൭. സേഖിയകണ്ഡം

൧. പരിമണ്ഡലവഗ്ഗോ

ഇമേ ഖോ പനായസ്മന്തോ സേഖിയാ

ധമ്മാ ഉദ്ദേസം ആഗച്ഛന്തി.

൫൭൬. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഛബ്ബഗ്ഗിയാ ഭിക്ഖൂ പുരതോപി പച്ഛതോപി ഓലമ്ബേന്താ നിവാസേന്തി. മനുസ്സാ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ സമണാ സക്യപുത്തിയാ പുരതോപി പച്ഛതോപി ഓലമ്ബേന്താ നിവാസേസ്സന്തി, സേയ്യഥാപി ഗിഹീ കാമഭോഗിനോ’’തി. അസ്സോസും ഖോ ഭിക്ഖൂ തേസം മനുസ്സാനം ഉജ്ഝായന്താനം ഖിയ്യന്താനം വിപാചേന്താനം. യേ തേ ഭിക്ഖൂ അപ്പിച്ഛാ…പേ… തേ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ ഛബ്ബഗ്ഗിയാ ഭിക്ഖൂ പുരതോപി പച്ഛതോപി ഓലമ്ബേന്താ നിവാസേസ്സന്തീ’’തി! അഥ ഖോ തേ ഭിക്ഖൂ ഛബ്ബഗ്ഗിയേ ഭിക്ഖൂ അനേകപരിയായേന വിഗരഹിത്വാ ഭഗവതോ ഏതമത്ഥം ആരോചേസും. അഥ ഖോ ഭഗവാ ഏതസ്മിം നിദാനേ ഏതസ്മിം പകരണേ ഭിക്ഖുസങ്ഘം സന്നിപാതാപേത്വാ ഛബ്ബഗ്ഗിയേ ഭിക്ഖൂ പടിപുച്ഛി – ‘‘സച്ചം കിര തുമ്ഹേ, ഭിക്ഖവേ, പുരതോപി പച്ഛതോപി ഓലമ്ബേന്താ നിവാസേഥാ’’തി? ‘‘സച്ചം, ഭഗവാ’’തി. വിഗരഹി ബുദ്ധോ ഭഗവാ…പേ… കഥഞ്ഹി നാമ തുമ്ഹേ, മോഘപുരിസാ, പുരതോപി പച്ഛതോപി ഓലമ്ബേന്താ നിവാസേസ്സഥ! നേതം, മോഘപുരിസാ, അപ്പസന്നാനം വാ പസാദായ…പേ… ഏവഞ്ച പന, ഭിക്ഖവേ, ഇമം സിക്ഖാപദം ഉദ്ദിസേയ്യാഥ –

‘‘പരിമണ്ഡലം നിവാസേസ്സാമീതി സിക്ഖാ കരണീയാ’’തി.

പരിമണ്ഡലം നിവാസേതബ്ബം നാഭിമണ്ഡലം ജാണുമണ്ഡലം പടിച്ഛാദേന്തേന. യോ അനാദരിയം പടിച്ച പുരതോ വാ പച്ഛതോ വാ ഓലമ്ബേന്തോ നിവാസേതി, ആപത്തി ദുക്കടസ്സ.

അനാപത്തി അസഞ്ചിച്ച, അസ്സതിയാ, അജാനന്തസ്സ, ഗിലാനസ്സ, ആപദാസു, ഉമ്മത്തകസ്സ,

ആദികമ്മികസ്സാതി.

പഠമസിക്ഖാപദം നിട്ഠിതം.

൫൭൭. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഛബ്ബഗ്ഗിയാ ഭിക്ഖൂ പുരതോപി പച്ഛതോപി ഓലമ്ബേന്താ പാരുപന്തി…പേ….

‘‘പരിമണ്ഡലം പാരുപിസ്സാമീതി സിക്ഖാ കരണീയാ’’തി.

പരിമണ്ഡലം പാരുപിതബ്ബം ഉഭോ കണ്ണേ സമം കത്വാ. യോ അനാദരിയം പടിച്ച പുരതോ വാ പച്ഛതോ വാ ഓലമ്ബേന്തോ പാരുപതി, ആപത്തി ദുക്കടസ്സ.

അനാപത്തി അസഞ്ചിച്ച, അസ്സതിയാ, അജാനന്തസ്സ, ഗിലാനസ്സ, ആപദാസു, ഉമ്മത്തകസ്സ,

ആദികമ്മികസ്സാതി.

ദുതിയസിക്ഖാപദം നിട്ഠിതം.

൫൭൮. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഛബ്ബഗ്ഗിയാ ഭിക്ഖൂ കായം വിവരിത്വാ അന്തരഘരേ ഗച്ഛന്തി…പേ….

‘‘സുപ്പടിച്ഛന്നോ അന്തരഘരേ ഗമിസ്സാമീതി സിക്ഖാ കരണീയാ’’തി.

സുപ്പടിച്ഛന്നേന അന്തരഘരേ ഗന്തബ്ബം. യോ അനാദരിയം പടിച്ച കായം വിവരിത്വാ അന്തരഘരേ ഗച്ഛതി, ആപത്തി ദുക്കടസ്സ.

അനാപത്തി അസഞ്ചിച്ച, അസ്സതിയാ, അജാനന്തസ്സ, ഗിലാനസ്സ, ആപദാസു, ഉമ്മത്തകസ്സ,

ആദികമ്മികസ്സാതി.

തതിയസിക്ഖാപദം നിട്ഠിതം.

൫൭൯. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഛബ്ബഗ്ഗിയാ ഭിക്ഖൂ കായം വിവരിത്വാ അന്തരഘരേ നിസീദന്തി…പേ….

‘‘സുപ്പടിച്ഛന്നോ അന്തരഘരേ നിസീദിസ്സാമീതി സിക്ഖാ കരണീയാ’’തി.

സുപ്പടിച്ഛന്നേന അന്തരഘരേ നിസീദിതബ്ബം. യോ അനാദരിയം പടിച്ച കായം വിവരിത്വാ അന്തരഘരേ നിസീദതി, ആപത്തി ദുക്കടസ്സ.

അനാപത്തി അസഞ്ചിച്ച, അസ്സതിയാ, അജാനന്തസ്സ, ഗിലാനസ്സ, വാസൂപഗതസ്സ, ആപദാസു, ഉമ്മത്തകസ്സ, ആദികമ്മികസ്സാതി.

ചതുത്ഥസിക്ഖാപദം നിട്ഠിതം.

൫൮൦. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഛബ്ബഗ്ഗിയാ ഭിക്ഖൂ ഹത്ഥമ്പി പാദമ്പി കീളാപേന്താ അന്തരഘരേ ഗച്ഛന്തി…പേ….

‘‘സുസംവുതോ അന്തരഘരേ ഗമിസ്സാമീതി സിക്ഖാ കരണീയാ’’തി.

സുസംവുതേന അന്തരഘരേ ഗന്തബ്ബം. യോ അനാദരിയം പടിച്ച ഹത്ഥം വാ പാദം വാ കീളാപേന്തോ അന്തരഘരേ ഗച്ഛതി, ആപത്തി ദുക്കടസ്സ.

അനാപത്തി അസഞ്ചിച്ച, അസ്സതിയാ, അജാനന്തസ്സ, ഗിലാനസ്സ, ഉമ്മത്തകസ്സ, ആദികമ്മികസ്സാതി.

പഞ്ചമസിക്ഖാപദം നിട്ഠിതം.

൫൮൧. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഛബ്ബഗ്ഗിയാ ഭിക്ഖൂ ഹത്ഥമ്പി പാദമ്പി കീളാപേന്താ അന്തരഘരേ നിസീദന്തി…പേ….

‘‘സുസംവുതോ അന്തരഘരേ നിസീദിസ്സാമീതി സിക്ഖാ കരണീയാ’’തി.

സുസംവുതേന അന്തരഘരേ നിസീദിതബ്ബം. യോ അനാദരിയം പടിച്ച ഹത്ഥം വാ പാദം വാ കീളാപേന്തോ അന്തരഘരേ നിസീദതി, ആപത്തി ദുക്കടസ്സ.

അനാപത്തി അസഞ്ചിച്ച, അസ്സതിയാ, അജാനന്തസ്സ, ഗിലാനസ്സ, ഉമ്മത്തകസ്സ, ആദികമ്മികസ്സാതി.

ഛട്ഠസിക്ഖാപദം നിട്ഠിതം.

൫൮൨. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഛബ്ബഗ്ഗിയാ ഭിക്ഖൂ തഹം തഹം ഓലോകേന്താ അന്തരഘരേ ഗച്ഛന്തി…പേ….

‘‘ഓക്ഖിത്തചക്ഖു അന്തരഘരേ ഗമിസ്സാമീതി സിക്ഖാ കരണീയാ’’തി.

ഓക്ഖിത്തചക്ഖുനാ അന്തരഘരേ ഗന്തബ്ബം യുഗമത്തം പേക്ഖന്തേന. യോ അനാദരിയം പടിച്ച തഹം തഹം ഓലോകേന്തോ അന്തരഘരേ ഗച്ഛതി, ആപത്തി ദുക്കടസ്സ.

അനാപത്തി അസഞ്ചിച്ച, അസ്സതിയാ, അജാനന്തസ്സ, ഗിലാനസ്സ, ആപദാസു, ഉമ്മത്തകസ്സ,

ആദികമ്മികസ്സാതി.

സത്തമസിക്ഖാപദം നിട്ഠിതം.

൫൮൩. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഛബ്ബഗ്ഗിയാ ഭിക്ഖൂ തഹം തഹം ഓലോകേന്താ അന്തരഘരേ നിസീദന്തി…പേ….

‘‘ഓക്ഖിത്തചക്ഖു അന്തരഘരേ നിസീദിസ്സാമീതി സിക്ഖാ കരണീയാ’’തി.

ഓക്ഖിത്തചക്ഖുനാ അന്തരഘരേ നിസീദിതബ്ബം യുഗമത്തം പേക്ഖന്തേന. യോ അനാദരിയം പടിച്ച തഹം തഹം ഓലോകേന്തോ അന്തരഘരേ നിസീദതി, ആപത്തി ദുക്കടസ്സ.

അനാപത്തി അസഞ്ചിച്ച, അസ്സതിയാ, അജാനന്തസ്സ, ഗിലാനസ്സ, ആപദാസു, ഉമ്മത്തകസ്സ,

ആദികമ്മികസ്സാതി.

അട്ഠമസിക്ഖാപദം നിട്ഠിതം.

൫൮൪. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഛബ്ബഗ്ഗിയാ ഭിക്ഖൂ ഉക്ഖിത്തകായ അന്തരഘരേ ഗച്ഛന്തി…പേ….

‘‘ന ഉക്ഖിത്തകായ അന്തരഘരേ ഗമിസ്സാമീതി സിക്ഖാ കരണീയാ’’തി.

ന ഉക്ഖിത്തകായ അന്തരഘരേ ഗന്തബ്ബം. യോ അനാദരിയം പടിച്ച ഏകതോ വാ ഉഭതോ വാ ഉക്ഖിപിത്വാ അന്തരഘരേ ഗച്ഛതി, ആപത്തി ദുക്കടസ്സ.

അനാപത്തി അസഞ്ചിച്ച, അസ്സതിയാ, അജാനന്തസ്സ, ഗിലാനസ്സ, ആപദാസു, ഉമ്മത്തകസ്സ,

ആദികമ്മികസ്സാതി.

നവമസിക്ഖാപദം നിട്ഠിതം.

൫൮൫. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഛബ്ബഗ്ഗിയാ ഭിക്ഖൂ ഉക്ഖിത്തകായ അന്തരഘരേ നിസീദന്തി…പേ….

‘‘ന ഉക്ഖിത്തകായ അന്തരഘരേ നിസീദിസ്സാമീതി സിക്ഖാ കരണീയാ’’തി.

ന ഉക്ഖിത്തകായ അന്തരഘരേ നിസീദിതബ്ബം. യോ അനാദരിയം പടിച്ച ഏകതോ വാ ഉഭതോ വാ ഉക്ഖിപിത്വാ അന്തരഘരേ നിസീദതി, ആപത്തി ദുക്കടസ്സ.

അനാപത്തി അസഞ്ചിച്ച, അസ്സതിയാ, അജാനന്തസ്സ, ഗിലാനസ്സ, വാസൂപഗതസ്സ, ആപദാസു, ഉമ്മത്തകസ്സ, ആദികമ്മികസ്സാതി.

ദസമസിക്ഖാപദം നിട്ഠിതം.

പരിമണ്ഡലവഗ്ഗോ പഠമോ.

൨. ഉജ്ജഗ്ഘികവഗ്ഗോ

൫൮൬. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഛബ്ബഗ്ഗിയാ ഭിക്ഖൂ മഹാഹസിതം ഹസന്താ അന്തരഘരേ ഗച്ഛന്തി…പേ….

‘‘ന ഉജ്ജഗ്ഘികായ അന്തരഘരേ ഗമിസ്സാമീതി സിക്ഖാ കരണീയാ’’തി.

ന ഉജ്ജഗ്ഘികായ അന്തരഘരേ ഗന്തബ്ബം. യോ അനാദരിയം പടിച്ച മഹാഹസിതം ഹസന്തോ അന്തരഘരേ ഗച്ഛതി, ആപത്തി ദുക്കടസ്സ.

അനാപത്തി അസഞ്ചിച്ച, അസ്സതിയാ, അജാനന്തസ്സ, ഗിലാനസ്സ, ഹസനീയസ്മിം വത്ഥുസ്മിം മിഹിതമത്തം കരോതി, ആപദാസു, ഉമ്മത്തകസ്സ, ആദികമ്മികസ്സാതി.

പഠമസിക്ഖാപദം നിട്ഠിതം.

൫൮൭. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഛബ്ബഗ്ഗിയാ ഭിക്ഖൂ മഹാഹസിതം ഹസന്താ അന്തരഘരേ നിസീദന്തി…പേ….

‘‘ന ഉജ്ജഗ്ഘികായ അന്തരഘരേ നിസീദിസ്സാമീതി സിക്ഖാ കരണീയാ’’തി.

ന ഉജ്ജഗ്ഘികായ അന്തരഘരേ നിസീദിതബ്ബം. യോ അനാദരിയം പടിച്ച മഹാഹസിതം ഹസന്തോ അന്തരഘരേ നിസീദതി, ആപത്തി ദുക്കടസ്സ.

അനാപത്തി അസഞ്ചിച്ച, അസ്സതിയാ, അജാനന്തസ്സ, ഗിലാനസ്സ, ഹസനീയസ്മിം വത്ഥുസ്മിം മിഹിതമത്തം കരോതി, ആപദാസു, ഉമ്മത്തകസ്സ, ആദികമ്മികസ്സാതി.

ദുതിയസിക്ഖാപദം നിട്ഠിതം.

൫൮൮. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഛബ്ബഗ്ഗിയാ ഭിക്ഖൂ ഉച്ചാസദ്ദം മഹാസദ്ദം കരോന്താ അന്തരഘരേ ഗച്ഛന്തി…പേ….

‘‘അപ്പസദ്ദോ അന്തരഘരേ ഗമിസ്സാമീതി സിക്ഖാ കരണീയാ’’തി.

അപ്പസദ്ദേന അന്തരഘരേ ഗന്തബ്ബം. യോ അനാദരിയം പടിച്ച ഉച്ചാസദ്ദം മഹാസദ്ദം കരോന്തോ അന്തരഘരേ ഗച്ഛതി, ആപത്തി ദുക്കടസ്സ.

അനാപത്തി അസഞ്ചിച്ച, അസ്സതിയാ, അജാനന്തസ്സ, ഗിലാനസ്സ, ആപദാസു, ഉമ്മത്തകസ്സ, ആദികമ്മികസ്സാതി.

തതിയസിക്ഖാപദം നിട്ഠിതം.

൫൮൯. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഛബ്ബഗ്ഗിയാ ഭിക്ഖൂ ഉച്ചാസദ്ദം മഹാസദ്ദം കരോന്താ അന്തരഘരേ നിസീദന്തി…പേ….

‘‘അപ്പസദ്ദോ അന്തരഘരേ നിസീദിസ്സാമീതി സിക്ഖാ കരണീയാ’’തി.

അപ്പസദ്ദേന അന്തരഘരേ നിസീദിതബ്ബം. യോ അനാദരിയം പടിച്ച ഉച്ചാസദ്ദം മഹാസദ്ദം കരോന്തോ അന്തരഘരേ നിസീദതി, ആപത്തി ദുക്കടസ്സ.

അനാപത്തി അസഞ്ചിച്ച…പേ… ആദികമ്മികസ്സാതി.

ചതുത്ഥസിക്ഖാപദം നിട്ഠിതം.

൫൯൦. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഛബ്ബഗ്ഗിയാ ഭിക്ഖൂ കായപ്പചാലകം അന്തരഘരേ ഗച്ഛന്തി കായം ഓലമ്ബേന്താ…പേ….

‘‘ന കായപ്പചാലകം അന്തരഘരേ ഗമിസ്സാമീതി സിക്ഖാ കരണീയാ’’തി.

ന കായപ്പചാലകം അന്തരഘരേ ഗന്തബ്ബം. കായം പഗ്ഗഹേത്വാ ഗന്തബ്ബം. യോ അനാദരിയം പടിച്ച കായപ്പചാലകം അന്തരഘരേ ഗച്ഛതി കായം ഓലമ്ബേന്തോ, ആപത്തി ദുക്കടസ്സ.

അനാപത്തി അസഞ്ചിച്ച…പേ… ആദികമ്മികസ്സാതി.

പഞ്ചമസിക്ഖാപദം നിട്ഠിതം.

൫൯൧. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഛബ്ബഗ്ഗിയാ ഭിക്ഖൂ കായപ്പചാലകം അന്തരഘരേ നിസീദന്തി, കായം ഓലമ്ബേന്താ…പേ….

‘‘ന കായപ്പചാലകം അന്തരഘരേ നിസീദിസ്സാമീതി സിക്ഖാ കരണീയാ’’തി.

ന കായപ്പചാലകം അന്തരഘരേ നിസീദിതബ്ബം. കായം പഗ്ഗഹേത്വാ നിസീദിതബ്ബം. യോ അനാദരിയം പടിച്ച കായപ്പചാലകം അന്തരഘരേ നിസീദതി കായം ഓലമ്ബേന്തോ, ആപത്തി ദുക്കടസ്സ.

അനാപത്തി അസഞ്ചിച്ച, അസ്സതിയാ, അജാനന്തസ്സ, ഗിലാനസ്സ, വാസൂപഗതസ്സ, ആപദാസു, ഉമ്മത്തകസ്സ, ആദികമ്മികസ്സാതി.

ഛട്ഠസിക്ഖാപദം നിട്ഠിതം.

൫൯൨. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഛബ്ബഗ്ഗിയാ ഭിക്ഖൂ ബാഹുപ്പചാലകം അന്തരഘരേ ഗച്ഛന്തി ബാഹും ഓലമ്ബേന്താ…പേ….

‘‘ന ബാഹുപ്പചാലകം അന്തരഘരേ ഗമിസ്സാമീതി സിക്ഖാ കരണീയാ’’തി.

ന ബാഹുപ്പചാലകം അന്തരഘരേ ഗന്തബ്ബം. ബാഹും പഗ്ഗഹേത്വാ ഗന്തബ്ബം. യോ അനാദരിയം പടിച്ച ബാഹുപ്പചാലകം അന്തരഘരേ ഗച്ഛതി ബാഹും ഓലമ്ബേന്തോ, ആപത്തി ദുക്കടസ്സ.

അനാപത്തി അസഞ്ചിച്ച…പേ… ആദികമ്മികസ്സാതി.

സത്തമസിക്ഖാപദം നിട്ഠിതം.

൫൯൩. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഛബ്ബഗ്ഗിയാ ഭിക്ഖൂ ബാഹുപ്പചാലകം അന്തരഘരേ നിസീദന്തി ബാഹും ഓലമ്ബേന്താ…പേ….

‘‘ന ബാഹുപ്പചാലകം അന്തരഘരേ നിസീദിസ്സാമീതി സിക്ഖാ കരണീയാ’’തി.

ന ബാഹുപ്പചാലകം അന്തരഘരേ നിസീദിതബ്ബം. ബാഹും പഗ്ഗഹേത്വാ നിസീദിതബ്ബം. യോ അനാദരിയം പടിച്ച ബാഹുപ്പചാലകം അന്തരഘരേ നിസീദതി ബാഹും ഓലമ്ബേന്തോ, ആപത്തി ദുക്കടസ്സ.

അനാപത്തി അസഞ്ചിച്ച, അസ്സതിയാ, അജാനന്തസ്സ, ഗിലാനസ്സ, വാസൂപഗതസ്സ, ആപദാസു, ഉമ്മത്തകസ്സ, ആദികമ്മികസ്സാതി.

അട്ഠമസിക്ഖാപദം നിട്ഠിതം.

൫൯൪. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡകസ്സ ആരാമേ. തേന ഖോ പന സമയേന ഛബ്ബഗ്ഗിയാ ഭിക്ഖൂ സീസപ്പചാലകം അന്തരഘരേ ഗച്ഛന്തി സീസം ഓലമ്ബേന്താ…പേ….

‘‘ന സീസപ്പചാലകം അന്തരഘരേ ഗമിസ്സാമീതി സിക്ഖാ കരണീയാ’’തി.

ന സീസപ്പചാലകം അന്തരഘരേ ഗന്തബ്ബം. സീസം പഗ്ഗഹേത്വാ ഗന്തബ്ബം. യോ അനാദരിയം പടിച്ച സീസപ്പചാലകം അന്തരഘരേ ഗച്ഛതി സീസം ഓലമ്ബേന്തോ, ആപത്തി ദുക്കടസ്സ.

അനാപത്തി അസഞ്ചിച്ച…പേ… ആദികമ്മികസ്സാതി.

നവമസിക്ഖാപദം നിട്ഠിതം.

൫൯൫. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഛബ്ബഗ്ഗിയാ ഭിക്ഖൂ സീസപ്പചാലകം അന്തരഘരേ നിസീദന്തി സീസം ഓലമ്ബേന്താ…പേ….

‘‘ന സീസപ്പചാലകം അന്തരഘരേ നിസീദിസ്സാമീതി സിക്ഖാ കരണീയാ’’തി.

ന സീസപ്പചാലകം അന്തരഘരേ നിസീദിതബ്ബം. സീസം പഗ്ഗഹേത്വാ നിസീദിതബ്ബം. യോ അനാദരിയം പടിച്ച സീസപ്പചാലകം അന്തരഘരേ നിസീദതി സീസം ഓലമ്ബേന്തോ, ആപത്തി ദുക്കടസ്സ.

അനാപത്തി അസഞ്ചിച്ച, അസ്സതിയാ, അജാനന്തസ്സ, ഗിലാനസ്സ, വാസൂപഗതസ്സ, ആപദാസു, ഉമ്മത്തകസ്സ, ആദികമ്മികസ്സാതി.

ദസമസിക്ഖാപദം നിട്ഠിതം.

ഉജ്ജഗ്ഘികവഗ്ഗോ ദുതിയോ.

൩. ഖമ്ഭകതവഗ്ഗോ

൫൯൬. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഛബ്ബഗ്ഗിയാ ഭിക്ഖൂ ഖമ്ഭകതാ അന്തരഘരേ ഗച്ഛന്തി…പേ….

‘‘ന ഖമ്ഭകതോ അന്തരഘരേ ഗമിസ്സാമീതി സിക്ഖാ കരണീയാ’’തി.

ന ഖമ്ഭകതേന അന്തരഘരേ ഗന്തബ്ബം. യോ അനാദരിയം പടിച്ച ഏകതോ വാ ഉഭതോ വാ ഖമ്ഭം കത്വാ അന്തരഘരേ ഗച്ഛതി, ആപത്തി ദുക്കടസ്സ.

അനാപത്തി അസഞ്ചിച്ച…പേ… ആദികമ്മികസ്സാതി.

പഠമസിക്ഖാപദം നിട്ഠിതം.

൫൯൭. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഛബ്ബഗ്ഗിയാ ഭിക്ഖൂ ഖമ്ഭകതാ അന്തരഘരേ നിസീദന്തി…പേ….

‘‘ന ഖമ്ഭകതോ അന്തരഘരേ നിസീദിസ്സാമീതി സിക്ഖാ കരണീയാ’’തി.

ന ഖമ്ഭകതേന അന്തരഘരേ നിസീദിതബ്ബം. യോ അനാദരിയം പടിച്ച ഏകതോ വാ ഉഭതോ വാ ഖമ്ഭം കത്വാ അന്തരഘരേ നിസീദതി, ആപത്തി ദുക്കടസ്സ.

അനാപത്തി അസഞ്ചിച്ച, അസ്സതിയാ, അജാനന്തസ്സ, ഗിലാനസ്സ, വാസൂപഗതസ്സ, ആപദാസു, ഉമ്മത്തകസ്സ, ആദികമ്മികസ്സാതി.

ദുതിയസിക്ഖാപദം നിട്ഠിതം.

൫൯൮. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഛബ്ബഗ്ഗിയാ ഭിക്ഖൂ സസീസം പാരുപിത്വാ അന്തരഘരേ ഗച്ഛന്തി…പേ….

‘‘ന ഓഗുണ്ഠിതോ അന്തരഘരേ ഗമിസ്സാമീതി സിക്ഖാ കരണീയാ’’തി.

ന ഓഗുണ്ഠിതേന അന്തരഘരേ ഗന്തബ്ബം. യോ അനാദരിയം പടിച്ച സസീസം പാരുപിത്വാ അന്തരഘരേ ഗച്ഛതി, ആപത്തി ദുക്കടസ്സ.

അനാപത്തി അസഞ്ചിച്ച…പേ… ആദികമ്മികസ്സാതി.

തതിയസിക്ഖാപദം നിട്ഠിതം.

൫൯൯. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഛബ്ബഗ്ഗിയാ ഭിക്ഖൂ സസീസം പാരുപിത്വാ അന്തരഘരേ നിസീദന്തി…പേ….

‘‘ന ഓഗുണ്ഠിതോ അന്തരഘരേ നിസീദിസ്സാമീതി സിക്ഖാ കരണീയാ’’തി.

ന ഓഗുണ്ഠിതേന അന്തരഘരേ നിസീദിതബ്ബം. യോ അനാദരിയം പടിച്ച സസീസം പാരുപിത്വാ അന്തരഘരേ നിസീദതി, ആപത്തി ദുക്കടസ്സ.

അനാപത്തി അസഞ്ചിച്ച, അസ്സതിയാ, അജാനന്തസ്സ, ഗിലാനസ്സ, വാസൂപഗതസ്സ, ആപദാസു, ഉമ്മത്തകസ്സ, ആദികമ്മികസ്സാതി.

ചതുത്ഥസിക്ഖാപദം നിട്ഠിതം.

൬൦൦. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഛബ്ബഗ്ഗിയാ ഭിക്ഖൂ ഉക്കുടികായ അന്തരഘരേ ഗച്ഛന്തി…പേ….

‘‘ന ഉക്കുടികായ അന്തരഘരേ ഗമിസ്സാമീതി സിക്ഖാ കരണീയാ’’തി.

ന ഉക്കുടികായ അന്തരഘരേ ഗന്തബ്ബം. യോ അനാദരിയം പടിച്ച ഉക്കുടികായ അന്തരഘരേ ഗച്ഛതി, ആപത്തി ദുക്കടസ്സ.

അനാപത്തി അസഞ്ചിച്ച…പേ… ആദികമ്മികസ്സാതി.

പഞ്ചമസിക്ഖാപദം നിട്ഠിതം.

൬൦൧. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഛബ്ബഗ്ഗിയാ ഭിക്ഖൂ പല്ലത്ഥികായ [പല്ലത്തികായ (ക.)] അന്തരഘരേ നിസീദന്തി…പേ….

‘‘ന പല്ലത്ഥികായ അന്തരഘരേ നിസീദിസ്സാമീതി സിക്ഖാ കരണീയാ’’തി.

ന പല്ലത്ഥികായ അന്തരഘരേ നിസീദിതബ്ബം. യോ അനാദരിയം പടിച്ച ഹത്ഥപല്ലത്ഥികായ വാ ദുസ്സപല്ലത്ഥികായ വാ അന്തരഘരേ നിസീദതി, ആപത്തി ദുക്കടസ്സ.

അനാപത്തി അസഞ്ചിച്ച, അസ്സതിയാ, അജാനന്തസ്സ, ഗിലാനസ്സ, വാസൂപഗതസ്സ, ആപദാസു,

ഉമ്മത്തകസ്സ, ആദികമ്മികസ്സാതി.

ഛട്ഠസിക്ഖാപദം നിട്ഠിതം.

൬൦൨. തേന സമയേന ബുദ്ധോ ഭഗവാ സാവത്ഥിയം വിഹരതി ജേതവനേ അനാഥപിണ്ഡികസ്സ ആരാമേ. തേന ഖോ പന സമയേന ഛബ്ബഗ്ഗിയാ ഭിക്ഖൂ അസക്കച്ചം പിണ്ഡപാതം പടിഗ്ഗണ്ഹന്തി ഛഡ്ഡേതുകാമാ വിയ…പേ….

‘‘സക്കച്ചം പിണ്ഡപാതം പടിഗ്ഗഹേസ്സാമീതി സിക്ഖാ കരണീയാ’’തി.

സക്കച്ചം പിണ്ഡപാതോ പടിഗ്ഗഹേതബ്ബോ. യോ അനാദരിയം പടിച്ച അസക്കച്ചം പിണ്ഡപാതം പടിഗ്ഗണ്ഹാതി ഛഡ്ഡേതുകാമോ വിയ, ആപത്തി ദുക്കടസ്സ.

അനാപത്തി അസഞ്ചിച്ച…പേ… ആദികമ്മികസ്സാതി.

സത്തമസിക്ഖാപദം നിട്ഠിതം.