൧. പാരാജികകണ്ഡം

൨൨൮. അവസ്സുതാ ഭിക്ഖുനീ അവസ്സുതസ്സ പുരിസപുഗ്ഗലസ്സ കായസംസഗ്ഗം സാദിയന്തീ കതി ആപത്തിയോ ആപജ്ജതി? അവസ്സുതാ ഭിക്ഖുനീ അവസ്സുതസ്സ പുരിസപുഗ്ഗലസ്സ കായസംസഗ്ഗം സാദിയന്തീ തിസ്സോ ആപത്തിയോ ആപജ്ജതി. അധക്ഖകം ഉബ്ഭജാണുമണ്ഡലം ഗഹണം സാദിയതി, ആപത്തി പാരാജികസ്സ; ഉബ്ഭക്ഖകം അധോജാണുമണ്ഡലം ഗഹണം സാദിയതി, ആപത്തി ഥുല്ലച്ചയസ്സ; കായപടിബദ്ധം ഗഹണം സാദിയതി, ആപത്തി ദുക്കടസ്സ – അവസ്സുതാ ഭിക്ഖുനീ അവസ്സുതസ്സ പുരിസപുഗ്ഗലസ്സ കായസംസഗ്ഗം സാദിയന്തീ ഇമാ തിസ്സോ ആപത്തിയോ ആപജ്ജതി.

വജ്ജപ്പടിച്ഛാദികാ ഭിക്ഖുനീ വജ്ജം പടിച്ഛാദേന്തീ കതി ആപത്തിയോ ആപജ്ജതി? വജ്ജപ്പടിച്ഛാദികാ ഭിക്ഖുനീ വജ്ജം പടിച്ഛാദേന്തീ തിസ്സോ ആപത്തിയോ ആപജ്ജതി. ജാനം പാരാജികം ധമ്മം പടിച്ഛാദേതി, ആപത്തി പാരാജികസ്സ; വേമതികാ പടിച്ഛാദേതി, ആപത്തി ഥുല്ലച്ചയസ്സ; ആചാരവിപത്തിം പടിച്ഛാദേതി, ആപത്തി ദുക്കടസ്സ – വജ്ജപ്പടിച്ഛാദികാ ഭിക്ഖുനീ വജ്ജം പടിച്ഛാദേന്തീ ഇമാ തിസ്സോ ആപത്തിയോ ആപജ്ജതി.

ഉക്ഖിത്താനുവത്തികാ ഭിക്ഖുനീ യാവതതിയം സമനുഭാസനായ ന പടിനിസ്സജ്ജന്തീ കതി ആപത്തിയോ ആപജ്ജതി? ഉക്ഖിത്താനുവത്തികാ ഭിക്ഖുനീ യാവതതിയം സമനുഭാസനായ ന പടിനിസ്സജ്ജന്തീ തിസ്സോ ആപത്തിയോ ആപജ്ജതി. ഞത്തിയാ ദുക്കടം; ദ്വീഹി കമ്മവാചാഹി ഥുല്ലച്ചയാ; കമ്മവാചാപരിയോസാനേ ആപത്തി പാരാജികസ്സ – ഉക്ഖിത്താനുവത്തികാ ഭിക്ഖുനീ യാവതതിയം സമനുഭാസനായ ന പടിനിസ്സജ്ജന്തീ ഇമാ തിസ്സോ ആപത്തിയോ ആപജ്ജതി.

അട്ഠമം വത്ഥും പരിപൂരേന്തീ കതി ആപത്തിയോ ആപജ്ജതി? അട്ഠമം വത്ഥും പരിപൂരേന്തീ തിസ്സോ ആപത്തിയോ ആപജ്ജതി. പുരിസേന – ‘‘ഇത്ഥന്നാമം ഓകാസം [ഇത്ഥന്നാമം ഗഹനം (സീ.), ഇത്ഥന്നാമം ഗബ്ഭം (സ്യാ.)] ആഗച്ഛാ’’തി വുത്താ ഗച്ഛതി, ആപത്തി ദുക്കടസ്സ; പുരിസസ്സ ഹത്ഥപാസം ഓക്കന്തമത്തേ ആപത്തി ഥുല്ലച്ചയസ്സ; അട്ഠമം വത്ഥും പരിപൂരേതി, ആപത്തി പാരാജികസ്സ – അട്ഠമം വത്ഥും പരിപൂരേന്തീ ഇമാ തിസ്സോ ആപത്തിയോ ആപജ്ജതി.

പാരാജികാ നിട്ഠിതാ.