൫൧. പിതുഘാതകവത്ഥു

൧൧൩. തേന ഖോ പന സമയേന അഞ്ഞതരോ മാണവകോ പിതരം ജീവിതാ വോരോപേസി. സോ തേന പാപകേന കമ്മേന അട്ടീയതി ഹരായതി ജിഗുച്ഛതി. അഥ ഖോ തസ്സ മാണവകസ്സ ഏതദഹോസി ‘‘കേന നു ഖോ അഹം ഉപായേന ഇമസ്സ പാപകസ്സ കമ്മസ്സ നിക്ഖന്തിം കരേയ്യ’’ന്തി. അഥ ഖോ തസ്സ മാണവകസ്സ ഏതദഹോസി ‘‘ഇമേ ഖോ സമണാ സക്യപുത്തിയാ ധമ്മചാരിനോ സമചാരിനോ ബ്രഹ്മചാരിനോ സച്ചവാദിനോ സീലവന്തോ കല്യാണധമ്മാ, സചേ ഖോ അഹം സമണേസു സക്യപുത്തിയേസു പബ്ബജേയ്യം, ഏവാഹം ഇമസ്സ പാപകസ്സ കമ്മസ്സ നിക്ഖന്തിം കരേയ്യ’’ന്തി. അഥ ഖോ സോ മാണവകോ ഭിക്ഖൂ ഉപസങ്കമിത്വാ പബ്ബജ്ജം യാചി. ഭിക്ഖൂ ആയസ്മന്തം ഉപാലിം ഏതദവോചും – ‘‘പുബ്ബേപി ഖോ, ആവുസോ ഉപാലി, നാഗോ മാണവകവണ്ണേന ഭിക്ഖൂസു പബ്ബജിതോ, ഇങ്ഘാവുസോ, ഉപാലി, ഇമം മാണവകം അനുയുഞ്ജാഹീ’’തി. അഥ ഖോ സോ മാണവകോ ആയസ്മതാ ഉപാലിനാ അനുയുഞ്ജീയമാനോ ഏതമത്ഥം ആരോചേസി. ആയസ്മാ ഉപാലി ഭിക്ഖൂനം ഏതമത്ഥം ആരോചേസി. ഭിക്ഖൂ ഭഗവതോ ഏതമത്ഥം ആരോചേസും. പിതുഘാതകോ, ഭിക്ഖവേ, അനുപസമ്പന്നോ ന ഉപസമ്പാദേതബ്ബോ, ഉപസമ്പന്നോ നാസേതബ്ബോതി.