൨൦൮. സിവേയ്യകദുസ്സയുഗകഥാ

൩൩൫. തേന ഖോ പന സമയേന രഞ്ഞോ പജ്ജോതസ്സ സിവേയ്യകം ദുസ്സയുഗം ഉപ്പന്നം ഹോതി – ബഹൂനം [ബഹുന്നം (സീ. സ്യാ.)] ദുസ്സാനം ബഹൂനം ദുസ്സയുഗാനം ബഹൂനം ദുസ്സയുഗസതാനം ബഹൂനം ദുസ്സയുഗസഹസ്സാനം ബഹൂനം ദുസ്സയുഗസതസഹസ്സാനം അഗ്ഗഞ്ച സേട്ഠഞ്ച മോക്ഖഞ്ച ഉത്തമഞ്ച പവരഞ്ച. അഥ ഖോ രാജാ പജ്ജോതോ തം സിവേയ്യകം ദുസ്സയുഗം ജീവകസ്സ കോമാരഭച്ചസ്സ പാഹേസി. അഥ ഖോ ജീവകസ്സ കോമാരഭച്ചസ്സ ഏതദഹോസി – ‘‘ഇദം ഖോ മേ സിവേയ്യകം ദുസ്സയുഗം രഞ്ഞാ പജ്ജോതേന പഹിതം – ബഹൂനം ദുസ്സാനം ബഹൂനം ദുസ്സയുഗാനം ബഹൂനം ദുസ്സയുഗസതാനം ബഹൂനം ദുസ്സയുഗസഹസ്സാനം ബഹൂനം ദുസ്സയുഗസതസഹസ്സാനം അഗ്ഗഞ്ച സേട്ഠഞ്ച മോക്ഖഞ്ച ഉത്തമഞ്ച പവരഞ്ച. നയിദം അഞ്ഞോ കോചി പച്ചാരഹതി അഞ്ഞത്ര തേന ഭഗവതാ അരഹതാ സമ്മാസമ്ബുദ്ധേന, രഞ്ഞാ വാ മാഗധേന സേനിയേന ബിമ്ബിസാരേനാ’’തി.

സിവേയ്യകദുസ്സയുഗകഥാ നിട്ഠിതാ.