൮. സമുച്ചയവാരോ

൨൪൬. അവസ്സുതാ ഭിക്ഖുനീ അവസ്സുതസ്സ പുരിസപുഗ്ഗലസ്സ കായസംസഗ്ഗം സാദിയന്തീ കതി ആപത്തിയോ ആപജ്ജതി? അവസ്സുതാ ഭിക്ഖുനീ അവസ്സുതസ്സ പുരിസപുഗ്ഗലസ്സ കായസംസഗ്ഗം സാദിയന്തീ തിസ്സോ ആപത്തിയോ ആപജ്ജതി. അധക്ഖകം ഉബ്ഭജാണുമണ്ഡലം ഗഹണം സാദിയതി, ആപത്തി പാരാജികസ്സ; ഉബ്ഭക്ഖകം അധോജാണുമണ്ഡലം ഗഹണം സാദിയതി, ആപത്തി ഥുല്ലച്ചയസ്സ; കായപടിബദ്ധം ഗഹണം സാദിയതി, ആപത്തി ദുക്കടസ്സ – അവസ്സുതാ ഭിക്ഖുനീ അവസ്സുതസ്സ പുരിസപുഗ്ഗലസ്സ കായസംസഗ്ഗം സാദിയന്തീ ഇമാ തിസ്സോ ആപത്തിയോ ആപജ്ജതി.

താ ആപത്തിയോ ചതുന്നം വിപത്തീനം കതി വിപത്തിയോ ഭജന്തി? സത്തന്നം ആപത്തിക്ഖന്ധാനം കതിഹി ആപത്തിക്ഖന്ധേഹി സങ്ഗഹിതാ? ഛന്നം ആപത്തിസമുട്ഠാനാനം കതിഹി സമുട്ഠാനേഹി സമുട്ഠന്തി? ചതുന്നം അധികരണാനം കതമം അധികരണം? സത്തന്നം സമഥാനം കതിഹി സമഥേഹി സമ്മന്തി? താ ആപത്തിയോ ചതുന്നം വിപത്തീനം ദ്വേ വിപത്തിയോ ഭജന്തി – സിയാ സീലവിപത്തിം, സിയാ ആചാരവിപത്തിം. സത്തന്നം ആപത്തിക്ഖന്ധാനം തീഹി ആപത്തിക്ഖന്ധേഹി സങ്ഗഹിതാ – സിയാ പാരാജികാപത്തിക്ഖന്ധേന, സിയാ ഥുല്ലച്ചയാപത്തിക്ഖന്ധേന, സിയാ ദുക്കടാപത്തിക്ഖന്ധേന. ഛന്നം ആപത്തിസമുട്ഠാനാനം ഏകേന സമുട്ഠാനേന സമുട്ഠന്തി – കായതോ ച ചിത്തതോ ച സമുട്ഠന്തി, ന വാചതോ. ചതുന്നം അധികരണാനം ആപത്താധികരണം. സത്തന്നം സമഥാനം തീഹി സമഥേഹി സമ്മന്തി – സിയാ സമ്മുഖാവിനയേന ച പടിഞ്ഞാതകരണേന ച, സിയാ സമ്മുഖാവിനയേന ച തിണവത്ഥാരകേന ച…പേ….

ദധിം വിഞ്ഞാപേത്വാ ഭുഞ്ജന്തീ കതി ആപത്തിയോ ആപജ്ജതി? ദധിം വിഞ്ഞാപേത്വാ ഭുഞ്ജന്തീ ദ്വേ ആപത്തിയോ ആപജ്ജതി. ഭുഞ്ജിസ്സാമീതി പടിഗ്ഗണ്ഹാതി, ആപത്തി ദുക്കടസ്സ; അജ്ഝോഹാരേ അജ്ഝോഹാരേ ആപത്തി പാടിദേസനീയസ്സ – ദധിം വിഞ്ഞാപേത്വാ ഭുഞ്ജന്തീ ഇമാ ദ്വേ ആപത്തിയോ ആപജ്ജതി.

താ ആപത്തിയോ ചതുന്നം വിപത്തീനം കതി വിപത്തിയോ ഭജന്തി? സത്തന്നം ആപത്തിക്ഖന്ധാനം കതിഹി ആപത്തിക്ഖന്ധേഹി സങ്ഗഹിതാ? ഛന്നം ആപത്തിസമുട്ഠാനാനം കതിഹി സമുട്ഠാനേഹി സമുട്ഠന്തി? ചതുന്നം അധികരണാനം കതമം അധികരണം? സത്തന്നം സമഥാനം കതിഹി സമഥേഹി സമ്മന്തി? താ ആപത്തിയോ ചതുന്നം വിപത്തീനം ഏകം വിപത്തിം ഭജന്തി – ആചാരവിപത്തിം. സത്തന്നം ആപത്തിക്ഖന്ധാനം ദ്വീഹി ആപത്തിക്ഖന്ധേഹി സങ്ഗഹിതാ – സിയാ പാടിദേസനീയാപത്തിക്ഖന്ധേന, സിയാ ദുക്കടാപത്തിക്ഖന്ധേന. ഛന്നം ആപത്തിസമുട്ഠാനാനം ചതൂഹി സമുട്ഠാനേഹി സമുട്ഠന്തി – സിയാ കായതോ സമുട്ഠന്തി ന വാചതോ ന ചിത്തതോ, സിയാ കായതോ ച വാചതോ ച സമുട്ഠന്തി ന ചിത്തതോ, സിയാ കായതോ ച ചിത്തതോ ച സമുട്ഠന്തി ന വാചതോ, സിയാ കായതോ ച വാചതോ ച ചിത്തതോ ച സമുട്ഠന്തി. ചതുന്നം അധികരണാനം – ആപത്താധികരണം. സത്തന്നം സമഥാനം തീഹി സമഥേഹി സമ്മന്തി – സിയാ സമ്മുഖാവിനയേന ച പടിഞ്ഞാതകരണേന ച, സിയാ സമ്മുഖാവിനയേന ച തിണവത്ഥാരകേന ച.

സമുച്ചയവാരോ നിട്ഠിതോ അട്ഠമോ.