൬. സുരുസുരുവഗ്ഗോ

൧൫൫. അനാദരിയം പടിച്ച സുരുസുരുകാരകം ഭുഞ്ജന്തസ്സ ദുക്കടം കത്ഥ പഞ്ഞത്തന്തി? കോസമ്ബിയം പഞ്ഞത്തം. കം ആരബ്ഭാതി? സമ്ബഹുലേ ഭിക്ഖൂ ആരബ്ഭ. കിസ്മിം വത്ഥുസ്മിന്തി? സമ്ബഹുലാ ഭിക്ഖൂ സുരുസുരുകാരകം ഖീരം പിവിംസു, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ഏകേന സമുട്ഠാനേന സമുട്ഠാതി – കായതോ ച ചിത്തതോ ച സമുട്ഠാതി, ന വാചതോ…പേ….

അനാദരിയം പടിച്ച ഹത്ഥനില്ലേഹകം ഭുഞ്ജന്തസ്സ ദുക്കടം…പേ… ഏകാ പഞ്ഞത്തി. ഏകേന സമുട്ഠാനേന സമുട്ഠാതി – കായതോ ച ചിത്തതോ ച സമുട്ഠാതി, ന വാചതോ…പേ….

അനാദരിയം പടിച്ച പത്തനില്ലേഹകം ഭുഞ്ജന്തസ്സ ദുക്കടം…പേ… ഏകാ പഞ്ഞത്തി. ഏകേന സമുട്ഠാനേന സമുട്ഠാതി – കായതോ ച ചിത്തതോ ച സമുട്ഠാതി, ന വാചതോ…പേ….

അനാദരിയം പടിച്ച ഓട്ഠനില്ലേഹകം ഭുഞ്ജന്തസ്സ ദുക്കടം…പേ… ഏകാ പഞ്ഞത്തി. ഏകേന സമുട്ഠാനേന സമുട്ഠാതി – കായതോ ച ചിത്തതോ ച സമുട്ഠാതി, ന വാചതോ…പേ….

അനാദരിയം പടിച്ച സാമിസേന ഹത്ഥേന പാനീയഥാലകം പടിഗ്ഗണ്ഹന്തസ്സ ദുക്കടം കത്ഥ പഞ്ഞത്തന്തി? ഭഗ്ഗേസു പഞ്ഞത്തം. കം ആരബ്ഭാതി? സമ്ബഹുലേ ഭിക്ഖൂ ആരബ്ഭ. കിസ്മിം വത്ഥുസ്മിന്തി? സമ്ബഹുലാ ഭിക്ഖൂ സാമിസേന ഹത്ഥേന പാനീയഥാലകം പടിഗ്ഗഹേസും, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ഏകേന സമുട്ഠാനേന സമുട്ഠാതി – കായതോ ച ചിത്തതോ ച സമുട്ഠാതി, ന വാചതോ…പേ….

അനാദരിയം പടിച്ച സസിത്ഥകം പത്തധോവനം അന്തരഘരേ ഛഡ്ഡേന്തസ്സ ദുക്കടം കത്ഥ പഞ്ഞത്തന്തി? ഭഗ്ഗേസു പഞ്ഞത്തം. കം ആരബ്ഭാതി? സമ്ബഹുലേ ഭിക്ഖൂ ആരബ്ഭ. കിസ്മിം വത്ഥുസ്മിന്തി? സമ്ബഹുലാ ഭിക്ഖൂ സസിത്ഥകം പത്തധോവനം അന്തരഘരേ ഛഡ്ഡേസും, തസ്മിം വത്ഥുസ്മിം. ഏകാ പഞ്ഞത്തി. ഛന്നം ആപത്തിസമുട്ഠാനാനം ഏകേന സമുട്ഠാനേന സമുട്ഠാതി – കായതോ ച ചിത്തതോ ച സമുട്ഠാതി, ന വാചതോ…പേ….

അനാദരിയം പടിച്ച ഛത്തപാണിസ്സ ധമ്മം ദേസേന്തസ്സ ദുക്കടം കത്ഥ പഞ്ഞത്തന്തി? സാവത്ഥിയം പഞ്ഞത്തം. കം ആരബ്ഭാതി? ഛബ്ബഗ്ഗിയേ ഭിക്ഖൂ ആരബ്ഭ. കിസ്മിം വത്ഥുസ്മിന്തി? ഛബ്ബഗ്ഗിയാ ഭിക്ഖൂ ഛത്തപാണിസ്സ ധമ്മം ദേസേസും, തസ്മിം വത്ഥുസ്മിം. ഏകാ പഞ്ഞത്തി, ഏകാ അനുപഞ്ഞത്തി. ഛന്നം ആപത്തിസമുട്ഠാനാനം ഏകേന സമുട്ഠാനേന സമുട്ഠാതി – വാചതോ ച ചിത്തതോ ച സമുട്ഠാതി, ന കായതോ…പേ….

അനാദരിയം പടിച്ച ദണ്ഡപാണിസ്സ ധമ്മം ദേസേന്തസ്സ ദുക്കടം…പേ… ഏകാ പഞ്ഞത്തി, ഏകാ അനുപഞ്ഞത്തി. ഛന്നം ആപത്തിസമുട്ഠാനാനം ഏകേന സമുട്ഠാനേന സമുട്ഠാതി – വാചതോ ച ചിത്തതോ ച സമുട്ഠാതി, ന കായതോ…പേ….

അനാദരിയം പടിച്ച സത്ഥപാണിസ്സ ധമ്മം ദേസേന്തസ്സ ദുക്കടം…പേ… ഏകാ പഞ്ഞത്തി, ഏകാ അനുപഞ്ഞത്തി. ഛന്നം ആപത്തിസമുട്ഠാനാനം ഏകേന സമുട്ഠാനേന സമുട്ഠാതി – വാചതോ ച ചിത്തതോ ച സമുട്ഠാതി, ന കായതോ…പേ….

അനാദരിയം പടിച്ച ആവുധപാണിസ്സ ധമ്മം ദേസേന്തസ്സ ദുക്കടം…പേ… ഏകാ പഞ്ഞത്തി, ഏകാ അനുപഞ്ഞത്തി. ഛന്നം ആപത്തിസമുട്ഠാനാനം ഏകേന സമുട്ഠാനേന സമുട്ഠാതി – വാചതോ ച ചിത്തതോ ച സമുട്ഠാതി, ന കായതോ…പേ….

സുരുസുരുവഗ്ഗോ ഛട്ഠോ.