ചൂളസങ്ഗാമോ

൧. അനുവിജ്ജകസ്സപടിപത്തി

൩൬൫. [പരി. ൪൨൧] സങ്ഗാമാവചരേ ഭിക്ഖുനാ സങ്ഘം ഉപസങ്കമന്തേന നീചചിത്തേന സങ്ഘോ ഉപസങ്കമിതബ്ബോ രജോഹരണസമേന ചിത്തേന; ആസനകുസലേന ഭവിതബ്ബം നിസജ്ജകുസലേന; ഥേരേ ഭിക്ഖൂ അനുപഖജ്ജന്തേന, നവേ ഭിക്ഖൂ ആസനേന അപ്പടിബാഹന്തേന, യഥാപതിരൂപേ ആസനേ നിസീദിതബ്ബം; അനാനാകഥികേന ഭവിതബ്ബം അതിരച്ഛാനകഥികേന; സാമം വാ ധമ്മോ ഭാസിതബ്ബോ പരോ വാ അജ്ഝേസിതബ്ബോ അരിയോ വാ തുണ്ഹീഭാവോ നാതിമഞ്ഞിതബ്ബോ.

സങ്ഘേന അനുമതേന പുഗ്ഗലേന അനുവിജ്ജകേന അനുവിജ്ജിതുകാമേന ന ഉപജ്ഝായോ പുച്ഛിതബ്ബോ, ന ആചരിയോ പുച്ഛിതബ്ബോ, ന സദ്ധിവിഹാരികോ പുച്ഛിതബ്ബോ, ന അന്തേവാസികോ പുച്ഛിതബ്ബോ, ന സമാനുപജ്ഝായകോ പുച്ഛിതബ്ബോ, ന സമാനാചരിയകോ പുച്ഛിതബ്ബോ, ന ജാതി പുച്ഛിതബ്ബാ, ന നാമം പുച്ഛിതബ്ബം, ന ഗോത്തം പുച്ഛിതബ്ബം, ന ആഗമോ പുച്ഛിതബ്ബോ, ന കുലപദേസോ പുച്ഛിതബ്ബോ, ന ജാതിഭൂമി പുച്ഛിതബ്ബാ. തം കിം കാരണാ? അത്രസ്സ പേമം വാ ദോസോ വാ. പേമേ വാ സതി ദോസേ വാ, ഛന്ദാപി ഗച്ഛേയ്യ ദോസാപി ഗച്ഛേയ്യ മോഹാപി ഗച്ഛേയ്യ ഭയാപി ഗച്ഛേയ്യ.

സങ്ഘേന അനുമതേന പുഗ്ഗലേന അനുവിജ്ജകേന അനുവിജ്ജിതുകാമേന സങ്ഘഗരുകേന ഭവിതബ്ബം നോ പുഗ്ഗലഗരുകേന, സദ്ധമ്മഗരുകേന ഭവിതബ്ബം നോ ആമിസഗരുകേന, അത്ഥവസികേന ഭവിതബ്ബം നോ പരിസകപ്പികേന, കാലേന അനുവിജ്ജിതബ്ബം നോ അകാലേന, ഭൂതേന അനുവിജ്ജിതബ്ബം നോ അഭൂതേന, സണ്ഹേന അനുവിജ്ജിതബ്ബം നോ ഫരുസേന, അത്ഥസംഹിതേന അനുവിജ്ജിതബ്ബം നോ അനത്ഥസംഹിതേന, മേത്താചിത്തേന അനുവിജ്ജിതബ്ബം നോ ദോസന്തരേന, ന ഉപകണ്ണകജപ്പിനാ ഭവിതബ്ബം, ന ജിമ്ഹം പേക്ഖിതബ്ബം, ന അക്ഖി നിഖണിതബ്ബം, ന ഭമുകം ഉക്ഖിപിതബ്ബം, ന സീസം ഉക്ഖിപിതബ്ബം, ന ഹത്ഥവികാരോ കാതബ്ബോ, ന ഹത്ഥമുദ്ദാ ദസ്സേതബ്ബാ.

ആസനകുസലേന ഭവിതബ്ബം നിസജ്ജകുസലേന, യുഗമത്തം പേക്ഖന്തേന അത്ഥം അനുവിധിയന്തേന സകേ ആസനേ നിസീദിതബ്ബം, ന ച ആസനാ വുട്ഠാതബ്ബം, ന വീതിഹാതബ്ബം, ന കുമ്മഗ്ഗോ സേവിതബ്ബോ, ന ബാഹാവിക്ഖേപകം [ന വാചാ വിക്ഖേപകം (സ്യാ.)] ഭണിതബ്ബം, അതുരിതേന ഭവിതബ്ബം അസാഹസികേന, അചണ്ഡികതേന ഭവിതബ്ബം വചനക്ഖമേ, മേത്താചിത്തേന ഭവിതബ്ബം ഹിതാനുകമ്പിനാ, കാരുണികേന ഭവിതബ്ബം ഹിതപരിസക്കിനാ, അസമ്ഫപ്പലാപിനാ ഭവിതബ്ബം പരിയന്തഭാണിനാ, അവേരവസികേന ഭവിതബ്ബം അനസുരുത്തേന, അത്താ പരിഗ്ഗഹേതബ്ബോ, പരോ പരിഗ്ഗഹേതബ്ബോ, ചോദകോ പരിഗ്ഗഹേതബ്ബോ, ചുദിതകോ പരിഗ്ഗഹേതബ്ബോ, അധമ്മചോദകോ പരിഗ്ഗഹേതബ്ബോ, അധമ്മചുദിതകോ പരിഗ്ഗഹേതബ്ബോ, ധമ്മചോദകോ പരിഗ്ഗഹേതബ്ബോ, ധമ്മചുദിതകോ പരിഗ്ഗഹേതബ്ബോ, വുത്തം അഹാപേന്തേന അവുത്തം അപകാസേന്തേന ഓതിണ്ണാനി പദബ്യഞ്ജനാനി സാധുകം പരിഗ്ഗഹേത്വാ പരോ പടിപുച്ഛിത്വാ യഥാ പടിഞ്ഞായ കാരേതബ്ബോ, മന്ദോ ഹാസേതബ്ബോ [വേപോ പഹാസേതബ്ബോ (സ്യാ.)], ഭീരൂ അസ്സാസേതബ്ബോ, ചണ്ഡോ നിസേധേതബ്ബോ, അസുചി വിഭാവേതബ്ബോ, ഉജുമദ്ദവേന ന ഛന്ദാഗതിം ഗന്തബ്ബം, ന ദോസാഗതിം ഗന്തബ്ബം, ന മോഹാഗതിം ഗന്തബ്ബം, ന ഭയാഗതിം ഗന്തബ്ബം, മജ്ഝത്തേന ഭവിതബ്ബം ധമ്മേസു ച പുഗ്ഗലേസു ച. ഏവഞ്ച പന അനുവിജ്ജകോ അനുവിജ്ജമാനോ സത്ഥു ചേവ സാസനകരോ ഹോതി, വിഞ്ഞൂനഞ്ച സബ്രഹ്മചാരീനം പിയോ ച ഹോതി മനാപോ ച ഗരു ച ഭാവനീയോ ച.

൩൬൬. സുത്തം സംസന്ദനത്ഥായ, ഓപമ്മം നിദസ്സനത്ഥായ, അത്ഥോ വിഞ്ഞാപനത്ഥായ, പടിപുച്ഛാ ഠപനത്ഥായ, ഓകാസകമ്മം ചോദനത്ഥായ, ചോദനാ സാരണത്ഥായ, സാരണാ സവചനീയത്ഥായ, സവചനീയം പലിബോധത്ഥായ, പലിബോധോ വിനിച്ഛയത്ഥായ, വിനിച്ഛയോ സന്തീരണത്ഥായ, സന്തീരണം ഠാനാഠാനഗമനത്ഥായ, ഠാനാഠാനഗമനം ദുമ്മങ്കൂനം പുഗ്ഗലാനം നിഗ്ഗഹത്ഥായ, പേസലാനം ഭിക്ഖൂനം സമ്പഗ്ഗഹത്ഥായ, സങ്ഘോ സമ്പരിഗ്ഗഹസമ്പടിച്ഛനത്ഥായ, സങ്ഘേന അനുമതാ പുഗ്ഗലാ പച്ചേകട്ഠായിനോ അവിസംവാദകട്ഠായിനോ.

വിനയോ സംവരത്ഥായ, സംവരോ അവിപ്പടിസാരത്ഥായ, അവിപ്പടിസാരോ പാമുജ്ജത്ഥായ, പാമുജ്ജം പീതത്ഥായ, പീതി പസ്സദ്ധത്ഥായ, പസ്സദ്ധി സുഖത്ഥായ, സുഖം സമാധത്ഥായ, സമാധി യഥാഭൂതഞാണദസ്സനത്ഥായ, യഥാഭൂതഞാണദസ്സനം നിബ്ബിദത്ഥായ, നിബ്ബിദാ വിരാഗത്ഥായ, വിരാഗോ വിമുത്തത്ഥായ, വിമുത്തി വിമുത്തിഞാണദസ്സനത്ഥായ, വിമുത്തിഞാണദസ്സനം അനുപാദാപരിനിബ്ബാനത്ഥായ. ഏതദത്ഥാ കഥാ, ഏതദത്ഥാ മന്തനാ, ഏതദത്ഥാ ഉപനിസാ, ഏതദത്ഥം സോതാവധാനം – യദിദം അനുപാദാചിത്തസ്സ വിമോക്ഖോതി.

൩൬൭. അനുയോഗവത്തം നിസാമയ, കുസലേന ബുദ്ധിമതാ കതം;

സുവുത്തം സിക്ഖാപദാനുലോമികം, ഗതിം ന നാസേന്തോ സമ്പരായികം.

വത്ഥും വിപത്തിം ആപത്തിം, നിദാനം ആകാരഅകോവിദോ;

പുബ്ബാപരം ന ജാനാതി, കതാകതം സമേന ച.

കമ്മഞ്ച അധികരണഞ്ച, സമഥേ ചാപി അകോവിദോ;

രത്തോ ദുട്ഠോ ച മൂള്ഹോ ച, ഭയാ മോഹാ ച ഗച്ഛതി.

ന ച സഞ്ഞത്തികുസലോ, നിജ്ഝത്തിയാ ച അകോവിദോ;

ലദ്ധപക്ഖോ അഹിരികോ, കണ്ഹകമ്മോ അനാദരോ;

സ വേ [സചേ (ക.)] താദിസകോ ഭിക്ഖു, അപ്പടിക്ഖോതി വുച്ചതി.

വത്ഥും വിപത്തിം ആപത്തിം, നിദാനം ആകാരകോവിദോ;

പുബ്ബാപരഞ്ച ജാനാതി, കതാകതം സമേന ച.

കമ്മഞ്ച അധികരണഞ്ച, സമഥേ ചാപി കോവിദോ;

അരത്തോ അദുട്ഠോ അമൂള്ഹോ, ഭയാ മോഹാ ന ഗച്ഛതി.

സഞ്ഞത്തിയാ ച കുസലോ, നിജ്ഝത്തിയാ ച കോവിദോ;

ലദ്ധപക്ഖോ ഹിരിമനോ, സുക്കകമ്മോ സഗാരവോ;

സ വേ താദിസകോ ഭിക്ഖു, സപ്പടിക്ഖോതി വുച്ചതീതി.

ചൂളസങ്ഗാമോ നിട്ഠിതോ.