ഭിക്ഖുനീവിഭങ്ഗോ

൧൭൦. ഭിക്ഖൂനം പാടവത്ഥായ, വിനയസ്സ വിനിച്ഛയേ;

ഭിക്ഖുനീനം വിഭങ്ഗോപി, കിഞ്ചിമത്തം ഭണാമഹം.

൧൭൧. അവസ്സുതസ്സ പോസസ്സ, ഭിക്ഖുനീപി അവസ്സുതാ;

നന്ദന്തീ കായസംസഗ്ഗം, കതി ആപത്തിയോ ഫുസേ;

൧൭൨. തിസ്സോ ആപത്തിയോ ഉബ്ഭ-ജാണുസ്സാധക്ഖകസ്സ ച;

ഹോതി പാരാജികം തസ്സാ, ഗഹണം സാദിയന്തിയാ.

൧൭൩. ഉബ്ഭക്ഖകം അധോജാണു-ഗഹണം സാദിയന്തിയാ;

ഥുല്ലച്ചയം സിയാ, കായ-പടിബദ്ധേ തു ദുക്കടം.

൧൭൪. ഛാദേന്തീ ഭിക്ഖുനീ വജ്ജം, തിസ്സോ ആപത്തിയോ ഫുസേ;

ജാനം പാരാജികം ധമ്മം, ഛാദേന്തീ സാ പരാജികാ.

൧൭൫. ഥുല്ലച്ചയം വേമതികാ, പടിച്ഛാദേതി ചേ പന;

അഥാചാരവിപത്തിം ചേ, പടിച്ഛാദേതി ദുക്കടം.

൧൭൬. നിസ്സജ്ജന്തീ ന തം ലദ്ധിം, ഉക്ഖിത്തസ്സാനുവത്തികാ;

സമനുഭാസനായേവ, തിസ്സോ ആപത്തിയോ ഫുസേ.

൧൭൭. ഞത്തിയാ ദുക്കടം, ദ്വീഹി, കമ്മവാചാഹി ഥുല്ലതാ;

കമ്മവാചായ ഓസാനേ, പാരാജികമുദീരിതം.

൧൭൮. പൂരേന്തീ അട്ഠമം വത്ഥും, തിസ്സോ ആപത്തിയോ ഫുസേ;

പുരിസേനിധാഗച്ഛാതി, വുത്താഗച്ഛതി ദുക്കടം.

൧൭൯. ഥുല്ലച്ചയം തു പോസസ്സ, ഹത്ഥപാസപ്പവേസനേ;

പൂരേന്തീ അട്ഠമം വത്ഥും, സമണീ സാ പരാജിതാ.

പാരാജികകഥാ.

൧൮൦. ഉസ്സയവാദികാ അട്ടം, കരോന്തീ തിവിധം ഫുസേ;

ഏകസ്സാരോചനേ തസ്സാ, ഹോതി ആപത്തി ദുക്കടം.

൧൮൧. ദുതിയാരോചനേ തസ്സാ, ഥുല്ലച്ചയമുദീരിതം;

അട്ടസ്സ പരിയോസാനേ, ഹോതി സങ്ഘാദിസേസതാ.

൧൮൨. ചോരിവുട്ഠാപികാ വാപി, ഞത്തിയാ ദുക്കടം ഫുസേ;

ദ്വീഹി ഥുല്ലച്ചയം കമ്മ-വാചോസാനേ ഗരും സിയാ.

൧൮൩. ഏകാ ഗാമന്തരം ഗച്ഛേ, ഗമനേ ദുക്കടം സിയാ;

പരിക്ഖേപേ അതിക്കന്തേ, പാദേന പഠമേന തു.

൧൮൪. ഹോതി ഥുല്ലച്ചയാപത്തി, തസ്സാ സമണിയാ പന;

ദുതിയേന അതിക്കന്തേ, ഗരുകേ പന തിട്ഠതി.

൧൮൫. ചതുത്ഥേ ദുതിയേ വുത്ത-സദിസോവ വിനിച്ഛയോ;

ആപത്തീനം പഭേദേ തു, കാചി നത്ഥി വിസേസതാ.

൧൮൬. അവസ്സുതാ സയം ഹുത്വാ, താദിസസ്സേവ ഹത്ഥതോ;

ഗഹേത്വാ പന ഭുഞ്ജന്തീ, ഭോജനാദീസു കിഞ്ചിപി.

൧൮൭. ഫുസേ ആപത്തിയോ തിസ്സോ, ഭോജനാദീസു കിഞ്ചിപി;

പടിഗ്ഗണ്ഹന്തിയാ തസ്സാ, ഹോതി ഥുല്ലച്ചയം പന.

൧൮൮. അജ്ഝോഹാരേസു സബ്ബേസു, ഹോതി സങ്ഘാദിസേസതാ;

ഉദകം ദന്തപോനം വാ, പടിഗ്ഗണ്ഹാതി ദുക്കടം.

൧൮൯. ‘‘സഹത്ഥേന ഗഹേത്വാ ത്വം, ഖാദ വാ ഭുഞ്ജ വാ’’തിപി;

ഉയ്യോജേന്തീ പനേവം തു, തിസ്സോ ആപത്തിയോ ഫുസേ.

൧൯൦. ദുക്കടം വചനേ തസ്സാ, ‘‘ഭുഞ്ജിസ്സാമീ’’തി ഗണ്ഹതി;

അജ്ഝോഹാരേസു സബ്ബേസു, തസ്സാ ഥുല്ലച്ചയം സിയാ.

൧൯൧. ഭോജനസ്സ പനോസാനേ, ഹോതി സങ്ഘാദിസേസതാ;

ഉയ്യോജേതി ച യാ തസ്സാ, ഇമാ തിസ്സോതി ദീപയേ.

൧൯൨. സത്തമേ അട്ഠമേ ചാപി, നവമേ ദസമേപി ച;

ചോരിവുട്ഠാപനേനേവ, സമാനോവ വിനിച്ഛയോ.

സങ്ഘാദിസേസകഥാ.

൧൯൩. പത്തസന്നിചയം യിഹ, കരോന്തീ ഭിക്ഖുനീ പന;

ഏകം നിസ്സഗ്ഗിയംയേവ, ഫുസേ പാചിത്തിയം തു സാ.

൧൯൪. അകാലചീവരം കാല-ചീവരം ഭാജാപേന്തിയാ;

പയോഗേ ദുക്കടം വുത്തം, ലാഭേ നിസ്സഗ്ഗിയം സിയാ.

൧൯൫. ചീവരം പരിവത്തേത്വാ, അച്ഛിന്ദതി സചേ പന;

പയോഗേ ദുക്കടം, ഛിന്നേ, തസ്സാ നിസ്സഗ്ഗിയം സിയാ.

൧൯൬. വിഞ്ഞാപേത്വാവ അഞ്ഞം ചേ, വിഞ്ഞാപേതി തതോ പരം;

പയോഗേ ദുക്കടം, വിഞ്ഞാ-പിതേ നിസ്സഗ്ഗിയം സിയാ.

൧൯൭. ചേതാപേത്വാ ഹി അഞ്ഞം ചേ, ചേതാപേതി തതോ പരം;

പയോഗേ ദുക്കടം, ചേതാ-പിതേ നിസ്സഗ്ഗിയം സിയാ.

൧൯൮. ഏവമേവ ച സേസേസു, ഛട്ഠാദീസു ച സത്തസു;

അനന്തരസമാനോവ, ആപത്തീനം വിനിച്ഛയോ.

നിസ്സഗ്ഗിയകഥാ.

൧൯൯. ലസുണം ഖാദതി ദ്വേ ചേ, ദുക്കടം ഗഹണേ സിയാ;

അജ്ഝോഹാരപയോഗേസു, പാചിത്തി പരിയാപുതാ.

൨൦൦. സംഹരാപേന്തിയാ ലോമം, സമ്ബാധേ ദ്വേവ ഹോന്തി ഹി;

പയോഗേ ദുക്കടം വുത്തം, ഹോതി പാചിത്തി സംഹടേ.

൨൦൧. കരോന്തീ തലഘാതം തു, ദ്വേ പനാപത്തിയോ ഫുസേ;

പയോഗേ ദുക്കടം ഹോതി, കതേ പാചിത്തിയം സിയാ.

൨൦൨. ജതുനാ മട്ഠകം കിഞ്ചി, സാദിയന്തീ ദുവേ ഫുസേ;

പയോഗേ ദുക്കടാദിന്നേ, തസ്സാ പാചിത്തിയം സിയാ.

൨൦൩. പഞ്ചമം തു ചതുത്ഥേന, സമാനമിതി ദീപയേ;

ആപത്തീനം വിഭാഗസ്മിം, വിസേസോ നത്ഥി കോചിപി.

൨൦൪. ഭിക്ഖുസ്സ ഭുഞ്ജമാനസ്സ, പാനീയേനുപതിട്ഠതി;

ഹത്ഥപാസേ തു പാചിത്തി, ഹിത്വാ തിട്ഠതി ദുക്കടം.

൨൦൫. വിഞ്ഞാപേത്വാമകം ധഞ്ഞം, ‘‘ഭുഞ്ജിസ്സാമീ’’തി ഗണ്ഹതി;

ദുക്കടം ഹോതി പാചിത്തി, അജ്ഝോഹാരേസു ദീപയേ.

൨൦൬. ഉച്ചാരാദിം തിരോകുട്ടേ, ഛഡ്ഡേന്തീ ദ്വേ ഫുസേ ഹവേ;

പയോഗേ ദുക്കടം വുത്തം, പാചിത്തി ഛഡ്ഡിതേ സിയാ.

൨൦൭. ഉച്ചാരാദിചതുക്കം തു, ഛഡ്ഡേതി ഹരിതേ സചേ;

പയോഗേ ദുക്കടം തസ്സാ, പാചിത്തി ഛഡ്ഡിതേ സിയാ.

൨൦൮. നച്ചാദിം ദസ്സനത്ഥായ, സചേ ഗച്ഛതി ദുക്കടം;

പസ്സന്തിയാപി പാചിത്തി, തഥേവ ച സുണന്തിയാ.

ലസുണവഗ്ഗോ പഠമോ.

൨൦൯. പഠമേ ദുതിയേ ചേവ, തതിയേ ച ചതുത്ഥകേ;

തുല്യോ ലസുണവഗ്ഗസ്സ, ഛട്ഠേനിധ വിനിച്ഛയോ.

൨൧൦. കുലാനി ഉപസങ്കമ്മ, നിസീദിത്വാ പനാസനേ;

സാമികേ തു അനാപുച്ഛാ, പക്കമന്തീ ദുവേ ഫുസേ.

൨൧൧. പഠമേന ച പാദേന, അനോവസ്സമതിക്കമേ;

ദുക്കടം ഹോതി, പാചിത്തി, ദുതിയാതിക്കമേ സിയാ.

൨൧൨. സാമികേ തു അനാപുച്ഛാ, ആസനേ ചേ നിസീദതി;

പയോഗേ ദുക്കടം ഹോതി, പാചിത്തി ച നിസീദിതേ.

൨൧൩. ഛട്ഠേന സത്തമം സബ്ബം, സമാനം അട്ഠമേ പന;

പയോഗേ ദുക്കടം, ഉജ്ഝാ-പിതേ പാചിത്തിയം സിയാ.

൨൧൪. അത്താനം ചാഭിസപ്പേന്തീ, ദ്വേ ഫുസേ നിരയാദിനാ;

പയോഗേ ദുക്കടം വുത്തം, പാചിത്തി അഭിസപ്പിതേ.

൨൧൫. വധിത്വാ പന അത്താനം, രോദന്തീ തു ദുവേ ഫുസേ;

വധതി രോദതി പാചിത്തി, കരോതേകം തു ദുക്കടം.

രത്തന്ധകാരവഗ്ഗോ ദുതിയോ.

൨൧൬. നഗ്ഗാ ന്ഹായതി ദ്വേ ചേവ, പയോഗേ ദുക്കടം സിയാ;

ന്ഹാനസ്സ പരിയോസാനേ, തസ്സാ പാചിത്തിയം സിയാ.

൨൧൭. കാരാപേതി പമാണാതി-ക്കന്തം ഉദകസാടികം;

പയോഗേ ദുക്കടം, കാരാ-പിതേ പാചിത്തിയം സിയാ.

൨൧൮. ചീവരം തു വിസിബ്ബേത്വാ, വിസിബ്ബാപേത്വ വാ പന;

നേവ സിബ്ബന്തിയാ വുത്ത-മേകം പാചിത്തിയം പന.

൨൧൯. പഞ്ചാഹികം തു സങ്ഘാടി-ചാരം പന അതിക്കമേ;

ഏകാവസ്സാ പനാപത്തി, പാചിത്തി പരിദീപിതാ.

൨൨൦. സചേ സങ്കമനീയം തു, ധാരേതി പന ചീവരം;

പയോഗേ ദുക്കടം വുത്തം, പാചിത്തി പന ധാരിതേ.

൨൨൧. ഗണചീവരലാഭസ്സ, അന്തരായം കരോതി ചേ;

പയോഗേ ദുക്കടം ഹോതി, കതേ പാചിത്തിയം സിയാ.

൨൨൨. വിഭങ്ഗം പടിബാഹന്തീ, ചീവരാനം തു ധമ്മികം;

പയോഗേ ദുക്കടം വുത്തം, പാചിത്തി പടിബാഹിതേ.

൨൨൩. അഗാരികാദിനോ ദേതി, സചേ സമണചീവരം;

പയോഗേ ദുക്കടം, ദിന്നേ, പാചിത്തി പരിയാപുതാ.

൨൨൪. ചീവരേ ദുബ്ബലാസായ, കാലം ചേ സമതിക്കമേ;

പയോഗേ ദുക്കടം വുത്തം, പാചിത്തി സമതിക്കമേ.

൨൨൫. ധമ്മികം കഥിനുദ്ധാരം, പടിബാഹന്തിയാ ദുവേ;

പയോഗേ ദുക്കടം ഹോതി, പാചിത്തി പടിബാഹിതേ.

ന്ഹാനവഗ്ഗോ തതിയോ.

൨൨൬. ദുവേ ഭിക്ഖുനിയോ ഏക-മഞ്ചസ്മിം ചേ തുവട്ടേയ്യും;

പയോഗേ ദുക്കടം താസം, നിപന്നേ ഇതരം സിയാ.

൨൨൭. ദുതിയം പഠമേനേവ, സദിസം തതിയേ പന;

പയോഗേ ദുക്കടം ഹോതി, കതേ പാചിത്തിയം സിയാ.

൨൨൮. നുപട്ഠാപേന്തിയാ വാപി, ദുക്ഖിതം സഹജീവിനിം;

ഏകായേവ പനാപത്തി, പാചിത്തി പരിദീപിതാ.

൨൨൯. സചേ ഉപസ്സയം ദത്വാ, നിക്കഡ്ഢതി ച ഭിക്ഖുനിം;

പയോഗേ ദുക്കടം തസ്സാ, ഹോതി പാചിത്തി കഡ്ഢിതേ.

൨൩൦. ഛട്ഠേ പന ച സംസട്ഠാ, ഞത്തിയാ ദുക്കടം ഫുസേ;

കമ്മവാചായ ഓസാനേ, പാചിത്തി പരിദീപിതാ.

൨൩൧. അന്തോരട്ഠേ തു സാസങ്കേ, ചാരികം തു ചരന്തിയാ;

പയോഗേ ദുക്കടം വുത്തം, പടിപന്നായ സേസകം.

൨൩൨. അട്ഠമം നവമഞ്ചേവ, സത്തമേന സമം മതം;

ദസമേ പന ഏകാവ, പാചിത്തി പരിദീപിതാ.

തുവട്ടവഗ്ഗോ ചതുത്ഥോ.

൨൩൩. രാജാഗാരാദികം സബ്ബം, ദസ്സനത്ഥായ ഗച്ഛതി;

പയോഗേ ദുക്കടം തസ്സാ, പാചിത്തി യദി പസ്സതി.

൨൩൪. ആസന്ദിം വാപി പല്ലങ്കം, പരിഭുഞ്ജന്തിയാ ദുവേ;

പയോഗേ ദുക്കടം വുത്തം, ഭുത്തേ പാചിത്തിയം സിയാ.

൨൩൫. സുത്തം കന്തന്തിയാ ദ്വേവ, പയോഗേ ദുക്കടം മതം;

ഉജ്ജവുജ്ജവനേ തസ്സാ, പാചിത്തി സമുദാഹരേ.

൨൩൬. വേയ്യാവച്ചം ഗിഹീനം തു, ദ്വേവ ഹോന്തി കരോന്തിയാ;

പയോഗേ ദുക്കടം വുത്തം, കതേ പാചിത്തിയം സിയാ.

൨൩൭. പഞ്ചമേ പന ഏകാവ, പാചിത്തി പരിദീപിതാ;

പയോഗേ ദുക്കടം ഛട്ഠേ, ദിന്നേ പാചിത്തിയം സിയാ.

൨൩൮. സത്തമം ദുതിയേനേവ, സമാപത്തിപഭേദതോ;

അട്ഠമം ദുതിയേ വഗ്ഗേ, പഞ്ചമേന സമം മതം.

൨൩൯. തിരച്ഛാനഗതം വിജ്ജം, ദ്വേവ ഹോന്തി പഠന്തിയാ;

പയോഗേ ദുക്കടം ഹോതി, പാചിത്തി ഹി പദേ പദേ.

൨൪൦. ദസമം നവമേനേവ, സമാനം സബ്ബഥാ പന;

‘‘പരിയാപുണാതി, വാചേതി’’, പദമത്തം വിസേസകം.