൮൪. പക്ഖഗണനാദിഉഗ്ഗഹണാനുജാനനാ

൧൫൬. അഥ ഖോ ഭഗവാ ചോദനാവത്ഥുസ്മിം യഥാഭിരന്തം വിഹരിത്വാ പുനദേവ രാജഗഹം പച്ചാഗഞ്ഛി.

തേന ഖോ പന സമയേന മനുസ്സാ ഭിക്ഖൂ പിണ്ഡായ ചരന്തേ പുച്ഛന്തി – ‘‘കതിമീ, ഭന്തേ, പക്ഖസ്സാ’’തി? ഭിക്ഖൂ ഏവമാഹംസു – ‘‘ന ഖോ മയം, ആവുസോ, ജാനാമാ’’തി. മനുസ്സാ ഉജ്ഝായന്തി ഖിയ്യന്തി വിപാചേന്തി – ‘‘പക്ഖഗണനമത്തമമ്പിമേ സമണാ സക്യപുത്തിയാ ന ജാനന്തി, കിം പനിമേ അഞ്ഞം കിഞ്ചി കല്യാണം ജാനിസ്സന്തീ’’തി? ഭഗവതോ ഏതമത്ഥം ആരോചേസും. അനുജാനാമി, ഭിക്ഖവേ, പക്ഖഗണനം ഉഗ്ഗഹേതുന്തി. അഥ ഖോ ഭിക്ഖൂനം ഏതദഹോസി – ‘‘കേന നു ഖോ പക്ഖഗണനാ ഉഗ്ഗഹേതബ്ബാ’’തി? ഭഗവതോ ഏതമത്ഥം ആരോചേസും. അനുജാനാമി, ഭിക്ഖവേ, സബ്ബേഹേവ പക്ഖഗണനം ഉഗ്ഗഹേതുന്തി.

൧൫൭. തേന ഖോ പന സമയേന മനുസ്സാ ഭിക്ഖൂ പിണ്ഡായ ചരന്തേ പുച്ഛന്തി – ‘‘കീവതികാ, ഭന്തേ, ഭിക്ഖൂ’’തി? ഭിക്ഖൂ ഏവമാഹംസു – ‘‘ന ഖോ മയം, ആവുസോ, ജാനാമാ’’തി. മനുസ്സാ ഉജ്ഝായന്തി ഖിയ്യന്തി വിപാചേന്തി – ‘‘അഞ്ഞമഞ്ഞമ്പിമേ സമണാ സക്യപുത്തിയാ ന ജാനന്തി, കിം പനിമേ അഞ്ഞം കിഞ്ചി കല്യാണം ജാനിസ്സന്തീ’’തി? ഭഗവതോ ഏതമത്ഥം ആരോചേസും. അനുജാനാമി, ഭിക്ഖവേ, ഭിക്ഖൂ ഗണേതുന്തി.

അഥ ഖോ ഭിക്ഖൂനം ഏതദഹോസി – ‘‘കദാ നു ഖോ ഭിക്ഖൂ ഗണേതബ്ബാ’’തി? ഭഗവതോ ഏതമത്ഥം ആരോചേസും. അനുജാനാമി, ഭിക്ഖവേ, തദഹുപോസഥേ നാമഗ്ഗേന [നാമമത്തേന (സ്യാ.), ഗണമഗ്ഗേന (ക.)] ഗണേതും, സലാകം വാ ഗാഹേതുന്തി.

൧൫൮. തേന ഖോ പന സമയേന ഭിക്ഖൂ അജാനന്താ അജ്ജുപോസഥോതി ദൂരം ഗാമം പിണ്ഡായ ചരന്തി. തേ ഉദ്ദിസ്സമാനേപി പാതിമോക്ഖേ ആഗച്ഛന്തി, ഉദ്ദിട്ഠമത്തേപി ആഗച്ഛന്തി. ഭഗവതോ ഏതമത്ഥം ആരോചേസും. അനുജാനാമി, ഭിക്ഖവേ, ആരോചേതും ‘അജ്ജുപോസഥോ’തി.

അഥ ഖോ ഭിക്ഖൂനം ഏതദഹോസി – ‘‘കേന നു ഖോ ആരോചേതബ്ബോ’’തി? ഭഗവതോ ഏതമത്ഥം ആരോചേസും. അനുജാനാമി, ഭിക്ഖവേ, ഥേരേന ഭിക്ഖുനാ കാലവതോ ആരോചേതുന്തി.

തേന ഖോ പന സമയേന അഞ്ഞതരോ ഥേരോ കാലവതോ നസ്സരതി. ഭഗവതോ ഏതമത്ഥം ആരോചേസും. അനുജാനാമി, ഭിക്ഖവേ, ഭത്തകാലേപി ആരോചേതുന്തി.

ഭത്തകാലേപി നസ്സരതി. ഭഗവതോ ഏതമത്ഥം ആരോചേസും. അനുജാനാമി, ഭിക്ഖവേ, യം കാലം സരതി, തം കാലം ആരോചേതുന്തി.