൪. ചതുത്ഥപാരാജികം

൧൯൩. [ഇദം വത്ഥു പാചി. ൬൭] തേന സമയേന ബുദ്ധോ ഭഗവാ വേസാലിയം വിഹരതി മഹാവനേ കൂടാഗാരസാലായം. തേന ഖോ പന സമയേന സമ്ബഹുലാ സന്ദിട്ഠാ സമ്ഭത്താ ഭിക്ഖൂ വഗ്ഗുമുദായ നദിയാ തീരേ വസ്സം ഉപഗച്ഛിംസു. തേന ഖോ പന സമയേന വജ്ജീ ദുബ്ഭിക്ഖാ ഹോതി ദ്വീഹിതികാ സേതട്ഠികാ സലാകാവുത്താ, ന സുകരാ ഉഞ്ഛേന പഗ്ഗഹേന യാപേതും. അഥ ഖോ തേസം ഭിക്ഖൂനം ഏതദഹോസി – ‘‘ഏതരഹി ഖോ വജ്ജീ ദുബ്ഭിക്ഖാ ദ്വീഹിതികാ സേതട്ഠികാ സലാകാവുത്താ, ന സുകരാ ഉഞ്ഛേന പഗ്ഗഹേന യാപേതും. കേന നു ഖോ മയം ഉപായേന സമഗ്ഗാ സമ്മോദമാനാ അവിവദമാനാ ഫാസുകം വസ്സം വസേയ്യാമ, ന ച പിണ്ഡകേന കിലമേയ്യാമാ’’തി? ഏകച്ചേ ഏവമാഹംസു – ‘‘ഹന്ദ മയം, ആവുസോ, ഗിഹീനം കമ്മന്തം അധിട്ഠേമ, ഏവം തേ അമ്ഹാകം ദാതും മഞ്ഞിസ്സന്തി. ഏവം മയം സമഗ്ഗാ സമ്മോദമാനാ അവിവദമാനാ ഫാസുകം വസ്സം വസിസ്സാമ, ന ച പിണ്ഡകേന കിലമിസ്സാമാ’’തി. ഏകച്ചേ ഏവമാഹംസു – ‘‘അലം, ആവുസോ, കിം ഗിഹീനം കമ്മന്തം അധിട്ഠിതേന! ഹന്ദ മയം, ആവുസോ, ഗിഹീനം ദൂതേയ്യം ഹരാമ, ഏവം തേ അമ്ഹാകം ദാതും മഞ്ഞിസ്സന്തി. ഏവം മയം സമഗ്ഗാ സമ്മോദമാനാ അവിവദമാനാ ഫാസുകം വസ്സം വസിസ്സാമ, ന ച പിണ്ഡകേന കിലമിസ്സാമാ’’തി. ഏകച്ചേ ഏവമാഹംസു – ‘‘അലം, ആവുസോ, കിം ഗിഹീനം കമ്മന്തം അധിട്ഠിതേന! കിം ഗിഹീനം ദൂതേയ്യം ഹടേന! ഹന്ദ മയം, ആവുസോ, ഗിഹീനം അഞ്ഞമഞ്ഞസ്സ ഉത്തരിമനുസ്സധമ്മസ്സ വണ്ണം ഭാസിസ്സാമ – ‘അസുകോ ഭിക്ഖു പഠമസ്സ ഝാനസ്സ ലാഭീ, അസുകോ ഭിക്ഖു ദുതിയസ്സ ഝാനസ്സ ലാഭീ, അസുകോ ഭിക്ഖു തതിയസ്സ ഝാനസ്സ ലാഭീ, അസുകോ ഭിക്ഖു ചതുത്ഥസ്സ ഝാനസ്സ ലാഭീ, അസുകോ ഭിക്ഖു സോതാപന്നോ, അസുകോ ഭിക്ഖു സകദാഗാമീ, അസുകോ ഭിക്ഖു അനാഗാമീ, അസുകോ ഭിക്ഖു അരഹാ, അസുകോ ഭിക്ഖു തേവിജ്ജോ, അസുകോ ഭിക്ഖു ഛളഭിഞ്ഞോ’തി. ഏവം തേ അമ്ഹാകം ദാതും മഞ്ഞിസ്സന്തി. ഏവം മയം സമഗ്ഗാ സമ്മോദമാനാ അവിവദമാനാ ഫാസുകം വസ്സം വസിസ്സാമ, ന ച പിണ്ഡകേന കിലമിസ്സാമാ’’തി. ‘‘ഏസോയേവ ഖോ, ആവുസോ, സേയ്യോ യോ അമ്ഹാകം ഗിഹീനം അഞ്ഞമഞ്ഞസ്സ ഉത്തരിമനുസ്സധമ്മസ്സ വണ്ണോ ഭാസിതോ’’തി.

൧൯൪. അഥ ഖോ തേ ഭിക്ഖൂ ഗിഹീനം അഞ്ഞമഞ്ഞസ്സ ഉത്തരിമനുസ്സധമ്മസ്സ വണ്ണം ഭാസിംസു – ‘‘അസുകോ ഭിക്ഖു പഠമസ്സ ഝാനസ്സ ലാഭീ…പേ… അസുകോ ഭിക്ഖു ഛളഭിഞ്ഞോ’’തി. അഥ ഖോ തേ മനുസ്സാ – ‘‘ലാഭാ വത നോ, സുലദ്ധം വത നോ, യേസം വത നോ ഏവരൂപാ ഭിക്ഖൂ വസ്സം ഉപഗതാ; ന വത നോ ഇതോ പുബ്ബേ ഏവരൂപാ ഭിക്ഖൂ വസ്സം ഉപഗതാ യഥയിമേ ഭിക്ഖൂ സീലവന്തോ കല്യാണധമ്മാ’’തി, തേ ന താദിസാനി ഭോജനാനി അത്തനാ പരിഭുഞ്ജന്തി മാതാപിതൂനം ദേന്തി പുത്തദാരസ്സ ദേന്തി ദാസകമ്മകരപോരിസസ്സ ദേന്തി മിത്താമച്ചാനം ദേന്തി ഞാതിസാലോഹിതാനം ദേന്തി, യാദിസാനി ഭിക്ഖൂനം ദേന്തി. തേ ന താദിസാനി ഖാദനീയാനി സായനീയാനി പാനാനി അത്തനാ ഖാദന്തി സായന്തി പിവന്തി മാതാപിതൂനം ദേന്തി പുത്തദാരസ്സ ദേന്തി ദാസകമ്മകരപോരിസസ്സ ദേന്തി മിത്താമച്ചാനം ദേന്തി ഞാതിസാലോഹിതാനം ദേന്തി, യാദിസാനി ഭിക്ഖൂനം ദേന്തി. അഥ ഖോ തേ ഭിക്ഖൂ വണ്ണവാ അഹേസും പീണിന്ദ്രിയാ പസന്നമുഖവണ്ണാ വിപ്പസന്നഛവിവണ്ണാ.

ആചിണ്ണം ഖോ പനേതം വസ്സംവുട്ഠാനം ഭിക്ഖൂനം ഭഗവന്തം ദസ്സനായ ഉപസങ്കമിതും. അഥ ഖോ തേ ഭിക്ഖൂ വസ്സംവുട്ഠാ തേമാസച്ചയേന സേനാസനം സംസാമേത്വാ പത്തചീവരം ആദായ യേന വേസാലീ തേന പക്കമിംസു. അനുപുബ്ബേന യേന വേസാലീ മഹാവനം കൂടാഗാരസാലാ യേന ഭഗവാ തേനുപസങ്കമിംസു; ഉപസങ്കമിത്വാ ഭഗവന്തം അഭിവാദേത്വാ ഏകമന്തം നിസീദിംസു.

തേന ഖോ പന സമയേന ദിസാസു വസ്സംവുട്ഠാ ഭിക്ഖൂ കിസാ ഹോന്തി ലൂഖാ ദുബ്ബണ്ണാ ഉപ്പണ്ഡുപ്പണ്ഡുകജാതാ ധമനിസന്ഥതഗത്താ; വഗ്ഗുമുദാതീരിയാ പന ഭിക്ഖൂ വണ്ണവാ ഹോന്തി പീണിന്ദ്രിയാ പസന്നമുഖവണ്ണാ വിപ്പസന്നഛവിവണ്ണാ. ആചിണ്ണം ഖോ പനേതം ബുദ്ധാനം ഭഗവന്താനം ആഗന്തുകേഹി ഭിക്ഖൂഹി സദ്ധിം പടിസമ്മോദിതും. അഥ ഖോ ഭഗവാ വഗ്ഗുമുദാതീരിയേ ഭിക്ഖൂ ഏതദവോച – ‘‘കച്ചി, ഭിക്ഖവേ, ഖമനീയം കച്ചി യാപനീയം കച്ചി സമഗ്ഗാ സമ്മോദമാനാ അവിവദമാനാ ഫാസുകം വസ്സം വസിത്ഥ ന ച പിണ്ഡകേന കിലമിത്ഥാ’’തി? ‘‘ഖമനീയം, ഭഗവാ, യാപനീയം, ഭഗവാ. സമഗ്ഗാ ച മയം, ഭന്തേ, സമ്മോദമാനാ അവിവദമാനാ ഫാസുകം വസ്സം വസിമ്ഹാ, ന ച പിണ്ഡകേന കിലമിമ്ഹാ’’തി. ജാനന്താപി തഥാഗതാ പുച്ഛന്തി, ജാനന്താപി ന പുച്ഛന്തി…പേ… ദ്വീഹാകാരേഹി ബുദ്ധാ ഭഗവന്തോ ഭിക്ഖൂ പടിപുച്ഛന്തി – ധമ്മം വാ ദേസേസ്സാമ, സാവകാനം വാ സിക്ഖാപദം പഞ്ഞാപേസ്സാമാതി. അഥ ഖോ ഭഗവാ വഗ്ഗുമുദാതീരിയേ ഭിക്ഖൂ ഏതദവോച – ‘‘യഥാ കഥം പന തുമ്ഹേ, ഭിക്ഖവേ, സമഗ്ഗാ സമ്മോദമാനാ അവിവദമാനാ ഫാസുകം വസ്സം വസിത്ഥ ന ച പിണ്ഡകേന കിലമിത്ഥാ’’തി? അഥ ഖോ തേ ഭിക്ഖൂ ഭഗവതോ ഏതമത്ഥം ആരോചേസും – ‘‘കച്ചി പന വോ, ഭിക്ഖവേ, ഭൂത’’ന്തി? ‘‘അഭൂതം, ഭഗവാ’’തി. വിഗരഹി ബുദ്ധോ ഭഗവാ – ‘‘അനനുച്ഛവികം, മോഘപുരിസാ, അനനുലോമികം അപ്പതിരൂപം അസ്സാമണകം അകപ്പിയം അകരണീയം. കഥഞ്ഹി നാമ തുമ്ഹേ, മോഘപുരിസാ, ഉദരസ്സ കാരണാ ഗിഹീനം അഞ്ഞമഞ്ഞസ്സ ഉത്തരിമനുസ്സധമ്മസ്സ വണ്ണം ഭാസിസ്സഥ! വരം തുമ്ഹേഹി, മോഘപുരിസാ, തിണ്ഹേന ഗോവികന്തനേന [ഗോവികത്തനേന (സീ. ക.)] കുച്ഛിം പരികന്തോ, ന ത്വേവ ഉദരസ്സ കാരണാ ഗിഹീനം അഞ്ഞമഞ്ഞസ്സ ഉത്തരിമനുസ്സധമ്മസ്സ വണ്ണോ ഭാസിതോ! തം കിസ്സ ഹേതു? തതോ നിദാനഞ്ഹി, മോഘപുരിസാ, മരണം വാ നിഗച്ഛേയ്യ മരണമത്തം വാ ദുക്ഖം, ന ത്വേവ തപ്പച്ചയാ കായസ്സ ഭേദാ പരം മരണാ അപായം ദുഗ്ഗതിം വിനിപാതം നിരയം ഉപപജ്ജേയ. ഇതോ നിദാനഞ്ച ഖോ, മോഘപുരിസാ, കായസ്സ ഭേദാ പരം മരണാ അപായം ദുഗ്ഗതിം വിനിപാതം നിരയം ഉപപജ്ജേയ്യ. നേതം, മോഘപുരിസാ, അപ്പസന്നാനം വാ പസാദായ’’…പേ… വിഗരഹിത്വാ ധമ്മിം കഥം കത്വാ ഭിക്ഖൂ ആമന്തേസി –

൧൯൫. ‘‘പഞ്ചിമേ, ഭിക്ഖവേ, മഹാചോരാ സന്തോ സംവിജ്ജമാനാ ലോകസ്മിം. കതമേ പഞ്ച? ഇധ, ഭിക്ഖവേ, ഏകച്ചസ്സ മഹാചോരസ്സ ഏവം ഹോതി – ‘കുദാസ്സു നാമാഹം സതേന വാ സഹസ്സേന വാ പരിവുതോ ഗാമനിഗമരാജധാനീസു ആഹിണ്ഡിസ്സാമി ഹനന്തോ ഘാതേന്തോ ഛിന്ദന്തോ ഛേദാപേന്തോ പചന്തോ പാചേന്തോ’തി! സോ അപരേന സമയേന സതേന വാ സഹസ്സേന വാ പരിവുതോ ഗാമനിഗമരാജധാനീസു ആഹിണ്ഡതി ഹനന്തോ ഘാതേന്തോ ഛിന്ദന്തോ ഛേദാപേന്തോ പചന്തോ പാചേന്തോ. ഏവമേവ ഖോ, ഭിക്ഖവേ, ഇധേകച്ചസ്സ പാപഭിക്ഖുനോ ഏവം ഹോതി – ‘കുദാസ്സു നാമാഹം സതേന വാ സഹസ്സേന വാ പരിവുതോ ഗാമനിഗമരാജധാനീസു ചാരികം ചരിസ്സാമി സക്കതോ ഗരുകതോ മാനിതോ പൂജിതോ അപചിതോ ഗഹട്ഠാനഞ്ചേവ പബ്ബജിതാനഞ്ച, ലാഭീ ചീവരപിണ്ഡപാതസേനാസനഗിലാനപ്പച്ചയഭേസജ്ജപരിക്ഖാരാന’ന്തി! സോ അപരേന സമയേന സതേന വാ സഹസ്സേന വാ പരിവുതോ ഗാമനിഗമരാജധാനീസു ചാരികം ചരതി സക്കതോ ഗരുകതോ മാനിതോ പൂജിതോ അപചിതോ ഗഹട്ഠാനഞ്ചേവ പബ്ബജിതാനഞ്ച, ലാഭീ ചീവരപിണ്ഡപാതസേനാസനഗിലാനപ്പച്ചയഭേസജ്ജപരിക്ഖാരാനം. അയം, ഭിക്ഖവേ, പഠമോ മഹാചോരോ സന്തോ സംവിജ്ജമാനോ ലോകസ്മിം.

‘‘പുന ചപരം, ഭിക്ഖവേ, ഇധേകച്ചോ പാപഭിക്ഖു തഥാഗതപ്പവേദിതം ധമ്മവിനയം പരിയാപുണിത്വാ അത്തനോ ദഹതി. അയം, ഭിക്ഖവേ, ദുതിയോ മഹാചോരോ സന്തോ സംവിജ്ജമാനോ ലോകസ്മിം.

‘‘പുന ചപരം, ഭിക്ഖവേ, ഇധേകച്ചോ പാപഭിക്ഖു സുദ്ധം ബ്രഹ്മചാരിം പരിസുദ്ധം ബ്രഹ്മചരിയം ചരന്തം അമൂലകേന അബ്രഹ്മചരിയേന അനുദ്ധംസേതി. അയം, ഭിക്ഖവേ, തതിയോ മഹാചോരോ സന്തോ സംവിജ്ജമാനോ ലോകസ്മിം.

‘‘പുന ചപരം, ഭിക്ഖവേ, ഇധേകച്ചോ പാപഭിക്ഖു യാനി താനി സങ്ഘസ്സ ഗരുഭണ്ഡാനി ഗരുപരിക്ഖാരാനി, സേയ്യഥിദം – ആരാമോ ആരാമവത്ഥു വിഹാരോ വിഹാരവത്ഥു മഞ്ചോ പീഠം ഭിസി ബിമ്ബോഹനം [ബിമ്ബോഹനം (സീ. സ്യാ.)] ലോഹകുമ്ഭീ ലോഹഭാണകം ലോഹവാരകോ ലോഹകടാഹം വാസീ പരസു [ഫരസു (സീ. സ്യാ.)] കുഠാരീ കുദാലോ നിഖാദനം വല്ലി വേളു മുഞ്ജം പബ്ബജം തിണം മത്തികാ ദാരുഭണ്ഡം മത്തികാഭണ്ഡം, തേഹി ഗിഹീം സങ്ഗണ്ഹാതി ഉപലാപേതി. അയം, ഭിക്ഖവേ, ചതുത്ഥോ മഹാചോരോ സന്തോ സംവിജ്ജമാനോ ലോകസ്മിം.

‘‘സദേവകേ, ഭിക്ഖവേ, ലോകേ സമാരകേ സബ്രഹ്മകേ സസ്സമണബ്രാഹ്മണിയാ പജായ സദേവമനുസ്സായ അയം അഗ്ഗോ മഹാചോരോ യോ അസന്തം അഭൂതം ഉത്തരിമനുസ്സധമ്മം ഉല്ലപതി. തം കിസ്സ ഹേതു? ഥേയ്യായ വോ, ഭിക്ഖവേ, രട്ഠപിണ്ഡോ ഭുത്തോ’’തി.

[സം. നി. ൧.൩൫] അഞ്ഞഥാ സന്തമത്താനം, അഞ്ഞഥാ യോ പവേദയേ;

നികച്ച കിതവസ്സേവ, ഭുത്തം ഥേയ്യേന തസ്സ തം.

[ധ. പ. ൩൦൭ ധമ്മപദേപി] കാസാവകണ്ഠാ ബഹവോ, പാപധമ്മാ അസഞ്ഞതാ;

പാപാ പാപേഹി കമ്മേഹി, നിരയം തേ ഉപപജ്ജരേ.

[ധ. പ. ൩൦൭ ധമ്മപദേപി] സേയ്യോ അയോഗുളോ ഭുത്തോ, തത്തോ അഗ്ഗിസിഖൂപമോ;

യഞ്ചേ ഭുഞ്ജേയ്യ ദുസ്സീലോ, രട്ഠപിണ്ഡം അസഞ്ഞതോതി.

അഥ ഖോ ഭഗവാ തേ വഗ്ഗുമുദാതീരിയേ ഭിക്ഖൂ അനേകപരിയായേന വിഗരഹിത്വാ ദുബ്ഭരതായ ദുപ്പോസതായ…പേ… ഏവഞ്ച പന, ഭിക്ഖവേ, ഇമം സിക്ഖാപദം ഉദ്ദിസേയ്യാഥ –

‘‘യോ പന ഭിക്ഖു അനഭിജാനം ഉത്തരിമനുസ്സധമ്മം അത്തുപനായികം അലമരിയഞാണദസ്സനം സമുദാചരേയ്യ – ‘ഇതി ജാനാമി ഇതി പസ്സാമീ’തി, തതോ അപരേന സമയേന സമനുഗ്ഗാഹീയമാനോ വാ അസമനുഗ്ഗാഹീയമാനോ വാ ആപന്നോ വിസുദ്ധാപേക്ഖോ ഏവം വദേയ്യ – ‘അജാനമേവം, ആവുസോ, അവചം ജാനാമി, അപസ്സം പസ്സാമി. തുച്ഛം മുസാ വിലപി’ന്തി, അയമ്പി പാരാജികോ ഹോതി അസംവാസോ’’തി.

ഏവഞ്ചിദം ഭഗവതാ ഭിക്ഖൂനം സിക്ഖാപദം പഞ്ഞത്തം ഹോതി.

൧൯൬. തേന ഖോ പന സമയേന സമ്ബഹുലാ ഭിക്ഖൂ അദിട്ഠേ ദിട്ഠസഞ്ഞിനോ അപത്തേ പത്തസഞ്ഞിനോ അനധിഗതേ അധിഗതസഞ്ഞിനോ അസച്ഛികതേ സച്ഛികതസഞ്ഞിനോ അധിമാനേന അഞ്ഞം ബ്യാകരിംസു. തേസം അപരേന സമയേന രാഗായപി ചിത്തം നമതി ദോസായപി ചിത്തം നമതി മോഹായപി ചിത്തം നമതി. തേസം കുക്കുച്ചം അഹോസി – ‘‘ഭഗവതാ സിക്ഖാപദം പഞ്ഞത്തം. മയഞ്ചമ്ഹ അദിട്ഠേ ദിട്ഠസഞ്ഞിനോ അപത്തേ പത്തസഞ്ഞിനോ അനധിഗതേ അധിഗതസഞ്ഞിനോ അസച്ഛികതേ സച്ഛികതസഞ്ഞിനോ, അധിമാനേന അഞ്ഞം ബ്യാകരിമ്ഹാ. കച്ചി നു ഖോ മയം പാരാജികം ആപത്തിം ആപന്നാ’’തി? തേ ആയസ്മതോ ആനന്ദസ്സ ഏതമത്ഥം ആരോചേസും. ആയസ്മാ ആനന്ദോ ഭഗവതോ ഏതമത്ഥം ആരോചേസി. ‘‘ഹോന്തി യേ തേ, ആനന്ദ [ഹോന്തി യേവാനന്ദ (സ്യാ.), ഹോന്തി തേ ആനന്ദ (സീ.)], ഭിക്ഖൂ അദിട്ഠേ ദിട്ഠസഞ്ഞിനോ അപത്തേ പത്തസഞ്ഞിനോ അനധിഗതേ അധിഗതസഞ്ഞിനോ അസച്ഛികതേ സച്ഛികതസഞ്ഞിനോ അധിമാനേന അഞ്ഞം ബ്യാകരോന്തി. തഞ്ച ഖോ ഏതം അബ്ബോഹാരിക’’ന്തി.

‘‘ഏവഞ്ച പന, ഭിക്ഖവേ, ഇമം സിക്ഖാപദം ഉദ്ദിസേയ്യാഥ –

൧൯൭. ‘‘യോ പന ഭിക്ഖു അനഭിജാനം ഉത്തരിമനുസ്സധമ്മം അത്തുപനായികം അലമരിയഞാണദസ്സനം സമുദാചരേയ്യ – ‘ഇതി ജാനാമി ഇതി പസ്സാമീ’തി, തതോ അപരേന സമയേന സമനുഗ്ഗാഹീയമാനോ വാ അസമനുഗ്ഗാഹീയമാനോ വാ ആപന്നോ വിസുദ്ധാപേക്ഖോ ഏവം വദേയ്യ – ‘അജാനമേവം, ആവുസോ, അവചം ജാനാമി, അപസ്സം പസ്സാമി. തുച്ഛം മുസാ വിലപി’ന്തി, അഞ്ഞത്ര അധിമാനാ, അയമ്പി പാരാജികോ ഹോതി അസംവാസോ’’തി.

൧൯൮. യോ പനാതി യോ യാദിസോ…പേ… ഭിക്ഖൂതി…പേ… അയം ഇമസ്മിം അത്ഥേ അധിപ്പേതോ ഭിക്ഖൂതി.

അനഭിജാനന്തി അസന്തം അഭൂതം അസംവിജ്ജമാനം അജാനന്തോ അപസ്സന്തോ അത്തനി കുസലം ധമ്മം – അത്ഥി മേ കുസലോ ധമ്മോതി.

[പാചി. ൭൦] ഉത്തരിമനുസ്സധമ്മോ നാമ ഝാനം വിമോക്ഖോ [വിമോക്ഖം (സീ. സ്യാ.)] സമാധി സമാപത്തി ഞാണദസ്സനം മഗ്ഗഭാവനാ ഫലസച്ഛികിരിയാ കിലേസപ്പഹാനം വിനീവരണതാ ചിത്തസ്സ സുഞ്ഞാഗാരേ അഭിരതി.

അത്തുപനായികന്തി തേ വാ കുസലേ ധമ്മേ അത്തനി ഉപനേതി അത്താനം വാ തേസു കുസലേസു ധമ്മേസു ഉപനേതി.

ഞാണന്തി തിസ്സോ വിജ്ജാ. ദസ്സനന്തി യം ഞാണം തം ദസ്സനം. യം ദസ്സനം തം ഞാണം.

സമുദാചരേയ്യാതി ആരോചേയ്യ ഇത്ഥിയാ വാ പുരിസസ്സ വാ ഗഹട്ഠസ്സ വാ പബ്ബജിതസ്സ വാ.

ഇതി ജാനാമി ഇതി പസ്സാമീതി ജാനാമഹം ഏതേ ധമ്മേ, പസ്സാമഹം ഏതേ ധമ്മേ അത്ഥി ച ഏതേ ധമ്മാ മയി, അഹഞ്ച ഏതേസു ധമ്മേസു സന്ദിസ്സാമീതി.

തതോ അപരേന സമയേനാതി യസ്മിം ഖണേ സമുദാചിണ്ണം ഹോതി തം ഖണം തം ലയം തം മുഹുത്തം വീതിവത്തേ.

സമനുഗ്ഗാഹീയമാനോതി യം വത്ഥു പടിഞ്ഞാതം ഹോതി തസ്മിം വത്ഥുസ്മിം സമനുഗ്ഗാഹീയമാനോ – ‘‘കിന്തേ അധിഗതം, കിന്തി തേ അധിഗതം, കദാ തേ അധിഗതം, കത്ഥ തേ അധിഗതം, കതമേ തേ കിലേസാ പഹീനാ, കതമേസം ത്വം ധമ്മാനം ലാഭീ’’തി.

അസമനുഗ്ഗാഹീയമാനോതി ന കേനചി വുച്ചമാനോ.

ആപന്നോതി പാപിച്ഛോ ഇച്ഛാപകതോ അസന്തം അഭൂതം ഉത്തരിമനുസ്സധമ്മം ഉല്ലപിത്വാ പാരാജികം ആപത്തിം ആപന്നോ ഹോതി.

വിസുദ്ധാപേക്ഖോതി ഗിഹീ വാ ഹോതുകാമോ ഉപാസകോ വാ ഹോതുകാമോ ആരാമികോ വാ ഹോതുകാമോ സാമണേരോ വാ ഹോതുകാമോ.

അജാനമേവം, ആവുസോ, അവചം – ജാനാമി, അപസ്സം പസ്സാമീതി നാഹം ഏതേ ധമ്മേ ജാനാമി, നാഹം ഏതേ ധമ്മേ പസ്സാമി, നത്ഥി ച ഏതേ ധമ്മാ മയി, ന ചാഹം ഏതേസു ധമ്മേസു സന്ദിസ്സാമീതി.

തുച്ഛം മുസാ വിലപിന്തി തുച്ഛകം മയാ ഭണിതം, മുസാ മയാ ഭണിതം, അഭൂതം മയാ ഭണിതം, അജാനന്തേന മയാ ഭണിതം.

അഞ്ഞത്ര അധിമാനാതി ഠപേത്വാ അധിമാനം.

അയമ്പീതി പുരിമേ ഉപാദായ വുച്ചതി.

പാരാജികോ ഹോതീതി സേയ്യഥാപി നാമ താലോ മത്ഥകച്ഛിന്നോ അഭബ്ബോ പുന വിരൂള്ഹിയാ, ഏവമേവ ഭിക്ഖു പാപിച്ഛോ ഇച്ഛാപകതോ അസന്തം അഭൂതം ഉത്തരിമനുസ്സധമ്മം ഉല്ലപിത്വാ അസ്സമണോ ഹോതി അസക്യപുത്തിയോ. തേന വുച്ചതി – ‘‘പാരാജികോ ഹോതീ’’തി.

അസംവാസോതി സംവാസോ നാമ ഏകകമ്മം ഏകുദ്ദേസോ സമസിക്ഖതാ – ഏസോ സംവാസോ നാമ. സോ തേന സദ്ധിം നത്ഥി. തേന വുച്ചതി – ‘‘അസംവാസോ’’തി.

൧൯൯. ഉത്തരിമനുസ്സധമ്മോ നാമ ഝാനം വിമോക്ഖോ സമാധി സമാപത്തി ഞാണദസ്സനം മഗ്ഗഭാവനാ ഫലസച്ഛികിരിയാ കിലേസപ്പഹാനം വിനീവരണതാ ചിത്തസ്സ സുഞ്ഞാഗാരേ അഭിരതി.

[പാചി. ൭൦] ഝാനന്തി പഠമം ഝാനം ദുതിയം ഝാനം തതിയം ഝാനം ചതുത്ഥം ഝാനം.

[പാചി. ൭൦] വിമോക്ഖോതി സുഞ്ഞതോ വിമോക്ഖോ അനിമിത്തോ വിമോക്ഖോ അപ്പണിഹിതോ വിമോക്ഖോ.

[പാചി. ൭൦] സമാധീതി സുഞ്ഞതോ സമാധി അനിമിത്തോ സമാധി അപ്പണിഹിതോ സമാധി.

[പാചി. ൭൦] സമാപത്തീതി സുഞ്ഞതാ സമാപത്തി അനിമിത്താ സമാപത്തി അപ്പണിഹിതാ സമാപത്തി.

[പാചി. ൭൦] ഞാണദസ്സനന്തി തിസ്സോ വിജ്ജാ.

[പാചി. ൭൦] മഗ്ഗഭാവനാതി ചത്താരോ സതിപട്ഠാനാ, ചത്താരോ സമ്മപ്പധാനാ, ചത്താരോ ഇദ്ധിപാദാ, പഞ്ചിന്ദ്രിയാനി, പഞ്ച ബലാനി, സത്ത ബോജ്ഝങ്ഗാ, അരിയോ അട്ഠങ്ഗികോ മഗ്ഗോ.

[പാചി. ൭൦] ഫലസച്ഛികിരിയാതി സോതാപത്തിഫലസ്സ സച്ഛികിരിയാ, സകദാഗാമിഫലസ്സ സച്ഛികിരിയാ, അനാഗാമിഫലസ്സ സച്ഛികിരിയാ, അരഹത്തസ്സ [അരഹത്തഫലസ്സ (സ്യാ.)] സച്ഛികിരിയാ.

[പാചി. ൭൦] കിലേസപ്പഹാനന്തി രാഗസ്സ പഹാനം ദോസസ്സ പഹാനം മോഹസ്സ പഹാനം.

[പാചി. ൭൦] വിനീവരണതാ ചിത്തസ്സാതി രാഗാ ചിത്തം വിനീവരണതാ, ദോസാ ചിത്തം വിനീവരണതാ, മോഹാ ചിത്തം വിനീവരണതാ.

[പാചി. ൭൦] സുഞ്ഞാഗാരേ അഭിരതീതി പഠമേന ഝാനേന സുഞ്ഞാഗാരേ അഭിരതി, ദുതിയേന ഝാനേന സുഞ്ഞാഗാരേ അഭിരതി, തതിയേന ഝാനേന സുഞ്ഞാഗാരേ അഭിരതി, ചതുത്ഥേന ഝാനേന സുഞ്ഞാഗാരേ അഭിരതി.

൨൦൦. തീഹാകാരേഹി പഠമം ഝാനം സമാപജ്ജിന്തി സമ്പജാനമുസാ ഭണന്തസ്സ ആപത്തി പാരാജികസ്സ, പുബ്ബേവസ്സ ഹോതി മുസാ ഭണിസ്സന്തി, ഭണന്തസ്സ ഹോതി മുസാ ഭണാമീതി, ഭണിതസ്സ ഹോതി മുസാ മയാ ഭണിതന്തി.

ചതൂഹാകാരേഹി പഠമം ഝാനം സമാപജ്ജിന്തി സമ്പജാനമുസാ ഭണന്തസ്സ ആപത്തി പാരാജികസ്സ – പുബ്ബേവസ്സ ഹോതി മുസാ ഭണിസ്സന്തി, ഭണന്തസ്സ ഹോതി മുസാ ഭണാമീതി, ഭണിതസ്സ ഹോതി മുസാ മയാ ഭണിതന്തി, വിനിധായ ദിട്ഠിം.

പഞ്ചഹാകാരേഹി പഠമം ഝാനം സമാപജ്ജിന്തി സമ്പജാനമുസാ ഭണന്തസ്സ ആപത്തി പാരാജികസ്സ – പുബ്ബേവസ്സ ഹോതി മുസാ ഭണിസ്സന്തി, ഭണന്തസ്സ ഹോതി മുസാ ഭണാമീതി, ഭണിതസ്സ ഹോതി മുസാ മയാ ഭണിതന്തി, വിനിധായ ദിട്ഠിം വിനിധായ ഖന്തിം.

ഛഹാകാരേഹി പഠമം ഝാനം സമാപജ്ജിന്തി സമ്പജാനമുസാ ഭണന്തസ്സ ആപത്തി പാരാജികസ്സ – പുബ്ബേവസ്സ ഹോതി മുസാ ഭണിസ്സന്തി, ഭണന്തസ്സ ഹോതി മുസാ ഭണാമീതി, ഭണിതസ്സ ഹോതി മുസാ മയാ ഭണിതന്തി, വിനിധായ ദിട്ഠിം, വിനിധായ ഖന്തിം, വിനിധായ രുചിം.

സത്തഹാകാരേഹി പഠമം ഝാനം സമാപജ്ജിന്തി സമ്പജാനമുസാ ഭണന്തസ്സ ആപത്തി പാരാജികസ്സ – പുബ്ബേവസ്സ ഹോതി മുസാ ഭണിസ്സന്തി, ഭണന്തസ്സ ഹോതി മുസാ ഭണാമീതി, ഭണിതസ്സ ഹോതി മുസാ മയാ ഭണിതന്തി, വിനിധായ ദിട്ഠിം, വിനിധായ ഖന്തിം, വിനിധായ രുചിം, വിനിധായ ഭാവം.

൨൦൧. തീഹാകാരേഹി പഠമം ഝാനം സമാപജ്ജാമീതി സമ്പജാനമുസാ ഭണന്തസ്സ ആപത്തി പാരാജികസ്സ – പുബ്ബേവസ്സ ഹോതി മുസാ ഭണിസ്സന്തി, ഭണന്തസ്സ ഹോതി മുസാ ഭണാമീതി, ഭണിതസ്സ ഹോതി മുസാ മയാ ഭണിതന്തി.

ചതൂഹാകാരേഹി പഠമം ഝാനം സമാപജ്ജാമീതി സമ്പജാനമുസാ ഭണന്തസ്സ ആപത്തി പാരാജികസ്സ – പുബ്ബേവസ്സ ഹോതി മുസാ ഭണിസ്സന്തി, ഭണന്തസ്സ ഹോതി മുസാ ഭണാമീതി, ഭണിതസ്സ ഹോതി മുസാ മയാ ഭണിതന്തി, വിനിധായ ദിട്ഠിം.

പഞ്ചഹാകാരേഹി പഠമം ഝാനം സമാപജ്ജാമീതി സമ്പജാനമുസാ ഭണന്തസ്സ ആപത്തി പാരാജികസ്സ – പുബ്ബേവസ്സ ഹോതി മുസാ ഭണിസ്സന്തി, ഭണന്തസ്സ ഹോതി മുസാ ഭണാമീതി, ഭണിതസ്സ ഹോതി മുസാ മയാ ഭണിതന്തി, വിനിധായ ദിട്ഠിം, വിനിധായ ഖന്തിം.

ഛഹാകാരേഹി പഠമം ഝാനം സമാപജ്ജാമീതി സമ്പജാനമുസാ ഭണന്തസ്സ ആപത്തി പാരാജികസ്സ – പുബ്ബേവസ്സ ഹോതി മുസാ ഭണിസ്സന്തി, ഭണന്തസ്സ ഹോതി മുസാ ഭണാമീതി, ഭണിതസ്സ ഹോതി മുസാ മയാ ഭണിതന്തി, വിനിധായ ദിട്ഠിം, വിനിധായ ഖന്തിം, വിനിധായ രുചിം.

സത്തഹാകാരേഹി പഠമം ഝാനം സമാപജ്ജാമീതി സമ്പജാനമുസാ ഭണന്തസ്സ ആപത്തി പാരാജികസ്സ – പുബ്ബേവസ്സ ഹോതി മുസാ ഭണിസ്സന്തി, ഭണന്തസ്സ ഹോതി മുസാ ഭണാമീതി, ഭണിതസ്സ ഹോതി മുസാ മയാ ഭണിതന്തി, വിനിധായ ദിട്ഠിം, വിനിധായ ഖന്തിം, വിനിധായ രുചിം, വിനിധായ ഭാവം.

൨൦൨. തീഹാകാരേഹി പഠമം ഝാനം സമാപന്നോതി സമ്പജാനമുസാ ഭണന്തസ്സ ആപത്തി പാരാജികസ്സ – പുബ്ബേവസ്സ ഹോതി മുസാ ഭണിസ്സന്തി, ഭണന്തസ്സ ഹോതി മുസാ ഭണാമീതി, ഭണിതസ്സ ഹോതി മുസാ മയാ ഭണിതന്തി.

ചതൂഹാകാരേഹി പഠമം ഝാനം സമാപന്നോതി സമ്പജാനമുസാ ഭണന്തസ്സ ആപത്തി പാരാജികസ്സ – പുബ്ബേവസ്സ ഹോതി മുസാ ഭണിസ്സന്തി, ഭണന്തസ്സ ഹോതി മുസാ ഭണാമീതി, ഭണിതസ്സ ഹോതി മുസാ മയാ ഭണിതന്തി, വിനിധായ ദിട്ഠിം.

പഞ്ചഹാകാരേഹി പഠമം ഝാനം സമാപന്നോതി സമ്പജാനമുസാ ഭണന്തസ്സ ആപത്തി പാരാജികസ്സ – പുബ്ബേവസ്സ ഹോതി മുസാ ഭണിസ്സന്തി, ഭണന്തസ്സ ഹോതി മുസാ ഭണാമീതി, ഭണിതസ്സ ഹോതി മുസാ മയാ ഭണിതന്തി, വിനിധായ ദിട്ഠിം, വിനിധായ ഖന്തിം.

ഛഹാകാരേഹി പഠമം ഝാനം സമാപന്നോതി സമ്പജാനമുസാ ഭണന്തസ്സ ആപത്തി പാരാജികസ്സ – പുബ്ബേവസ്സ ഹോതി മുസാ ഭണിസ്സന്തി, ഭണന്തസ്സ ഹോതി മുസാ ഭണാമീതി, ഭണിതസ്സ ഹോതി മുസാ മയാ ഭണിതന്തി, വിനിധായ ദിട്ഠിം, വിനിധായ ഖന്തിം, വിനിധായ രുചിം.

സത്തഹാകാരേഹി പഠമം ഝാനം സമാപന്നോതി സമ്പജാനമുസാ ഭണന്തസ്സ ആപത്തി പാരാജികസ്സ – പുബ്ബേവസ്സ ഹോതി മുസാ ഭണിസ്സന്തി, ഭണന്തസ്സ ഹോതി മുസാ ഭണാമീതി, ഭണിതസ്സ ഹോതി മുസാ മയാ ഭണിതന്തി, വിനിധായ ദിട്ഠിം, വിനിധായ ഖന്തിം, വിനിധായ രുചിം, വിനിധായ ഭാവം.

൨൦൩. തീഹാകാരേഹി പഠമസ്സ ഝാനസ്സ ലാഭീമ്ഹീതി സമ്പജാനമുസാ ഭണന്തസ്സ ആപത്തി പാരാജികസ്സ – പുബ്ബേവസ്സ ഹോതി മുസാ ഭണിസ്സന്തി, ഭണന്തസ്സ ഹോതി മുസാ ഭണാമീതി, ഭണിതസ്സ ഹോതി മുസാ മയാ ഭണിതന്തി.

ചതൂഹാകാരേഹി പഠമസ്സ ഝാനസ്സ ലാഭീമ്ഹീതി സമ്പജാനമുസാ ഭണന്തസ്സ ആപത്തി പാരാജികസ്സ – പുബ്ബേവസ്സ ഹോതി മുസാ ഭണിസ്സന്തി, ഭണന്തസ്സ ഹോതി മുസാ ഭണാമീതി, ഭണിതസ്സ ഹോതി മുസാ മയാ ഭണിതന്തി, വിനിധായ ദിട്ഠിം.

പഞ്ചഹാകാരേഹി പഠമസ്സ ഝാനസ്സ ലാഭീമ്ഹീതി സമ്പജാനമുസാ ഭണന്തസ്സ ആപത്തി പാരാജികസ്സ – പുബ്ബേവസ്സ ഹോതി മുസാ ഭണിസ്സന്തി, ഭണന്തസ്സ ഹോതി മുസാ ഭണാമീതി, ഭണിതസ്സ ഹോതി മുസാ മയാ ഭണിതന്തി, വിനിധായ ദിട്ഠിം, വിനിധായ ഖന്തിം.

ഛഹാകാരേഹി പഠമസ്സ ഝാനസ്സ ലാഭീമ്ഹീതി സമ്പജാനമുസാ ഭണന്തസ്സ ആപത്തി പാരാജികസ്സ – പുബ്ബേവസ്സ ഹോതി മുസാ ഭണിസ്സന്തി, ഭണന്തസ്സ ഹോതി മുസാ ഭണാമീതി, ഭണിതസ്സ ഹോതി മുസാ മയാ ഭണിതന്തി, വിനിധായ ദിട്ഠിം, വിനിധായ ഖന്തിം, വിനിധായ രുചിം.

സത്തഹാകാരേഹി പഠമസ്സ ഝാനസ്സ ലാഭീമ്ഹീതി സമ്പജാനമുസാ ഭണന്തസ്സ ആപത്തി പാരാജികസ്സ – പുബ്ബേവസ്സ ഹോതി മുസാ ഭണിസ്സന്തി, ഭണന്തസ്സ ഹോതി മുസാ ഭണാമീതി, ഭണിതസ്സ ഹോതി മുസാ മയാ ഭണിതന്തി, വിനിധായ ദിട്ഠിം, വിനിധായ ഖന്തിം, വിനിധായ രുചിം, വിനിധായ ഭാവം.

൨൦൪. തീഹാകാരേഹി പഠമസ്സ ഝാനസ്സ വസീമ്ഹീതി സമ്പജാനമുസാ ഭണന്തസ്സ ആപത്തി പാരാജികസ്സ – പുബ്ബേവസ്സ ഹോതി മുസാ ഭണിസ്സന്തി, ഭണന്തസ്സ ഹോതി മുസാ ഭണാമീതി, ഭണിതസ്സ ഹോതി മുസാ മയാ ഭണിതന്തി.

ചതൂഹാകാരേഹി പഠമസ്സ ഝാനസ്സ വസീമ്ഹീതി സമ്പജാനമുസാ ഭണന്തസ്സ ആപത്തി പാരാജികസ്സ – പുബ്ബേവസ്സ ഹോതി മുസാ ഭണിസ്സന്തി, ഭണന്തസ്സ ഹോതി മുസാ ഭണാമീതി, ഭണിതസ്സ ഹോതി മുസാ മയാ ഭണിതന്തി, വിനിധായ ദിട്ഠിം.

പഞ്ചഹാകാരേഹി പഠമസ്സ ഝാനസ്സ വസീമ്ഹീതി സമ്പജാനമുസാ ഭണന്തസ്സ ആപത്തി പാരാജികസ്സ – പുബ്ബേവസ്സ ഹോതി മുസാ ഭണിസ്സന്തി, ഭണന്തസ്സ ഹോതി മുസാ ഭണാമീതി, ഭണിതസ്സ ഹോതി മുസാ മയാ ഭണിതന്തി, വിനിധായ ദിട്ഠിം, വിനിധായ ഖന്തിം.

ഛഹാകാരേഹി പഠമസ്സ ഝാനസ്സ വസീമ്ഹീതി സമ്പജാനമുസാ ഭണന്തസ്സ ആപത്തി പാരാജികസ്സ – പുബ്ബേവസ്സ ഹോതി മുസാ ഭണിസ്സന്തി, ഭണന്തസ്സ ഹോതി മുസാ ഭണാമീതി, ഭണിതസ്സ ഹോതി മുസാ മയാ ഭണിതന്തി, വിനിധായ ദിട്ഠിം, വിനിധായ ഖന്തിം, വിനിധായ രുചിം.

സത്തഹാകാരേഹി പഠമസ്സ ഝാനസ്സ വസീമ്ഹീതി സമ്പജാനമുസാ ഭണന്തസ്സ ആപത്തി പാരാജികസ്സ – പുബ്ബേവസ്സ ഹോതി മുസാ ഭണിസ്സന്തി, ഭണന്തസ്സ ഹോതി മുസാ ഭണാമീതി, ഭണിതസ്സ ഹോതി മുസാ മയാ ഭണിതന്തി, വിനിധായ ദിട്ഠിം, വിനിധായ ഖന്തിം, വിനിധായ രുചിം, വിനിധായ ഭാവം.

൨൦൫. തീഹാകാരേഹി പഠമം ഝാനം സച്ഛികതം മയാതി സമ്പജാനമുസാ ഭണന്തസ്സ ആപത്തി പാരാജികസ്സ – പുബ്ബേവസ്സ ഹോതി മുസാ ഭണിസ്സന്തി, ഭണന്തസ്സ ഹോതി മുസാ ഭണാമീതി, ഭണിതസ്സ ഹോതി മുസാ മയാ ഭണിതന്തി.

ചതൂഹാകാരേഹി പഠമം ഝാനം സച്ഛികതം മയാതി സമ്പജാനമുസാ ഭണന്തസ്സ ആപത്തി പാരാജികസ്സ – പുബ്ബേവസ്സ ഹോതി മുസാ ഭണിസ്സന്തി, ഭണന്തസ്സ ഹോതി മുസാ ഭണാമീതി, ഭണിതസ്സ ഹോതി മുസാ മയാ ഭണിതന്തി, വിനിധായ ദിട്ഠിം.

പഞ്ചഹാകാരേഹി പഠമം ഝാനം സച്ഛികതം മയാതി സമ്പജാനമുസാ ഭണന്തസ്സ ആപത്തി പാരാജികസ്സ – പുബ്ബേവസ്സ ഹോതി മുസാ ഭണിസ്സന്തി, ഭണന്തസ്സ ഹോതി മുസാ ഭണാമീതി, ഭണിതസ്സ ഹോതി മുസാ മയാ ഭണിതന്തി, വിനിധായ ദിട്ഠിം, വിനിധായ ഖന്തിം.

ഛഹാകാരേഹി പഠമം ഝാനം സച്ഛികതം മയാതി സമ്പജാനമുസാ ഭണന്തസ്സ ആപത്തി പാരാജികസ്സ – പുബ്ബേവസ്സ ഹോതി മുസാ ഭണിസ്സന്തി, ഭണന്തസ്സ ഹോതി മുസാ ഭണാമീതി, ഭണിതസ്സ ഹോതി മുസാ മയാ ഭണിതന്തി, വിനിധായ ദിട്ഠിം, വിനിധായ ഖന്തിം, വിനിധായ രുചിം.

സത്തഹാകാരേഹി പഠമം ഝാനം സച്ഛികതം മയാതി സമ്പജാനമുസാ ഭണന്തസ്സ ആപത്തി പാരാജികസ്സ – പുബ്ബേവസ്സ ഹോതി മുസാ ഭണിസ്സന്തി, ഭണന്തസ്സ ഹോതി മുസാ ഭണാമീതി, ഭണിതസ്സ ഹോതി മുസാ മയാ ഭണിതന്തി, വിനിധായ ദിട്ഠിം, വിനിധായ ഖന്തിം, വിനിധായ രുചിം, വിനിധായ ഭാവം.

യഥാ ഇദം പഠമം ഝാനം വിത്ഥാരിതം തം സബ്ബമ്പി വിത്ഥാരേതബ്ബം.

൨൦൬. തീഹാകാരേഹി…പേ… സത്തഹാകാരേഹി ദുതിയം ഝാനം…പേ… തതിയം ഝാനം…പേ… ചതുത്ഥം ഝാനം സമാപജ്ജിം… സമാപജ്ജാമി… സമാപന്നോ… ചതുത്ഥസ്സ ഝാനസ്സ ലാഭീമ്ഹി… വസീമ്ഹി… ചതുത്ഥം ഝാനം സച്ഛികതം മയാതി സമ്പജാനമുസാ ഭണന്തസ്സ ആപത്തി പാരാജികസ്സ. പുബ്ബേവസ്സ ഹോതി മുസാ ഭണിസ്സന്തി, ഭണന്തസ്സ ഹോതി മുസാ ഭണാമീതി, ഭണിതസ്സ ഹോതി മുസാ മയാ ഭണിതന്തി, വിനിധായ ദിട്ഠിം, വിനിധായ ഖന്തിം, വിനിധായ രുചിം, വിനിധായ ഭാവം.

൨൦൭. തീഹാകാരേഹി സുഞ്ഞതം വിമോക്ഖം… അനിമിത്തം വിമോക്ഖം… അപ്പണിഹിതം വിമോക്ഖം… സമാപജ്ജിം… സമാപജ്ജാമി… സമാപന്നോ… അപ്പണിഹിതസ്സ വിമോക്ഖസ്സ ലാഭീമ്ഹി… വസീമ്ഹി… അപ്പണിഹിതോ വിമോക്ഖോ സച്ഛികതോ മയാതി സമ്പജാനമുസാ ഭണന്തസ്സ ആപത്തി പാരാജികസ്സ…പേ….

തീഹാകാരേഹി സുഞ്ഞതം സമാധിം… അനിമിത്തം സമാധിം… അപ്പണിഹിതം സമാധിം സമാപജ്ജിം… സമാപജ്ജാമി… സമാപന്നോ… അപ്പണിഹിതസ്സ സമാധിസ്സ ലാഭീമ്ഹി… വസീമ്ഹി… അപ്പണിഹിതോ സമാധി സച്ഛികതോ മയാതി സമ്പജാനമുസാ ഭണന്തസ്സ ആപത്തി പാരാജികസ്സ.

തീഹാകാരേഹി സുഞ്ഞതം സമാപത്തിം… അനിമിത്തം സമാപത്തിം… അപ്പണിഹിതം സമാപത്തിം സമാപജ്ജിം… സമാപജ്ജാമി… സമാപന്നോ… അപ്പണിഹിതായ സമാപത്തിയാ ലാഭീമ്ഹി… വസീമ്ഹി… അപ്പണിഹിതാ സമാപത്തി സച്ഛികതാ മയാതി സമ്പജാനമുസാ ഭണന്തസ്സ ആപത്തി പാരാജികസ്സ.

തീഹാകാരേഹി തിസ്സോ വിജ്ജാ സമാപജ്ജിം… സമാപജ്ജാമി സമാപന്നോ… തിസ്സന്നം വിജ്ജാനം ലാഭീമ്ഹി… വസീമ്ഹി… തിസ്സോ വിജ്ജാ സച്ഛികതാ മയാതി സമ്പജാനമുസാ ഭണന്തസ്സ ആപത്തി പാരാജികസ്സ.

തീഹാകാരേഹി ചത്താരോ സതിപട്ഠാനേ… ചത്താരോ സമ്മപ്പധാനേ… ചത്താരോ ഇദ്ധിപാദേ സമാപജ്ജിം… സമാപജ്ജാമി… സമാപന്നോ… ചതുന്നം ഇദ്ധിപാദാനം ലാഭീമ്ഹി… വസീമ്ഹി… ചത്താരോ ഇദ്ധിപാദാ സച്ഛികതാ മയാതി സമ്പജാനമുസാ ഭണന്തസ്സ ആപത്തി പാരാജികസ്സ.

തീഹാകാരേഹി പഞ്ചിന്ദ്രിയാനി… പഞ്ച ബലാനി സമാപജ്ജിം… സമാപജ്ജാമി… സമാപന്നോ … പഞ്ചന്നം ബലാനം ലാഭീമ്ഹി… വസീമ്ഹി… പഞ്ചബലാനി സച്ഛികതാനി മയാതി സമ്പജാനമുസാ ഭണന്തസ്സ ആപത്തി പാരാജികസ്സ.

തീഹാകാരേഹി സത്ത ബോജ്ഝങ്ഗേ സമാപജ്ജിം… സമാപജ്ജാമി… സമാപന്നോ… സത്തന്നം ബോജ്ഝങ്ഗാനം ലാഭീമ്ഹി… വസീമ്ഹി… സത്ത ബോജ്ഝങ്ഗാ സച്ഛികതാ മയാതി സമ്പജാനമുസാ ഭണന്തസ്സ ആപത്തി പാരാജികസ്സ.

തീഹാകാരേഹി അരിയം അട്ഠങ്ഗികം മഗ്ഗം സമാപജ്ജിം… സമാപജ്ജാമി… സമാപന്നോ… അരിയസ്സ അട്ഠങ്ഗികസ്സ മഗ്ഗസ്സ ലാഭീമ്ഹി… വസീമ്ഹി… അരിയോ അട്ഠങ്ഗികോ മഗ്ഗോ സച്ഛികതോ മയാതി സമ്പജാനമുസാ ഭണന്തസ്സ ആപത്തി പാരാജികസ്സ.

തീഹാകാരേഹി സോതാപത്തിഫലം… സകദാഗാമിഫലം… അനാഗാമിഫലം… അരഹത്തം സമാപജ്ജിം… സമാപജ്ജാമി… സമാപന്നോ… അരഹത്തസ്സ ലാഭീമ്ഹി വസീമ്ഹി അരഹത്തം സച്ഛികതം മയാതി സമ്പജാനമുസാ ഭണന്തസ്സ ആപത്തി പാരാജികസ്സ.

തീഹാകാരേഹി രാഗോ മേ ചത്തോ വന്തോ മുത്തോ പഹീനോ പടിനിസ്സട്ഠോ ഉക്ഖേടിതോ സമുക്ഖേടിതോതി സമ്പജാനമുസാ ഭണന്തസ്സ ആപത്തി പാരാജികസ്സ.

തീഹാകാരേഹി ദോസോ മേ ചത്തോ വന്തോ മുത്തോ പഹീനോ പടിനിസ്സട്ഠോ ഉക്ഖേടിതോ സമുക്ഖേടിതോതി സമ്പജാനമുസാ ഭണന്തസ്സ ആപത്തി പാരാജികസ്സ.

തീഹാകാരേഹി മോഹോ മേ ചത്തോ വന്തോ മുത്തോ പഹീനോ പടിനിസ്സട്ഠോ ഉക്ഖേടിതോ സമുക്ഖേടിതോതി സമ്പജാനമുസാ ഭണന്തസ്സ ആപത്തി പാരാജികസ്സ.

തീഹാകാരേഹി രാഗാ മേ ചിത്തം വിനീവരണന്തി സമ്പജാനമുസാ ഭണന്തസ്സ ആപത്തി പാരാജികസ്സ.

തീഹാകാരേഹി ദോസാ മേ ചിത്തം വിനീവരണന്തി സമ്പജാനമുസാ ഭണന്തസ്സ ആപത്തി പാരാജികസ്സ.

തീഹാകാരേഹി …പേ… സത്തഹാകാരേഹി മോഹാ മേ ചിത്തം വിനീവരണന്തി സമ്പജാനമുസാ ഭണന്തസ്സ ആപത്തി പാരാജികസ്സ – പുബ്ബേവസ്സ ഹോതി മുസാ ഭണിസ്സന്തി, ഭണന്തസ്സ ഹോതി മുസാ ഭണാമീതി, ഭണിതസ്സ ഹോതി മുസാ മയാ ഭണിതന്തി, വിനിധായ ദിട്ഠിം, വിനിധായ ഖന്തിം, വിനിധായ രുചിം, വിനിധായ ഭാവം.

സുദ്ധികം നിട്ഠിതം.

൨൦൮. തീഹാകാരേഹി പഠമഞ്ച ഝാനം ദുതിയഞ്ച ഝാനം സമാപജ്ജിം… സമാപജ്ജാമി… സമാപന്നോ… പഠമസ്സ ച ഝാനസ്സ ദുതിയസ്സ ച ഝാനസ്സ ലാഭീമ്ഹി… വസീമ്ഹി… പഠമഞ്ച ഝാനം ദുതിയഞ്ച ഝാനം സച്ഛികതം മയാതി സമ്പജാനമുസാ ഭണന്തസ്സ ആപത്തി പാരാജികസ്സ…പേ….

തീഹാകാരേഹി പഠമഞ്ച ഝാനം തതിയഞ്ച ഝാനം സമാപജ്ജിം… സമാപജ്ജാമി… സമാപന്നോ… പഠമസ്സ ച ഝാനസ്സ തതിയസ്സ ച ഝാനസ്സ ലാഭീമ്ഹി… വസീമ്ഹി… പഠമഞ്ച ഝാനം തതിയഞ്ച ഝാനം സച്ഛികതം മയാതി സമ്പജാനമുസാ ഭണന്തസ്സ ആപത്തി പാരാജികസ്സ.

തീഹാകാരേഹി പഠമഞ്ച ഝാനം ചതുത്ഥഞ്ച ഝാനം സമാപജ്ജിം… സമാപജ്ജാമി… സമാപന്നോ… പഠമസ്സ ച ഝാനസ്സ ചതുത്ഥസ്സ ച ഝാനസ്സ ലാഭീമ്ഹി… വസീമ്ഹി… പഠമഞ്ച ഝാനം ചതുത്ഥഞ്ച ഝാനം സച്ഛികതം മയാതി സമ്പജാനമുസാ ഭണന്തസ്സ ആപത്തി പാരാജികസ്സ.

തീഹാകാരേഹി പഠമഞ്ച ഝാനം സുഞ്ഞതഞ്ച വിമോക്ഖം… പഠമഞ്ച ഝാനം അനിമിത്തഞ്ച വിമോക്ഖം… പഠമഞ്ച ഝാനം അപ്പണിഹിതഞ്ച വിമോക്ഖം സമാപജ്ജിം… സമാപജ്ജാമി… സമാപന്നോ… പഠമസ്സ ച ഝാനസ്സ അപ്പണിഹിതസ്സ ച വിമോക്ഖസ്സ ലാഭീമ്ഹി… വസീമ്ഹി… പഠമഞ്ച ഝാനം അപ്പണിഹിതോ ച വിമോക്ഖോ സച്ഛികതോ മയാതി സമ്പജാനമുസാ ഭണന്തസ്സ ആപത്തി പാരാജികസ്സ.

തീഹാകാരേഹി പഠമഞ്ച ഝാനം സുഞ്ഞതഞ്ച സമാധിം… പഠമഞ്ച ഝാനം അനിമിത്തഞ്ച സമാധിം… പഠമഞ്ച ഝാനം അപ്പണിഹിതഞ്ച സമാധിം സമാപജ്ജിം… സമാപജ്ജാമി… സമാപന്നോ പഠമസ്സ ച ഝാനസ്സ അപ്പണിഹിതസ്സ ച സമാധിസ്സ ലാഭീമ്ഹി… വസീമ്ഹി… പഠമഞ്ച ഝാനം അപ്പണിഹിതോ ച സമാധി സച്ഛികതോ മയാതി സമ്പജാനമുസാ ഭണന്തസ്സ ആപത്തി പാരാജികസ്സ.

തീഹാകാരേഹി പഠമഞ്ച ഝാനം സുഞ്ഞതഞ്ച സമാപത്തിം… പഠമഞ്ച ഝാനം അനിമിത്തഞ്ച സമാപത്തിം… പഠമഞ്ച ഝാനം അപ്പണിഹിതഞ്ച സമാപത്തിം സമാപജ്ജിം… സമാപജ്ജാമി… സമാപന്നോ പഠമസ്സ ച ഝാനസ്സ അപ്പണിഹിതായ ച സമാപത്തിയാ ലാഭീമ്ഹി… വസീമ്ഹി… പഠമഞ്ച ഝാനം അപ്പണിഹിതാ ച സമാപത്തി സച്ഛികതാ മയാതി സമ്പജാനമുസാ ഭണന്തസ്സ ആപത്തി പാരാജികസ്സ.

തീഹാകാരേഹി പഠമഞ്ച ഝാനം തിസ്സോ ച വിജ്ജാ സമാപജ്ജിം… സമാപജ്ജാമി… സമാപന്നോ… പഠമസ്സ ച ഝാനസ്സ തിസ്സന്നഞ്ച വിജ്ജാനം ലാഭീമ്ഹി… വസീമ്ഹി… പഠമഞ്ച ഝാനം തിസ്സോ ച വിജ്ജാ സച്ഛികതാ മയാതി സമ്പജാനമുസാ ഭണന്തസ്സ ആപത്തി പാരാജികസ്സ.

തീഹാകാരേഹി പഠമഞ്ച ഝാനം ചത്താരോ ച സതിപട്ഠാനേ… പഠമഞ്ച ഝാനം ചത്താരോ ച സമ്മപ്പധാനേ… പഠമഞ്ച ഝാനം ചത്താരോ ച ഇദ്ധിപാദേ സമാപജ്ജിം… സമാപജ്ജാമി… സമാപന്നോ… പഠമസ്സ ച ഝാനസ്സ ചതുന്നഞ്ച ഇദ്ധിപാദാനം ലാഭീമ്ഹി… വസീമ്ഹി… പഠമഞ്ച ഝാനം ചത്താരോ ച ഇദ്ധിപാദാ സച്ഛികതാ മയാതി സമ്പജാനമുസാ ഭണന്തസ്സ ആപത്തി പാരാജികസ്സ.

തീഹാകാരേഹി പഠമഞ്ച ഝാനം പഞ്ച ച ഇന്ദ്രിയാനി… പഠമഞ്ച ഝാനം പഞ്ച ച ബലാനി സമാപജ്ജിം… സമാപജ്ജാമി… സമാപന്നോ… പഠമസ്സ ച ഝാനസ്സ പഞ്ചന്നഞ്ച ബലാനം ലാഭീമ്ഹി… വസീമ്ഹി… പഠമഞ്ച ഝാനം പഞ്ച ച ബലാനി സച്ഛികതാനി മയാതി സമ്പജാനമുസാ ഭണന്തസ്സ ആപത്തി പാരാജികസ്സ.

൨൦൯. തീഹാകാരേഹി പഠമഞ്ച ഝാനം സത്ത ച ബോജ്ഝങ്ഗേ സമാപജ്ജിം… സമാപജ്ജാമി… സമാപന്നോ… പഠമസ്സ ച ഝാനസ്സ സത്തന്നഞ്ച ബോജ്ഝങ്ഗാനം ലാഭീമ്ഹി… വസീമ്ഹി… പഠമഞ്ച ഝാനം സത്ത ച ബോജ്ഝങ്ഗാ സച്ഛികതാ മയാതി സമ്പജാനമുസാ ഭണന്തസ്സ ആപത്തി പാരാജികസ്സ.

തീഹാകാരേഹി പഠമഞ്ച ഝാനം അരിയഞ്ച അട്ഠങ്ഗികം മഗ്ഗം സമാപജ്ജിം… സമാപജ്ജാമി… സമാപന്നോ… പഠമസ്സ ച ഝാനസ്സ അരിയസ്സ ച അട്ഠങ്ഗികസ്സ മഗ്ഗസ്സ ലാഭീമ്ഹി വസീമ്ഹി… പഠമഞ്ച ഝാനം അരിയോ ച അട്ഠങ്ഗികോ മഗ്ഗോ സച്ഛികതോ മയാതി സമ്പജാനമുസാ ഭണന്തസ്സ ആപത്തി പാരാജികസ്സ.

തീഹാകാരേഹി പഠമഞ്ച ഝാനം സോതാപത്തിഫലഞ്ച… പഠമഞ്ച ഝാനം സകദാഗാമിഫലഞ്ച… പഠമഞ്ച ഝാനം അനാഗാമിഫലഞ്ച… പഠമഞ്ച ഝാനം അരഹത്തഞ്ച സമാപജ്ജിം… സമാപജ്ജാമി… സമാപന്നോ… പഠമസ്സ ച ഝാനസ്സ അരഹത്തസ്സ ച ലാഭീമ്ഹി… വസീമ്ഹി… പഠമഞ്ച ഝാനം അരഹത്തഞ്ച സച്ഛികതം മയാതി സമ്പജാനമുസാ ഭണന്തസ്സ ആപത്തി പാരാജികസ്സ.

തീഹാകാരേഹി പഠമഞ്ച ഝാനം സമാപജ്ജിം… സമാപജ്ജാമി… സമാപന്നോ… പഠമസ്സ ച ഝാനസ്സ ലാഭീമ്ഹി… വസീമ്ഹി… പഠമഞ്ച ഝാനം സച്ഛികതം മയാ, രാഗോ ച മേ ചത്തോ… ദോസോ ച മേ ചത്തോ… മോഹോ ച മേ ചത്തോ വന്തോ മുത്തോ പഹീനോ പടിനിസ്സട്ഠോ ഉക്ഖേടിതോ സമുക്ഖേടിതോതി സമ്പജാനമുസാ ഭണന്തസ്സ ആപത്തി പാരാജികസ്സ.

തീഹാകാരേഹി…പേ… സത്തഹാകാരേഹി പഠമഞ്ച ഝാനം സമാപജ്ജിം… സമാപജ്ജാമി… സമാപന്നോ… പഠമസ്സ ച ഝാനസ്സ ലാഭീമ്ഹി… വസീമ്ഹി… പഠമഞ്ച ഝാനം സച്ഛികതം മയാ, രാഗാ ച മേ ചിത്തം വിനീവരണം… ദോസാ ച മേ ചിത്തം വിനീവരണം… മോഹാ ച മേ ചിത്തം വിനീവരണന്തി സമ്പജാനമുസാ ഭണന്തസ്സ ആപത്തി പാരാജികസ്സ. പുബ്ബേവസ്സ ഹോതി മുസാ ഭണിസ്സന്തി, ഭണന്തസ്സ ഹോതി മുസാ ഭണാമീതി, ഭണിതസ്സ ഹോതി മുസാ മയാ ഭണിതന്തി, വിനിധായ ദിട്ഠിം, വിനിധായ ഖന്തിം, വിനിധായ രുചിം, വിനിധായ ഭാവം.

ഖണ്ഡചക്കം നിട്ഠിതം.

൨൧൦. തീഹാകാരേഹി ദുതിയഞ്ച ഝാനം തതിയഞ്ച ഝാനം സമാപജ്ജിം… സമാപജ്ജാമി… സമാപന്നോ… ദുതിയസ്സ ച ഝാനസ്സ തതിയസ്സ ച ഝാനസ്സ ലാഭീമ്ഹി… വസീമ്ഹി… ദുതിയഞ്ച ഝാനം തതിയഞ്ച ഝാനം സച്ഛികതം മയാതി സമ്പജാനമുസാ ഭണന്തസ്സ ആപത്തി പാരാജികസ്സ.

തീഹാകാരേഹി ദുതിയഞ്ച ഝാനം ചതുത്ഥഞ്ച ഝാനം സമാപജ്ജിം… സമാപജ്ജാമി… സമാപന്നോ… ദുതിയസ്സ ച ഝാനസ്സ ചതുത്ഥസ്സ ച ഝാനസ്സ ലാഭീമ്ഹി… വസീമ്ഹി… ദുതിയഞ്ച ഝാനം ചതുത്ഥഞ്ച ഝാനം സച്ഛികതം മയാതി സമ്പജാനമുസാ ഭണന്തസ്സ ആപത്തി പാരാജികസ്സ.

തീഹാകാരേഹി ദുതിയഞ്ച ഝാനം സുഞ്ഞതഞ്ച വിമോക്ഖം… അനിമിത്തഞ്ച വിമോക്ഖം… അപ്പണിഹിതഞ്ച വിമോക്ഖം… സുഞ്ഞതഞ്ച സമാധിം… അനിമിത്തഞ്ച സമാധിം… അപ്പണിഹിതഞ്ച സമാധിം… സുഞ്ഞതഞ്ച സമാപത്തിം… അനിമിത്തഞ്ച സമാപത്തിം… അപ്പണിഹിതഞ്ച സമാപത്തിം… തിസ്സോ ച വിജ്ജാ… ചത്താരോ ച സതിപട്ഠാനേ… ചത്താരോ ച സമ്മപ്പധാനേ… ചത്താരോ ച ഇദ്ധിപാദേ… പഞ്ച ച ഇന്ദ്രിയാനി… പഞ്ച ച ബലാനി… സത്ത ച ബോജ്ഝങ്ഗേ… അരിയഞ്ച അട്ഠങ്ഗികം മഗ്ഗം… സോതാപത്തിഫലഞ്ച… സകദാഗാമിഫലഞ്ച… അനാഗാമിഫലഞ്ച… അരഹത്തഞ്ച സമാപജ്ജിം… സമാപജ്ജാമി… സമാപന്നോ… ദുതിയസ്സ ച ഝാനസ്സ അരഹത്തസ്സ ച ലാഭീമ്ഹി… വസീമ്ഹി… ദുതിയഞ്ച ഝാനം അരഹത്തഞ്ച സച്ഛികതം മയാതി സമ്പജാനമുസാ ഭണന്തസ്സ ആപത്തി പാരാജികസ്സ.

തീഹാകാരേഹി ദുതിയഞ്ച ഝാനം സമാപജ്ജിം… സമാപജ്ജാമി… സമാപന്നോ… ദുതിയസ്സ ച ഝാനസ്സ ലാഭീമ്ഹി… വസീമ്ഹി… ദുതിയഞ്ച ഝാനം സച്ഛികതം മയാ, രാഗോ ച മേ ചത്തോ… ദോസോ ച മേ ചത്തോ… മോഹോ ച മേ ചത്തോ വന്തോ മുത്തോ പഹീനോ പടിനിസ്സട്ഠോ ഉക്ഖേടിതോ സമുക്ഖേടിതോ. രാഗാ ച മേ ചിത്തം വിനീവരണം… ദോസാ ച മേ ചിത്തം വിനീവരണം… മോഹാ ച മേ ചിത്തം വിനീവരണന്തി സമ്പജാനമുസാ ഭണന്തസ്സ ആപത്തി പാരാജികസ്സ.

തീഹാകാരേഹി …പേ… സത്തഹാകാരേഹി ദുതിയഞ്ച ഝാനം പഠമഞ്ച ഝാനം സമാപജ്ജിം… സമാപജ്ജാമി… സമാപന്നോ… ദുതിയസ്സ ച ഝാനസ്സ പഠമസ്സ ച ഝാനസ്സ ലാഭീമ്ഹി… വസീമ്ഹി… ദുതിയഞ്ച ഝാനം പഠമഞ്ച ഝാനം സച്ഛികതം മയാതി സമ്പജാനമുസാ ഭണന്തസ്സ ആപത്തി പാരാജികസ്സ…പേ… വിനിധായ ഭാവം.

ബദ്ധചക്കം.

ഏവം ഏകേകം മൂലം കാതുന ബദ്ധചക്കം പരിവത്തകം കത്തബ്ബം.

ഇദം സംഖിത്തം.

൨൧൧. തീഹാകാരേഹി തതിയഞ്ച ഝാനം ചതുത്ഥഞ്ച ഝാനം…പേ… തതിയഞ്ച ഝാനം അരഹത്തഞ്ച സമാപജ്ജിം… സമാപജ്ജാമി… സമാപന്നോ… തതിയസ്സ ച ഝാനസ്സ അരഹത്തസ്സ ച ലാഭീമ്ഹി… വസീമ്ഹി… തതിയഞ്ച ഝാനം അരഹത്തഞ്ച സച്ഛികതം മയാതി സമ്പജാനമുസാ ഭണന്തസ്സ ആപത്തി പാരാജികസ്സ.

തീഹാകാരേഹി തതിയഞ്ച ഝാനം സമാപജ്ജിം… സമാപജ്ജാമി… സമാപന്നോ… തതിയസ്സ ച ഝാനസ്സ ലാഭീമ്ഹി… വസീമ്ഹി… തതിയഞ്ച ഝാനം സച്ഛികതം മയാ, രാഗോ ച മേ ചത്തോ… ദോസോ ച മേ ചത്തോ… മോഹോ ച മേ ചത്തോ വന്തോ മുത്തോ പഹീനോ പടിനിസ്സട്ഠോ ഉക്ഖേടിതോ സമുക്ഖേടിതോ. രാഗാ ച മേ ചിത്തം വിനീവരണം… ദോസാ ച മേ ചിത്തം വിനീവരണം… മോഹാ ച മേ ചിത്തം വിനീവരണന്തി സമ്പജാനമുസാ ഭണന്തസ്സ ആപത്തി പാരാജികസ്സ.

തീഹാകാരേഹി തതിയഞ്ച ഝാനം പഠമഞ്ച ഝാനം… തതിയഞ്ച ഝാനം ദുതിയഞ്ച ഝാനം സമാപജ്ജിം… സമാപജ്ജാമി… സമാപന്നോ… തതിയസ്സ ച ഝാനസ്സ ദുതിയസ്സ ച ഝാനസ്സ ലാഭീമ്ഹി… വസീമ്ഹി… തതിയഞ്ച ഝാനം ദുതിയഞ്ച ഝാനം സച്ഛികതം മയാതി സമ്പജാനമുസാ ഭണന്തസ്സ ആപത്തി പാരാജികസ്സ.

തീകാരേഹി മോഹാ ച മേ ചിത്തം വിനീവരണം പഠമഞ്ച ഝാനം…പേ… ദുതിയഞ്ച ഝാനം… തതിയഞ്ച ഝാനം… ചതുത്ഥഞ്ച ഝാനം സമാപജ്ജിം സമാപജ്ജാമി… സമാപന്നോ… മോഹാ ച മേ ചിത്തം വിനീവരണം ചതുത്ഥസ്സ ച ഝാനസ്സ ലാഭീമ്ഹി… വസീമ്ഹി… മോഹാ ച മേ ചിത്തം വിനീവരണം ചതുത്ഥഞ്ച ഝാനം സച്ഛികതം മയാതി സമ്പജാനമുസാ ഭണന്തസ്സ ആപത്തി പാരാജികസ്സ.

൨൧൨. തീഹാകാരേഹി മോഹാ ച മേ ചിത്തം വിനീവരണം സുഞ്ഞതഞ്ച വിമോക്ഖം… അനിമിത്തഞ്ച വിമോക്ഖം… അപ്പണിഹിതഞ്ച വിമോക്ഖം സമാപജ്ജിം… സമാപജ്ജാമി… സമാപന്നോ… മോഹാ ച മേ ചിത്തം വിനീവരണം അപ്പണിഹിതസ്സ ച വിമോക്ഖസ്സ ലാഭീമ്ഹി… വസീമ്ഹി… മോഹാ ച മേ ചിത്തം വിനീവരണം അപ്പണിഹിതോ ച വിമോക്ഖോ സച്ഛികതോ മയാതി സമ്പജാനമുസാ ഭണന്തസ്സ ആപത്തി പാരാജികസ്സ.

തീഹാകാരേഹി മോഹാ ച മേ ചിത്തം വിനീവരണം സുഞ്ഞതഞ്ച സമാധിം… അനിമിത്തഞ്ച സമാധിം… അപ്പണിഹിതഞ്ച സമാധിം സമാപജ്ജിം… സമാപജ്ജാമി… സമാപന്നോ… മോഹാ ച മേ ചിത്തം വിനീവരണം അപ്പണിഹിതസ്സ ച സമാധിസ്സ ലാഭീമ്ഹി… വസീമ്ഹി… മോഹാ ച മേ ചിത്തം വിനീവരണം അപ്പണിഹിതോ ച സമാധി സച്ഛികതോ മയാതി സമ്പജാനമുസാ ഭണന്തസ്സ ആപത്തി പാരാജികസ്സ.

തീഹാകാരേഹി മോഹാ ച മേ ചിത്തം വിനീവരണം സുഞ്ഞതഞ്ച സമാപത്തിം… അനിമിത്തഞ്ച സമാപത്തിം… അപ്പണിഹിതഞ്ച സമാപത്തിം സമാപജ്ജിം സമാപജ്ജാമി… സമാപന്നോ… മോഹാ ച മേ ചിത്തം വിനീവരണം അപ്പണിഹിതായ ച സമാപത്തിയാ ലാഭീമ്ഹി… വസീമ്ഹി… മോഹാ ച മേ ചിത്തം വിനീവരണം അപ്പണിഹിതാ ച സമാപത്തി സച്ഛികതാ മയാതി സമ്പജാനമുസാ ഭണന്തസ്സ ആപത്തി പാരാജികസ്സ.

തീഹാകാരേഹി മോഹാ ച മേ ചിത്തം വിനീവരണം തിസ്സോ ച വിജ്ജാ സമാപജ്ജിം… സമാപജ്ജാമി… സമാപന്നോ… ‘മോഹാ ച മേ ചിത്തം വിനീവരണം തിസ്സന്നഞ്ച വിജ്ജാനം ലാഭീമ്ഹി… വസീമ്ഹി… മോഹാ ച മേ ചിത്തം വിനീവരണം തിസ്സോ ച വിജ്ജാ സച്ഛികതാ മയാതി സമ്പജാനമുസാ ഭണന്തസ്സ ആപത്തി പാരാജികസ്സ.

തീഹാകാരേഹി മോഹാ ച മേ ചിത്തം വിനീവരണം ചത്താരോ ച സതിപട്ഠാനേ… ചത്താരോ ച സമ്മപ്പധാനേ… ചത്താരോ ച ഇദ്ധിപാദേ സമാപജ്ജിം… സമാപജ്ജാമി… സമാപന്നോ… മോഹാ ച മേ ചിത്തം വിനീവരണം ചതുന്നഞ്ച ഇദ്ധിപാദാനം ലാഭീമ്ഹി… വസീമ്ഹി… മോഹാ ച മേ ചിത്തം വിനീവരണം ചത്താരോ ച ഇദ്ധിപാദാ സച്ഛികതാ മയാതി സമ്പജാനമുസാ ഭണന്തസ്സ ആപത്തി പാരാജികസ്സ.

൨൧൩. തീഹാകാരേഹി മോഹാ ച മേ ചിത്തം വിനീവരണം പഞ്ച ച ഇന്ദ്രിയാനി… പഞ്ച ച ബലാനി സമാപജ്ജിം… സമാപജ്ജാമി… സമാപന്നോ… മോഹാ ച മേ ചിത്തം വിനീവരണം പഞ്ചന്നഞ്ച ബലാനം ലാഭീമ്ഹി… വസീമ്ഹി… മോഹാ ച മേ ചിത്തം വിനീവരണം പഞ്ച ച ബലാനി സച്ഛികതാനി മയാതി സമ്പജാനമുസാ ഭണന്തസ്സ ആപത്തി പാരാജികസ്സ.

തീഹാകാരേഹി മോഹാ ച മേ ചിത്തം വിനീവരണം സത്ത ച ബോജ്ഝങ്ഗേ സമാപജ്ജിം… സമാപജ്ജാമി… സമാപന്നോ… മോഹാ ച മേ ചിത്തം വിനീവരണം സത്തന്നഞ്ച ബോജ്ഝങ്ഗാനം ലാഭീമ്ഹി … വസീമ്ഹി… മോഹാ ച മേ ചിത്തം വിനീവരണം സത്ത ച ബോജ്ഝങ്ഗാ സച്ഛികതാ മയാതി സമ്പജാനമുസാ ഭണന്തസ്സ ആപത്തി പാരാജികസ്സ.

തീഹാകാരേഹി മോഹാ ച മേ ചിത്തം വിനീവരണം അരിയഞ്ച അട്ഠങ്ഗികം മഗ്ഗം സമാപജ്ജിം… സമാപജ്ജാമി… സമാപന്നോ… മോഹാ ച മേ ചിത്തം വിനീവരണം അരിയസ്സ ച അട്ഠങ്ഗികസ്സ മഗ്ഗസ്സ ലാഭീമ്ഹി… വസീമ്ഹി… മോഹാ ച മേ ചിത്തം വിനീവരണം അരിയോ ച അട്ഠങ്ഗികോ മഗ്ഗോ സച്ഛികതോ മയാതി സമ്പജാനമുസാ ഭണന്തസ്സ ആപത്തി പാരാജികസ്സ.

തീഹാകാരേഹി മോഹാ ച മേ ചിത്തം വിനീവരണം സോതാപത്തിഫലഞ്ച… സകദാഗാമിഫലഞ്ച… അനാഗാമിഫലഞ്ച… അരഹത്തഞ്ച സമാപജ്ജിം… സമാപജ്ജാമി… സമാപന്നോ… മോഹാ ച മേ ചിത്തം വിനീവരണം അരഹത്തസ്സ ച ലാഭീമ്ഹി… വസീമ്ഹി… മോഹാ ച മേ ചിത്തം വിനീവരണം അരഹത്തഞ്ച സച്ഛികതം മയാതി സമ്പജാനമുസാ ഭണന്തസ്സ ആപത്തി പാരാജികസ്സ.

തീഹാകാരേഹി മോഹാ ച മേ ചിത്തം വിനീവരണം, രാഗോ ച മേ ചത്തോ… ദോസോ ച മേ ചത്തോ… മോഹോ ച മേ ചത്തോ വന്തോ മുത്തോ പഹീനോ പടിനിസ്സട്ഠോ ഉക്ഖേടിതോ സമുക്ഖേടിതോതി സമ്പജാനമുസാ ഭണന്തസ്സ ആപത്തി പാരാജികസ്സ.

തീഹാകാരേഹി…പേ… സത്തഹാകാരേഹി മോഹാ ച മേ ചിത്തം വിനീവരണം രാഗാ ച മേ ചിത്തം വിനീവരണം… ദോസാ ച മേ ചിത്തം വിനീവരണന്തി സമ്പജാനമുസാ ഭണന്തസ്സ ആപത്തി പാരാജികസ്സ പുബ്ബേവസ്സ ഹോതി മുസാ ഭണിസ്സന്തി, ഭണന്തസ്സ ഹോതി മുസാ ഭണാമീതി, ഭണിതസ്സ ഹോതി മുസാ മയാ ഭണിതന്തി, വിനിധായ ദിട്ഠിം, വിനിധായ ഖന്തിം, വിനിധായ രുചിം, വിനിധായ ഭാവം.

ഏകമൂലകം നിട്ഠിതം. [ഏകമൂലകം സങ്ഖിത്തം നിട്ഠിതം (സ്യാ.)]

യഥാ ഏകമൂലകം വിത്ഥാരിതം ഏവമേവ ദുമൂലകാദിപി വിത്ഥാരേതബ്ബം.

ഇദം സബ്ബമൂലകം

൨൧൪. തീഹാകാരേഹി …പേ… സത്തഹാകാരേഹി പഠമഞ്ച ഝാനം ദുതിയഞ്ച ഝാനം തതിയഞ്ച ഝാനം ചതുത്ഥഞ്ച ഝാനം സുഞ്ഞതഞ്ച വിമോക്ഖം അനിമിത്തഞ്ച വിമോക്ഖം അപ്പണിഹിതഞ്ച വിമോക്ഖം സുഞ്ഞതഞ്ച സമാധിം അനിമിത്തഞ്ച സമാധിം അപ്പണിഹിതഞ്ച സമാധിം സുഞ്ഞതഞ്ച സമാപത്തിം അനിമിത്തഞ്ച സമാപത്തിം അപ്പണിഹിതഞ്ച സമാപത്തിം തിസ്സോ ച വിജ്ജാ ചത്താരോ ച സതിപട്ഠാനേ ചത്താരോ ച സമ്മപ്പധാനേ ചത്താരോ ച ഇദ്ധിപാദേ പഞ്ച ച ഇന്ദ്രിയാനി പഞ്ച ച ബലാനി സത്ത ച ബോജ്ഝങ്ഗേ അരിയഞ്ച അട്ഠങ്ഗികം മഗ്ഗം സോതാപത്തിഫലഞ്ച സകദാഗാമിഫലഞ്ച അനാഗാമിഫലഞ്ച അരഹത്തഞ്ച സമാപജ്ജിം… സമാപജ്ജാമി… സമാപന്നോ…പേ… രാഗോ ച മേ ചത്തോ, ദോസോ ച മേ ചത്തോ, മോഹോ ച മേ ചത്തോ വന്തോ മുത്തോ പഹീനോ പടിനിസ്സട്ഠോ ഉക്ഖേടിതോ സമുക്ഖേടിതോ. രാഗാ ച മേ ചിത്തം വിനീവരണം, ദോസാ ച മേ ചിത്തം വിനീവരണം, മോഹാ ച മേ ചിത്തം വിനീവരണന്തി സമ്പജാനമുസാ ഭണന്തസ്സ ആപത്തി പാരാജികസ്സ. പുബ്ബേവസ്സ ഹോതി മുസാ ഭണിസ്സന്തി, ഭണന്തസ്സ ഹോതി മുസാ ഭണാമീതി, ഭണിതസ്സ ഹോതി മുസാ മയാ ഭണിതന്തി, വിനിധായ ദിട്ഠിം, വിനിധായ ഖന്തിം, വിനിധായ രുചിം, വിനിധായ ഭാവം.

സബ്ബമൂലകം നിട്ഠിതം.

സുദ്ധികവാരകഥാ നിട്ഠിതാ.

൨൧൫. തീഹാകാരേഹി പഠമം ഝാനം സമാപജ്ജിന്തി വത്തുകാമോ ദുതിയം ഝാനം സമാപജ്ജിന്തി സമ്പജാനമുസാ ഭണന്തസ്സ പടിവിജാനന്തസ്സ ആപത്തി പാരാജികസ്സ; ന പടിവിജാനന്തസ്സ ആപത്തി ഥുല്ലച്ചയസ്സ.

തീഹാകാരേഹി പഠമം ഝാനം സമാപജ്ജിന്തി വത്തുകാമോ തതിയം ഝാനം സമാപജ്ജിന്തി സമ്പജാനമുസാ ഭണന്തസ്സ പടിവിജാനന്തസ്സ ആപത്തി പാരാജികസ്സ; ന പടിവിജാനന്തസ്സ ആപത്തി ഥുല്ലച്ചയസ്സ.

തീഹാകാരേഹി പഠമം ഝാനം സമാപജ്ജിന്തി വത്തുകാമോ ചതുത്ഥം ഝാനം സമാപജ്ജിന്തി സമ്പജാനമുസാ ഭണന്തസ്സ പടിവിജാനന്തസ്സ ആപത്തി പാരാജികസ്സ; ന പടിവിജാനന്തസ്സ ആപത്തി ഥുല്ലച്ചയസ്സ.

തീഹാകാരേഹി …പേ… സത്തഹാകാരേഹി പഠമം ഝാനം സമാപജ്ജിന്തി വത്തുകാമോ സുഞ്ഞതം വിമോക്ഖം… അനിമിത്തം വിമോക്ഖം… അപ്പണിഹിതം വിമോക്ഖം… സുഞ്ഞതം സമാധിം… അനിമിത്തം സമാധിം… അപ്പണിഹിതം സമാധിം… സുഞ്ഞതം സമാപത്തിം… അനിമിത്തം സമാപത്തിം… അപ്പണിഹിതം സമാപത്തിം… തിസ്സോ വിജ്ജാ… ചത്താരോ സതിപട്ഠാനേ… ചത്താരോ സമ്മപ്പധാനേ… ചത്താരോ ഇദ്ധിപാദേ… പഞ്ചിന്ദ്രിയാനി… പഞ്ച ബലാനി… സത്ത ബോജ്ഝങ്ഗേ… അരിയം അട്ഠങ്ഗികം മഗ്ഗം… സോതാപത്തിഫലം… സകദാഗാമിഫലം… അനാഗാമിഫലം… അരഹത്തം സമാപജ്ജിം…പേ… രാഗോ മേ ചത്തോ… ദോസോ മേ ചത്തോ… മോഹോ മേ ചത്തോ വന്തോ മുത്തോ പഹീനോ പടിനിസ്സട്ഠോ ഉക്ഖേടിതോ സമുക്ഖേടിതോ. രാഗാ മേ ചിത്തം വിനീവരണം… ദോസാ മേ ചിത്തം വിനീവരണം… മോഹാ മേ ചിത്തം വിനീവരണന്തി സമ്പജാനമുസാ ഭണന്തസ്സ പടിവിജാനന്തസ്സ ആപത്തി പാരാജികസ്സ; ന പടിവിജാനന്തസ്സ ആപത്തി ഥുല്ലച്ചയസ്സ. പുബ്ബേവസ്സ ഹോതി മുസാ ഭണിസ്സന്തി, ഭണന്തസ്സ ഹോതി മുസാ ഭണാമീതി, ഭണിതസ്സ ഹോതി മുസാ മയാ ഭണിതന്തി, വിനിധായ ദിട്ഠിം, വിനിധായ ഖന്തിം, വിനിധായ രുചിം, വിനിധായ ഭാവം.

വത്ഥുവിസാരകസ്സ ഏകമൂലകസ്സ ഖണ്ഡചക്കം നിട്ഠിതം.

൨൧൬. തീഹാകാരേഹി ദുതിയം ഝാനം സമാപജ്ജിന്തി വത്തുകാമോ തതിയം ഝാനം സമാപജ്ജിന്തി സമ്പജാനമുസാ ഭണന്തസ്സ പടിവിജാനന്തസ്സ ആപത്തി പാരാജികസ്സ; ന പടിവിജാനന്തസ്സ ആപത്തി ഥുല്ലച്ചയസ്സ.

തീഹാകാരേഹി ദുതിയം ഝാനം സമാപജ്ജിന്തി വത്തുകാമോ ചതുത്ഥം ഝാനം സമാപജ്ജിന്തി…പേ… മോഹാ ച മേ ചിത്തം വിനീവരണന്തി സമ്പജാനമുസാ ഭണന്തസ്സ പടിവിജാനന്തസ്സ ആപത്തി പാരാജികസ്സ; ന പടിവിജാനന്തസ്സ ആപത്തി ഥുല്ലച്ചയസ്സ.