൧. പഠമസങ്ഘാദിസേസസിക്ഖാപദവണ്ണനാ

൬൭൯. സങ്ഘാദിസേസകണ്ഡസ്സ പഠമസിക്ഖാപദേ ദ്വീസു ജനേസൂതി അഡ്ഡകാരകേസു ദ്വീസു ജനേസു. യോ കോചീതി തേസുയേവ ദ്വീസു യോ കോചി, അഞ്ഞോ വാ തേഹി ആണത്തോ. ദുതിയസ്സ ആരോചേതീതി ഏത്ഥാപി ദ്വീസു ജനേസു യസ്സ കസ്സചി ദുതിയസ്സ കഥം യോ കോചി ആരോചേതീതി ഏവമത്ഥോ ഗഹേതബ്ബോതി ആഹ ‘‘ദുതിയസ്സ ആരോചേതീതി ഏത്ഥാപി ഏസേവ നയോ’’തി. ഗതിഗതന്തി ചിരകാലപവത്തം.

ആപത്തീതി ആപജ്ജനം. സഹ വത്ഥുജ്ഝാചാരാതി വത്ഥുവീതിക്കമേന സഹ. സഹയോഗേ കരണവചനപ്പസങ്ഗേ ഇദം നിസ്സക്കവചനം. യന്തി യം ധമ്മം. നിസ്സാരേതീതി ആപന്നം ഭിക്ഖുനിസങ്ഘമ്ഹാ നിസ്സാരേതി. ഹേതുമ്ഹി ചായം കത്തുവോഹാരോ. നിസ്സാരണഹേതുഭൂതോ ഹി ധമ്മോ നിസ്സാരണീയോതി വുത്തോ. ഗീവായേവ ഹോതി, ന പാരാജികം അനാണത്തിയാ ഗഹിതത്താ. യഥാ ദാസദാസീവാപീആദീനി സമ്പടിച്ഛിതും ന വട്ടതി, ഏവം തേസം അത്ഥായ അഡ്ഡകരണമ്പി ന വട്ടതീതി ആഹ ‘‘അയം അകപ്പിയഅഡ്ഡോ നാമ, ന വട്ടതീ’’തി.

ഏത്ഥ ച സചേ അധികരണട്ഠാനം ഗന്ത്വാ ‘‘അമ്ഹാകം ഏസോ ദാസോ, ദാസീ, വാപീ, ഖേത്തം, ആരാമോ, ആരാമവത്ഥു, ഗാവോ, അജാ, കുക്കുടാ’’തിആദിനാ വോഹരതി, അകപ്പിയം. ‘‘അയം അമ്ഹാകം ആരാമികോ, അയം വാപീ ഇത്ഥന്നാമേന സങ്ഘസ്സ ഭണ്ഡധോവനത്ഥായ ദിന്നാ, ഇതോ ഖേത്തതോ ആരാമതോ ഉപ്പജ്ജനകചതുപച്ചയാ ഇതോ ഗാവിതോ മഹിംസിതോ അജാതോ ഉപ്പജ്ജനകഗോരസാ ഇത്ഥന്നാമേന സങ്ഘസ്സ ദിന്നാതി പുച്ഛിതേ വാ അപുച്ഛിതേ വാ വത്തും വട്ടതീ’’തി വദന്തി. സേസമേത്ഥ ഉത്താനമേവ. അനാകഡ്ഢിതായ അഡ്ഡകരണം, അഡ്ഡപരിയോസാനന്തി ഇമാനി പനേത്ഥ ദ്വേ അങ്ഗാനി.

പഠമസങ്ഘാദിസേസസിക്ഖാപദവണ്ണനാ നിട്ഠിതാ.