൧൮൫. ചതുമഹാപദേസകഥാ

൩൦൫. തേന ഖോ പന സമയേന ഭിക്ഖൂനം കിസ്മിഞ്ചി കിസ്മിഞ്ചി ഠാനേ കുക്കുച്ചം ഉപ്പജ്ജതി – ‘‘കിം നു ഖോ ഭഗവതാ അനുഞ്ഞാതം, കിം അനനുഞ്ഞാത’’ന്തി? ഭഗവതോ ഏതമത്ഥം ആരോചേസും. ‘‘യം, ഭിക്ഖവേ, മയാ ‘ഇദം ന കപ്പതീ’തി അപ്പടിക്ഖിത്തം തഞ്ചേ അകപ്പിയം അനുലോമേതി, കപ്പിയം പടിബാഹതി, തം വോ ന കപ്പതി. യം, ഭിക്ഖവേ, മയാ ‘ഇദം ന കപ്പതീ’തി അപ്പടിക്ഖിത്തം തഞ്ചേ കപ്പിയം അനുലോമേതി, അകപ്പിയം പടിബാഹതി, തം വോ കപ്പതി. യം, ഭിക്ഖവേ, മയാ ‘ഇദം കപ്പതീ’തി അനനുഞ്ഞാതം തഞ്ചേ അകപ്പിയം അനുലോമേതി, കപ്പിയം പടിബാഹതി, തം വോ ന കപ്പതി. യം, ഭിക്ഖവേ, മയാ ‘ഇദം കപ്പതീ’തി അനനുഞ്ഞാതം, തഞ്ചേ കപ്പിയം അനുലോമേതി, അകപ്പിയം പടിബാഹതി, തം വോ കപ്പതീ’’തി.

അഥ ഖോ ഭിക്ഖൂനം ഏതദഹോസി – ‘‘കപ്പതി നു ഖോ യാവകാലികേന യാമകാലികം, ന നു ഖോ കപ്പതി? കപ്പതി നു ഖോ യാവകാലികേന സത്താഹകാലികം, ന നു ഖോ കപ്പതി? കപ്പതി നു ഖോ യാവകാലികേന യാവജീവികം, ന നു ഖോ കപ്പതി? കപ്പതി നു ഖോ യാമകാലികേന സത്താഹകാലികം, ന നു ഖോ കപ്പതി? കപ്പതി നു ഖോ യാമകാലികേന യാവജീവികം, ന നു ഖോ കപ്പതി? കപ്പതി നു ഖോ സത്താഹകാലികേന യാവജീവികം, ന നു ഖോ കപ്പതീ’’തി? ഭഗവതോ ഏതമത്ഥം ആരോചേസും. ‘‘യാവകാലികേന, ഭിക്ഖവേ, യാമകാലികം, തദഹു പടിഗ്ഗഹിതം കാലേ കപ്പതി, വികാലേ ന കപ്പതി. യാവകാലികേന, ഭിക്ഖവേ, സത്താഹകാലികം, തദഹു പടിഗ്ഗഹിതം കാലേ കപ്പതി, വികാലേ ന കപ്പതി. യാവകാലികേന, ഭിക്ഖവേ, യാവജീവികം, തദഹു പടിഗ്ഗഹിതം കാലേ കപ്പതി, വികാലേ ന കപ്പതി. യാമകാലികേന, ഭിക്ഖവേ, സത്താഹകാലികം, തദഹു പടിഗ്ഗഹിതം യാമേ കപ്പതി, യാമാതിക്കന്തേ ന കപ്പതി. യാമകാലികേന, ഭിക്ഖവേ, യാവജീവികം, തദഹു പടിഗ്ഗഹിതം യാമേ കപ്പതി, യാമാതിക്കന്തേ ന കപ്പതി. സത്താഹകാലികേന, ഭിക്ഖവേ, യാവജീവികം പടിഗ്ഗഹിതം, സത്താഹം കപ്പതി, സത്താഹാതിക്കന്തേ ന കപ്പതീ’’തി.

ചതുമഹാപദേസകഥാ നിട്ഠിതാ.

ഭേസജ്ജക്ഖന്ധകോ ഛട്ഠോ.