൧൧൦. പഞ്ചന്നം അപ്പഹിതേപി അനുജാനനാ

൧൯൩. തേന ഖോ പന സമയേന അഞ്ഞതരോ ഭിക്ഖു ഗിലാനോ ഹോതി. സോ ഭിക്ഖൂനം സന്തികേ ദൂതം പാഹേസി – ‘‘അഹഞ്ഹി ഗിലാനോ, ആഗച്ഛന്തു ഭിക്ഖൂ, ഇച്ഛാമി ഭിക്ഖൂനം ആഗത’’ന്തി. ഭഗവതോ ഏതമത്ഥം ആരോചേസും. അനുജാനാമി, ഭിക്ഖവേ, പഞ്ചന്നം സത്താഹകരണീയേന അപ്പഹിതേപി ഗന്തും, പഗേവ പഹിതേ. ഭിക്ഖുസ്സ, ഭിക്ഖുനിയാ, സിക്ഖമാനായ, സാമണേരസ്സ, സാമണേരിയാ – അനുജാനാമി, ഭിക്ഖവേ, ഇമേസം പഞ്ചന്നം സത്താഹകരണീയേന അപ്പഹിതേപി ഗന്തും, പഗേവ പഹിതേ. സത്താഹം സന്നിവത്തോ കാതബ്ബോ.

ഇധ പന, ഭിക്ഖവേ, ഭിക്ഖു ഗിലാനോ ഹോതി. സോ ചേ ഭിക്ഖൂനം സന്തികേ ദൂതം പഹിണേയ്യ – ‘‘അഹഞ്ഹി ഗിലാനോ, ആഗച്ഛന്തു ഭിക്ഖൂ, ഇച്ഛാമി ഭിക്ഖൂനം ആഗത’’ന്തി, ഗന്തബ്ബം, ഭിക്ഖവേ, സത്താഹകരണീയേന, അപ്പഹിതേപി, പഗേവ പഹിതേ – ‘‘ഗിലാനഭത്തം വാ പരിയേസിസ്സാമി, ഗിലാനുപട്ഠാകഭത്തം വാ പരിയേസിസ്സാമി, ഗിലാനഭേസജ്ജം വാ പരിയേസിസ്സാമി, പുച്ഛിസ്സാമി വാ, ഉപട്ഠഹിസ്സാമി വാ’’തി. സത്താഹം സന്നിവത്തോ കാതബ്ബോ.

ഇധ പന, ഭിക്ഖവേ, ഭിക്ഖുസ്സ അനഭിരതി ഉപ്പന്നാ ഹോതി. സോ ചേ ഭിക്ഖൂനം സന്തികേ ദൂതം പഹിണേയ്യ – ‘‘അനഭിരതി മേ ഉപ്പന്നാ, ആഗച്ഛന്തു ഭിക്ഖൂ, ഇച്ഛാമി ഭിക്ഖൂനം ആഗത’’ന്തി, ഗന്തബ്ബം, ഭിക്ഖവേ, സത്താഹകരണീയേന, അപ്പഹിതേപി, പഗേവ പഹിതേ – ‘‘അനഭിരതം വൂപകാസേസ്സാമി വാ, വൂപകാസാപേസ്സാമി വാ, ധമ്മകഥം വാസ്സ കരിസ്സാമീ’’തി. സത്താഹം സന്നിവത്തോ കാതബ്ബോ.

ഇധ പന, ഭിക്ഖവേ, ഭിക്ഖുസ്സ കുക്കുച്ചം ഉപ്പന്നം ഹോതി. സോ ചേ ഭിക്ഖൂനം സന്തികേ ദൂതം പഹിണേയ്യ – ‘‘കുക്കുച്ചം മേ ഉപ്പന്നം, ആഗച്ഛന്തു ഭിക്ഖൂ, ഇച്ഛാമി ഭിക്ഖൂനം ആഗത’’ന്തി, ഗന്തബ്ബം, ഭിക്ഖവേ, സത്താഹകരണീയേന, അപ്പഹിതേപി, പഗേവ പഹിതേ – ‘‘കുക്കുച്ചം വിനോദേസ്സാമി വാ, വിനോദാപേസ്സാമി വാ, ധമ്മകഥം വാസ്സ കരിസ്സാമീ’’തി. സത്താഹം സന്നിവത്തോ കാതബ്ബോ.

ഇധ പന, ഭിക്ഖവേ, ഭിക്ഖുസ്സ ദിട്ഠിഗതം ഉപ്പന്നം ഹോതി. സോ ചേ ഭിക്ഖൂനം സന്തികേ ദൂതം പഹിണേയ്യ – ‘‘ദിട്ഠിഗതം മേ ഉപ്പന്നം, ആഗച്ഛന്തു ഭിക്ഖൂ, ഇച്ഛാമി ഭിക്ഖൂനം ആഗത’’ന്തി, ഗന്തബ്ബം, ഭിക്ഖവേ, സത്താഹകരണീയേന, അപ്പഹിതേപി, പഗേവ പഹിതേ – ‘‘ദിട്ഠിഗതം വിവേചേസ്സാമി വാ, വിവേചാപേസ്സാമി വാ, ധമ്മകഥം വാസ്സ കരിസ്സാമീ’’തി. സത്താഹം സന്നിവത്തോ കാതബ്ബോ.

ഇധ പന, ഭിക്ഖവേ, ഭിക്ഖു ഗരുധമ്മം അജ്ഝാപന്നോ ഹോതി പരിവാസാരഹോ. സോ ചേ ഭിക്ഖൂനം സന്തികേ ദൂതം പഹിണേയ്യ – ‘‘അഹഞ്ഹി ഗരുധമ്മം അജ്ഝാപന്നോ പരിവാസാരഹോ, ആഗച്ഛന്തു ഭിക്ഖൂ, ഇച്ഛാമി ഭിക്ഖൂനം ആഗത’’ന്തി, ഗന്തബ്ബം, ഭിക്ഖവേ, സത്താഹകരണീയേന, അപ്പഹിതേപി, പഗേവ പഹിതേ – ‘‘പരിവാസദാനം ഉസ്സുക്കം കരിസ്സാമി വാ, അനുസ്സാവേസ്സാമി വാ, ഗണപൂരകോ വാ ഭവിസ്സാമീ’’തി. സത്താഹം സന്നിവത്തോ കാതബ്ബോ.

ഇധ പന, ഭിക്ഖവേ, ഭിക്ഖു മൂലായ പടികസ്സനാരഹോ ഹോതി. സോ ചേ ഭിക്ഖൂനം സന്തികേ ദൂതം പഹിണേയ്യ – ‘‘അഹഞ്ഹി മൂലായ പടികസ്സനാരഹോ, ആഗച്ഛന്തു ഭിക്ഖൂ, ഇച്ഛാമി ഭിക്ഖൂനം ആഗത’’ന്തി, ഗന്തബ്ബം, ഭിക്ഖവേ, സത്താഹകരണീയേന, അപ്പഹിതേപി, പഗേവ പഹിതേ – ‘‘മൂലായ പടികസ്സനം ഉസ്സുക്കം കരിസ്സാമി വാ, അനുസ്സാവേസ്സാമി വാ, ഗണപൂരകോ വാ ഭവിസ്സാമീ’’തി. സത്താഹം സന്നിവത്തോ കാതബ്ബോ.

ഇധ പന, ഭിക്ഖവേ, ഭിക്ഖു മാനത്താരഹോ ഹോതി. സോ ചേ ഭിക്ഖൂനം സന്തികേ ദൂതം പഹിണേയ്യ – ‘‘അഹഞ്ഹി മാനത്താരഹോ, ആഗച്ഛന്തു ഭിക്ഖൂ, ഇച്ഛാമി ഭിക്ഖൂനം ആഗത’’ന്തി, ഗന്തബ്ബം, ഭിക്ഖവേ, സത്താഹകരണീയേന, അപ്പഹിതേപി, പഗേവ പഹിതേ – ‘‘മാനത്തദാനം ഉസ്സുക്കം കരിസ്സാമി വാ, അനുസ്സാവേസ്സാമി വാ, ഗണപൂരകോ വാ ഭവിസ്സാമീ’’തി. സത്താഹം സന്നിവത്തോ കാതബ്ബോ.

ഇധ പന, ഭിക്ഖവേ, ഭിക്ഖു അബ്ഭാനാരഹോ ഹോതി. സോ ചേ ഭിക്ഖൂനം സന്തികേ ദൂതം പഹിണേയ്യ – ‘‘അഹഞ്ഹി അബ്ഭാനാരഹോ, ആഗച്ഛന്തു ഭിക്ഖൂ, ഇച്ഛാമി ഭിക്ഖൂനം ആഗത’’ന്തി, ഗന്തബ്ബം, ഭിക്ഖവേ, സത്താഹകരണീയേന, അപ്പഹിതേപി, പഗേവ പഹിതേ – ‘‘അബ്ഭാനം ഉസ്സുക്കം കരിസ്സാമി വാ, അനുസ്സാവേസ്സാമി വാ, ഗണപൂരകോ വാ ഭവിസ്സാമീ’’തി. സത്താഹം സന്നിവത്തോ കാതബ്ബോ.

ഇധ പന, ഭിക്ഖവേ, ഭിക്ഖുസ്സ സങ്ഘോ കമ്മം കത്തുകാമോ ഹോതി തജ്ജനീയം വാ, നിയസ്സം വാ, പബ്ബാജനീയം വാ, പടിസാരണീയം വാ, ഉക്ഖേപനീയം വാ. സോ ചേ ഭിക്ഖൂനം സന്തികേ ദൂതം പഹിണേയ്യ – ‘‘സങ്ഘോ മേ കമ്മം കത്തുകാമോ, ആഗച്ഛന്തു ഭിക്ഖൂ, ഇച്ഛാമി ഭിക്ഖൂനം ആഗത’’ന്തി, ഗന്തബ്ബം, ഭിക്ഖവേ, സത്താഹകരണീയേന, അപ്പഹിതേപി, പഗേവ പഹിതേ – ‘‘കിന്തി നു ഖോ സങ്ഘോ കമ്മം ന കരേയ്യ, ലഹുകായ വാ പരിണാമേയ്യാ’’തി. സത്താഹം സന്നിവത്തോ കാതബ്ബോ.

കതം വാ പനസ്സ ഹോതി സങ്ഘേന കമ്മം തജ്ജനീയം വാ നിയസ്സം വാ പബ്ബാജനീയം വാ പടിസാരണീയം വാ ഉക്ഖേപനീയം വാ. സോ ചേ ഭിക്ഖൂനം സന്തികേ ദൂതം പഹിണേയ്യ ‘‘സങ്ഘോ മേ കമ്മം അകാസി, ആഗച്ഛന്തു ഭിക്ഖൂ, ഇച്ഛാമി ഭിക്ഖൂനം ആഗത’’ന്തി, ഗന്തബ്ബം, ഭിക്ഖവേ, സത്താഹകരണീയേന, അപ്പഹിതേപി, പഗേവ പഹിതേ – ‘‘കിന്തി നു ഖോ സമ്മാ വത്തേയ്യ, ലോമം പാതേയ്യ, നേത്ഥാരം വത്തേയ്യ, സങ്ഘോ തം കമ്മം പടിപ്പസ്സമ്ഭേയ്യാ’’തി. സത്താഹം സന്നിവത്തോ കാതബ്ബോ.

൧൯൪. ഇധ പന, ഭിക്ഖവേ, ഭിക്ഖുനീ ഗിലാനാ ഹോതി. സാ ചേ ഭിക്ഖൂനം സന്തികേ ദൂതം പഹിണേയ്യ – ‘‘അഹഞ്ഹി ഗിലാനാ, ആഗച്ഛന്തു അയ്യാ, ഇച്ഛാമി അയ്യാനം ആഗത’’ന്തി, ഗന്തബ്ബം, ഭിക്ഖവേ, സത്താഹകരണീയേന, അപ്പഹിതേപി, പഗേവ പഹിതേ – ‘‘ഗിലാനഭത്തം വാ പരിയേസിസ്സാമി, ഗിലാനുപട്ഠാകഭത്തം വാ പരിയേസിസ്സാമി, ഗിലാനഭേസജ്ജം വാ പരിയേസിസ്സാമി, പുച്ഛിസ്സാമി വാ, ഉപട്ഠഹിസ്സാമി വാ’’തി. സത്താഹം സന്നിവത്തോ കാതബ്ബോ.

ഇധ പന, ഭിക്ഖവേ, ഭിക്ഖുനിയാ അനഭിരതി ഉപ്പന്നാ ഹോതി. സാ ചേ ഭിക്ഖൂനം സന്തികേ ദൂതം പഹിണേയ്യ – ‘‘അനഭിരതി മേ ഉപ്പന്നാ, ആഗച്ഛന്തു അയ്യാ, ഇച്ഛാമി അയ്യാനം ആഗത’’ന്തി, ഗന്തബ്ബം, ഭിക്ഖവേ, സത്താഹകരണീയേന, അപ്പഹിതേപി, പഗേവ പഹിതേ – ‘‘അനഭിരതം വൂപകാസേസ്സാമി വാ, വൂപകാസാപേസ്സാമി വാ, ധമ്മകഥം വാസ്സാ കരിസ്സാമീ’’തി. സത്താഹം സന്നിവത്തോ കാതബ്ബോ.

ഇധ പന, ഭിക്ഖവേ, ഭിക്ഖുനിയാ കുക്കുച്ചം ഉപ്പന്നം ഹോതി. സാ ചേ ഭിക്ഖൂനം സന്തികേ ദൂതം പഹിണേയ്യ – ‘‘കുക്കുച്ചം മേ ഉപ്പന്നം, ആഗച്ഛന്തു അയ്യാ, ഇച്ഛാമി അയ്യാനം ആഗത’’ന്തി, ഗന്തബ്ബം, ഭിക്ഖവേ, സത്താഹകരണീയേന, അപ്പഹിതേപി, പഗേവ പഹിതേ – ‘‘കുക്കുച്ചം വിനോദേസ്സാമി വാ, വിനോദാപേസ്സാമി വാ, ധമ്മകഥം വാസ്സാ കരിസ്സാമീ’’തി. സത്താഹം സന്നിവത്തോ കാതബ്ബോ.

ഇധ പന, ഭിക്ഖവേ, ഭിക്ഖുനിയാ ദിട്ഠിഗതം ഉപ്പന്നം ഹോതി. സാ ചേ ഭിക്ഖൂനം സന്തികേ ദൂതം പഹിണേയ്യ – ‘‘ദിട്ഠിഗതം മേ ഉപ്പന്നം, ആഗച്ഛന്തു അയ്യാ, ഇച്ഛാമി അയ്യാനം ആഗത’’ന്തി, ഗന്തബ്ബം, ഭിക്ഖവേ, സത്താഹകരണീയേന, അപ്പഹിതേപി, പഗേവ പഹിതേ – ‘‘ദിട്ഠിഗതം വിവേചേസ്സാമി വാ, വിവേചാപേസ്സാമി വാ, ധമ്മകഥം വാസ്സാ കരിസ്സാമീ’’തി. സത്താഹം സന്നിവത്തോ കാതബ്ബോ.

ഇധ പന, ഭിക്ഖവേ, ഭിക്ഖുനീ ഗരുധമ്മം അജ്ഝാപന്നാ ഹോതി മാനത്താരഹാ. സാ ചേ ഭിക്ഖൂനം സന്തികേ ദൂതം പഹിണേയ്യ – ‘‘അഹഞ്ഹി ഗരുധമ്മം അജ്ഝാപന്നാ മാനത്താരഹാ, ആഗച്ഛന്തു അയ്യാ, ഇച്ഛാമി അയ്യാനം ആഗത’’ന്തി, ഗന്തബ്ബം, ഭിക്ഖവേ, സത്താഹകരണീയേന, അപ്പഹിതേപി, പഗേവ പഹിതേ – ‘‘മാനത്തദാനം ഉസ്സുക്കം കരിസ്സാമീ’’തി. സത്താഹം സന്നിവത്തോ കാതബ്ബോ.

ഇധ പന, ഭിക്ഖവേ, ഭിക്ഖുനീ മൂലായ പടികസ്സനാരഹാ ഹോതി. സാ ചേ ഭിക്ഖൂനം സന്തികേ ദൂതം പഹിണേയ്യ – ‘‘അഹഞ്ഹി മൂലായ പടികസ്സനാരഹാ, ആഗച്ഛന്തു അയ്യാ, ഇച്ഛാമി അയ്യാനം ആഗത’’ന്തി, ഗന്തബ്ബം, ഭിക്ഖവേ, സത്താഹകരണീയേന, അപ്പഹിതേപി, പഗേവ പഹിതേ – ‘‘മൂലായ പടികസ്സനം ഉസ്സുക്കം കരിസ്സാമീ’’തി. സത്താഹം സന്നിവത്തോ കാതബ്ബോ.

ഇധ പന, ഭിക്ഖവേ, ഭിക്ഖുനീ അബ്ഭാനാരഹാ ഹോതി. സാ ചേ ഭിക്ഖൂനം സന്തികേ ദൂതം പഹിണേയ്യ – ‘‘അഹഞ്ഹി അബ്ഭാനാരഹാ, ആഗച്ഛന്തു അയ്യാ, ഇച്ഛാമി അയ്യാനം ആഗത’’ന്തി, ഗന്തബ്ബം, ഭിക്ഖവേ, സത്താഹകരണീയേന, അപ്പഹിതേപി, പഗേവ പഹിതേ – ‘‘അബ്ഭാനം ഉസ്സുക്കം കരിസ്സാമീ’’തി. സത്താഹം സന്നിവത്തോ കാതബ്ബോ.

ഇധ പന, ഭിക്ഖവേ, ഭിക്ഖുനിയാ സങ്ഘോ കമ്മം കത്തുകാമോ ഹോതി – തജ്ജനീയം വാ, നിയസ്സം വാ, പബ്ബാജനീയം വാ, പടിസാരണീയം വാ, ഉക്ഖേപനീയം വാ. സാ ചേ ഭിക്ഖൂനം സന്തികേ ദൂതം പഹിണേയ്യ – ‘‘സങ്ഘോ മേ കമ്മം കത്തുകാമോ, ആഗച്ഛന്തു അയ്യാ, ഇച്ഛാമി അയ്യാനം ആഗത’’ന്തി, ഗന്തബ്ബം, ഭിക്ഖവേ, സത്താഹകരണീയേന, അപ്പഹിതേപി, പഗേവ പഹിതേ – ‘‘കിന്തി നു ഖോ സങ്ഘോ കമ്മം ന കരേയ്യ, ലഹുകായ വാ പരിണാമേയ്യാ’’തി. സത്താഹം സന്നിവത്തോ കാതബ്ബോ.

കതം വാ പനസ്സാ ഹോതി സങ്ഘേന കമ്മം – തജ്ജനീയം വാ, നിയസ്സം വാ, പബ്ബാജനീയം വാ, പടിസാരണീയം വാ, ഉക്ഖേപനീയം വാ. സാ ചേ ഭിക്ഖൂനം സന്തികേ ദൂതം പഹിണേയ്യ – ‘‘സങ്ഘോ മേ കമ്മം അകാസി, ആഗച്ഛന്തു അയ്യാ, ഇച്ഛാമി അയ്യാനം ആഗത’’ന്തി, ഗന്തബ്ബം, ഭിക്ഖവേ, സത്താഹകരണീയേന, അപ്പഹിതേപി, പഗേവ പഹിതേ – ‘‘കിന്തി നു ഖോ സമ്മാ വത്തേയ്യ, ലോമം പാതേയ്യ, നേത്ഥാരം വത്തേയ്യ, സങ്ഘോ തം കമ്മം പടിപ്പസ്സമ്ഭേയ്യാ’’തി. സത്താഹം സന്നിവത്തോ കാതബ്ബോ.

൧൯൫. ഇധ പന, ഭിക്ഖവേ, സിക്ഖമാനാ ഗിലാനാ ഹോതി. സാ ചേ ഭിക്ഖൂനം സന്തികേ ദൂതം പഹിണേയ്യ – ‘‘അഹഞ്ഹി ഗിലാനാ, ആഗച്ഛന്തു അയ്യാ, ഇച്ഛാമി അയ്യാനം ആഗത’’ന്തി – ഗന്തബ്ബം, ഭിക്ഖവേ, സത്താഹകരണീയേന, അപ്പഹിതേപി, പഗേവ പഹിതേ – ‘‘ഗിലാനഭത്തം വാ പരിയേസിസ്സാമി, ഗിലാനുപട്ഠാകഭത്തം വാ പരിയേസിസ്സാമി, ഗിലാനഭേസജ്ജം വാ പരിയേസിസ്സാമി, പുച്ഛിസ്സാമി വാ, ഉപട്ഠഹിസ്സാമി വാ’’തി. സത്താഹം സന്നിവത്തോ കാതബ്ബോ.

ഇധ പന, ഭിക്ഖവേ, സിക്ഖമാനായ അനഭിരതി ഉപ്പന്നാ ഹോതി…പേ… സിക്ഖമാനായ കുക്കുച്ചം ഉപ്പന്നം ഹോതി… സിക്ഖമാനായ ദിട്ഠിഗതം ഉപ്പന്നം ഹോതി… സിക്ഖമാനായ സിക്ഖാ കുപിതാ ഹോതി. സാ ചേ ഭിക്ഖൂനം സന്തികേ ദൂതം പഹിണേയ്യ – ‘‘സിക്ഖാ മേ കുപിതാ, ആഗച്ഛന്തു അയ്യാ, ഇച്ഛാമി അയ്യാനം ആഗത’’ന്തി, ഗന്തബ്ബം, ഭിക്ഖവേ, സത്താഹകരണീയേന, അപ്പഹിതേപി, പഗേവ പഹിതേ – ‘‘സിക്ഖാസമാദാനം ഉസ്സുക്കം കരിസ്സാമീ’’തി. സത്താഹം സന്നിവത്തോ കാതബ്ബോ.

ഇധ പന, ഭിക്ഖവേ, സിക്ഖമാനാ ഉപസമ്പജ്ജിതുകാമാ ഹോതി. സാ ചേ ഭിക്ഖൂനം സന്തികേ ദൂതം പഹിണേയ്യ – ‘‘അഹഞ്ഹി ഉപസമ്പജ്ജിതുകാമാ, ആഗച്ഛന്തു അയ്യാ, ഇച്ഛാമി അയ്യാനം ആഗത’’ന്തി ഗന്തബ്ബം, ഭിക്ഖവേ, സത്താഹകരണീയേന, അപ്പഹിതേപി, പഗേവ പഹിതേ – ഉപസമ്പദം ഉസ്സുക്കം കരിസ്സാമി വാ, അനുസ്സാവേസ്സാമി വാ, ഗണപൂരകോ വാ ഭവിസ്സാമീതി. സത്താഹം സന്നിവത്തോ കാതബ്ബോ.

൧൯൬. ഇധ പന, ഭിക്ഖവേ, സാമണേരോ ഗിലാനോ ഹോതി. സോ ചേ ഭിക്ഖൂനം സന്തികേ ദൂതം പഹിണേയ്യ – ‘‘അഹഞ്ഹി ഗിലാനോ, ആഗച്ഛന്തു ഭിക്ഖൂ, ഇച്ഛാമി ഭിക്ഖൂനം ആഗത’’ന്തി, ഗന്തബ്ബം, ഭിക്ഖവേ, സത്താഹകരണീയേന, അപ്പഹിതേപി, പഗേവ പഹിതേ – ‘‘ഗിലാനഭത്തം വാ പരിയേസിസ്സാമി, ഗിലാനുപട്ഠാകഭത്തം വാ പരിയേസിസ്സാമി, ഗിലാനഭേസജ്ജം വാ പരിയേസിസ്സാമി, പുച്ഛിസ്സാമി വാ, ഉപട്ഠഹിസ്സാമി വാ’’തി. സത്താഹം സന്നിവത്തോ കാതബ്ബോ.

ഇധ പന, ഭിക്ഖവേ, സാമണേരസ്സ അനഭിരതി ഉപ്പന്നാ ഹോതി…പേ… സാമണേരസ്സ കുക്കുച്ചം ഉപ്പന്നം ഹോതി… സാമണേരസ്സ ദിട്ഠിഗതം ഉപ്പന്നം ഹോതി… സാമണേരോ വസ്സം പുച്ഛിതുകാമോ ഹോതി. സോ ചേ ഭിക്ഖൂനം സന്തികേ ദൂതം പഹിണേയ്യ – ‘‘അഹഞ്ഹി വസ്സം പുച്ഛിതുകാമോ, ആഗച്ഛന്തു ഭിക്ഖൂ, ഇച്ഛാമി ഭിക്ഖൂനം ആഗത’’ന്തി, ഗന്തബ്ബം, ഭിക്ഖവേ, സത്താഹകരണീയേന, അപ്പഹിതേപി, പഗേവ പഹിതേ – ‘‘പുച്ഛിസ്സാമി വാ, ആചിക്ഖിസ്സാമി വാ’’തി. സത്താഹം സന്നിവത്തോ കാതബ്ബോ.

ഇധ പന, ഭിക്ഖവേ, സാമണേരോ ഉപസമ്പജ്ജിതുകാമോ ഹോതി. സോ ചേ ഭിക്ഖൂനം സന്തികേ ദൂതം പഹിണേയ്യ – ‘‘അഹഞ്ഹി ഉപസമ്പജ്ജിതുകാമോ, ആഗച്ഛന്തു ഭിക്ഖൂ, ഇച്ഛാമി ഭിക്ഖൂനം ആഗത’’ന്തി, ഗന്തബ്ബം, ഭിക്ഖവേ, സത്താഹകരണീയേന, അപ്പഹിതേപി, പഗേവ പഹിതേ – ‘‘ഉപസമ്പദം ഉസ്സുക്കം കരിസ്സാമി വാ, അനുസ്സാവേസ്സാമി വാ, ഗണപൂരകോ വാ ഭവിസ്സാമീ’’തി. സത്താഹം സന്നിവത്തോ കാതബ്ബോ.

൧൯൭. ഇധ പന, ഭിക്ഖവേ, സാമണേരീ ഗിലാനാ ഹോതി. സാ ചേ ഭിക്ഖൂനം സന്തികേ ദൂതം പഹിണേയ്യ – ‘‘അഹഞ്ഹി ഗിലാനാ, ആഗച്ഛന്തു അയ്യാ, ഇച്ഛാമി അയ്യാനം ആഗത’’ന്തി, ഗന്തബ്ബം, ഭിക്ഖവേ, സത്താഹകരണീയേന, അപ്പഹിതേപി, പഗേവ പഹിതേ – ‘‘ഗിലാനഭത്തം വാ പരിയേസിസ്സാമി, ഗിലാനുപട്ഠാകഭത്തം വാ പരിയേസിസ്സാമി, ഗിലാനഭേസജ്ജം വാ പരിയേസിസ്സാമി, പുച്ഛിസ്സാമി വാ, ഉപട്ഠഹിസ്സാമി വാ’’തി. സത്താഹം സന്നിവത്തോ കാതബ്ബോ.

ഇധ പന, ഭിക്ഖവേ, സാമണേരിയാ അനഭിരതി ഉപ്പന്നാ ഹോതി…പേ… സാമണേരിയാ കുക്കുച്ചം ഉപ്പന്നം ഹോതി… സാമണേരിയാ ദിട്ഠിഗതം ഉപ്പന്നം ഹോതി… സാമണേരീ വസ്സം പുച്ഛിതുകാമാ ഹോതി. സാ ചേ ഭിക്ഖൂനം സന്തികേ ദൂതം പഹിണേയ്യ – ‘‘അഹഞ്ഹി വസ്സം പുച്ഛിതുകാമാ, ആഗച്ഛന്തു അയ്യാ, ഇച്ഛാമി അയ്യാനം ആഗത’’ന്തി, ഗന്തബ്ബം, ഭിക്ഖവേ, സത്താഹകരണീയേന, അപ്പഹിതേപി, പഗേവ പഹിതേ – ‘‘പുച്ഛിസ്സാമി വാ, ആചിക്ഖിസ്സാമി വാ’’തി. സത്താഹം സന്നിവത്തോ കാതബ്ബോ.

ഇധ പന, ഭിക്ഖവേ, സാമണേരീ സിക്ഖം സമാദിയിതുകാമാ ഹോതി. സാ ചേ ഭിക്ഖൂനം സന്തികേ ദൂതം പഹിണേയ്യ – ‘‘അഹഞ്ഹി സിക്ഖം സമാദിയിതുകാമാ, ആഗച്ഛന്തു അയ്യാ, ഇച്ഛാമി അയ്യാനം ആഗത’’ന്തി, ഗന്തബ്ബം, ഭിക്ഖവേ, സത്താഹകരണീയേന, അപ്പഹിതേപി, പഗേവ പഹിതേ – ‘‘സിക്ഖാസമാദാനം ഉസ്സുക്കം കരിസ്സാമീ’’തി. സത്താഹം സന്നിവത്തോ കാതബ്ബോതി.

പഞ്ചന്നം അപ്പഹിതേപി അനുജാനനാ നിട്ഠിതാ.