഹോതി, ദസ ചീവരധാരണാ.
കതിനം വസ്സംവുട്ഠാനം, ദാതബ്ബം ഇധ ചീവരം;
കതിനം ഭന്തേ ദാതബ്ബം, കതിനഞ്ചേവ ന ദാതബ്ബം.
പഞ്ചന്നം വസ്സംവുട്ഠാനം, ദാതബ്ബം ഇധ ചീവരം;
സത്തന്നം സന്തേ ദാതബ്ബം, സോളസന്നം ന ദാതബ്ബം.
കതിസതം രത്തിസതം, ആപത്തിയോ ഛാദയിത്വാന;
കതി രത്തിയോ വസിത്വാന, മുച്ചേയ്യ പാരിവാസികോ.
ദസസതം രത്തിസതം, ആപത്തിയോ ഛാദയിത്വാന;
ദസ രത്തിയോ വസിത്വാന, മുച്ചേയ്യ പാരിവാസികോ.
കതി കമ്മദോസാ വുത്താ, ബുദ്ധേനാദിച്ചബന്ധുനാ;
ചമ്പായം വിനയവത്ഥുസ്മിം, സബ്ബേവ അധമ്മികാ [സബ്ബേ അധമ്മികാ (സീ. സ്യാ.)] കതി.
ദ്വാദസ കമ്മദോസാ വുത്താ, ബുദ്ധേനാദിച്ചബന്ധുനാ;
ചമ്പായം വിനയവത്ഥുസ്മിം, സബ്ബേവ അധമ്മികാ [സബ്ബേവാധമ്മികാ (സീ.), സബ്ബേ അധമ്മികാ (സ്യാ.)] കതാ.
കതി കമ്മസമ്പത്തിയോ വുത്താ, ബുദ്ധേനാദിച്ചബന്ധുനാ;
ചമ്പായം വിനയവത്ഥുസ്മിം, സബ്ബേവ ധമ്മികാ കതി.
ചതസ്സോ കമ്മസമ്പത്തിയോ വുത്താ, ബുദ്ധേനാദിച്ചബന്ധുനാ;