൧൦൫. വജ്ജനീയപുഗ്ഗലസന്ദസ്സനാ

൧൮൩. ന, ഭിക്ഖവേ, ഭിക്ഖുനിയാ നിസിന്നപരിസായ പാതിമോക്ഖം ഉദ്ദിസിതബ്ബം. യോ ഉദ്ദിസേയ്യ, ആപത്തി ദുക്കടസ്സ. ന സിക്ഖമാനായ…പേ… ന സാമണേരസ്സ …പേ… ന സാമണേരിയാ…പേ… ന സിക്ഖാപച്ചക്ഖാതകസ്സ…പേ… ന അന്തിമവത്ഥും അജ്ഝാപന്നകസ്സ നിസിന്നപരിസായ പാതിമോക്ഖം ഉദ്ദിസിതബ്ബം. യോ ഉദ്ദിസേയ്യ, ആപത്തി ദുക്കടസ്സ.

ന ആപത്തിയാ അദസ്സനേ ഉക്ഖിത്തകസ്സ നിസിന്നപരിസായ പാതിമോക്ഖം ഉദ്ദിസിതബ്ബം. യോ ഉദ്ദിസേയ്യ, യഥാധമ്മോ കാരേതബ്ബോ. ന ആപത്തിയാ അപ്പടികമ്മേ ഉക്ഖിത്തകസ്സ നിസിന്നപരിസായ…പേ… ന പാപികായ ദിട്ഠിയാ അപ്പടിനിസ്സഗ്ഗേ ഉക്ഖിത്തകസ്സ നിസിന്നപരിസായ പാതിമോക്ഖം ഉദ്ദിസിതബ്ബം. യോ ഉദ്ദിസേയ്യ, യഥാധമ്മോ കാരേതബ്ബോ.

ന പണ്ഡകസ്സ നിസിന്നപരിസായ പാതിമോക്ഖം ഉദ്ദിസിതബ്ബം. യോ ഉദ്ദിസേയ്യ, ആപത്തി ദുക്കടസ്സ. ന ഥേയ്യസംവാസകസ്സ…പേ… ന തിത്ഥിയപക്കന്തകസ്സ…പേ… ന തിരച്ഛാനഗതസ്സ…പേ… ന മാതുഘാതകസ്സ…പേ… ന പിതുഘാതകസ്സ…പേ… ന അരഹന്തഘാതകസ്സ…പേ… ന ഭിക്ഖുനിദൂസകസ്സ…പേ… ന സങ്ഘഭേദകസ്സ…പേ… ന ലോഹിതുപ്പാദകസ്സ…പേ… ന ഉഭതോബ്യഞ്ജനകസ്സ നിസിന്നപരിസായ പാതിമോക്ഖം ഉദ്ദിസിതബ്ബം. യോ ഉദ്ദിസേയ്യ, ആപത്തി ദുക്കടസ്സ.

ന, ഭിക്ഖവേ, പാരിവാസികപാരിസുദ്ധിദാനേന ഉപോസഥോ കാതബ്ബോ, അഞ്ഞത്ര അവുട്ഠിതായ പരിസായ. ന ച, ഭിക്ഖവേ, അനുപോസഥേ ഉപോസഥോ കാതബ്ബോ, അഞ്ഞത്ര സങ്ഘസാമഗ്ഗിയാതി.

വജ്ജനീയപുഗ്ഗലസന്ദസ്സനാ നിട്ഠിതാ.

തതിയഭാണവാരോ നിട്ഠിതോ.

ഉപോസഥക്ഖന്ധകോ ദുതിയോ.