൬. ഛട്ഠസങ്ഘാദിസേസസിക്ഖാപദം

൭൦൪. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന സുന്ദരീനന്ദാ ഭിക്ഖുനീ അഭിരൂപാ ഹോതി ദസ്സനീയാ പാസാദികാ. മനുസ്സാ ഭത്തഗ്ഗേ സുന്ദരീനന്ദം ഭിക്ഖുനിം പസ്സിത്വാ അവസ്സുതാ സുന്ദരീനന്ദായ ഭിക്ഖുനിയാ അഗ്ഗമഗ്ഗാനി ഭോജനാനി ദേന്തി. സുന്ദരീനന്ദാ ഭിക്ഖുനീ കുക്കുച്ചായന്തീ ന പടിഗ്ഗണ്ഹാതി. അനന്തരികാ ഭിക്ഖുനീ സുന്ദരീനന്ദം ഭിക്ഖുനിം ഏതദവോച – ‘‘കിസ്സ ത്വം, അയ്യേ, ന പടിഗ്ഗണ്ഹാസീ’’തി? ‘‘അവസ്സുതാ, അയ്യേ’’തി. ‘‘ത്വം പന, അയ്യേ, അവസ്സുതാ’’തി? ‘‘നാഹം, അയ്യേ, അവസ്സുതാ’’തി. ‘‘കിം തേ, അയ്യേ, ഏസോ പുരിസപുഗ്ഗലോ കരിസ്സതി അവസ്സുതോ വാ അനവസ്സുതോ വാ, യതോ ത്വം അനവസ്സുതാ. ഇങ്ഘം, അയ്യേ, യം തേ ഏസോ പുരിസപുഗ്ഗലോ ദേതി ഖാദനീയം വാ ഭോജനീയം വാ തം ത്വം സഹത്ഥാ പടിഗ്ഗഹേത്വാ ഖാദ വാ, ഭുഞ്ജ വാ’’തി.

യാ താ ഭിക്ഖുനിയോ അപ്പിച്ഛാ…പേ… താ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ ഭിക്ഖുനീ ഏവം വക്ഖതി – ‘കിം തേ, അയ്യേ, ഏസോ പുരിസപുഗ്ഗലോ കരിസ്സതി അവസ്സുതോ വാ അനവസ്സുതോ വാ, യതോ ത്വം അനവസ്സുതാ. ഇങ്ഘ, അയ്യേ, യം തേ ഏസോ പുരിസപുഗ്ഗലോ ദേതി ഖാദനീയം വാ ഭോജനീയം വാ തം ത്വം സഹത്ഥാ പടിഗ്ഗഹേത്വാ ഖാദ വാ ഭുഞ്ജ വാ’’തി…പേ… സച്ചം കിര, ഭിക്ഖവേ, ഭിക്ഖുനീ ഏവം വദേതി – ‘‘കിം തേ, അയ്യേ, ഏസോ പുരിസപുഗ്ഗലോ കരിസ്സതി അവസ്സുതോ വാ അനവസ്സുതോ വാ യതോ ത്വം അനവസ്സുതാ! ഇങ്ഘ, അയ്യേ, യം തേ ഏസോ പുരിസപുഗ്ഗലോ ദേതി ഖാദനീയം വാ ഭോജനീയം വാ തം ത്വം സഹത്ഥാ പടിഗ്ഗഹേത്വാ ഖാദ വാ ഭുഞ്ജ വാ’’തി? ‘‘സച്ചം, ഭഗവാ’’തി. വിഗരഹി ബുദ്ധോ ഭഗവാ…പേ… കഥഞ്ഹി നാമ, ഭിക്ഖവേ, ഭിക്ഖുനീ ഏവം വക്ഖതി – ‘‘കിം തേ, അയ്യേ, ഏസോ പുരിസപുഗ്ഗലോ കരിസ്സതി അവസ്സുതോ വാ അനവസ്സുതോ വാ യതോ ത്വം അനവസ്സുതാ; ഇങ്ഘ, അയ്യേ, യം തേ ഏസോ പുരിസപുഗ്ഗലോ ദേതി ഖാദനീയം വാ ഭോജനീയം വാ തം ത്വം സഹത്ഥാ പടിഗ്ഗഹേത്വാ ഖാദ വാ ഭുഞ്ജ വാ’’. നേതം, ഭിക്ഖവേ, അപ്പസന്നാനം വാ പസാദായ…പേ… ഏവഞ്ച പന, ഭിക്ഖവേ, ഭിക്ഖുനിയോ ഇമം സിക്ഖാപദം ഉദ്ദിസന്തു –

൭൦൫. ‘‘യാ പന ഭിക്ഖുനീ ഏവം വദേയ്യ – ‘കിം തേ, അയ്യേ, ഏസോ പുരിസപുഗ്ഗലോ കരിസ്സതി അവസ്സുതോ വാ അനവസ്സുതോ വാ, യതോ ത്വം അനവസ്സുതാ. ഇങ്ഘ, അയ്യേ, യം തേ ഏസോ പുരിസപുഗ്ഗലോ ദേതി ഖാദനീയം വാ ഭോജനീയം വാ തം ത്വം സഹത്ഥാ പടിഗ്ഗഹേത്വാ ഖാദ വാ ഭുഞ്ജ വാ’തി, അയമ്പി ഭിക്ഖുനീ പഠമാപത്തികം ധമ്മം ആപന്നാ നിസ്സാരണീയം സങ്ഘാദിസേസ’’ന്തി.

൭൦൬. യാ പനാതി യാ യാദിസാ…പേ… ഭിക്ഖുനീതി…പേ… അയം ഇമസ്മിം അത്ഥേ അധിപ്പേതാ ഭിക്ഖുനീതി.

ഏവം വദേയ്യാതി – ‘‘കിം തേ, അയ്യേ, ഏസോ പുരിസപുഗ്ഗലോ കരിസ്സതി അവസ്സുതോ വാ അനവസ്സുതോ വാ, യതോ ത്വം അനവസ്സുതാ. ഇങ്ഘ, അയ്യേ, യം തേ ഏസോ പുരിസപുഗ്ഗലോ ദേതി ഖാദനീയം വാ ഭോജനീയം വാ തം ത്വം സഹത്ഥാ പടിഗ്ഗഹേത്വാ ഖാദ വാ ഭുഞ്ജ വാ’’തി ഉയ്യോജേതി, ആപത്തി ദുക്കടസ്സ. തസ്സാ വചനേന ‘‘ഖാദിസ്സാമി ഭുഞ്ജിസ്സാമീ’’തി പടിഗ്ഗണ്ഹാതി, ആപത്തി ദുക്കടസ്സ. അജ്ഝോഹാരേ അജ്ഝോഹാരേ ആപത്തി ഥുല്ലച്ചയസ്സ. ഭോജനപരിയോസാനേ ആപത്തി സങ്ഘാദിസേസസ്സ.

അയമ്പീതി പുരിമായോ ഉപാദായ വുച്ചതി.

പഠമാപത്തികന്തി സഹ വത്ഥുജ്ഝാചാരാ ആപജ്ജതി അസമനുഭാസനായ.

നിസ്സാരണീയന്തി സങ്ഘമ്ഹാ നിസ്സാരീയതി.

സങ്ഘാദിസേസോതി…പേ… തേനപി വുച്ചതി സങ്ഘാദിസേസോതി.

ഉദകദന്തപോനം ‘‘പടിഗ്ഗണ്ഹാ’’തി ഉയ്യോജേതി, ആപത്തി ദുക്കടസ്സ. തസ്സാ വചനേന ഖാദിസ്സാമി ഭുഞ്ജിസ്സാമീ’’തി പടിഗ്ഗണ്ഹാതി, ആപത്തി ദുക്കടസ്സ.

൭൦൭. ഏകതോഅവസ്സുതേ യക്ഖസ്സ വാ പേതസ്സ വാ പണ്ഡകസ്സ വാ തിരച്ഛാനഗതമനുസ്സവിഗ്ഗഹസ്സ വാ ഹത്ഥതോ ഖാദനീയം വാ ഭോജനീയം വാ ‘‘ഖാദ വാ ഭുഞ്ജ വാ’’തി ഉയ്യോജേതി, ആപത്തി ദുക്കടസ്സ. തസ്സാ വചനേന ‘‘ഖാദിസ്സാമി ഭുഞ്ജിസ്സാമീ’’തി പടിഗ്ഗണ്ഹാതി, ആപത്തി ദുക്കടസ്സ. അജ്ഝോഹാരേ അജ്ഝോഹാരേ ആപത്തി ദുക്കടസ്സ. ഭോജനപരിയോസാനേ ആപത്തി ഥുല്ലച്ചയസ്സ. ഉദകദന്തപോനം പടിഗ്ഗണ്ഹാതി ഉയ്യോജേതി, ആപത്തി ദുക്കടസ്സ. തസ്സാ വചനേന ‘‘ഖാദിസ്സാമി ഭുഞ്ജിസ്സാമീ’’തി പടിഗ്ഗണ്ഹാതി, ആപത്തി ദുക്കടസ്സ.

൭൦൮. അനാപത്തി ‘‘അനവസ്സുതോ’’തി ജാനന്തീ ഉയ്യോജേതി, ‘‘കുപിതാ ന പടിഗ്ഗണ്ഹാതീ’’തി ഉയ്യോജേതി, ‘‘കുലാനുദ്ദയതായ ന പടിഗ്ഗണ്ഹാതീ’’തി ഉയ്യോജേതി, ഉമ്മത്തികായ, ആദികമ്മികായാതി.

ഛട്ഠസങ്ഘാദിസേസസിക്ഖാപദം നിട്ഠിതം.