൮൭. പാരിസുദ്ധിദാനകഥാ

൧൬൪. അഥ ഖോ ഭഗവാ ഭിക്ഖൂ ആമന്തേസി – ‘‘സന്നിപതഥ, ഭിക്ഖവേ, സങ്ഘോ ഉപോസഥം കരിസ്സതീ’’തി. ഏവം വുത്തേ അഞ്ഞതരോ ഭിക്ഖു ഭഗവന്തം ഏതദവോച – ‘‘അത്ഥി, ഭന്തേ, ഭിക്ഖു ഗിലാനോ, സോ അനാഗതോ’’തി. അനുജാനാമി, ഭിക്ഖവേ, ഗിലാനേന ഭിക്ഖുനാ പാരിസുദ്ധിം ദാതും. ഏവഞ്ച പന, ഭിക്ഖവേ, ദാതബ്ബാ – തേന ഗിലാനേന ഭിക്ഖുനാ ഏകം ഭിക്ഖും ഉപസങ്കമിത്വാ ഏകംസം ഉത്തരാസങ്ഗം കരിത്വാ ഉക്കുടികം നിസീദിത്വാ അഞ്ജലിം പഗ്ഗഹേത്വാ ഏവമസ്സ വചനീയോ – ‘‘പാരിസുദ്ധിം ദമ്മി, പാരിസുദ്ധിം മേ ഹര, പാരിസുദ്ധിം മേ ആരോചേഹീ’’തി. കായേന വിഞ്ഞാപേതി, വാചായ വിഞ്ഞാപേതി, കായേന വാചായ വിഞ്ഞാപേതി, ദിന്നാ ഹോതി പാരിസുദ്ധി. ന കായേന വിഞ്ഞാപേതി, ന വാചായ വിഞ്ഞാപേതി, ന കായേന വാചായ വിഞ്ഞാപേതി, ന ദിന്നാ ഹോതി പാരിസുദ്ധി. ഏവഞ്ചേതം ലഭേഥ, ഇച്ചേതം കുസലം. നോ ചേ ലഭേഥ, സോ, ഭിക്ഖവേ, ഗിലാനോ ഭിക്ഖു മഞ്ചേന വാ പീഠേന വാ സങ്ഘമജ്ഝേ ആനേത്വാ ഉപോസഥോ കാതബ്ബോ. സചേ, ഭിക്ഖവേ, ഗിലാനുപട്ഠാകാനം ഭിക്ഖൂനം ഏവം ഹോതി – ‘‘സചേ ഖോ മയം ഗിലാനം ഠാനാ ചാവേസ്സാമ, ആബാധോ വാ അഭിവഡ്ഢിസ്സതി കാലംകിരിയാ വാ ഭവിസ്സതീ’’തി, ന, ഭിക്ഖവേ, ഗിലാനോ ഭിക്ഖു ഠാനാ ചാവേതബ്ബോ. സങ്ഘേന തത്ഥ ഗന്ത്വാ ഉപോസഥോ കാതബ്ബോ. ന ത്വേവ വഗ്ഗേന സങ്ഘേന ഉപോസഥോ കാതബ്ബോ. കരേയ്യ ചേ, ആപത്തി ദുക്കടസ്സ.

പാരിസുദ്ധിഹാരകോ ചേ, ഭിക്ഖവേ, ദിന്നായ പാരിസുദ്ധിയാ തത്ഥേവ പക്കമതി, അഞ്ഞസ്സ ദാതബ്ബാ പാരിസുദ്ധി. പാരിസുദ്ധിഹാരകോ ചേ, ഭിക്ഖവേ, ദിന്നായ പാരിസുദ്ധിയാ തത്ഥേവ വിബ്ഭമതി,…പേ… കാലം കരോതി – സാമണേരോ പടിജാനാതി – സിക്ഖം പച്ചക്ഖാതകോ പടിജാനാതി – അന്തിമവത്ഥും അജ്ഝാപന്നകോ പടിജാനാതി – ഉമ്മത്തകോ പടിജാനാതി – ഖിത്തചിത്തോ പടിജാനാതി – വേദനാട്ടോ പടിജാനാതി – ആപത്തിയാ അദസ്സനേ ഉക്ഖിത്തകോ പടിജാനാതി – ആപത്തിയാ അപ്പടികമ്മേ ഉക്ഖിത്തകോ പടിജാനാതി – പാപികായ ദിട്ഠിയാ അപ്പടിനിസ്സഗ്ഗേ ഉക്ഖിത്തകോ പടിജാനാതി – പണ്ഡകോ പടിജാനാതി – ഥേയ്യസംവാസകോ പടിജാനാതി – തിത്ഥിയപക്കന്തകോ പടിജാനാതി – തിരച്ഛാനഗതോ പടിജാനാതി – മാതുഘാതകോ പടിജാനാതി – പിതുഘാതകോ പടിജാനാതി – അരഹന്തഘാതകോ പടിജാനാതി – ഭിക്ഖുനിദൂസകോ പടിജാനാതി – സങ്ഘഭേദകോ പടിജാനാതി – ലോഹിതുപ്പാദകോ പടിജാനാതി – ഉഭതോബ്യഞ്ജനകോ പടിജാനാതി, അഞ്ഞസ്സ ദാതബ്ബാ പാരിസുദ്ധി.

പാരിസുദ്ധിഹാരകോ ചേ, ഭിക്ഖവേ, ദിന്നായ പാരിസുദ്ധിയാ അന്തരാമഗ്ഗേ പക്കമതി, അനാഹടാ ഹോതി പാരിസുദ്ധി. പാരിസുദ്ധിഹാരകോ ചേ, ഭിക്ഖവേ, ദിന്നായ പാരിസുദ്ധിയാ അന്തരാമഗ്ഗേ വിബ്ഭമതി,…പേ… ഉഭതോബ്യഞ്ജനകോ പടിജാനാതി, അനാഹടാ ഹോതി പാരിസുദ്ധി.

പാരിസുദ്ധിഹാരകോ ചേ, ഭിക്ഖവേ, ദിന്നായ പാരിസുദ്ധിയാ സങ്ഘപ്പത്തോ പക്കമതി, ആഹടാ ഹോതി പാരിസുദ്ധി. പാരിസുദ്ധിഹാരകോ ചേ, ഭിക്ഖവേ, ദിന്നായ പാരിസുദ്ധിയാ സങ്ഘപ്പത്തോ വിബ്ഭമതി,…പേ… ഉഭതോബ്യഞ്ജനകോ പടിജാനാതി, ആഹടാ ഹോതി പാരിസുദ്ധി.

പാരിസുദ്ധിഹാരകോ ചേ, ഭിക്ഖവേ, ദിന്നായ പാരിസുദ്ധിയാ സങ്ഘപ്പത്തോ സുത്തോ ന ആരോചേതി, പമത്തോ ന ആരോചേതി, സമാപന്നോ ന ആരോചേതി, ആഹടാ ഹോതി പാരിസുദ്ധി. പാരിസുദ്ധിഹാരകസ്സ അനാപത്തി.

പാരിസുദ്ധിഹാരകോ ചേ, ഭിക്ഖവേ, ദിന്നായ പാരിസുദ്ധിയാ സങ്ഘപ്പത്തോ സഞ്ചിച്ച ന ആരോചേതി, ആഹടാ ഹോതി പാരിസുദ്ധി. പാരിസുദ്ധിഹാരകസ്സ ആപത്തി ദുക്കടസ്സാതി.