൭. പാദുകവഗ്ഗോ
൬൩൮. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഛബ്ബഗ്ഗിയാ ഭിക്ഖൂ പാദുകാരുള്ഹസ്സ ധമ്മം ദേസേന്തി…പേ….
‘‘ന പാദുകാരുള്ഹസ്സ അഗിലാനസ്സ ധമ്മം ദേസേസ്സാമീതി സിക്ഖാ കരണീയാ’’തി.
ന പാദുകാരുള്ഹസ്സ അഗിലാനസ്സ ധമ്മോ ദേസേതബ്ബോ. യോ അനാദരിയം പടിച്ച അക്കന്തസ്സ വാ പടിമുക്കസ്സ വാ ഓമുക്കസ്സ വാ അഗിലാനസ്സ ധമ്മം ദേസേതി, ആപത്തി ദുക്കടസ്സ.
അനാപത്തി അസഞ്ചിച്ച…പേ… ആദികമ്മികസ്സാതി.
പഠമസിക്ഖാപദം നിട്ഠിതം.
൬൩൯. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഛബ്ബഗ്ഗിയാ ഭിക്ഖൂ ഉപാഹനാരുള്ഹസ്സ ധമ്മം ദേസേന്തി…പേ….
‘‘ന ഉപാഹനാരുള്ഹസ്സ അഗിലാനസ്സ ധമ്മം ദേസേസ്സാമീതി സിക്ഖാകരണീയാ’’തി.
ന ഉപാഹനാരുള്ഹസ്സ അഗിലാനസ്സ ധമ്മോ ദേസേതബ്ബോ. യോ അനാദരിയം പടിച്ച അക്കന്തസ്സ വാ പടിമുക്കസ്സ വാ ഓമുക്കസ്സ വാ അഗിലാനസ്സ ധമ്മം ദേസേതി, ആപത്തി ദുക്കടസ്സ.
അനാപത്തി അസഞ്ചിച്ച…പേ… ആദികമ്മികസ്സാതി.
ദുതിയസിക്ഖാപദം നിട്ഠിതം.
൬൪൦. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഛബ്ബഗ്ഗിയാ ഭിക്ഖൂ യാനഗതസ്സ ധമ്മം ദേസേന്തി…പേ….
‘‘ന യാനഗതസ്സ അഗിലാനസ്സ ധമ്മം ദേസേസ്സാമീതി സിക്ഖാ കരണീയാ’’തി.
യാനം നാമ വയ്ഹം രഥോ സകടം സന്ദമാനികാ സിവികാ പാടങ്കീ.
ന യാനഗതസ്സ അഗിലാനസ്സ ധമ്മോ ദേസേതബ്ബോ. യോ അനാദരിയം പടിച്ച യാനഗതസ്സ അഗിലാനസ്സ ധമ്മം ദേസേതി, ആപത്തി ദുക്കടസ്സ.
അനാപത്തി അസഞ്ചിച്ച…പേ… ആദികമ്മികസ്സാതി.
തതിയസിക്ഖാപദം നിട്ഠിതം.
൬൪൧. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഛബ്ബഗ്ഗിയാ ഭിക്ഖൂ സയനഗതസ്സ ധമ്മം ദേസേന്തി…പേ….
‘‘ന സയനഗതസ്സ അഗിലാനസ്സ ധമ്മം ദേസേസ്സാമീതി സിക്ഖാ കരണീയാ’’തി.
ന സയനഗതസ്സ അഗിലാനസ്സ ധമ്മോ ദേസേതബ്ബോ. യോ അനാദരിയം പടിച്ച അന്തമസോ ഛമായമ്പി നിപന്നസ്സ സയനഗതസ്സ അഗിലാനസ്സ ധമ്മം ദേസേതി, ആപത്തി ദുക്കടസ്സ.
അനാപത്തി അസഞ്ചിച്ച…പേ… ആദികമ്മികസ്സാതി.
ചതുത്ഥസിക്ഖാപദം നിട്ഠിതം.
൬൪൨. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഛബ്ബഗ്ഗിയാ ഭിക്ഖൂ പല്ലത്ഥികായ നിസിന്നസ്സ ധമ്മം ദേസേന്തി…പേ….
‘‘ന പല്ലത്ഥികായ നിസിന്നസ്സ അഗിലാനസ്സ ധമ്മം ദേസേസ്സാമീതി സിക്ഖാ കരണീയാ’’തി.
ന പല്ലത്ഥികായ നിസിന്നസ്സ അഗിലാനസ്സ ധമ്മോ ദേസേതബ്ബോ. യോ അനാദരിയം പടിച്ച ഹത്ഥപല്ലത്ഥികായ വാ ദുസ്സപല്ലത്ഥികായ വാ നിസിന്നസ്സ അഗിലാനസ്സ ധമ്മം ദേസേതി, ആപത്തി ദുക്കടസ്സ.
അനാപത്തി അസഞ്ചിച്ച…പേ… ആദികമ്മികസ്സാതി.
പഞ്ചമസിക്ഖാപദം നിട്ഠിതം.
൬൪൩. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഛബ്ബഗ്ഗിയാ ഭിക്ഖൂ വേഠിതസീസസ്സ ധമ്മം ദേസേന്തി…പേ….
‘‘ന വേഠിതസീസസ്സ അഗിലാനസ്സ ധമ്മം ദേസേസ്സാമീതി സിക്ഖാ കരണീയാ’’തി.
വേഠിതസീസോ നാമ കേസന്തം ന ദസ്സാപേത്വാ വേഠിതോ ഹോതി.
ന വേഠിതസീസസ്സ അഗിലാനസ്സ ധമ്മോ ദേസേതബ്ബോ. യോ അനാദരിയം പടിച്ച വേഠിതസീസസ്സ അഗിലാനസ്സ ധമ്മം ദേസേതി, ആപത്തി ദുക്കടസ്സ.
അനാപത്തി അസഞ്ചിച്ച, അസ്സതിയാ, അജാനന്തസ്സ, ഗിലാനസ്സ, കേസന്തം വിവരാപേത്വാ ദേസേതി, ആപദാസു, ഉമ്മത്തകസ്സ, ആദികമ്മികസ്സാതി.
ഛട്ഠസിക്ഖാപദം നിട്ഠിതം.
൬൪൪. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഛബ്ബഗ്ഗിയാ ഭിക്ഖൂ ഓഗുണ്ഠിതസീസസ്സ ധമ്മം ദേസേന്തി…പേ….
‘‘ന ഓഗുണ്ഠിതസീസസ്സ അഗിലാനസ്സ ധമ്മം ദേസേസ്സാമീതി സിക്ഖാ കരണീയാ’’തി.
ഓഗുണ്ഠിതസീസോ നാമ സസീസം പാരുതോ വുച്ചതി.
ന ഓഗുണ്ഠിതസീസസ്സ അഗിലാനസ്സ ധമ്മോ ദേസേതബ്ബോ. യോ അനാദരിയം പടിച്ച ഓഗുണ്ഠിതസീസസ്സ അഗിലാനസ്സ ധമ്മം ദേസേതി, ആപത്തി ദുക്കടസ്സ.
അനാപത്തി അസഞ്ചിച്ച, അസ്സതിയാ, അജാനന്തസ്സ, ഗിലാനസ്സ, സീസം വിവരാപേത്വാ ദേസേതി, ആപദാസു, ഉമ്മത്തകസ്സ, ആദികമ്മികസ്സാതി.
സത്തമസിക്ഖാപദം നിട്ഠിതം.
൬൪൫. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഛബ്ബഗ്ഗിയാ ഭിക്ഖൂ ഛമായ നിസീദിത്വാ ആസനേ നിസിന്നസ്സ ധമ്മം ദേസേന്തി…പേ….
‘‘ന ഛമായം നിസീദിത്വാ ആസനേ നിസിന്നസ്സ അഗിലാനസ്സ ധമ്മം ദേസേസ്സാമീതി സിക്ഖാ കരണീയാ’’തി.
ന ഛമായം നിസീദിത്വാ [നിസിന്നേന (അട്ഠകഥാ)] ആസനേ നിസിന്നസ്സ അഗിലാനസ്സ ധമ്മോ ദേസേതബ്ബോ. യോ അനാദരിയം പടിച്ച ഛമായം നിസീദിത്വാ ആസനേ നിസിന്നസ്സ അഗിലാനസ്സ ധമ്മം ദേസേതി, ആപത്തി ദുക്കടസ്സ.
അനാപത്തി അസഞ്ചിച്ച…പേ… ആദികമ്മികസ്സാതി.
അട്ഠമസിക്ഖാപദം നിട്ഠിതം.
൬൪൬. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഛബ്ബഗ്ഗിയാ ഭിക്ഖൂ നീചേ ആസനേ നിസീദിത്വാ ഉച്ചേ ആസനേ നിസിന്നസ്സ ധമ്മം ദേസേന്തി. യേ തേ ഭിക്ഖൂ അപ്പിച്ഛാ…പേ… തേ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ ഛബ്ബഗ്ഗിയാ ഭിക്ഖൂ നീചേ ആസനേ നിസീദിത്വാ ഉച്ചേ ആസനേ നിസിന്നസ്സ ധമ്മം ദേസേസ്സന്തീ’’തി…പേ… സച്ചം കിര തുമ്ഹേ, ഭിക്ഖവേ, നീചേ ആസനേ നിസീദിത്വാ ഉച്ചേ ആസനേ നിസിന്നസ്സ ധമ്മം ദേസേഥാതി? ‘‘സച്ചം, ഭഗവാ’’തി. വിഗരഹി ബുദ്ധോ ഭഗവാ…പേ… കഥഞ്ഹി നാമ തുമ്ഹേ, മോഘപുരിസാ, നീചേ ആസനേ നിസീദിത്വാ ഉച്ചേ ആസനേ നിസിന്നസ്സ ധമ്മം ദേസേസ്സഥ! നേതം, മോഘപുരിസാ, അപ്പസന്നാനം വാ പസാദായ…പേ… വിഗരഹിത്വാ…പേ… ധമ്മിം കഥം കത്വാ ഭിക്ഖൂ ആമന്തേസി –
൬൪൭. ‘‘ഭൂതപുബ്ബം, ഭിക്ഖവേ, ബാരാണസിയം അഞ്ഞതരസ്സ ഛപകസ്സ [ഛവകസ്സ (സ്യാ.)] പജാപതി ഗബ്ഭിനീ അഹോസി. അഥ ഖോ, ഭിക്ഖവേ, സാ ഛപകീ തം ഛപകം ഏതദവോച – ‘ഗബ്ഭിനീമ്ഹി, അയ്യപുത്ത! ഇച്ഛാമി അമ്ബം ഖാദിതു’ന്തി. ‘നത്ഥി അമ്ബം [അമ്ബോ (സ്യാ.)], അകാലോ അമ്ബസ്സാ’തി. ‘സചേ ന ലഭിസ്സാമി മരിസ്സാമീ’തി. തേന ഖോ പന സമയേന, രഞ്ഞോ അമ്ബോ ധുവഫലോ ഹോതി. അഥ ഖോ, ഭിക്ഖവേ, സോ ഛപകോ യേന സോ അമ്ബോ തേനുപസങ്കമി; ഉപസങ്കമിത്വാ തം അമ്ബം അഭിരുഹിത്വാ നിലീനോ അച്ഛി. അഥ ഖോ, ഭിക്ഖവേ, രാജാ പുരോഹിതേന ബ്രാഹ്മണേന സദ്ധിം യേന സോ അമ്ബോ തേനുപസങ്കമി; ഉപസങ്കമിത്വാ ഉച്ചേ ആസനേ നിസീദിത്വാ മന്തം പരിയാപുണാതി. അഥ ഖോ, ഭിക്ഖവേ, തസ്സ ഛപകസ്സ ഏതദഹോസി – ‘യാവ അധമ്മികോ അയം രാജാ, യത്ര ഹി നാമ ഉച്ചേ ആസനേ നിസീദിത്വാ മന്തം പരിയാപുണിസ്സതി. അയഞ്ച ബ്രാഹ്മണോ അധമ്മികോ, യത്ര ഹി നാമ നീചേ ആസനേ നിസീദിത്വാ ഉച്ചേ ആസനേ നിസിന്നസ്സ മന്തം വാചേസ്സതി. അഹഞ്ചമ്ഹി അധമ്മികോ, യോഹം ഇത്ഥിയാ കാരണാ രഞ്ഞോ അമ്ബം അവഹരാമി. സബ്ബമിദം ചരിമം കത’ന്തി തത്ഥേവ പരിപതി.
[ഇമാ ഗാഥായോ ജാ. ൧.൪.൩൩-൩൫ ജാതകേ അഞ്ഞഥാ ദിസ്സന്തി] ‘‘ഉഭോ അത്ഥം ന ജാനന്തി, ഉഭോ ധമ്മം ന പസ്സരേ;
യോ ചായം മന്തം വാചേതി, യോ ചാധമ്മേനധീയതി.
‘‘സാലീനം ഓദനോ ഭുത്തോ, സുചിമംസൂപസേചനോ;
തസ്മാ ധമ്മേ ന വത്താമി, ധമ്മോ അരിയേഭി വണ്ണിതോ.
‘‘ധിരത്ഥു തം ധനലാഭം, യസലാഭഞ്ച ബ്രാഹ്മണ;
യാ വുത്തി വിനിപാതേന, അധമ്മചരണേന വാ.
‘‘പരിബ്ബജ മഹാബ്രഹ്മേ, പചന്തഞ്ഞേപി പാണിനോ;
മാ ത്വം അധമ്മോ ആചരിതോ, അസ്മാ കുമ്ഭമിവാഭിദാ’’തി.
‘‘തദാപി മേ, ഭിക്ഖവേ, അമനാപാ നീചേ ആസനേ നിസീദിത്വാ ഉച്ചേ ആസനേ നിസിന്നസ്സ മന്തം വാചേതും, കിമങ്ഗ പന ഏതരഹി ന അമനാപാ ഭവിസ്സതി നീചേ ആസനേ നിസീദിത്വാ ഉച്ചേ ആസനേ നിസിന്നസ്സ ധമ്മം ദേസേതും. നേതം, ഭിക്ഖവേ, അപ്പസന്നാനം വാ പസാദായ…പേ… ഏവഞ്ച പന, ഭിക്ഖവേ, ഇമം സിക്ഖാപദം ഉദ്ദിസേയ്യാഥ –
‘‘ന നീചേ ആസനേ നിസീദിത്വാ ഉച്ചേ ആസനേ നിസിന്നസ്സ അഗിലാനസ്സ ധമ്മം ദേസേസ്സാമീതി സിക്ഖാ കരണീയാ’’തി.
ന നീചേ ആസനേ നിസീദിത്വാ ഉച്ചേ ആസനേ നിസിന്നസ്സ അഗിലാനസ്സ ധമ്മോ ദേസേതബ്ബോ. യോ അനാദരിയം പടിച്ച നീചേ ആസനേ നിസീദിത്വാ ഉച്ചേ ആസനേ നിസിന്നസ്സ അഗിലാനസ്സ ധമ്മം ദേസേതി, ആപത്തി ദുക്കടസ്സ.
അനാപത്തി അസഞ്ചിച്ച…പേ… ആദികമ്മികസ്സാതി.
നവമസിക്ഖാപദം നിട്ഠിതം.
൬൪൮. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഛബ്ബഗ്ഗിയാ ഭിക്ഖൂ ഠിതാ നിസിന്നസ്സ ധമ്മം ദേസേന്തി…പേ….
‘‘ന ഠിതോ നിസിന്നസ്സ അഗിലാനസ്സ ധമ്മം ദേസേസ്സാമീതി സിക്ഖാ കരണീയാ’’തി.
ന ഠിതേന നിസിന്നസ്സ അഗിലാനസ്സ ധമ്മോ ദേസേതബ്ബോ. യോ അനാദരിയം പടിച്ച ഠിതോ നിസിന്നസ്സ അഗിലാനസ്സ ധമ്മം ദേസേതി, ആപത്തി ദുക്കടസ്സ.
അനാപത്തി അസഞ്ചിച്ച…പേ… ആദികമ്മികസ്സാതി.
ദസമസിക്ഖാപദം നിട്ഠിതം.
൬൪൯. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഛബ്ബഗ്ഗിയാ ഭിക്ഖൂ പച്ഛതോ ഗച്ഛന്താ പുരതോ ഗച്ഛന്തസ്സ ധമ്മം ദേസേന്തി…പേ….
‘‘ന പച്ഛതോ ഗച്ഛന്തോ പുരതോ ഗച്ഛന്തസ്സ അഗിലാനസ്സ ധമ്മം ദേസേസ്സാമീതി സിക്ഖാ കരണീയാ’’തി.
ന പച്ഛതോ ഗച്ഛന്തേന പുരതോ ഗച്ഛന്തസ്സ അഗിലാനസ്സ ധമ്മോ ദേസേതബ്ബോ. യോ അനാദരിയം പടിച്ച പച്ഛതോ ഗച്ഛന്തോ പുരതോ ഗച്ഛന്തസ്സ അഗിലാനസ്സ ധമ്മം ദേസേതി, ആപത്തി ദുക്കടസ്സ.
അനാപത്തി അസഞ്ചിച്ച…പേ… ആദികമ്മികസ്സാതി.
ഏകാദസമസിക്ഖാപദം നിട്ഠിതം.
൬൫൦. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഛബ്ബഗ്ഗിയാ ഭിക്ഖൂ ഉപ്പഥേന ഗച്ഛന്താ പഥേന ഗച്ഛന്തസ്സ ധമ്മം ദേസേന്തി…പേ….
‘‘ന ഉപ്പഥേന ഗച്ഛന്തോ പഥേന ഗച്ഛന്തസ്സ അഗിലാനസ്സ ധമ്മം ദേസേസ്സാമീതി സിക്ഖാ കരണീയാ’’തി.
ന ഉപ്പഥേന ഗച്ഛന്തേന പഥേന ഗച്ഛന്തസ്സ അഗിലാനസ്സ ധമ്മോ ദേസേതബ്ബോ. യോ അനാദരിയം പടിച്ച ഉപ്പഥേന ഗച്ഛന്തോ പഥേന ഗച്ഛന്തസ്സ അഗിലാനസ്സ ധമ്മം ദേസേതി, ആപത്തി ദുക്കടസ്സ.
അനാപത്തി അസഞ്ചിച്ച…പേ… ആദികമ്മികസ്സാതി.
ദ്വാദസമസിക്ഖാപദം നിട്ഠിതം.
൬൫൧. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഛബ്ബഗ്ഗിയാ ഭിക്ഖൂ ഠിതാ ഉച്ചാരമ്പി പസ്സാവമ്പി കരോന്തി…പേ….
‘‘ന ഠിതോ അഗിലാനോ ഉച്ചാരം വാ പസ്സാവം വാ കരിസ്സാമീതി സിക്ഖാ കരണീയാ’’തി.
ന ഠിതേന അഗിലാനേന ഉച്ചാരോ വാ പസ്സാവോ വാ കാതബ്ബോ. യോ അനാദരിയം പടിച്ച ഠിതോ അഗിലാനോ ഉച്ചാരം വാ പസ്സാവം വാ കരോതി, ആപത്തി ദുക്കടസ്സ.
അനാപത്തി അസഞ്ചിച്ച…പേ… ആദികമ്മികസ്സാതി.
തേരസമസിക്ഖാപദം നിട്ഠിതം.
൬൫൨. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഛബ്ബഗ്ഗിയാ ഭിക്ഖൂ ഹരിതേ ഉച്ചാരമ്പി പസ്സാവമ്പി ഖേളമ്പി കരോന്തി…പേ….
‘‘ന ഹരിതേ അഗിലാനോ ഉച്ചാരം വാ പസ്സാവം വാ ഖേളം വാ കരിസ്സാമീതി സിക്ഖാ കരണീയാ’’തി.
ന ഹരിതേ അഗിലാനേന ഉച്ചാരോ വാ പസ്സാവോ വാ ഖേളോ വാ കാതബ്ബോ. യോ അനാദരിയം പടിച്ച ഹരിതേ അഗിലാനോ ഉച്ചാരം വാ പസ്സാവം വാ ഖേളം വാ കരോതി, ആപത്തി ദുക്കടസ്സ.
അനാപത്തി അസഞ്ചിച്ച, അസ്സതിയാ, അജാനന്തസ്സ, ഗിലാനസ്സ, അപ്പഹരിതേ കതോ ഹരിതം ഓത്ഥരതി, ആപദാസു, ഉമ്മത്തകസ്സ, ആദികമ്മികസ്സാതി.
ചുദ്ദസമസിക്ഖാപദം നിട്ഠിതം.
൬൫൩. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഛബ്ബഗ്ഗിയാ ഭിക്ഖൂ ഉദകേ ഉച്ചാരമ്പി പസ്സാവമ്പി ഖേളമ്പി കരോന്തി. മനുസ്സാ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ സമണാ സക്യപുത്തിയാ ഉദകേ ഉച്ചാരമ്പി പസ്സാവമ്പി ഖേളമ്പി കരിസ്സന്തി, സേയ്യഥാപി ഗിഹീ കാമഭോഗിനോ’’തി! അസ്സോസും ഖോ ഭിക്ഖൂ തേസം മനുസ്സാനം ഉജ്ഝായന്താനം ഖിയ്യന്താനം വിപാചേന്താനം. യേ തേ ഭിക്ഖൂ അപ്പിച്ഛാ…പേ… തേ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ ഛബ്ബഗ്ഗിയാ ഭിക്ഖൂ ഉദകേ ഉച്ചാരമ്പി പസ്സാവമ്പി ഖേളമ്പി കരിസ്സന്തീ’’തി…പേ… സച്ചം കിര തുമ്ഹേ, ഭിക്ഖവേ, ഉദകേ ഉച്ചാരമ്പി പസ്സാവമ്പി ഖേളമ്പി കരോഥാതി? ‘‘സച്ചം, ഭഗവാ’’തി. വിഗരഹി ബുദ്ധോ ഭഗവാ…പേ… കഥഞ്ഹി നാമ തുമ്ഹേ, മോഘപുരിസാ, ഉദകേ ഉച്ചാരമ്പി പസ്സാവമ്പി ഖേളമ്പി കരിസ്സഥ! നേതം, മോഘപുരിസാ, അപ്പസന്നാനം വാ പസാദായ…പേ… ഏവഞ്ച പന, ഭിക്ഖവേ, ഇമം സിക്ഖാപദം ഉദ്ദിസേയ്യാഥ –
‘‘ന ഉദകേ ഉച്ചാരം വാ പസ്സാവം വാ ഖേളം വാ കരിസ്സാമീതി സിക്ഖാ കരണീയാ’’തി.
ഏവഞ്ചിദം ഭഗവതാ ഭിക്ഖൂനം സിക്ഖാപദം പഞ്ഞത്തം ഹോതി.
൬൫൪. തേന ഖോ പന സമയേന ഗിലാനാ ഭിക്ഖൂ ഉദകേ ഉച്ചാരമ്പി പസ്സാവമ്പി ഖേളമ്പി കാതും കുക്കുച്ചായന്തി. ഭഗവതോ ഏതമത്ഥം ആരോചേസും. അഥ ഖോ ഭഗവാ ഏതസ്മിം നിദാനേ ഏതസ്മിം പകരണേ ധമ്മിം കഥം കത്വാ ഭിക്ഖൂ ആമന്തേസി – ‘‘അനുജാനാമി, ഭിക്ഖവേ, ഗിലാനേന ഭിക്ഖുനാ ഉദകേ ഉച്ചാരമ്പി പസ്സാവമ്പി ഖേളമ്പി കാതും. ഏവഞ്ച പന, ഭിക്ഖവേ, ഇമം സിക്ഖാപദം ഉദ്ദിസേയ്യാഥ –
‘‘ന ഉദകേ അഗിലാനോ ഉച്ചാരം വാ പസ്സാവം വാ ഖേളം വാ കരിസ്സാമീതി സിക്ഖാ കരണീയാ’’തി.
ന ഉദകേ അഗിലാനേന ഉച്ചാരോ വാ പസ്സാവോ വാ ഖേളോ വാ കാതബ്ബോ. യോ അനാദരിയം പടിച്ച ഉദകേ അഗിലാനോ ഉച്ചാരം വാ പസ്സാവം വാ ഖേളം വാ കരോതി, ആപത്തി ദുക്കടസ്സ.
അനാപത്തി അസഞ്ചിച്ച, അസ്സതിയാ, അജാനന്തസ്സ, ഗിലാനസ്സ, ഥലേ കതോ ഉദകം ഓത്ഥരതി, ആപദാസു, ഉമ്മത്തകസ്സ, ഖിത്തചിത്തസ്സ, വേദനാട്ടസ്സ, ആദികമ്മികസ്സാതി.
പന്നരസമസിക്ഖാപദം നിട്ഠിതം.
പാദുകവഗ്ഗോ സത്തമോ.
ഉദ്ദിട്ഠാ ഖോ, ആയസ്മന്തോ, സേഖിയാ ധമ്മാ. തത്ഥായസ്മന്തേ പുച്ഛാമി – ‘‘കച്ചിത്ഥ പരിസുദ്ധാ’’? ദുതിയമ്പി പുച്ഛാമി – ‘‘കച്ചിത്ഥ പരിസുദ്ധാ’’? തതിയമ്പി പുച്ഛാമി – ‘‘കച്ചിത്ഥ പരിസുദ്ധാ’’? പരിസുദ്ധേത്ഥായസ്മന്തോ, തസ്മാ തുണ്ഹീ, ഏവമേതം ധാരയാമീതി.
സേഖിയാ നിട്ഠിതാ.
സേഖിയകണ്ഡം നിട്ഠിതം.