൧൫൫. സബ്ബചമ്മപടിക്ഖേപോ

൨൫൫. തേന ഖോ പന സമയേന ഛബ്ബഗ്ഗിയാ ഭിക്ഖൂ – ഭഗവതാ ഉച്ചാസയനമഹാസയനാനി പടിക്ഖിത്താനീതി – മഹാചമ്മാനി ധാരേന്തി, സീഹചമ്മം ബ്യഗ്ഘചമ്മം ദീപിചമ്മം. താനി മഞ്ചപ്പമാണേനപി ഛിന്നാനി ഹോന്തി, പീഠപ്പമാണേനപി ഛിന്നാനി ഹോന്തി, അന്തോപി മഞ്ചേ പഞ്ഞത്താനി ഹോന്തി, ബഹിപി മഞ്ചേ പഞ്ഞത്താനി ഹോന്തി, അന്തോപി പീഠേ പഞ്ഞത്താനി ഹോന്തി, ബഹിപി പീഠേ പഞ്ഞത്താനി ഹോന്തി. മനുസ്സാ വിഹാരചാരികം ആഹിണ്ഡന്താ പസ്സിത്വാ ഉജ്ഝായന്തി ഖിയ്യന്തി വിപാചേന്തി – ‘‘സേയ്യഥാപി ഗിഹീ കാമഭോഗിനോ’’തി. ഭഗവതോ ഏതമത്ഥം ആരോചേസും. ന, ഭിക്ഖവേ, മഹാചമ്മാനി ധാരേതബ്ബാനി, സീഹചമ്മം ബ്യഗ്ഘചമ്മം ദീപിചമ്മം. യോ ധാരേയ്യ, ആപത്തി ദുക്കടസ്സാതി.

തേന ഖോ പന സമയേന ഛബ്ബഗ്ഗിയാ ഭിക്ഖൂ – ഭഗവതാ മഹാചമ്മാനി പടിക്ഖിത്താനീതി – ഗോചമ്മാനി ധാരേന്തി. താനി മഞ്ചപ്പമാണേനപി ഛിന്നാനി ഹോന്തി, പീഠപ്പമാണേനപി ഛിന്നാനി ഹോന്തി, അന്തോപി മഞ്ചേ പഞ്ഞത്താനി ഹോന്തി, ബഹിപി മഞ്ചേ പഞ്ഞത്താനി ഹോന്തി, അന്തോപി പീഠേ പഞ്ഞത്താനി ഹോന്തി, ബഹിപി പീഠേ പഞ്ഞത്താനി ഹോന്തി. അഞ്ഞതരോപി പാപഭിക്ഖു അഞ്ഞതരസ്സ പാപുപാസകസ്സ കുലൂപകോ ഹോതി. അഥ ഖോ സോ പാപഭിക്ഖു പുബ്ബണ്ഹസമയം നിവാസേത്വാ പത്തചീവരമാദായ യേന തസ്സ പാപുപാസകസ്സ നിവേസനം തേനുപസങ്കമി, ഉപസങ്കമിത്വാ പഞ്ഞത്തേ ആസനേ നിസീദി. അഥ ഖോ സോ പാപുപാസകോ യേന സോ പാപഭിക്ഖു തേനുപസങ്കമി, ഉപസങ്കമിത്വാ തം പാപഭിക്ഖും അഭിവാദേത്വാ ഏകമന്തം നിസീദി. തേന ഖോ പന സമയേന തസ്സ പാപുപാസകസ്സ വച്ഛകോ ഹോതി തരുണകോ അഭിരൂപോ ദസ്സനീയോ പാസാദികോ ചിത്രോ, സേയ്യഥാപി ദീപിച്ഛാപോ. അഥ ഖോ സോ പാപഭിക്ഖു തം വച്ഛകം സക്കച്ചം ഉപനിജ്ഝായതി. അഥ ഖോ സോ പാപുപാസകോ തം പാപഭിക്ഖും ഏതദവോച – ‘‘കിസ്സ, ഭന്തേ, അയ്യോ ഇമം വച്ഛകം സക്കച്ചം ഉപനിജ്ഝായതീ’’തി? ‘‘അത്ഥോ മേ, ആവുസോ, ഇമസ്സ വച്ഛകസ്സ ചമ്മേനാ’’തി. അഥ ഖോ സോ പാപുപാസകോ തം വച്ഛകം വധിത്വാ ചമ്മം വിധുനിത്വാ തസ്സ പാപഭിക്ഖുനോ പാദാസി. അഥ ഖോ സോ പാപഭിക്ഖു തം ചമ്മം സങ്ഘാടിയാ പടിച്ഛാദേത്വാ അഗമാസി. അഥ ഖോ സാ ഗാവീ വച്ഛഗിദ്ധിനീ തം പാപഭിക്ഖും പിട്ഠിതോ പിട്ഠിതോ അനുബന്ധി. ഭിക്ഖൂ ഏവമാഹംസു – ‘‘കിസ്സ ത്യായം, ആവുസോ, ഗാവീ പിട്ഠിതോ പിട്ഠിതോ അനുബന്ധീ’’തി? ‘‘അഹമ്പി ഖോ, ആവുസോ, ന ജാനാമി കേന [കേനചി (ക.)] മ്യായം ഗാവീ പിട്ഠിതോ പിട്ഠിതോ അനുബന്ധീ’’തി. തേന ഖോ പന സമയേന തസ്സ പാപഭിക്ഖുനോ സങ്ഘാടി ലോഹിതേന മക്ഖിതാ ഹോതി. ഭിക്ഖൂ ഏവമാഹംസു – ‘‘അയം പന തേ, ആവുസോ, സങ്ഘാടി കിം കതാ’’തി? അഥ ഖോ സോ പാപഭിക്ഖു ഭിക്ഖൂനം ഏതമത്ഥം ആരോചേസി. ‘‘കിം പന ത്വം, ആവുസോ, പാണാതിപാതേ സമാദപേസീ’’തി? ‘‘ഏവമാവുസോ’’തി. യേ തേ ഭിക്ഖൂ അപ്പിച്ഛാ തേ ഉജ്ഝായന്തി ഖിയ്യന്തി വിപാചേന്തി – ‘‘കഥഞ്ഹി നാമ ഭിക്ഖു പാണാതിപാതേ സമാദപേസ്സതി, നനു ഭഗവതാ അനേകപരിയായേന പാണാതിപാതോ ഗരഹിതോ, പാണാതിപാതാ വേരമണീ പസത്ഥാ’’തി. അഥ ഖോ തേ ഭിക്ഖൂ ഭഗവതോ ഏതമത്ഥം ആരോചേസും.

അഥ ഖോ ഭഗവാ ഏതസ്മിം നിദാനേ ഏതസ്മിം പകരണേ ഭിക്ഖുസങ്ഘം സന്നിപാതാപേത്വാ തം പാപഭിക്ഖും പടിപുച്ഛി – ‘‘സച്ചം കിര ത്വം, ഭിക്ഖു, പാണാതിപാതേ സമാദപേസീ’’തി? സച്ചം ഭഗവാതി…പേ… കഥഞ്ഹി നാമ ത്വം, മോഘപുരിസ, പാണാതിപാതേ സമാദപേസ്സസി, നനു മയാ, മോഘപുരിസ, അനേകപരിയായേന പാണാതിപാതോ ഗരഹിതോ, പാണാതിപാതാ വേരമണീ പസത്ഥാ. നേതം, മോഘപുരിസ, അപ്പസന്നാനം വാ പസാദായ…പേ… വിഗരഹിത്വാ ധമ്മിം കഥം കത്വാ ഭിക്ഖൂ ആമന്തേസി – ‘‘ന, ഭിക്ഖവേ, പാണാതിപാതേ സമാദപേതബ്ബം. യോ സമാദപേയ്യ, യഥാധമ്മോ കാരേതബ്ബോ. ന, ഭിക്ഖവേ, ഗോചമ്മം ധാരേതബ്ബം. യോ ധാരേയ്യ, ആപത്തി ദുക്കടസ്സ. ന ച, ഭിക്ഖവേ, കിഞ്ചി ചമ്മം ധാരേതബ്ബം. യോ ധാരേയ്യ, ആപത്തി ദുക്കടസ്സാ’’തി.

സബ്ബചമ്മപടിക്ഖേപോ നിട്ഠിതോ.