ഉപാലിപഞ്ചകവണ്ണനാ

൪൨൦-൪൨൧. ഓമദ്ദകാരകോതി ഓമദ്ദിത്വാ അഭിഭവിത്വാ കാരകോ. ഉപത്ഥമ്ഭോ ന ദാതബ്ബോതി സാമഗ്ഗിവിനാസായ അനുബലം ന ദാതബ്ബം. ദിട്ഠാവികമ്മമ്പി കത്വാതി ‘‘ന മേതം ഖമതീ’’തി ദിട്ഠിം ആവി കത്വാപി.

വോഹാരവഗ്ഗവണ്ണനാ

൪൨൪. കായപ്പയോഗേന ആപജ്ജിതബ്ബാ കായപ്പയോഗാ. വചീപയോഗേന ആപജ്ജിതബ്ബാ വചീപയോഗാ. നവസു ഠാനേസൂതി ഓസാരണാദീസു നവസു ഠാനേസു. ദ്വീസു ഠാനേസൂതി ഞത്തിദുതിയഞത്തിചതുത്ഥകമ്മേസു. തസ്മാതി യസ്മാ മഹാഅട്ഠകഥായം വുത്തനയേന ഉഭതോവിഭങ്ഗാ അസങ്ഗഹിതാ, തസ്മാ. യം കുരുന്ദിയം വുത്തം, തം ഗഹേതബ്ബന്തി സമ്ബന്ധോ.

ദിട്ഠാവികമ്മവഗ്ഗവണ്ണനാ

൪൨൫. ‘‘ചതൂഹി പഞ്ചഹീ’’തി വചനതോ ദ്വീഹി വാ തീഹി വാ ഏകതോ ദേസേതും വട്ടതി, തതോ പരം ന വട്ടതി. മാളകസീമായാതി ഖണ്ഡസീമായ. അവിപ്പവാസസീമായാതി മഹാസീമായ.

മുസാവാദവഗ്ഗവണ്ണനാ

൪൪൪. പരിയായേന ജാനന്തസ്സ വുത്തമുസാവാദോതി യസ്സ കസ്സചി ജാനന്തസ്സ പരിയായേന വുത്തമുസാവാദോതി അത്ഥോ.

൪൪൬. അനുയോഗോ ന ദാതബ്ബോതി തേന വുത്തം അനാദിയിത്വാ തുണ്ഹീ ഭവിതബ്ബന്തി അത്ഥോ.

ഭിക്ഖുനോവാദവഗ്ഗവണ്ണനാ

൪൫൪. ഏകൂനവീസതിഭേദായാതി മഗ്ഗപച്ചവേക്ഖണാദിവസേന ഏകൂനവീസതിഭേദായ.

അധികരണവൂപസമവഗ്ഗവണ്ണനാ

൪൫൮. പഞ്ചഹി കാരണേഹീതി ഇദം അത്ഥനിപ്ഫാദനകാനി തേസം പുബ്ബഭാഗാനി ച കാരണഭാവസാമഞ്ഞേന ഏകജ്ഝം ഗഹേത്വാ വുത്തം, ന പന സബ്ബേസം പഞ്ചന്നം സമാനയോഗക്ഖേമത്താ. അനുസ്സാവനേനാതി ഭേദസ്സ അനുരൂപസാവനേന. യഥാ ഭേദോ ഹോതി, ഏവം ഭിന്ദിതബ്ബാനം ഭിക്ഖൂനം അത്തനോ വചനസ്സ സാവനേന വിഞ്ഞാപനേനാതി അത്ഥോ. തേനാഹ ‘‘നനു തുമ്ഹേ’’തിആദി. കണ്ണമൂലേ വചീഭേദം കത്വാതി ഏതേന പാകടം കത്വാ ഭേദകരവത്ഥുദീപനം വോഹരണം. തത്ഥ അത്തനാ വിനിച്ഛിതമത്തം രഹസ്സവസേന വിഞ്ഞാപനം അനുസ്സാവനന്തി ദസ്സേതി. കമ്മമേവ ഉദ്ദേസോ വാ പമാണന്തി തേഹി സങ്ഘഭേദസിദ്ധിതോ പമാണം, ഇതരേ പന തേസം സമ്ഭാരഭൂതാ. തേനാഹ ‘‘വോഹാരാ’’തിആദി. തത്ഥാതി വോഹരണേ.

കഥിനത്ഥാരവഗ്ഗവണ്ണനാ

൪൬൭. അന്തരാ വുത്തകാരണേനാതി ‘‘തഞ്ഹി വന്ദന്തസ്സ മഞ്ചപാദാദീസുപി നലാടം പടിഹഞ്ഞേയ്യാ’’തിആദിനാ വുത്തകാരണേന.