൧. കത്ഥപഞ്ഞത്തിവാരോ

൧. പാരാജികകണ്ഡം

൨൦൧. യം തേന ഭഗവതാ ജാനതാ പസ്സതാ അരഹതാ സമ്മാസമ്ബുദ്ധേന ഭിക്ഖുനീനം പഞ്ചമം പാരാജികം കത്ഥ പഞ്ഞത്തം? കം ആരബ്ഭ? കിസ്മിം വത്ഥുസ്മിം? അത്ഥി തത്ഥ പഞ്ഞത്തി, അനുപഞ്ഞത്തി, അനുപ്പന്നപഞ്ഞത്തി? സബ്ബത്ഥപഞ്ഞത്തി, പദേസപഞ്ഞത്തി? സാധാരണപഞ്ഞത്തി, അസാധാരണപഞ്ഞത്തി? ഏകതോപഞ്ഞത്തി, ഉഭതോപഞ്ഞത്തി? ചതുന്നം പാതിമോക്ഖുദ്ദേസാനം കത്ഥോഗധം കത്ഥ പരിയാപന്നം? കതമേന ഉദ്ദേസേന ഉദ്ദേസം ആഗച്ഛതി? ചതുന്നം വിപത്തീനം കതമാ വിപത്തി? സത്തന്നം ആപത്തിക്ഖന്ധാനം കതമോ ആപത്തിക്ഖന്ധോ? ഛന്നം ആപത്തിസമുട്ഠാനാനം കതിഹി സമുട്ഠാനേഹി സമുട്ഠാതി? ചതുന്നം അധികരണാനം കതമം അധികരണം? സത്തന്നം സമഥാനം കതിഹി സമഥേഹി സമ്മതി? കോ തത്ഥ വിനയോ? കോ തത്ഥ അഭിവിനയോ? കിം തത്ഥ പാതിമോക്ഖം? കിം തത്ഥ അധിപാതിമോക്ഖം? കാ വിപത്തി? കാ സമ്പത്തി? കാ പടിപത്തി? കതി അത്ഥവസേ പടിച്ച ഭഗവതാ ഭിക്ഖുനീനം പഞ്ചമം പാരാജികം പഞ്ഞത്തം? കാ സിക്ഖന്തി? കാ സിക്ഖിതസിക്ഖാ? കത്ഥ ഠിതം? കാ ധാരേന്തി? കസ്സ വചനം? കേനാഭതന്തി?

൨൦൨. യം തേന ഭഗവതാ ജാനതാ പസ്സതാ അരഹതാ സമ്മാസമ്ബുദ്ധേന ഭിക്ഖുനീനം പഞ്ചമം പാരാജികം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? സുന്ദരീനന്ദം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? സുന്ദരീനന്ദാ ഭിക്ഖുനീ അവസ്സുതാ അവസ്സുതസ്സ പുരിസപുഗ്ഗലസ്സ കായസംസഗ്ഗം സാദിയി, തസ്മിം വത്ഥുസ്മിം. അത്ഥി തത്ഥ പഞ്ഞത്തി അനുപഞ്ഞത്തി അനുപ്പന്നപഞ്ഞത്തീതി? ഏകാ പഞ്ഞത്തി. അനുപഞ്ഞത്തി അനുപ്പന്നപഞ്ഞത്തി തസ്മിം നത്ഥി. സബ്ബത്ഥപഞ്ഞത്തി, പദേസപഞ്ഞത്തീതി? സബ്ബത്ഥപഞ്ഞത്തി. സാധാരണപഞ്ഞത്തി, അസാധാരണപഞ്ഞത്തീതി? അസാധാരണപഞ്ഞത്തി. ഏകതോപഞ്ഞത്തി, ഉഭതോപഞ്ഞത്തീതി? ഏകതോപഞ്ഞത്തി. ചതുന്നം പാതിമോക്ഖുദ്ദേസാനം കത്ഥോഗധം കത്ഥ പരിയാപന്നന്തി? നിദാനോഗധം നിദാനപരിയാപന്നം. കതമേന ഉദ്ദേസേന ഉദ്ദേസം ആഗച്ഛതീതി? ദുതിയേന ഉദ്ദേസേന ഉദ്ദേസം ആഗച്ഛതി. ചതുന്നം വിപത്തീനം കതമാ വിപത്തീതി? സീലവിപത്തി. സത്തന്നം ആപത്തിക്ഖന്ധാനം കതമോ ആപത്തിക്ഖന്ധോതി? പാരാജികാപത്തിക്ഖന്ധോ. ഛന്നം ആപത്തിസമുട്ഠാനാനം കതിഹി സമുട്ഠാനേഹി സമുട്ഠാതീതി? ഏകേന സമുട്ഠാനേ സമുട്ഠാതി – കായതോ ച ചിത്തതോ ച സമുട്ഠാതി, ന വാചതോ. ചതുന്നം അധികരണാനം കതമം അധികരണന്തി? ആപത്താധികരണം? സത്തന്നം സമഥാനം കതിഹി സമഥേഹി സമ്മതീതി? ദ്വീഹി സമഥേഹി സമ്മതി – സമ്മുഖാവിനയേന ച പടിഞ്ഞാതകരണേന ച. കോ തത്ഥ വിനയോ, കോ തത്ഥ അഭിവിനയോതി? പഞ്ഞത്തി വിനയോ, വിഭത്തി അഭിവിനയോ. കിം തത്ഥ പാതിമോക്ഖം, കിം തത്ഥ അധിപാതിമോക്ഖന്തി? പഞ്ഞത്തി പാതിമോക്ഖം, വിഭത്തി അധിപാതിമോക്ഖം. കാ വിപത്തീതി? അസംവരോ വിപത്തി. കാ സമ്പത്തീതി? സംവരോ സമ്പത്തി. കാ പടിപത്തീതി? ന ഏവരൂപം കരിസ്സാമീതി യാവജീവം ആപാണകോടികം സമാദായ സിക്ഖതി സിക്ഖാപദേസു. [അ. നി. ൧൦.൩൧] കതി അത്ഥവസേ പടിച്ച ഭഗവതാ ഭിക്ഖുനീനം പഞ്ചമം പാരാജികം പഞ്ഞത്തന്തി? ദസ അത്ഥവസേ പടിച്ച ഭഗവതാ ഭിക്ഖുനീനം പഞ്ചമം പാരാജികം പഞ്ഞത്തം – സങ്ഘസുട്ഠുതായ, സങ്ഘഫാസുതായ, ദുമ്മങ്കൂനം ഭിക്ഖുനീനം നിഗ്ഗഹായ, പേസലാനം ഭിക്ഖുനീനം ഫാസുവിഹാരായ, ദിട്ഠധമ്മികാനം ആസവാനം സംവരായ, സമ്പരായികാനം ആസവാനം പടിഘാതായ, അപ്പസന്നാനം പസാദായ, പസന്നാനം ഭിയ്യോഭാവായ, സദ്ധമ്മട്ഠിതിയാ, വിനയാനുഗ്ഗഹായ. കാ സിക്ഖന്തീതി? സേക്ഖാ ച പുഥുജ്ജനകല്യാണികാ ച സിക്ഖന്തി. കാ സിക്ഖിതസിക്ഖാതി? അരഹന്തിയോ [അരഹന്താ (ക.)] സിക്ഖിതസിക്ഖാ. കത്ഥ ഠിതന്തി? സിക്ഖാകാമാസു ഠിതം. കാ ധാരേന്തീതി? യാസം വത്തതി താ ധാരേന്തി. കസ്സ വചനന്തി? ഭഗവതോ വചനം അരഹതോ സമ്മാസമ്ബുദ്ധസ്സ. കേനാഭതന്തി? പരമ്പരാഭതം –

ഉപാലി ദാസകോ ചേവ, സോണകോ സിഗ്ഗവോ തഥാ;

മോഗ്ഗലിപുത്തേന പഞ്ചമാ, ഏതേ ജമ്ബുസിരിവ്ഹയേ.

തതോ മഹിന്ദോ ഇട്ടിയോ, ഉത്തിയോ സമ്ബലോ തഥാ;

ഭദ്ദനാമോ ച പണ്ഡിതോ.

ഏതേ നാഗാ മഹാപഞ്ഞാ, ജമ്ബുദീപാ ഇധാഗതാ;

വിനയം തേ വാചയിംസു, പിടകം തമ്ബപണ്ണിയാ.

നികായേ പഞ്ച വാചേസും, സത്ത ചേവ പകരണേ;

തതോ അരിട്ഠോ മേധാവീ, തിസ്സദത്തോ ച പണ്ഡിതോ.

വിസാരദോ കാളസുമനോ, ഥേരോ ച ദീഘനാമകോ;

ദീഘസുമനോ ച പണ്ഡിതോ.

പുനദേവ കാളസുമനോ, നാഗത്ഥേരോ ച ബുദ്ധരക്ഖിതോ;

തിസ്സത്ഥേരോ ച മേധാവീ, ദേവത്ഥേരോ ച പണ്ഡിതോ.

പുനദേവ സുമനോ മേധാവീ, വിനയേ ച വിസാരദോ;

ബഹുസ്സുതോ ചൂളനാഗോ, ഗജോവ ദുപ്പധംസിയോ.

ധമ്മപാലിതനാമോ ച, രോഹണേ സാധുപൂജിതോ;

തസ്സ സിസ്സോ മഹാപഞ്ഞോ, ഖേമനാമോ തിപേടകോ.

ദീപേ താരകരാജാവ പഞ്ഞായ അതിരോചഥ;

ഉപതിസ്സോ ച മേധാവീ, ഫുസ്സദേവോ മഹാകഥീ.

പുനദേവ സുമനോ മേധാവീ, പുപ്ഫനാമോ ബഹുസ്സുതോ;

മഹാകഥീ മഹാസിവോ, പിടകേ സബ്ബത്ഥ കോവിദോ.

പുനദേവ ഉപാലി മേധാവീ, വിനയേ ച വിസാരദോ;

മഹാനാഗോ മഹാപഞ്ഞോ, സദ്ധമ്മവംസകോവിദോ.

പുനദേവ അഭയോ മേധാവീ, പിടകേ സബ്ബത്ഥ കോവിദോ;

തിസ്സത്ഥേരോ ച മേധാവീ, വിനയേ ച വിസാരദോ.

തസ്സ സിസ്സോ മഹാപഞ്ഞോ, പുപ്ഫനാമോ ബഹുസ്സുതോ;

സാസനം അനുരക്ഖന്തോ, ജമ്ബുദീപേ പതിട്ഠിതോ.

ചൂളാഭയോ ച മേധാവീ, വിനയേ ച വിസാരദോ;

തിസ്സത്ഥേരോ ച മേധാവീ, സദ്ധമ്മവംസകോവിദോ.

ചൂളദേവോ ച മേധാവീ, വിനയേ ച വിസാരദോ;

സിവത്ഥേരോ ച മേധാവീ, വിനയേ സബ്ബത്ഥ കോവിദോ.

ഏതേ നാഗാ മഹാപഞ്ഞാ, വിനയഞ്ഞൂ മഗ്ഗകോവിദാ;

വിനയം ദീപേ പകാസേസും, പിടകം തമ്ബപണ്ണിയാതി.

൨൦൩. യം തേന ഭഗവതാ ജാനതാ പസ്സതാ അരഹതാ സമ്മാസമ്ബുദ്ധേന ഭിക്ഖുനീനം ഛട്ഠം പാരാജികം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ഥുല്ലനന്ദം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? ഥുല്ലനന്ദാ ഭിക്ഖുനീ ജാനം പാരാജികം ധമ്മം അജ്ഝാപന്നം ഭിക്ഖുനിം നേവത്തനാ പടിചോദേസി ഗണസ്സ ആരോചേസി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ഏകേന സമുട്ഠാനേന സമുട്ഠാതി – കായതോ ച വാചതോ ച ചിത്തതോ ച സമുട്ഠാതി…പേ….

൨൦൪. ഭിക്ഖുനീനം സത്തമം പാരാജികം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ഥുല്ലനന്ദം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? ഥുല്ലനന്ദാ ഭിക്ഖുനീ സമഗ്ഗേന സങ്ഘേന ഉക്ഖിത്തം അരിട്ഠം ഭിക്ഖും ഗദ്ധബാധിപുബ്ബം അനുവത്തി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ഏകേന സമുട്ഠാനേന സമുട്ഠാതി – ധുരനിക്ഖേപേ…പേ….

൨൦൫. ഭിക്ഖുനീനം അട്ഠമം പാരാജികം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ഛബ്ബഗ്ഗിയാ ഭിക്ഖുനിയോ ആരബ്ഭ. കിസ്മിം വത്ഥുസ്മിന്തി? ഛബ്ബഗ്ഗിയാ ഭിക്ഖുനിയോ അട്ഠമം വത്ഥും പരിപൂരേസും, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ഏകേന സമുട്ഠാനേന സമുട്ഠാതി – ധുരനിക്ഖേപേ…പേ….

അട്ഠ പാരാജികാ നിട്ഠിതാ.

തസ്സുദ്ദാനം –

മേഥുനാദിന്നാദാനഞ്ച, മനുസ്സവിഗ്ഗഹുത്തരി;

കായസംസഗ്ഗം ഛാദേതി, ഉക്ഖിത്താ അട്ഠ വത്ഥുകാ;

പഞ്ഞാപേസി മഹാവീരോ, ഛേജ്ജവത്ഥൂ അസംസയാതി.

൨. സങ്ഘാദിസേസകണ്ഡം

൨൦൬. യം തേന ഭഗവതാ ജാനതാ പസ്സതാ അരഹതാ സമ്മാസമ്ബുദ്ധേന ഉസ്സയവാദികായ ഭിക്ഖുനിയാ അഡ്ഡം കരോന്തിയാ സങ്ഘാദിസേസോ കത്ഥ പഞ്ഞത്തോ? കം ആരബ്ഭ? കിസ്മിം വത്ഥുസ്മിം…പേ… കേനാഭതന്തി?

൨൦൭. യം തേന ഭഗവതാ ജാനതാ പസ്സതാ അരഹതാ സമ്മാസമ്ബുദ്ധേന ഉസ്സയവാദികായ ഭിക്ഖുനിയാ അഡ്ഡം കരോന്തിയാ സങ്ഘാദിസേസോ കത്ഥ പഞ്ഞത്തോതി? സാവത്ഥിയം പഞ്ഞത്തോ. കം ആരബ്ഭാതി? ഥുല്ലനന്ദം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? ഥുല്ലനന്ദാ ഭിക്ഖുനീ ഉസ്സയവാദികാ വിഹരി, തസ്മിം വത്ഥുസ്മിം. അത്ഥി തത്ഥ പഞ്ഞത്തി, അനുപഞ്ഞത്തി, അനുപ്പന്നപഞ്ഞത്തീതി? ഏകാ പഞ്ഞത്തി. അനുപഞ്ഞത്തി അനുപ്പന്നപഞ്ഞത്തി തസ്മിം നത്ഥി. സബ്ബത്ഥപഞ്ഞത്തി, പദേസപഞ്ഞത്തീതി? സബ്ബത്ഥപഞ്ഞത്തി. സാധാരണപഞ്ഞത്തി, അസാധാരണപഞ്ഞത്തീതി? അസാധാരണപഞ്ഞത്തി. ഏകതോപഞ്ഞത്തി, ഉഭതോപഞ്ഞത്തീതി? ഏകതോപഞ്ഞത്തി. ചതുന്നം പാതിമോക്ഖുദ്ദേസാനം കത്ഥോഗധം കത്ഥ പരിയാപന്നന്തി? നിദാനോഗധം നിദാനപരിയാപന്നം. കതമേന ഉദ്ദേസേന ഉദ്ദേസം ആഗച്ഛതീതി? തതിയേന ഉദ്ദേസേന ഉദ്ദേസം ആഗച്ഛതി. ചതുന്നം വിപത്തീനം കതമാ വിപത്തീതി? സീലവിപത്തി. സത്തന്നം ആപത്തിക്ഖന്ധാനം കതമോ ആപത്തിക്ഖന്ധോതി? സങ്ഘാദിസേസാപത്തിക്ഖന്ധോ. ഛന്നം ആപത്തിസമുട്ഠാനാനം കതിഹി സമുട്ഠാനേഹി സമുട്ഠാതീതി? ദ്വീഹി സമുട്ഠാനേഹി സമുട്ഠാതി – സിയാ കായതോ ച വാചതോ ച സമുട്ഠാതി, ന ചിത്തതോ; സിയാ കായതോ ച വാചതോ ച ചിത്തതോ ച സമുട്ഠാതി…പേ… കേനാഭതന്തി? പരമ്പരാഭതം –

ഉപാലി ദാസകോ ചേവ, സോണകോ സിഗ്ഗവോ തഥാ;

മോഗ്ഗലിപുത്തേന പഞ്ചമാ, ഏതേ ജമ്ബുസിരിവ്ഹയേ. …പേ…;

ഏതേ നാഗാ മഹാപഞ്ഞാ, വിനയഞ്ഞൂ മഗ്ഗകോവിദാ;

വിനയം ദീപേ പകാസേസും, പിടകം തമ്ബപണ്ണിയാതി.

൨൦൮. ചോരിം വുട്ഠാപേന്തിയാ സങ്ഘാദിസേസോ കത്ഥ പഞ്ഞത്തോതി? സാവത്ഥിയം പഞ്ഞത്തോ. കം ആരബ്ഭാതി? ഥുല്ലനന്ദം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? ഥുല്ലനന്ദാ ഭിക്ഖുനീ ചോരിം വുട്ഠാപേസി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി – സിയാ വാചതോ ച ചിത്തതോ ച സമുട്ഠാതി, ന കായതോ; സിയാ കായതോ ച വാചതോ ച ചിത്തതോ ച സമുട്ഠാതി…പേ….

൨൦൯. ഏകായ ഗാമന്തരം ഗച്ഛന്തിയാ സങ്ഘാദിസേസോ കത്ഥ പഞ്ഞത്തോതി? സാവത്ഥിയം പഞ്ഞത്തോ. കം ആരബ്ഭാതി? അഞ്ഞതരം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? അഞ്ഞതരാ ഭിക്ഖുനീ ഏകാ ഗാമന്തരം ഗച്ഛി, തസ്മിം വത്ഥുസ്മിം. ഏകാ പഞ്ഞത്തി, തിസ്സോ അനുപഞ്ഞത്തിയോ. ഛന്നം ആപത്തിസമുട്ഠാനാനം ഏകേന സമുട്ഠാനേന സമുട്ഠാതി – പഠമപാരാജികേ…പേ….

൨൧൦. സമഗ്ഗേന സങ്ഘേന ഉക്ഖിത്തം ഭിക്ഖുനിം ധമ്മേന വിനയേന സത്ഥുസാസനേന അനപലോകേത്വാ കാരകസങ്ഘം അനഞ്ഞായ ഗണസ്സ ഛന്ദം ഓസാരേന്തിയാ സങ്ഘാദിസേസോ കത്ഥ പഞ്ഞത്തോതി? സാവത്ഥിയം പഞ്ഞത്തോ. കം ആരബ്ഭാതി? ഥുല്ലനന്ദം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? ഥുല്ലനന്ദാ ഭിക്ഖുനീ സമഗ്ഗേന സങ്ഘേന ഉക്ഖിത്തം ഭിക്ഖുനിം ധമ്മേന വിനയേന സത്ഥുസാസനേന അനപലോകേത്വാ കാരകസങ്ഘം അനഞ്ഞായ ഗണസ്സ ഛന്ദം ഓസാരേസി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ഏകേന സമുട്ഠാനേന സമുട്ഠാതി – ധുരനിക്ഖേപേ…പേ….

൨൧൧. അവസ്സുതായ ഭിക്ഖുനിയാ അവസ്സുതസ്സ പുരിസപുഗ്ഗലസ്സ ഹത്ഥതോ ഖാദനീയം വാ ഭോജനീയം വാ സഹത്ഥാ പടിഗ്ഗഹേത്വാ ഭുഞ്ജന്തിയാ സങ്ഘാദിസേസോ കത്ഥ പഞ്ഞത്തോതി? സാവത്ഥിയം പഞ്ഞത്തോ. കം ആരബ്ഭാതി? സുന്ദരീനന്ദം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? സുന്ദരീനന്ദാ ഭിക്ഖുനീ അവസ്സുതാ അവസ്സുതസ്സ പുരിസപുഗ്ഗലസ്സ ഹത്ഥതോ ആമിസം പടിഗ്ഗഹേസി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ഏകേന സമുട്ഠാനേന സമുട്ഠാതി – പഠമപാരാജികേ…പേ….

൨൧൨. ‘‘കിം തേ, അയ്യേ, ഏസോ പുരിസപുഗ്ഗലോ കരിസ്സതി അവസ്സുതോ വാ അനവസ്സുതോ വാ, യതോ ത്വം അനവസ്സുതാ! ഇങ്ഘ, അയ്യേ, യം തേ ഏസോ പുരിസപുഗ്ഗലോ ദേതി ഖാദനീയം വാ ഭോജനീയം വാ, തം ത്വം സഹത്ഥാ പടിഗ്ഗഹേത്വാ ഖാദ വാ ഭുഞ്ജ വാ’’തി ഉയ്യോജേന്തിയാ സങ്ഘാദിസേസോ കത്ഥ പഞ്ഞത്തോതി? സാവത്ഥിയം പഞ്ഞത്തോ. കം അരബ്ഭാതി? അഞ്ഞതരം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? അഞ്ഞതരാ ഭിക്ഖുനീ –‘‘കിം തേ, അയ്യേ, ഏസോ പുരിസപുഗ്ഗലോ കരിസ്സതി അവസ്സുതോ വാ അനവസ്സുതോ വാ, യതോ ത്വം അനവസ്സുതാ! ഇങ്ഘ, അയ്യേ, യം തേ ഏസോ പുരിസപുഗ്ഗലോ ദേതി ഖാദനീയം വാ ഭോജനീയം വാ, തം ത്വം സഹത്ഥാ പടിഗ്ഗഹേത്വാ ഖാദ വാ ഭുഞ്ജ വാ’’തി ഉയ്യോജേസി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം തീഹി സമുട്ഠാനേഹി സമുട്ഠാതി…പേ….

൨൧൩. കുപിതായ അനത്തമനായ ഭിക്ഖുനിയാ യാവതതിയം സമനുഭാസനായ ന പടിനിസ്സജ്ജന്തിയാ സങ്ഘാദിസേസോ കത്ഥ പഞ്ഞത്തോതി? സാവത്ഥിയം പഞ്ഞത്തോ. കം ആരബ്ഭാതി? ചണ്ഡകാളിം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? ചണ്ഡകാളീ ഭിക്ഖുനീ കുപിതാ അനത്തമനാ ഏവം അവച – ‘‘ബുദ്ധം പച്ചാചിക്ഖാമി, ധമ്മം പച്ചാചിക്ഖാമി, സങ്ഘം പച്ചാചിക്ഖാമി, സിക്ഖം പച്ചാചിക്ഖാമീ’’തി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ഏകേന സമുട്ഠാനേന സമുട്ഠാതി – ധുരനിക്ഖേപേ…പേ….

൨൧൪. കിസ്മിഞ്ചിദേവ അധികരണേ പച്ചാകതായ ഭിക്ഖുനിയാ യാവതതിയം സമനുഭാസനായ ന പടിനിസ്സജ്ജന്തിയാ സങ്ഘാദിസേസോ കത്ഥ പഞ്ഞത്തോതി? സാവത്ഥിയം പഞ്ഞത്തോ. കം ആരബ്ഭാതി? ചണ്ഡകാളിം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? ചണ്ഡകാളീ ഭിക്ഖുനീ കിസ്മിഞ്ചിദേവ അധികരണേ പച്ചാകതാ കുപിതാ അനത്തമനാ ഏവം അവച – ‘‘ഛന്ദഗാമിനിയോ ച ഭിക്ഖുനിയോ, ദോസഗാമിനിയോ ച ഭിക്ഖുനിയോ, മോഹഗാമിനിയോ ച ഭിക്ഖുനിയോ, ഭയഗാമിനിയോ ച ഭിക്ഖുനിയോ’’തി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ഏകേന സമുട്ഠാനേന സമുട്ഠാതി – ധുരനിക്ഖേപേ…പേ….

൨൧൫. സംസട്ഠാനം ഭിക്ഖുനീനം യാവതതിയം സമനുഭാസനായ ന പടിനിസ്സജ്ജന്തീനം സങ്ഘാദിസേസോ കത്ഥ പഞ്ഞത്തോതി? സാവത്ഥിയം പഞ്ഞത്തോ. കം ആരബ്ഭാതി? സമ്ബഹുലാ ഭിക്ഖുനിയോ ആരബ്ഭ. കിസ്മിം വത്ഥുസ്മിന്തി? സമ്ബഹുലാ ഭിക്ഖുനിയോ സംസട്ഠാ വിഹരിംസു, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ഏകേന സമുട്ഠാനേന സമുട്ഠാതി – ധുരനിക്ഖേപേ…പേ….

൨൧൬. ‘‘സംസട്ഠാവ, അയ്യേ, തുമ്ഹേ വിഹരഥ. മാ തുമ്ഹേ നാനാ വിഹരിത്ഥാ’’തി ഉയ്യോജേന്തിയാ യാവതതിയം സമനുഭാസനായ ന പടിനിസ്സജ്ജന്തിയാ സങ്ഘാദിസേസോ കത്ഥ പഞ്ഞത്തോതി? സാവത്ഥിയം പഞ്ഞത്തോ. കം ആരബ്ഭാതി? ഥുല്ലനന്ദം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? ഥുല്ലനന്ദാ ഭിക്ഖുനീ – ‘‘സംസട്ഠാവ അയ്യേ, തുമ്ഹേ വിഹരഥ, മാ തുമ്ഹേ നാനാ വിഹരിത്ഥാ’’തി ഉയ്യോജേസി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ഏകേന സമുട്ഠാനേന സമുട്ഠാതി – ധുരനിക്ഖേപേ…പേ….

ദസ സങ്ഘാദിസേസാ നിട്ഠിതാ.

തസ്സുദ്ദാനം –

ഉസ്സയചോരി ഗാമന്തം, ഉക്ഖിത്തം ഖാദനേന ച;

കിം തേ കുപിതാ കിസ്മിഞ്ചി, സംസട്ഠാ ഞായതേ ദസാതി.

൩. നിസ്സഗ്ഗിയകണ്ഡം

൨൧൭. യം തേന ഭഗവതാ ജാനതാ പസ്സതാ അരഹതാ സമ്മാസമ്ബുദ്ധേന പത്തസന്നിചയം കരോന്തിയാ നിസ്സഗ്ഗിയം പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ഛബ്ബഗ്ഗിയാ ഭിക്ഖുനിയോ ആരബ്ഭ. കിസ്മിം വത്ഥുസ്മിന്തി? ഛബ്ബഗ്ഗിയാ ഭിക്ഖുനിയോ പത്തസന്നിചയം അകംസു, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി – കഥിനകേ…പേ….

അകാലചീവരം ‘‘കാലചീവര’’ന്തി അധിട്ഠഹിത്വാ ഭാജാപേന്തിയാ നിസ്സഗ്ഗിയം പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ഥുല്ലനന്ദം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? ഥുല്ലനന്ദാ ഭിക്ഖുനീ അകാലചീവരം ‘‘കാലചീവര’’ന്തി അധിട്ഠഹിത്വാ ഭാജാപേസി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം തീഹി സമുട്ഠാനേഹി സമുട്ഠാതി…പേ….

ഭിക്ഖുനിയാ സദ്ധിം ചീവരം പരിവത്തേത്വാ അച്ഛിന്ദന്തിയാ നിസ്സഗ്ഗിയം പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ഥുല്ലനന്ദം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? ഥുല്ലനന്ദാ ഭിക്ഖുനീ ഭിക്ഖുനിയാ സദ്ധിം ചീവരം പരിവത്തേത്വാ അച്ഛിന്ദി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം തീഹി സമുട്ഠാനേഹി സമുട്ഠാതി…പേ….

അഞ്ഞം വിഞ്ഞാപേത്വാ അഞ്ഞം വിഞ്ഞാപേന്തിയാ നിസ്സഗ്ഗിയം പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ഥുല്ലനന്ദം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? ഥുല്ലനന്ദാ ഭിക്ഖുനീ അഞ്ഞം വിഞ്ഞാപേത്വാ അഞ്ഞം വിഞ്ഞാപേസി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ഛഹി സമുട്ഠാനേഹി സമുട്ഠാതി…പേ….

അഞ്ഞം ചേതാപേത്വാ അഞ്ഞം ചേതാപേന്തിയാ നിസ്സഗ്ഗിയം പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ഥുല്ലനന്ദം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? ഥുല്ലനന്ദാ ഭിക്ഖുനീ അഞ്ഞം ചേതാപേത്വാ അഞ്ഞം ചേതാപേസി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ഛഹി സമുട്ഠാനേഹി സമുട്ഠാതി…പേ….

അഞ്ഞദത്ഥികേന പരിക്ഖാരേന അഞ്ഞുദ്ദിസികേന സങ്ഘികേന അഞ്ഞം ചേതാപേന്തിയാ നിസ്സഗ്ഗിയം പാചിത്തിയം കത്ഥം പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? സമ്ബഹുലാ ഭിക്ഖുനിയോ ആരബ്ഭ. കിസ്മിം വത്ഥുസ്മിന്തി? സമ്ബഹുലാ ഭിക്ഖുനിയോ അഞ്ഞദത്ഥികേന പരിക്ഖാരേന അഞ്ഞുദ്ദിസികേന സങ്ഘികേന അഞ്ഞം ചേതാപേസും, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ഛഹി സമുട്ഠാനേഹി സമുട്ഠാതി…പേ….

അഞ്ഞദത്ഥികേന പരിക്ഖാരേന അഞ്ഞുദ്ദിസികേന സങ്ഘികേന സഞ്ഞാചികേന അഞ്ഞം ചേതാപേന്തിയാ നിസ്സഗ്ഗിയം പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? സമ്ബഹുലാ ഭിക്ഖുനിയോ ആരബ്ഭ. കിസ്മിം വത്ഥുസ്മിന്തി? സമ്ബഹുലാ ഭിക്ഖുനിയോ അഞ്ഞദത്ഥികേന പരിക്ഖാരേന അഞ്ഞുദ്ദിസികേന സങ്ഘികേന സഞ്ഞാചികേന അഞ്ഞം ചേതാപേസും, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ഛഹി സമുട്ഠാനേഹി സമുട്ഠാതി…പേ….

അഞ്ഞദത്ഥികേന പരിക്ഖാരേന അഞ്ഞുദ്ദിസികേന മഹാജനികേന അഞ്ഞം ചേതാപേന്തിയാ നിസ്സഗ്ഗിയം പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? സമ്ബഹുലാ ഭിക്ഖുനിയോ ആരബ്ഭ. കിസ്മിം വത്ഥുസ്മിന്തി? സമ്ബഹുലാ ഭിക്ഖുനിയോ അഞ്ഞദത്ഥികേന പരിക്ഖാരേന അഞ്ഞുദ്ദിസികേന മഹാജനികേന അഞ്ഞം ചേതാപേസും, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ഛഹി സമുട്ഠാനേഹി സമുട്ഠാതി…പേ….

അഞ്ഞദത്ഥികേന പരിക്ഖാരേന അഞ്ഞുദ്ദിസികേന മഹാജനികേന സഞ്ഞാചികേന അഞ്ഞം ചേതാപേന്തിയാ നിസ്സഗ്ഗിയം പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? സമ്ബഹുലാ ഭിക്ഖുനിയോ ആരബ്ഭ. കിസ്മിം വത്ഥുസ്മിന്തി? സമ്ബഹുലാ ഭിക്ഖുനിയോ അഞ്ഞദത്ഥികേന പരിക്ഖാരേന അഞ്ഞുദ്ദിസികേന മഹാജനികേന സഞ്ഞാചികേന അഞ്ഞം ചേതാപേസും, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ഛഹി സമുട്ഠാനേഹി സമുട്ഠാതി…പേ….

അഞ്ഞദത്ഥികേന പരിക്ഖാരേന അഞ്ഞുദ്ദിസികേന പുഗ്ഗലികേന സഞ്ഞാചികേന അഞ്ഞം ചേതാപേന്തിയാ നിസ്സഗ്ഗിയം പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ഥുല്ലനന്ദം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? ഥുല്ലനന്ദാ ഭിക്ഖുനീ അഞ്ഞദത്ഥികേന പരിക്ഖാരേന അഞ്ഞുദ്ദിസികേന പുഗ്ഗലികേന സഞ്ഞാചികേന അഞ്ഞം ചേതാപേസി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ഛഹി സമുട്ഠാനേഹി സമുട്ഠാതി…പേ….

അതിരേകചതുക്കംസപരമം ഗരുപാവുരണം ചേതാപേന്തിയാ നിസ്സഗ്ഗിയം പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ഥുല്ലനന്ദം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? ഥുല്ലനന്ദാ ഭിക്ഖുനീ രാജാനം കമ്ബലം വിഞ്ഞാപേസി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ഛഹി സമുട്ഠാനേഹി സമുട്ഠാതി…പേ….

അതിരേകഅഡ്ഢതേയ്യകംസപരമം ലഹുപാവുരണം ചേതാപേന്തിയാ നിസ്സഗ്ഗിയം പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ഥുല്ലനന്ദം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? ഥുല്ലനന്ദാ ഭിക്ഖുനീ രാജാനം ഖോമം വിഞ്ഞാപേസി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ഛഹി സമുട്ഠാനേഹി സമുട്ഠാതി …പേ….

ദ്വാദസ നിസ്സഗ്ഗിയാ പാചിത്തിയാ നിട്ഠിതാ.

തസ്സുദ്ദാനം –

പത്തം അകാലം കാലഞ്ച, പരിവത്തേ ച വിഞ്ഞാപേ;

ചേതാപേത്വാ അഞ്ഞദത്ഥി, സങ്ഘികഞ്ച മഹാജനികം;

സഞ്ഞാചികാ പുഗ്ഗലികാ, ചതുക്കംസഡ്ഢതേയ്യകാതി.

൪. പാചിത്തിയകണ്ഡം

൧. ലസുണവഗ്ഗോ

൨൧൮. യം തേന ഭഗവതാ ജാനതാ പസ്സതാ അരഹതാ സമ്മാസമ്ബുദ്ധേന ലസുണം ഖാദന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ഥുല്ലനന്ദം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? ഥുല്ലനന്ദാ ഭിക്ഖുനീ ന മത്തം ജാനിത്വാ ലസുണം ഹരാപേസി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി ഏളകലോമകേ…പേ….

സമ്ബാധേ ലോമം സംഹരാപേന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ഛബ്ബഗ്ഗിയാ ഭിക്ഖുനിയോ ആരബ്ഭ. കിസ്മിം വത്ഥുസ്മിന്തി? ഛബ്ബഗ്ഗിയാ ഭിക്ഖുനിയോ സമ്ബാധേ ലോമം സംഹരാപേസും, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ചതൂഹി സമുട്ഠാനേഹി സമുട്ഠാതി…പേ….

തലഘാതകേ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ദ്വേ ഭിക്ഖുനിയോ ആരബ്ഭ. കിസ്മിം വത്ഥുസ്മിന്തി? ദ്വേ ഭിക്ഖുനിയോ തലഘാതകം അകംസു, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ഏകേന സമുട്ഠാനേന സമുട്ഠാതി – പഠമപാരാജികേ…പേ….

ജതുമട്ഠകേ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? അഞ്ഞതരം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? അഞ്ഞതരാ ഭിക്ഖുനീ ജതുമട്ഠകം ആദിയി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ഏകേന സമുട്ഠാനേന സമുട്ഠാതി – പഠമപാരാജികേ…പേ….

അതിരേകദ്വങ്ഗുലപബ്ബപരമം ഉദകസുദ്ധികം ആദിയന്തിയാ പാചിത്തിയം കത്ഥ പഞ്ഞത്തന്തി? സക്കേസു പഞ്ഞത്തം. കം ആരബ്ഭാതി? അഞ്ഞതരം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? അഞ്ഞതരാ ഭിക്ഖുനീ അതിഗമ്ഭീരം ഉദകസുദ്ധികം ആദിയി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ഏകേന സമുട്ഠാനേന സമുട്ഠാതി – പഠമപാരാജികേ…പേ….

ഭിക്ഖുസ്സ ഭുഞ്ജന്തസ്സ പാനീയേന വാ വിധൂപനേന വാ ഉപതിട്ഠന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? അഞ്ഞതരം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? അഞ്ഞതരാ ഭിക്ഖുനീ ഭിക്ഖുസ്സ ഭുഞ്ജന്തസ്സ പാനീയേന ച വിധൂപനേന ച ഉപതിട്ഠി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി – ഏളകലോമകേ…പേ….

ആമകധഞ്ഞം വിഞ്ഞാപേത്വാ ഭുഞ്ജന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? സമ്ബഹുലാ ഭിക്ഖുനിയോ ആരബ്ഭ. കിസ്മിം വത്ഥുസ്മിന്തി? സമ്ബഹുലാ ഭിക്ഖുനിയോ ആമകധഞ്ഞം വിഞ്ഞാപേത്വാ ഭുഞ്ജിംസു, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ചതൂഹി സമുട്ഠാനേഹി സമുട്ഠാതി…പേ….

ഉച്ചാരം വാ പസ്സാവം വാ സങ്കാരം വാ വിഘാസം വാ തിരോകുട്ടേ [തിരോകുഡ്ഡേ (സീ. സ്യാ.)] ഛഡ്ഡേന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? അഞ്ഞതരം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? അഞ്ഞതരാ ഭിക്ഖുനീ ഉച്ചാരം [ഉച്ചാരമ്പി പസ്സാവമ്പി സങ്കാരമ്പി വിഘാസമ്പി (ക.)] തിരോകുട്ടേ ഛഡ്ഡേസി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ഛഹി സമുട്ഠാനേഹി സമുട്ഠാതി…പേ….

ഉച്ചാരം വാ പസ്സാവം വാ സങ്കാരം വാ വിഘാസം വാ ഹരിതേ ഛഡ്ഡേന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? സമ്ബഹുലാ ഭിക്ഖുനിയോ ആരബ്ഭ. കിസ്മിം വത്ഥുസ്മിന്തി? സമ്ബഹുലാ ഭിക്ഖുനിയോ ഉച്ചാരമ്പി പസ്സാവമ്പി സങ്കാരമ്പി വിഘാസമ്പി ഹരിതേ ഛഡ്ഡേസും, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ഛഹി സമുട്ഠാനേഹി സമുട്ഠാതി…പേ….

നച്ചം വാ ഗീതം വാ വാദിതം വാ ദസ്സനായ ഗച്ഛന്തിയാ പാചിത്തിയം കത്ഥ പഞ്ഞത്തന്തി? രാജഗഹേ പഞ്ഞത്തം. കം ആരബ്ഭാതി? ഛബ്ബഗ്ഗിയാ ഭിക്ഖുനിയോ ആരബ്ഭ. കിസ്മിം വത്ഥുസ്മിന്തി? ഛബ്ബഗ്ഗിയാ ഭിക്ഖുനിയോ നച്ചമ്പി ഗീതമ്പി വാദിതമ്പി ദസ്സനായ അഗമംസു, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി – ഏളകലോമകേ…പേ….

ലസുണവഗ്ഗോ പഠമോ.

൨. രത്തന്ധകാരവഗ്ഗോ

൨൧൯. രത്തന്ധകാരേ അപ്പദീപേ പുരിസേന സദ്ധിം ഏകേനേകായ സന്തിട്ഠന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? അഞ്ഞതരം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? അഞ്ഞതരാ ഭിക്ഖുനീ രത്തന്ധകാരേ അപ്പദീപേ പുരിസേന സദ്ധിം ഏകേനേകാ സന്തിട്ഠി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി – ഥേയ്യസത്ഥകേ…പേ….

പടിച്ഛന്നേ ഓകാസേ പുരിസേന സദ്ധിം ഏകേനേകായ സന്തിട്ഠന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? അഞ്ഞതരം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? അഞ്ഞതരാ ഭിക്ഖുനീ പടിച്ഛന്നേ ഓകാസേ പുരിസേന സദ്ധിം ഏകേനേകാ സന്തിട്ഠി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി – ഥേയ്യസത്ഥകേ…പേ….

അജ്ഝോകാസേ പുരിസേന സദ്ധിം ഏകേനേകായ സന്തിട്ഠന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? അഞ്ഞതരം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? അഞ്ഞതരാ ഭിക്ഖുനീ അജ്ഝോകാസേ പുരിസേന സദ്ധിം ഏകേനേകാ സന്തിട്ഠി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി – ഥേയ്യസത്ഥകേ…പേ….

രഥികാ വാ [രഥിയായ വാ (ക.)] ബ്യൂഹേ വാ സിങ്ഘാടകേ വാ പുരിസേന സദ്ധിം ഏകേനേകായ സന്തിട്ഠന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ഥുല്ലനന്ദം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? ഥുല്ലനന്ദാ ഭിക്ഖുനീ രഥികായപി ബ്യൂഹേപി സിങ്ഘാടകേപി പുരിസേന സദ്ധിം ഏകേനേകാ സന്തിട്ഠി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി – ഥേയ്യസത്ഥകേ…പേ….

പുരേഭത്തം കുലാനി ഉപസങ്കമിത്വാ ആസനേ നിസീദിത്വാ സാമികേ അനാപുച്ഛാ പക്കമന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? അഞ്ഞതരം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? അഞ്ഞതരാ ഭിക്ഖുനീ പുരേഭത്തം കുലാനി ഉപസങ്കമിത്വാ ആസനേ നിസീദിത്വാ സാമികേ അനാപുച്ഛാ പക്കാമി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി – കഥിനകേ…പേ….

പച്ഛാഭത്തം കുലാനി ഉപസങ്കമിത്വാ സാമികേ അനാപുച്ഛാ ആസനേ അഭിനിസീദന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ഥുല്ലനന്ദം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? ഥുല്ലനന്ദാ ഭിക്ഖുനീ പച്ഛാഭത്തം കുലാനി ഉപസങ്കമിത്വാ സാമികേ അനാപുച്ഛാ ആസനേ അഭിനിസീദി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി – കഥിനകേ…പേ….

വികാലേ കുലാനി ഉപസങ്കമിത്വാ സാമികേ അനാപുച്ഛാ സേയ്യം സന്ഥരിത്വാ വാ സന്ഥരാപേത്വാ വാ അഭിനിസീദന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? സമ്ബഹുലാ ഭിക്ഖുനിയോ ആരബ്ഭ. കിസ്മിം വത്ഥുസ്മിന്തി? സമ്ബഹുലാ ഭിക്ഖുനിയോ വികാലേ കുലാനി ഉപസങ്കമിത്വാ സാമികേ അനാപുച്ഛാ സേയ്യം സന്ഥരിത്വാ അഭിനിസീദിംസു, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി – കഥിനകേ…പേ….

ദുഗ്ഗഹിതേന ദൂപധാരിതേന പരം ഉജ്ഝാപേന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? അഞ്ഞതരം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? അഞ്ഞതരാ ഭിക്ഖുനീ ദുഗ്ഗഹിതേന ദൂപധാരിതേന പരം ഉജ്ഝാപേസി, തസ്മിം വത്ഥുസ്മിം. ഏകാ പഞ്ഞത്തി ഛന്നം ആപത്തിസമുട്ഠാനാനം തീഹി സമുട്ഠാനേഹി സമുട്ഠാതി…പേ….

അത്താനം വാ പരം വാ നിരയേന വാ ബ്രഹ്മചരിയേന വാ അഭിസപന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ചണ്ഡകാളിം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? ചണ്ഡകാളീ ഭിക്ഖുനീ അത്താനമ്പി പരമ്പി നിരയേനപി ബ്രഹ്മചരിയേനപി അഭിസപി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം തീഹി സമുട്ഠാനേഹി സമുട്ഠാതി…പേ….

അത്താനം വധിത്വാ വധിത്വാ രോദന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ചണ്ഡകാളിം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? ചണ്ഡകാളീ ഭിക്ഖുനീ അത്താനം വധിത്വാ വധിത്വാ രോദി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ഏകേന സമുട്ഠാനേന സമുട്ഠാതി – ധുരനിക്ഖേപേ…പേ….

രത്തന്ധകാരവഗ്ഗോ ദുതിയോ.

൩. നഹാനവഗ്ഗോ

൨൨൦. നഗ്ഗായ നഹായന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? സമ്ബഹുലാ ഭിക്ഖുനിയോ ആരബ്ഭ. കിസ്മിം വത്ഥുസ്മിന്തി? സമ്ബഹുലാ ഭിക്ഖുനിയോ നഗ്ഗാ നഹായിംസു, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി – ഏളകലോമകേ…പേ….

പമാണാതിക്കന്തം ഉദകസാടികം കാരാപേന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ഛബ്ബഗ്ഗിയാ ഭിക്ഖുനിയോ ആരബ്ഭ. കിസ്മിം വത്ഥുസ്മിന്തി? ഛബ്ബഗ്ഗിയാ ഭിക്ഖുനിയോ അപ്പമാണികായോ ഉദകസാടികായോ ധാരേസും, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ഛഹി സമുട്ഠാനേഹി സമുട്ഠാതി…പേ….

ഭിക്ഖുനിയാ ചീവരം വിസിബ്ബേത്വാ വാ വിസിബ്ബാപേത്വാ വാ നേവ സിബ്ബേന്തിയാ ന സിബ്ബാപനായ ഉസ്സുക്കം കരോന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ഥുല്ലനന്ദം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? ഥുല്ലനന്ദാ ഭിക്ഖുനീ ഭിക്ഖുനിയാ ചീവരം വിസിബ്ബാപേത്വാ നേവ സിബ്ബേസി ന സിബ്ബാപനായ ഉസ്സുക്കം അകാസി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ഏകേന സമുട്ഠാനേന സമുട്ഠാതി – ധുരനിക്ഖേപേ…പേ….

പഞ്ചാഹികം സങ്ഘാടിചാരം അതിക്കാമേന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? സമ്ബഹുലാ ഭിക്ഖുനിയോ ആരബ്ഭ. കിസ്മിം വത്ഥുസ്മിന്തി? സമ്ബഹുലാ ഭിക്ഖുനിയോ ഭിക്ഖുനീനം ഹത്ഥേ ചീവരം നിക്ഖിപിത്വാ സന്തരുത്തരേന ജനപദചാരികം പക്കമിംസു, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി കഥിനകേ…പേ….

ചീവരസങ്കമനീയം ധാരേന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? അഞ്ഞതരം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? അഞ്ഞതരാ ഭിക്ഖുനീ അഞ്ഞതരായ ഭിക്ഖുനിയാ ചീവരം അനാപുച്ഛാ പാരുപി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി – കഥിനകേ…പേ….

ഗണസ്സ ചീവരലാഭം അന്തരായം കരോന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ഥുല്ലനന്ദം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? ഥുല്ലനന്ദാ ഭിക്ഖുനീ ഗണസ്സ ചീവരലാഭം അന്തരായം അകാസി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം തീഹി സമുട്ഠാനേഹി സമുട്ഠാതി…പേ….

ധമ്മികം ചീവരവിഭങ്ഗം പടിബാഹന്തിയാ പാചിത്തിയം കത്ഥ പഞ്ഞത്തന്തി. സാവത്ഥിയം പഞ്ഞത്തം. കം ആരബ്ഭാതി? ഥുല്ലനന്ദം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? ഥുല്ലനന്ദാ ഭിക്ഖുനീ ധമ്മികം ചീവരവിഭങ്ഗം പടിബാഹി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം തീഹി സമുട്ഠാനേഹി സമുട്ഠാതി…പേ….

അഗാരികസ്സ വാ പരിബ്ബാജകസ്സ വാ പരിബ്ബാജികായ വാ സമണചീവരം ദേന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ഥുല്ലനന്ദം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? ഥുല്ലനന്ദാ ഭിക്ഖുനീ അഗാരികസ്സ സമണചീവരം അദാസി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ഛഹി സമുട്ഠാനേഹി സമുട്ഠാതി…പേ….

ദുബ്ബലചീവരപച്ചാസായ ചീവരകാലസമയം അതിക്കാമേന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ഥുല്ലനന്ദം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? ഥുല്ലനന്ദാ ഭിക്ഖുനീ ദുബ്ബലചീവരപച്ചാസായ ചീവരകാലസമയം അതിക്കാമേസി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം തീഹി സമുട്ഠാനേഹി സമുട്ഠാതി…പേ….

ധമ്മികം കഥിനുദ്ധാരം പടിബാഹന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ഥുല്ലനന്ദം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? ഥുല്ലനന്ദാ ഭിക്ഖുനീ ധമ്മികം കഥിനുദ്ധാരം പടിബാഹി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം തീഹി സമുട്ഠാനേഹി സമുട്ഠാതി…പേ….

നഹാനവഗ്ഗോ തതിയോ.

൪. തുവട്ടവഗ്ഗോ

൨൨൧. ദ്വിന്നം ഭിക്ഖുനീനം ഏകമഞ്ചേ തുവട്ടേന്തീനം പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? സമ്ബഹുലാ ഭിക്ഖുനിയോ ആരബ്ഭ. കിസ്മിം വത്ഥുസ്മിന്തി? സമ്ബഹുലാ ഭിക്ഖുനിയോ ദ്വേ ഏകമഞ്ചേ തുവട്ടേസും, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി – ഏളകലോമകേ…പേ….

ദ്വിന്നം ഭിക്ഖുനീനം ഏകത്ഥരണപാവുരണേ തുവട്ടേന്തീനം പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? സമ്ബഹുലാ ഭിക്ഖുനിയോ ആരബ്ഭ. കിസ്മിം വത്ഥുസ്മിന്തി? സമ്ബഹുലാ ഭിക്ഖുനിയോ ദ്വേ ഏകത്ഥരണപാവുരണാ തുവട്ടേസും, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി – ഏളകലോമകേ…പേ….

ഭിക്ഖുനിയാ സഞ്ചിച്ച അഫാസും കരോന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ഥുല്ലനന്ദം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? ഥുല്ലനന്ദാ ഭിക്ഖുനീ ഭിക്ഖുനിയാ സഞ്ചിച്ച അഫാസും അകാസി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം തീഹി സമുട്ഠാനേഹി സമുട്ഠാതി…പേ….

ദുക്ഖിതം സഹജീവിനിം നേവ ഉപട്ഠേന്തിയാ ന ഉപട്ഠാപനായ ഉസ്സുക്കം കരോന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ഥുല്ലനന്ദം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? ഥുല്ലനന്ദാ ഭിക്ഖുനീ ദുക്ഖിതം സഹജീവിനിം നേവ ഉപട്ഠേസി ന ഉപട്ഠാപനായ ഉസ്സുക്കം അകാസി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ഏകേന സമുട്ഠാനേന സമുട്ഠാതി – ധുരനിക്ഖേപേ…പേ….

ഭിക്ഖുനിയാ ഉപസ്സയം ദത്വാ കുപിതായ അനത്തമനായ നിക്കഡ്ഢന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ഥുല്ലനന്ദം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? ഥുല്ലനന്ദാ ഭിക്ഖുനീ ഭിക്ഖുനിയാ ഉപസ്സയം ദത്വാ കുപിതാ അനത്തമനാ നിക്കഡ്ഢി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം തീഹി സമുട്ഠാനേഹി സമുട്ഠാതി…പേ….

സംസട്ഠായ ഭിക്ഖുനിയാ യാവതതിയം സമനുഭാസനായ ന പടിനിസ്സജ്ജന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ചണ്ഡകാളിം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? ചണ്ഡകാളീ ഭിക്ഖുനീ സംസട്ഠാ വിഹരി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ഏകേന സമുട്ഠാനേന സമുട്ഠാതി – ധുരനിക്ഖേപേ…പേ….

അന്തോരട്ഠേ സാസങ്കസമ്മതേ സപ്പടിഭയേ അസത്ഥികായ ചാരികം ചരന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? സമ്ബഹുലാ ഭിക്ഖുനിയോ ആരബ്ഭ. കിസ്മിം വത്ഥുസ്മിന്തി? സമ്ബഹുലാ ഭിക്ഖുനിയോ അന്തോരട്ഠേ സാസങ്കസമ്മതേ സപ്പടിഭയേ അസത്ഥികായോ ചാരികം ചരിംസു, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി – ഏളകലോമകേ…പേ….

തിരോരട്ഠേ സാസങ്കസമ്മതേ സപ്പടിഭയേ അസത്ഥികായ ചാരികം ചരന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? സമ്ബഹുലാ ഭിക്ഖുനിയോ ആരബ്ഭ. കിസ്മിം വത്ഥുസ്മിന്തി? സമ്ബഹുലാ ഭിക്ഖുനിയോ തിരോരട്ഠേ സാസങ്കസമ്മതേ സപ്പടിഭയേ അസത്ഥികായോ ചാരികം ചരിംസു, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി – ഏളകലോമകേ…പേ….

അന്തോവസ്സം ചാരികം ചരന്തിയാ പാചിത്തിയം കത്ഥ പഞ്ഞത്തന്തി? രാജഗഹേ പഞ്ഞത്തം. കം ആരബ്ഭാതി? സമ്ബഹുലാ ഭിക്ഖുനിയോ ആരബ്ഭ. കിസ്മിം വത്ഥുസ്മിന്തി? സമ്ബഹുലാ ഭിക്ഖുനിയോ അന്തോവസ്സം ചാരികം ചരിംസു, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി – ഏളകലോമകേ…പേ….

വസ്സംവുട്ഠായ [വസ്സംവുത്ഥായ (സീ. സ്യാ.)] ഭിക്ഖുനിയാ ചാരികം ന പക്കമന്തിയാ പാചിത്തിയം കത്ഥ പഞ്ഞത്തന്തി? രാജഗഹേ പഞ്ഞത്തം. കം ആരബ്ഭാതി? സമ്ബഹുലാ ഭിക്ഖുനിയോ ആരബ്ഭ. കിസ്മിം വത്ഥുസ്മിന്തി? സമ്ബഹുലാ ഭിക്ഖുനിയോ വസ്സംവുട്ഠാ ചാരികം ന പക്കമിംസു, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ഏകേന സമുട്ഠാനേന സമുട്ഠാതി – പഠമപാരാജികേ…പേ….

തുവട്ടവഗ്ഗോ ചതുത്ഥോ.

൫. ചിത്താഗാരവഗ്ഗോ

൨൨൨. രാജാഗാരം വാ ചിത്താഗാരം വാ ആരാമം വാ ഉയ്യാനം വാ പോക്ഖരണിം വാ ദസ്സനായ ഗച്ഛന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ഛബ്ബഗ്ഗിയാ ഭിക്ഖുനിയോ ആരബ്ഭ. കിസ്മിം വത്ഥുസ്മിന്തി? ഛബ്ബഗ്ഗിയാ ഭിക്ഖുനിയോ രാജാഗാരമ്പി ചിത്താഗാരമ്പി ദസ്സനായ അഗമംസു, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി – ഏളകലോമകേ…പേ….

ആസന്ദിം വാ പല്ലങ്കം വാ പരിഭുഞ്ജന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? സമ്ബഹുലാ ഭിക്ഖുനിയോ ആരബ്ഭ. കിസ്മിം വത്ഥുസ്മിന്തി? സമ്ബഹുലാ ഭിക്ഖുനിയോ ആസന്ദിമ്പി പല്ലങ്കമ്പി പരിഭുഞ്ജിംസു, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി – ഏളകലോമകേ…പേ….

സുത്തം കന്തന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ഛബ്ബഗ്ഗിയാ ഭിക്ഖുനിയോ ആരബ്ഭ. കിസ്മിം വത്ഥുസ്മിന്തി? ഛബ്ബഗ്ഗിയാ ഭിക്ഖുനിയോ സുത്തം കന്തിംസു, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി – ഏളകലോമകേ…പേ….

ഗിഹിവേയ്യാവച്ചം കരോന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? സമ്ബഹുലാ ഭിക്ഖുനിയോ ആരബ്ഭ. കിസ്മിം വത്ഥുസ്മിന്തി? സമ്ബഹുലാ ഭിക്ഖുനിയോ ഗിഹിവേയ്യാവച്ചം അകംസു, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി – ഏളകലോമകേ…പേ….

ഭിക്ഖുനിയാ ‘‘ഏഹായ്യേ ഇമം അധികരണം വൂപസമേഹീ’’തി വുച്ചമാനായ ‘‘സാധൂ’’തി പടിസ്സുണിത്വാ നേവ വൂപസമേന്തിയാ ന വൂപസമായ ഉസ്സുക്കം കരോന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ഥുല്ലനന്ദം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? ഥുല്ലനന്ദാ ഭിക്ഖുനീ ഭിക്ഖുനിയാ – ‘‘ഏഹായ്യേ, ഇമം അധികരണം വൂപസമേഹീ’’തി വുച്ചമാനാ ‘‘സാധൂ’’തി പടിസ്സുണിത്വാ നേവ വൂപസമേസി ന വൂപസമായ ഉസ്സുക്കം അകാസി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ഏകേന സമുട്ഠാനേന സമുട്ഠാതി – ധുരനിക്ഖേപേ…പേ….

അഗാരികസ്സ വാ പരിബ്ബാജകസ്സ വാ പരിബ്ബാജികായ വാ സഹത്ഥാ ഖാദനീയം വാ ഭോജനീയം വാ ദേന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ഥുല്ലനന്ദം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? ഥുല്ലനന്ദാ ഭിക്ഖുനീ അഗാരികസ്സ സഹത്ഥാ ഖാദനീയമ്പി ഭോജനീയമ്പി അദാസി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി – ഏളകലോമകേ…പേ….

ആവസഥചീവരം അനിസ്സജ്ജിത്വാ പരിഭുഞ്ജന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ഥുല്ലനന്ദം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? ഥുല്ലനന്ദാ ഭിക്ഖുനീ ആവസഥചീവരം അനിസ്സജ്ജിത്വാ പരിഭുഞ്ജി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി – കഥിനകേ…പേ….

ആവസഥം അനിസ്സജ്ജിത്വാ ചാരികം പക്കമന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ഥുല്ലനന്ദം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? ഥുല്ലനന്ദാ ഭിക്ഖുനീ ആവസഥം അനിസ്സജ്ജിത്വാ ചാരികം പക്കാമി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി – കഥിനകേ…പേ….

തിരച്ഛാനവിജ്ജം പരിയാപുണന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ഛബ്ബഗ്ഗിയാ ഭിക്ഖുനിയോ ആരബ്ഭ. കിസ്മിം വത്ഥുസ്മിന്തി? ഛബ്ബഗ്ഗിയാ ഭിക്ഖുനിയോ തിരച്ഛാനവിജ്ജം പരിയാപുണിംസു, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി – പദസോധമ്മേ…പേ….

തിരച്ഛാനവിജ്ജം വാചേന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ഛബ്ബഗ്ഗിയാ ഭിക്ഖുനിയോ ആരബ്ഭ. കിസ്മിം വത്ഥുസ്മിന്തി. ഛബ്ബഗ്ഗിയാ ഭിക്ഖുനിയോ തിരച്ഛാനവിജ്ജം വാചേസും, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി – പദസോധമ്മേ…പേ….

ചിത്താഗാരവഗ്ഗോ പഞ്ചമോ.

൬. ആരാമവഗ്ഗോ

൨൨൩. ജാനം സഭിക്ഖുകം ആരാമം അനാപുച്ഛാ പവിസന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? സമ്ബഹുലാ ഭിക്ഖുനിയോ ആരബ്ഭ. കിസ്മിം വത്ഥുസ്മിന്തി? സമ്ബഹുലാ ഭിക്ഖുനിയോ ആരാമം അനാപുച്ഛാ പവിസിംസു, തസ്മിം വത്ഥുസ്മിം. ഏകാ പഞ്ഞത്തി, ദ്വേ അനുപഞ്ഞത്തിയോ. ഛന്നം ആപത്തിസമുട്ഠാനാനം ഏകേന സമുട്ഠാനേന സമുട്ഠാതി – ധുരനിക്ഖേപേ…പേ….

ഭിക്ഖും അക്കോസന്തിയാ പരിഭാസന്തിയാ പാചിത്തിയം കത്ഥ പഞ്ഞത്തന്തി? വേസാലിയം പഞ്ഞത്തം. കം ആരബ്ഭാതി? ഛബ്ബഗ്ഗിയാ ഭിക്ഖുനിയോ ആരബ്ഭ. കിസ്മിം വത്ഥുസ്മിന്തി? ഛബ്ബഗ്ഗിയാ ഭിക്ഖുനിയോ ആയസ്മന്തം ഉപാലിം അക്കോസിംസു, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം തീഹി സമുട്ഠാനേഹി സമുട്ഠാതി…പേ….

ചണ്ഡീകതായ ഗണം പരിഭാസന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ഥുല്ലനന്ദം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? ഥുല്ലനന്ദാ ഭിക്ഖുനീ ചണ്ഡീകതായ ഗണം പരിഭാസി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം തീഹി സമുട്ഠാനേഹി സമുട്ഠാതി…പേ….

നിമന്തിതായ വാ പവാരിതായ വാ ഖാദനീയം വാ ഭോജനീയം വാ അഞ്ഞത്ര ഭുഞ്ജന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? സമ്ബഹുലാ ഭിക്ഖുനിയോ ആരബ്ഭ. കിസ്മിം വത്ഥുസ്മിന്തി? സമ്ബഹുലാ ഭിക്ഖുനിയോ ഭുത്താവിനിയോ പവാരിതാ അഞ്ഞത്ര ഭുഞ്ജിംസു, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ചതൂഹി സമുട്ഠാനേഹി സമുട്ഠാതി…പേ….

കുലം മച്ഛരായന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? അഞ്ഞതരം ഭിക്ഖുനിം ആരബ്ഭ. കിസ്മിം വത്ഥുസ്മിന്തി? അഞ്ഞതരാ ഭിക്ഖുനീ കുലം മച്ഛരായി, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം തീഹി സമുട്ഠാനേഹി സമുട്ഠാതി…പേ….

അഭിക്ഖുകേ ആവാസേ വസ്സം വസന്തിയാ പാചിത്തിയം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? സമ്ബഹുലാ ഭിക്ഖുനിയോ ആരബ്ഭ. കിസ്മിം വത്ഥുസ്മിന്തി? സമ്ബഹുലാ ഭിക്ഖുനിയോ അഭിക്ഖുകേ ആവാസേ വസ്സം വസിംസു, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ദ്വീഹി സമുട്ഠാനേഹി സമുട്ഠാതി – ഏളകലോമകേ…പേ….