൭. പാദുകവഗ്ഗോ

൧൫൬. അനാദരിയം പടിച്ച പാദുകാരുള്ഹസ്സ ധമ്മം ദേസേന്തസ്സ ദുക്കടം…പേ… ഏകാ പഞ്ഞത്തി, ഏകാ അനുപഞ്ഞത്തി. ഛന്നം ആപത്തിസമുട്ഠാനാനം ഏകേന സമുട്ഠാനേന സമുട്ഠാതി – വാചതോ ച ചിത്തതോ ച സമുട്ഠാതി, ന കായതോ…പേ….

അനാദരിയം പടിച്ച ഉപാഹനാരുള്ഹസ്സ ധമ്മം ദേസേന്തസ്സ ദുക്കടം…പേ… ഏകാ പഞ്ഞത്തി, ഏകാ അനുപഞ്ഞത്തി. ഛന്നം ആപത്തിസമുട്ഠാനാനം ഏകേന സമുട്ഠാനേന സമുട്ഠാതി – വാചതോ ച ചിത്തതോ ച സമുട്ഠാതി, ന കായതോ…പേ….

അനാദരിയം പടിച്ച യാനഗതസ്സ ധമ്മം ദേസേന്തസ്സ ദുക്കടം…പേ… ഏകാ പഞ്ഞത്തി, ഏകാ അനുപഞ്ഞത്തി. ഛന്നം ആപത്തിസമുട്ഠാനാനം ഏകേന സമുട്ഠാനേന സമുട്ഠാതി – വാചതോ ച ചിത്തതോ ച സമുട്ഠാതി, ന കായതോ…പേ….

അനാദരിയം പടിച്ച സയനഗതസ്സ ധമ്മം ദേസേന്തസ്സ ദുക്കടം…പേ… ഏകാ പഞ്ഞത്തി, ഏകാ അനുപഞ്ഞത്തി. ഛന്നം ആപത്തിസമുട്ഠാനാനം ഏകേന സമുട്ഠാനേന സമുട്ഠാതി – വാചതോ ച ചിത്തതോ ച സമുട്ഠാതി, ന കായതോ…പേ….

അനാദരിയം പടിച്ച പല്ലത്ഥികായ നിസിന്നസ്സ ധമ്മം ദേസേന്തസ്സ ദുക്കടം…പേ… ഏകാ പഞ്ഞത്തി, ഏകാ അനുപഞ്ഞത്തി. ഛന്നം ആപത്തിസമുട്ഠാനാനം ഏകേന സമുട്ഠാനേ സമുട്ഠാതി – വാചതോ ച ചിത്തതോ ച സമുട്ഠാതി, ന കായതോ…പേ….

അനാദരിയം പടിച്ച വേഠിതസീസസ്സ ധമ്മം ദേസേന്തസ്സ ദുക്കടം…പേ… ഏകാ പഞ്ഞത്തി, ഏകാ അനുപഞ്ഞത്തി. ഛന്നം ആപത്തിസമുട്ഠാനാനം ഏകേന സമുട്ഠാനേന സമുട്ഠാതി – വാചതോ ച ചിത്തതോ ച സമുട്ഠാതി, ന കായതോ…പേ….

അനാദരിയം പടിച്ച ഓഗുണ്ഠിതസീസസ്സ ധമ്മം ദേസേന്തസ്സ ദുക്കടം…പേ… ഏകാ പഞ്ഞത്തി, ഏകാ അനുപഞ്ഞത്തി. ഛന്നം ആപത്തിസമുട്ഠാനാനം ഏകേന സമുട്ഠാനേന സമുട്ഠാതി – വാചതോ ച ചിത്തതോ ച സമുട്ഠാതി, ന കായതോ…പേ….

അനാദരിയം പടിച്ച ഛമായം നിസീദിത്വാ ആസനേ നിസിന്നസ്സ ധമ്മം ദേസേന്തസ്സ ദുക്കടം…പേ… ഏകാ പഞ്ഞത്തി, ഏകാ അനുപഞ്ഞത്തി. ഛന്നം ആപത്തിസമുട്ഠാനാനം ഏകേന സമുട്ഠാനേന സമുട്ഠാതി – കായതോ ച വാചതോ ച ചിത്തതോ ച സമുട്ഠാതി…പേ….

അനാദരിയം പടിച്ച നീചേ ആസനേ നിസീദിത്വാ ഉച്ചേ ആസനേ നിസിന്നസ്സ ധമ്മം ദേസേന്തസ്സ ദുക്കടം…പേ… ഏകാ പഞ്ഞത്തി, ഏകാ അനുപഞ്ഞത്തി. ഛന്നം ആപത്തിസമുട്ഠാനാനം ഏകേന സമുട്ഠാനേന സമുട്ഠാതി – കായതോ ച വാചതോ ച ചിത്തതോ ച സമുട്ഠാതി…പേ….

അനാദരിയം പടിച്ച ഠിതേന നിസിന്നസ്സ ധമ്മം ദേസേന്തസ്സ ദുക്കടം…പേ… ഏകാ പഞ്ഞത്തി, ഏകാ അനുപഞ്ഞത്തി. ഛന്നം ആപത്തിസമുട്ഠാനാനം ഏകേന സമുട്ഠാനേന സമുട്ഠാതി – കായതോ ച വാചതോ ച ചിത്തതോ ച സമുട്ഠാതി…പേ….

അനാദരിയം പടിച്ച പച്ഛതോ ഗച്ഛന്തേന പുരതോ ഗച്ഛന്തസ്സ ധമ്മം ദേസേന്തസ്സ ദുക്കടം…പേ… ഏകാ പഞ്ഞത്തി, ഏകാ അനുപഞ്ഞത്തി. ഛന്നം ആപത്തിസമുട്ഠാനാനം ഏകേന സമുട്ഠാനേന സമുട്ഠാതി – കായതോ ച വാചതോ ച ചിത്തതോ ച സമുട്ഠാതി…പേ….

അനാദരിയം പടിച്ച ഉപ്പഥേന ഗച്ഛന്തേന പഥേന ഗച്ഛന്തസ്സ ധമ്മം ദേസേന്തസ്സ ദുക്കടം…പേ… ഏകാ പഞ്ഞത്തി, ഏകാ അനുപഞ്ഞത്തി. ഛന്നം ആപത്തിസമുട്ഠാനാനം ഏകേന സമുട്ഠാനേന സമുട്ഠാതി – കായതോ ച വാചതോ ച ചിത്തതോ ച സമുട്ഠാതി…പേ….

അനാദരിയം പടിച്ച ഠിതേന ഉച്ചാരം വാ പസ്സാവം വാ കരോന്തസ്സ ദുക്കടം…പേ… ഏകാ പഞ്ഞത്തി, ഏകാ അനുപഞ്ഞത്തി. ഛന്നം ആപത്തിസമുട്ഠാനാനം ഏകേന സമുട്ഠാനേ സമുട്ഠാതി – കായതോ ച ചിത്തതോ ച സമുട്ഠാതി, ന വാചതോ…പേ….

അനാദരിയം പടിച്ച ഹരിതേ ഉച്ചാരം വാ പസ്സാവം വാ ഖേളം വാ കരോന്തസ്സ ദുക്കടം…പേ… ഏകാ പഞ്ഞത്തി, ഏകാ അനുപഞ്ഞത്തി. ഛന്നം ആപത്തിസമുട്ഠാനാനം ഏകേന സമുട്ഠാനേന സമുട്ഠാതി – കായതോ ച ചിത്തതോ ച സമുട്ഠാതി, ന വാചതോ…പേ….

അനാദരിയം പടിച്ച ഉദകേ ഉച്ചാരം വാ പസ്സാവം വാ ഖേളം വാ കരോന്തസ്സ ദുക്കടം…പേ… കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ഛബ്ബഗ്ഗിയേ ഭിക്ഖൂ ആരബ്ഭ. കിസ്മിം വത്ഥുസ്മിന്തി? ഛബ്ബഗ്ഗിയാ ഭിക്ഖൂ ഉദകേ ഉച്ചാരമ്പി പസ്സാവമ്പി ഖേളമ്പി അകംസു, തസ്മിം വത്ഥുസ്മിം. ഏകാ പഞ്ഞത്തി, ഏകാ അനുപഞ്ഞത്തി. ഛന്നം ആപത്തിസമുട്ഠാനാനം ഏകേന സമുട്ഠാനേന സമുട്ഠാതി – കായതോ ച ചിത്തതോ ച സമുട്ഠാതി, ന വാചതോ…പേ….

പാദുകവഗ്ഗോ സത്തമോ.

പഞ്ചസത്തതി സേഖിയാ നിട്ഠിതാ.

തസ്സുദ്ദാനം –

പരിമണ്ഡലം പടിച്ഛന്നം, സുസംവുതോക്ഖിത്തചക്ഖു;

ഉക്ഖിത്തോജ്ജഗ്ഘികാ സദ്ദോ, തയോ ചേവ പചാലനാ.

ഖമ്ഭം ഓഗുണ്ഠിതോ ചേവുക്കുടിപല്ലത്ഥികായ ച;

സക്കച്ചം പത്തസഞ്ഞീ ച, സമസൂപം സമതിത്തികം [സമതിത്ഥികം (ക.)].

സക്കച്ചം പത്തസഞ്ഞീ ച, സപദാനം സമസൂപകം;

ഥൂപകതോ പടിച്ഛന്നം, വിഞ്ഞത്തുജ്ഝാനസഞ്ഞിനാ.

ന മഹന്തം മണ്ഡലം ദ്വാരം, സബ്ബം ഹത്ഥം ന ബ്യാഹരേ;

ഉക്ഖേപോ ഛേദനാ ഗണ്ഡോ, ധുനം സിത്ഥാവകാരകം.

ജിവ്ഹാനിച്ഛാരകഞ്ചേവ, ചപുചപു സുരുസുരു;

ഹത്ഥോ പത്തോ ച ഓട്ഠോ ച, സാമിസം സിത്ഥകേന ച.

ഛത്തപാണിസ്സ സദ്ധമ്മം, ന ദേസേന്തി തഥാഗതാ;

ഏവമേവ ദണ്ഡപാണിസ്സ, സത്ഥആവുധപാണിനം.

പാദുകാ ഉപാഹനാ ചേവ, യാനസേയ്യാഗതസ്സ ച;

പല്ലത്ഥികാ നിസിന്നസ്സ, വേഠിതോഗുണ്ഠിതസ്സ ച.

ഛമാ നീചാസനേ ഠാനേ, പച്ഛതോ ഉപ്പഥേന ച;

ഠിതകേന ന കാതബ്ബം, ഹരിതേ ഉദകമ്ഹി ചാതി.

തേസം വഗ്ഗാനമുദ്ദാനം –

പരിമണ്ഡലഉജ്ജഗ്ഘി, ഖമ്ഭം പിണ്ഡം തഥേവ ച;

കബളാ സുരുസുരു ച, പാദുകേന ച സത്തമാതി.

മഹാവിഭങ്ഗേ കത്ഥപഞ്ഞത്തിവാരോ നിട്ഠിതോ.