൪. കഥിനാദിജാനിതബ്ബവിഭാഗോ

൪൧൨. കഥിനം ജാനിതബ്ബം, കഥിനത്ഥാരോ ജാനിതബ്ബോ, കഥിനസ്സ അത്ഥാരമാസോ ജാനിതബ്ബോ, കഥിനസ്സ അത്ഥാരവിപത്തി ജാനിതബ്ബാ, കഥിനസ്സ അത്ഥാരസമ്പത്തി ജാനിതബ്ബാ, നിമിത്തകമ്മം ജാനിതബ്ബം, പരികഥാ ജാനിതബ്ബാ, കുക്കുകതം ജാനിതബ്ബം, സന്നിധി ജാനിതബ്ബാ, നിസ്സഗ്ഗിയം ജാനിതബ്ബം.

കഥിനം ജാനിതബ്ബന്തി തേസഞ്ഞേവ ധമ്മാനം സങ്ഗഹോ സമവായോ നാമം നാമകമ്മം നാമധേയ്യം നിരുത്തി ബ്യഞ്ജനം അഭിലാപോ യദിദം കഥിനന്തി.

കഥിനസ്സ അത്ഥാരമാസോ ജാനിതബ്ബോതി വസ്സാനസ്സ പച്ഛിമോ മാസോ ജാനിതബ്ബോ.

കഥിനസ്സ അത്ഥാരവിപത്തി ജാനിതബ്ബാതി ചതുവീസതിയാ ആകാരേഹി കഥിനസ്സ അത്ഥാരവിപത്തി ജാനിതബ്ബാ.

കഥിനസ്സ അത്ഥാരസമ്പത്തി ജാനിതബ്ബാതി സത്തരസഹി ആകാരേഹി കഥിനസ്സ അത്ഥാരസമ്പത്തി ജാനിതബ്ബാ.

നിമിത്തകമ്മം ജാനിതബ്ബന്തി നിമിത്തം കരോതി ഇമിനാ ദുസ്സേന കഥിനം അത്ഥരിസ്സാമീതി.

പരികഥാ ജാനിതബ്ബാതി പരികഥം കരോതി ഇമായ പരികഥായ കഥിനദുസ്സം നിബ്ബത്തേസ്സാമീതി.

കുക്കുകതം ജാനിതബ്ബന്തി അനാദിയദാനം ജാനിതബ്ബം.

സന്നിധി ജാനിതബ്ബാതി ദ്വേ സന്നിധിയോ ജാനിതബ്ബാ – കരണസന്നിധി വാ നിചയസന്നിധി വാ.

നിസ്സഗ്ഗിയം ജാനിതബ്ബന്തി കരിയമാനേ അരുണം ഉട്ഠഹതി.

കഥിനത്ഥാരോ ജാനിതബ്ബോതി സചേ സങ്ഘസ്സ കഥിനദുസ്സം ഉപ്പന്നം ഹോതി, സങ്ഘേന കഥം പടിപജ്ജിതബ്ബം, അത്ഥാരകേന കഥം പടിപജ്ജിതബ്ബം, അനുമോദകേന കഥം പടിപജ്ജിതബ്ബം.

൪൧൩. സങ്ഘേന ഞത്തിദുതിയേന കമ്മേന കഥിനത്ഥാരകസ്സ ഭിക്ഖുനോ ദാതബ്ബം, തേന കഥിനത്ഥാരകേന ഭിക്ഖുനാ തദഹേവ ധോവിത്വാ വിമജ്ജിത്വാ വിചാരേത്വാ ഛിന്ദിത്വാ സിബ്ബേത്വാ രജിത്വാ കപ്പം കത്വാ കഥിനം അത്ഥരിതബ്ബം. സചേ സങ്ഘാടിയാ കഥിനം അത്ഥരിതുകാമോ ഹോതി, പോരാണികാ സങ്ഘാടി പച്ചുദ്ധരിതബ്ബാ, നവാ സങ്ഘാടി അധിട്ഠാതബ്ബാ. ഇമായ സങ്ഘാടിയാ കഥിനം അത്ഥരാമീതി വാചാ ഭിന്ദിതബ്ബാ. സചേ ഉത്തരാസങ്ഗേന കഥിനം അത്ഥരിതുകാമോ ഹോതി, പോരാണകോ ഉത്തരാസങ്ഗോ പച്ചുദ്ധരിതബ്ബോ, നവോ ഉത്തരാസങ്ഗോ അധിട്ഠാതബ്ബോ. ഇമിനാ ഉത്തരാസങ്ഗേന കഥിനം അത്ഥരാമീതി വാചാ ഭിന്ദിതബ്ബാ. സചേ അന്തരവാസകേന കഥിനം അത്ഥരിതുകാമോ ഹോതി, പോരാണകോ അന്തരവാസകോ പച്ചുദ്ധരിതബ്ബോ, നവോ അന്തരവാസകോ അധിട്ഠാതബ്ബോ. ഇമിനാ അന്തരവാസകേന കഥിനം അത്ഥരാമീതി വാചാ ഭിന്ദിതബ്ബാ. തേന കഥിനത്ഥാരകേന ഭിക്ഖുനാ സങ്ഘം ഉപസങ്കമിത്വാ ഏകംസം ഉത്തരാസങ്ഗം കരിത്വാ അഞ്ജലിം പഗ്ഗഹേത്വാ ഏവമസ്സ വചനീയോ – ‘‘അത്ഥതം, ഭന്തേ, സങ്ഘസ്സ കഥിനം, ധമ്മികോ കഥിനത്ഥാരോ, അനുമോദഥാ’’തി. തേഹി അനുമോദകേഹി ഭിക്ഖൂഹി ഏകംസം ഉത്തരാസങ്ഗം കരിത്വാ അഞ്ജലിം പഗ്ഗഹേത്വാ ഏവമസ്സ വചനീയോ – ‘‘അത്ഥതം, ആവുസോ, സങ്ഘസ്സ കഥിനം, ധമ്മികോ കഥിനത്ഥാരോ, അനുമോദാമാ’’തി. തേന കഥിനത്ഥാരകേന ഭിക്ഖുനാ സമ്ബഹുലേ ഭിക്ഖൂ ഉപസങ്കമിത്വാ ഏകംസം ഉത്തരാസങ്ഗം കരിത്വാ അഞ്ജലിം പഗ്ഗഹേത്വാ ഏവമസ്സു വചനീയാ – ‘‘അത്ഥതം, ഭന്തേ, സങ്ഘസ്സ കഥിനം, ധമ്മികോ കഥിനത്ഥാരോ, അനുമോദഥാ’’തി. തേഹി അനുമോദകേഹി ഭിക്ഖൂഹി ഏകംസം ഉത്തരാസങ്ഗം കരിത്വാ അഞ്ജലിം പഗ്ഗഹേത്വാ ഏവമസ്സ വചനീയോ – ‘‘അത്ഥതം, ആവുസോ, സങ്ഘസ്സ കഥിനം, ധമ്മികോ കഥിനത്ഥാരോ അനുമോദാമാ’’തി. തേന കഥിനത്ഥാരകേന ഭിക്ഖുനാ ഏകം ഭിക്ഖും ഉപസങ്കമിത്വാ ഏകംസം ഉത്തരാസങ്ഗം കരിത്വാ അഞ്ജലിം പഗ്ഗഹേത്വാ ഏവമസ്സ വചനീയോ – ‘‘അത്ഥതം, ആവുസോ, സങ്ഘസ്സ കഥിനം, ധമ്മികോ കഥിനത്ഥാരോ, അനുമോദാഹീ’’തി. തേന അനുമോദകേന ഭിക്ഖുനാ ഏകംസം ഉത്തരാസങ്ഗം കരിത്വാ അഞ്ജലിം പഗ്ഗഹേത്വാ ഏവമസ്സ വചനീയോ – ‘‘അത്ഥതം, ആവുസോ, സങ്ഘസ്സ കഥിനം, ധമ്മികോ കഥിനത്ഥാരോ, അനുമോദാമീ’’തി.