൯. ഛത്തുപാഹനവഗ്ഗോ

൨൨൬. ഛത്തുപാഹനം ധാരേന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ഛബ്ബഗ്ഗിയാ ഭിക്ഖുനിയോ ആരബ്ഭ. കിസ്മിം വത്ഥുസ്മിന്തി? ഛബ്ബഗ്ഗിയാ ഭിക്ഖുനിയോ ഛത്തുപാഹനം ധാരേസും, തസ്മിം വത്ഥുസ്മിം. ഏകാ പഞ്ഞത്തി, ഏകാ അനുപഞ്ഞത്തി. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി – ഏളകലോമകേ…പേ….

യാനേന യായന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ഛബ്ബഗ്ഗിയാ ഭിക്ഖുനിയോ ആരബ്ഭ. കിസ്മിം വത്ഥുസ്മിന്തി? ഛബ്ബഗ്ഗിയാ ഭിക്ഖുനിയോ യാനേന യായിംസു, തസ്മിം വത്ഥുസ്മിം. ഏകാ പഞ്ഞത്തി, ഏകാ അനുപഞ്ഞത്തി. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി – ഏളകലോമകേ…പേ….

സങ്ഘാണിം ധാരേന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? അഞ്ഞതരം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? അഞ്ഞതരാ ഭിക്ഖുനീ സങ്ഘാണിം ധാരേസി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി – ഏളകലോമകേ…പേ….

ഇത്ഥാലങ്കാരം ധാരേന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ഛബ്ബഗ്ഗിയാ ഭിക്ഖുനിയോ ആരബ്ഭ. കിസ്മിം വത്ഥുസ്മിന്തി? ഛബ്ബഗ്ഗിയാ ഭിക്ഖുനിയോ ഇത്ഥാലങ്കാരം ധാരേസും, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി – ഏളകലോമകേ…പേ….

ഗന്ധവണ്ണകേന നഹായന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ഛബ്ബഗ്ഗിയാ ഭിക്ഖുനിയോ ആരബ്ഭ. കിസ്മിം വത്ഥുസ്മിന്തി? ഛബ്ബഗ്ഗിയാ ഭിക്ഖുനിയോ ഗന്ധവണ്ണകേന നഹായിംസു, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി – ഏളകലോമകേ…പേ….

വാസിതകേന പിഞ്ഞാകേന നഹായന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ഛബ്ബഗ്ഗിയാ ഭിക്ഖുനിയോ ആരബ്ഭ. കിസ്മിം വത്ഥുസ്മിന്തി? ഛബ്ബഗ്ഗിയാ ഭിക്ഖുനിയോ വാസിതകേന പിഞ്ഞാകേന നഹായിംസു, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി – ഏളകലോമകേ…പേ….

ഭിക്ഖുനിയാ ഉമ്മദ്ദാപേന്തിയാ പരിമദ്ദാപേന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? സമ്ബഹുലാ ഭിക്ഖുനിയോ ആരബ്ഭ. കിസ്മിം വത്ഥുസ്മിന്തി? സമ്ബഹുലാ ഭിക്ഖുനിയോ ഭിക്ഖുനിയാ ഉമ്മദ്ദാപേസും പരിമദ്ദാപേസും, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി – ഏളകലോമകേ…പേ….

സിക്ഖമാനാ ഉമ്മദ്ദാപേന്തിയാ പരിമദ്ദാപേന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? സമ്ബഹുലാ ഭിക്ഖുനിയോ ആരബ്ഭ. കിസ്മിം വത്ഥുസ്മിന്തി? സമ്ബഹുലാ ഭിക്ഖുനിയോ സിക്ഖമാനായ ഉമ്മദ്ദാപേസും പരിമദ്ദാപേസും, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി – ഏളകലോമകേ…പേ….

സാമണേരിയാ ഉമ്മദ്ദാപേന്തിയാ പരിമദ്ദാപേന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? സമ്ബഹുലാ ഭിക്ഖുനിയോ ആരബ്ഭ. കിസ്മിം വത്ഥുസ്മിന്തി? സമ്ബഹുലാ ഭിക്ഖുനിയോ സാമണേരിയാ ഉമ്മദ്ദാപേസും പരിമദ്ദാപേസും, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി – ഏളകലോമകേ…പേ….

ഗിഹിനിയാ ഉമ്മദ്ദാപേന്തിയാ പരിമദ്ദാപേന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? സമ്ബഹുലാ ഭിക്ഖുനിയോ ആരബ്ഭ. കിസ്മിം വത്ഥുസ്മിന്തി? സമ്ബഹുലാ ഭിക്ഖുനിയോ ഗിഹിനിയാ ഉമ്മദ്ദാപേസും പരിമദ്ദാപേസും, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി – ഏളകലോമകേ…പേ….

ഭിക്ഖുസ്സ പുരതോ അനാപുച്ഛാ ആസനേ നിസീദന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? സമ്ബഹുലാ ഭിക്ഖുനിയോ ആരബ്ഭ. കിസ്മിം വത്ഥുസ്മിന്തി? സമ്ബഹുലാ ഭിക്ഖുനിയോ ഭിക്ഖുസ്സ പുരതോ അനാപുച്ഛാ ആസനേ നിസീദിംസു, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി – കഥിനകേ…പേ….

അനോകാസകതം ഭിക്ഖും പഞ്ഹം പുച്ഛന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? സമ്ബഹുലാ ഭിക്ഖുനിയോ ആരബ്ഭ. കിസ്മിം വത്ഥുസ്മിന്തി? സമ്ബഹുലാ ഭിക്ഖുനിയോ അനോകാസകതം ഭിക്ഖും പഞ്ഹം പുച്ഛിംസു, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി – പദസോധമ്മേ…പേ….

അസങ്കച്ചികായ [അസങ്കച്ഛികായ (സ്യാ.)] ഗാമം പവിസന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? അഞ്ഞതരം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? അഞ്ഞതരാ ഭിക്ഖുനീ അസങ്കച്ചികാ ഗാമം പാവിസി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി – സിയാ കായതോ സമുട്ഠാതി, ന വാചതോ ന ചിത്തതോ; സിയാ കായതോ ച ചിത്തതോ ച സമുട്ഠാതി, ന വാചതോ…പേ….

ഛത്തുപാഹനവഗ്ഗോ നവമോ.

നവവഗ്ഗഖുദ്ദകാ നിട്ഠിതാ.

തസ്സുദ്ദാനം –

ലസുണം സംഹരേ ലോമം, തലമട്ഠഞ്ച സുദ്ധികം;

ഭുഞ്ജന്താമകധഞ്ഞാനം, ദ്വേ വിഘാസേന ദസ്സനാ.

അന്ധകാരേ പടിച്ഛന്നേ, അജ്ഝോകാസേ രഥികായ ച;

പുരേ പച്ഛാ വികാലേ ച, ദുഗ്ഗഹി നിരയേ വധി.

നഗ്ഗോദകാ വിസിബ്ബേത്വാ, പഞ്ചാഹികം സങ്കമനീയം;

ഗണം വിഭങ്ഗസമണം, ദുബ്ബലം കഥിനേന ച.

ഏകമഞ്ചത്ഥരണേന, സഞ്ചിച്ച സഹജീവിനീ;

ദത്വാ സംസട്ഠഅന്തോ ച, തിരോവസ്സം ന പക്കമേ.

രാജാ ആസന്ദി സുത്തഞ്ച, ഗിഹി വൂപസമേന ച;

ദദേ ചീവരാവസഥം, പരിയാപുണഞ്ച വാചയേ.

ആരാമക്കോസചണ്ഡീ ച, ഭുഞ്ജേയ്യ കുലമച്ഛരീ;

വാസേ പവാരണോവാദം, ദ്വേ ധമ്മാ പസാഖേന ച.

ഗബ്ഭീ പായന്തീ ഛ ധമ്മേ, അസമ്മതൂനദ്വാദസ;

പരിപുണ്ണഞ്ച സങ്ഘേന, സഹ വുട്ഠാ ഛ പഞ്ച ച.

കുമാരീ ദ്വേ ച സങ്ഘേന, ദ്വാദസ സമ്മതേന ച;

അലം സചേ ച ദ്വേവസ്സം, സംസട്ഠാ സാമികേന ച.

പാരിവാസികാനുവസ്സം, ദുവേ വുട്ഠാപനേന ച;

ഛത്തയാനേന സങ്ഘാണി, ഇത്ഥാലങ്കാരവണ്ണകേ.

പിഞ്ഞാകഭിക്ഖുനീ ചേവ, സിക്ഖാ ച സാമണേരികാ;

ഗിഹി ഭിക്ഖുസ്സ പുരതോ, അനോകാസം സങ്കച്ചികാതി.

തേസം വഗ്ഗാനം ഉദ്ദാനം –

ലസുണന്ധകാരാ ന്ഹാനാ, തുവട്ടാ ചിത്തഗാരകാ;

ആരാമം ഗബ്ഭിനീ ചേവ, കുമാരീ ഛത്തുപാഹനാതി.