ഭിക്ഖുനീവിഭങ്ഗോ

൧൯൬൪. ഭിക്ഖുനീനം ഹിതത്ഥായ, വിഭങ്ഗം യം ജിനോബ്രവി;

തസ്മിം അപി സമാസേന, കിഞ്ചിമത്തം ഭണാമഹം.

പാരാജികകഥാ

൧൯൬൫. ഛന്ദസോ മേഥുനം ധമ്മം, പടിസേവേയ്യ യാ പന;

ഹോതി പാരാജികാ നാമ, സമണീ സാ പവുച്ചതി.

൧൯൬൬. മനുസ്സപുരിസാദീനം, നവന്നം യസ്സ കസ്സചി;

സജീവസ്സാപ്യജീവസ്സ, സന്ഥതം വാ അസന്ഥതം.

൧൯൬൭. അത്തനോ തിവിധേ മഗ്ഗേ, യേഭുയ്യക്ഖായിതാദികം;

അങ്ഗജാതം പവേസേന്തീ, അല്ലോകാസേ പരാജിതാ.

൧൯൬൮. ഇതോ പരമവത്വാവ, സാധാരണവിനിച്ഛയം;

അസാധാരണമേവാഹം, ഭണിസ്സാമി സമാസതോ.

൧൯൬൯. അധക്ഖകം സരീരകം, യദുബ്ഭജാണുമണ്ഡലം;

സരീരകേന ചേ തേന, ഫുസേയ്യ ഭിക്ഖുനീ പന.

൧൯൭൦. അവസ്സുതസ്സാവസ്സുതാ, മനുസ്സപുഗ്ഗലസ്സ യാ;

സരീരമസ്സ തേന വാ, ഫുട്ഠാ പാരാജികാ സിയാ.

൧൯൭൧. കപ്പരസ്സ പനുദ്ധമ്പി, ഗഹിതം ഉബ്ഭജാണുനാ;

യഥാവുത്തപ്പകാരേന, കായേനാനേന അത്തനോ.

൧൯൭൨. പുരിസസ്സ തഥാ കായ- പടിബദ്ധം ഫുസന്തിയാ;

തഥാ യഥാപരിച്ഛിന്ന- കായബദ്ധേന അത്തനോ.

൧൯൭൩. അവസേസേന വാ തസ്സ, കായം കായേന അത്തനോ;

ഹോതി ഥുല്ലച്ചയം തസ്സാ, പയോഗേ പുരിസസ്സ ച.

൧൯൭൪. യക്ഖപേതതിരച്ഛാന- പണ്ഡകാനം അധക്ഖകം;

ഉബ്ഭജാണും തഥേവസ്സാ, ഉഭതോവസ്സവേ സതി.

൧൯൭൫. ഏകതോവസ്സവേ ചാപി, ഥുല്ലച്ചയമുദീരിതം;

അവസേസേ ച സബ്ബത്ഥ, ഹോതി ആപത്തി ദുക്കടം.

൧൯൭൬. ഉബ്ഭക്ഖകമധോജാണു-മണ്ഡലം പന യം ഇധ;

കപ്പരസ്സ ച ഹേട്ഠാപി, ഗതം ഏത്ഥേവ സങ്ഗഹം.

൧൯൭൭. കേലായതി സചേ ഭിക്ഖു, സദ്ധിം ഭിക്ഖുനിയാ പന;

ഉഭിന്നം കായസംസഗ്ഗ-രാഗേ സതി ഹി ഭിക്ഖുനോ.

൧൯൭൮. ഹോതി സങ്ഘാദിസേസോവ, നാസോ ഭിക്ഖുനിയാ സിയാ;

കായസംസഗ്ഗരാഗോ ച, സചേ ഭിക്ഖുനിയാ സിയാ.

൧൯൭൯. ഭിക്ഖുനോ മേഥുനോ രാഗോ, ഗേഹപേമമ്പി വാ ഭവേ;

തസ്സാ ഥുല്ലച്ചയം വുത്തം, ഭിക്ഖുനോ ഹോതി ദുക്കടം.

൧൯൮൦. ഉഭിന്നം മേഥുനേ രാഗേ, ഗേഹപേമേപി വാ സതി;

അവിസേസേന നിദ്ദിട്ഠം, ഉഭിന്നം ദുക്കടം പന.

൧൯൮൧. യസ്സ യത്ഥ മനോസുദ്ധം, തസ്സ തത്ഥ ന ദോസതാ;

ഉഭിന്നമ്പി അനാപത്തി, ഉഭിന്നം ചിത്തസുദ്ധിയാ.

൧൯൮൨. കായസംസഗ്ഗരാഗേന, ഭിന്ദിത്വാ പഠമം പന;

പച്ഛാ ദൂസേതി ചേ നേവ, ഹോതി ഭിക്ഖുനിദൂസകോ.

൧൯൮൩. അഥ ഭിക്ഖുനിയാ ഫുട്ഠോ, സാദിയന്തോവ ചേതസാ;

നിച്ചലോ ഹോതി ചേ ഭിക്ഖു, ന ഹോതാപത്തി ഭിക്ഖുനോ.

൧൯൮൪. ഭിക്ഖുനീ ഭിക്ഖുനാ ഫുട്ഠാ, സചേ ഹോതിപി നിച്ചലാ;

അധിവാസേതി സമ്ഫസ്സം, തസ്സാ പാരാജികം സിയാ.

൧൯൮൫. തഥാ ഥുല്ലച്ചയം ഖേത്തേ, ദുക്കടഞ്ച വിനിദ്ദിസേ;

വുത്തത്താ ‘‘കായസംസഗ്ഗം, സാദിയേയ്യാ’’തി സത്ഥുനാ.

൧൯൮൬. തസ്സാ ക്രിയസമുട്ഠാനം, ഏവം സതി ന ദിസ്സതി;

ഇദം തബ്ബഹുലേനേവ, നയേന പരിദീപിതം.

൧൯൮൭. അനാപത്തി അസഞ്ചിച്ച, അജാനിത്വാമസന്തിയാ;

സതി ആമസനേ തസ്സാ, ഫസ്സം വാസാദിയന്തിയാ.

൧൯൮൮. വേദനട്ടായ വാ ഖിത്ത-ചിത്തായുമ്മത്തികായ വാ;

സമുട്ഠാനാദയോ തുല്യാ, പഠമന്തിമവത്ഥുനാ.

ഉബ്ഭജാണുമണ്ഡലകഥാ.

൧൯൮൯. പാരാജികത്തം ജാനന്തി, സലിങ്ഗേ തു ഠിതായ ഹി;

‘‘ന കസ്സചി പരസ്സാഹം, ആരോചേസ്സാമി ദാനി’’തി.

൧൯൯൦. ധുരേ നിക്ഖിത്തമത്തസ്മിം, സാ ച പാരാജികാ സിയാ;

അയം വജ്ജപടിച്ഛാദി- നാമികാ പന നാമതോ.

൧൯൯൧. സേസം സപ്പാണവഗ്ഗസ്മിം, ദുട്ഠുല്ലേന സമം നയേ;

വിസേസോ തത്ര പാചിത്തി, ഇധ പാരാജികം സിയാ.

വജ്ജപടിച്ഛാദികഥാ.

൧൯൯൨. സങ്ഘേനുക്ഖിത്തകോ ഭിക്ഖു, ഠിതോ ഉക്ഖേപനേ പന;

യംദിട്ഠികോ ച സോ തസ്സാ, ദിട്ഠിയാ ഗഹണേന തം.

൧൯൯൩. അനുവത്തേയ്യ യാ ഭിക്ഖും, ഭിക്ഖുനീ സാ വിസുമ്പി ച;

സങ്ഘമജ്ഝേപി അഞ്ഞാഹി, വുച്ചമാനാ തഥേവ ച.

൧൯൯൪. അചജന്തീവ തം വത്ഥും, ഗഹേത്വാ യദി തിട്ഠതി;

തസ്സ കമ്മസ്സ ഓസാനേ, ഉക്ഖിത്തസ്സാനുവത്തികാ.

൧൯൯൫. ഹോതി പാരാജികാപന്നാ, ഹോതാസാകിയധീതരാ;

പുന അപ്പടിസന്ധേയാ, ദ്വിധാ ഭിന്നാ സിലാ വിയ.

൧൯൯൬. അധമ്മേ പന കമ്മസ്മിം, നിദ്ദിട്ഠം തികദുക്കടം;

സമുട്ഠാനാദയോ സബ്ബേ, വുത്താ സമനുഭാസനേ.

ഉക്ഖിത്താനുവത്തികകഥാ.

൧൯൯൭. അപാരാജികഖേത്തസ്സ, ഗഹണം യസ്സ കസ്സചി;

അങ്ഗസ്സ പന തം ഹത്ഥ-ഗ്ഗഹണന്തി പവുച്ചതി.

൧൯൯൮. പാരുതസ്സ നിവത്ഥസ്സ, ഗഹണം യസ്സ കസ്സചി;

ഏതം സങ്ഘാടിയാ കണ്ണ-ഗ്ഗഹണന്തി പവുച്ചതി.

൧൯൯൯. കായസംസഗ്ഗസങ്ഖാത-അസദ്ധമ്മസ്സ കാരണാ;

ഭിക്ഖുനീ ഹത്ഥപാസസ്മിം, തിട്ഠേയ്യ പുരിസസ്സ വാ.

൨൦൦൦. സല്ലപേയ്യ തഥാ തത്ഥ, ഠത്വാ തു പുരിസേന വാ;

സങ്കേതം വാപി ഗച്ഛേയ്യ, ഇച്ഛേയ്യാ ഗമനസ്സ വാ.

൨൦൦൧. തദത്ഥായ പടിച്ഛന്ന-ട്ഠാനഞ്ച പവിസേയ്യ വാ;

ഉപസംഹരേയ്യ കായം വാ, ഹത്ഥപാസേ ഠിതാ പന.

൨൦൦൨. അയമസ്സമണീ ഹോതി, വിനട്ഠാ അട്ഠവത്ഥുകാ;

അഭബ്ബാ പുനരുള്ഹായ, ഛിന്നോ താലോവ മത്ഥകേ.

൨൦൦൩. അനുലോമേന വാ വത്ഥും, പടിലോമേന വാ ചുതാ;

അട്ഠമം പരിപൂരേന്തീ, തഥേകന്തരികായ വാ.

൨൦൦൪. അഥാദിതോ പനേകം വാ, ദ്വേ വാ തീണിപി സത്ത വാ;

സതക്ഖത്തുമ്പി പൂരേന്തീ, നേവ പാരാജികാ സിയാ.

൨൦൦൫. ആപത്തിയോ പനാപന്നാ, ദേസേത്വാ താഹി മുച്ചതി;

ധുരനിക്ഖേപനം കത്വാ, ദേസിതാ ഗണനൂപികാ.

൨൦൦൬. ന ഹോതാപത്തിയാ അങ്ഗം, സഉസ്സാഹായ ദേസിതാ;

ദേസനാഗണനം നേതി, ദേസിതാപി അദേസിതാ.

൨൦൦൭. അനാപത്തി അസഞ്ചിച്ച, അജാനിത്വാ കരോന്തിയാ;

സമുട്ഠാനാദയോ സബ്ബേ, അനന്തരസമാ മതാ.

൨൦൦൮. ‘‘അസദ്ധമ്മോ’’തി നാമേത്ഥ, കായസംസഗ്ഗനാമകോ;

അയമുദ്ദിസിതോ അത്ഥോ, സബ്ബഅട്ഠകഥാസുപി.

൨൦൦൯. വിഞ്ഞൂ പടിബലോ കായ-സംസഗ്ഗം പടിപജ്ജിതും;

കായസംസഗ്ഗഭാവേ തു, സാധകം വചനം ഇദം.

അട്ഠവത്ഥുകകഥാ.

൨൦൧൦. അവസ്സുതാ പടിച്ഛാദീ, ഉക്ഖിത്താ അട്ഠവത്ഥുകാ;

അസാധാരണപഞ്ഞത്താ, ചതസ്സോവ മഹേസിനാ.

പാരാജികകഥാ നിട്ഠിതാ.

സങ്ഘാദിസേസകഥാ

൨൦൧൧. യാ പന ഭിക്ഖുനീ ഉസ്സയവാദാ;

അട്ടകരീ മുഖരീ വിഹരേയ്യ;

യേന കേനചി നരേനിധ സദ്ധിം;

സാ ഗരുകം കിര ദോസമുപേതി.

൨൦൧൨. സക്ഖിം വാപി സഹായം വാ, പരിയേസതി ദുക്കടം;

പദേ പദേ തഥാ അട്ടം, കാതും ഗച്ഛന്തിയാപി ച.

൨൦൧൩. ആരോചേതി സചേ പുബ്ബം, ഭിക്ഖുനീ അത്തനോ കഥം;

ദിസ്വാ വോഹാരികം തസ്സാ, ഹോതി ആപത്തി ദുക്കടം.

൨൦൧൪. ആരോചേതി സചേ പച്ഛാ, ഇതരോ അത്തനോ കഥം;

ഹോതി ഭിക്ഖുനിയാ തസ്സാ, ഥുല്ലച്ചയമനന്തരം.

൨൦൧൫. ആരോചേതിതരോ പുബ്ബം, സചേ സോ അത്തനോ കഥം;

പച്ഛാ ഭിക്ഖുനീ ചേ പുബ്ബ-സദിസോവ വിനിച്ഛയോ.

൨൦൧൬. ‘‘ആരോചേഹീ’’തി വുത്താ ചേ, ‘‘കഥം തവ മമാപി ച’’;

ആരോചേതു യഥാകാമം, പഠമേ ദുക്കടം സിയാ.

൨൦൧൭. ദുതിയാരോചനേ തസ്സാ, ഥുല്ലച്ചയമുദീരിതം;

ഉപാസകേന വുത്തേപി, അയമേവ വിനിച്ഛയോ.

൨൦൧൮. ആരോചിതകഥം സുത്വാ, ഉഭിന്നമ്പി യഥാ തഥാ;

വിനിച്ഛയേ കതേ തേഹി, അട്ടേ പന ച നിട്ഠിതേ.

൨൦൧൯. അട്ടസ്സ പരിയോസാനേ, ജയേ ഭിക്ഖുനിയാ പന;

പരാജയേപി വാ തസ്സാ, ഹോതി സങ്ഘാദിസേസതാ.

൨൦൨൦. ദൂതം വാപി പഹിണിത്വാ, ആഗന്ത്വാന സയമ്പി വാ;

പച്ചത്ഥികമനുസ്സേഹി, ആകഡ്ഢീയതി യാ പന.

൨൦൨൧. ആരാമേ പന അഞ്ഞേഹി, അനാചാരം കതം സചേ;

അനോദിസ്സ പരം കിഞ്ചി, രക്ഖം യാചതി തത്ഥ യാ.

൨൦൨൨. യായ കിഞ്ചി അവുത്താവ, ധമ്മട്ഠാ സയമേവ തു;

സുത്വാ തം അഞ്ഞതോ അട്ടം, നിട്ഠാപേന്തി സചേ പന.

൨൦൨൩. തസ്സാ, ഉമ്മത്തികാദീന-മനാപത്തി പകാസിതാ;

കഥിനേന സമുട്ഠാനം, തുല്യം സകിരിയം ഇദം.

അട്ടകാരികഥാ.

൨൦൨൪. ജാനന്തീ ഭിക്ഖുനീ ചോരിം, വജ്ഝം വിദിതമേവ യാ;

സങ്ഘം അനപലോകേത്വാ, രാജാനം ഗണമേവ വാ.

൨൦൨൫. വുട്ഠാപേയ്യ വിനാ കപ്പം, ചോരിവുട്ഠാപനം പന;

സങ്ഘാദിസേസമാപത്തി-മാപന്നാ നാമ ഹോതി സാ.

൨൦൨൬. പഞ്ചമാസഗ്ഘനം യായ, ഹരിതം പരസന്തകം;

അതിരേകഗ്ഘനം വാപി, അയം ‘‘ചോരീ’’തി വുച്ചതി.

൨൦൨൭. ഭിക്ഖുനീസു പനഞ്ഞാസു, തിത്ഥിയേസുപി വാ തഥാ;

യാ പബ്ബജിതപുബ്ബാ സാ, അയം ‘‘കപ്പാ’’തി വുച്ചതി.

൨൦൨൮. വുട്ഠാപേതി ച യാ ചോരിം, ഠപേത്വാ കപ്പമേവിദം;

സചേ ആചരിനിം പത്തം, ചീവരം പരിയേസതി.

൨൦൨൯. സമ്മന്നതി ച സീമം വാ, തസ്സാ ആപത്തി ദുക്കടം;

ഞത്തിയാ ദുക്കടം ദ്വീഹി, കമ്മവാചാഹി ച ദ്വയം.

൨൦൩൦. ഥുല്ലച്ചയസ്സ, കമ്മന്തേ, ഗരുകം നിദ്ദിസേ ബുധോ;

ഗണോ ആചരിനീ ചേവ, ന ച മുച്ചതി ദുക്കടം.

൨൦൩൧. അനാപത്തി അജാനന്തീ, വുട്ഠാപേതി, തഥേവ ച;

കപ്പം വാ അപലോകേത്വാ, തസ്സാ ഉമ്മത്തികായ വാ.

൨൦൩൨. ചോരിവുട്ഠാപനം നാമ, ജായതേ വാചചിത്തതോ;

കായവാചാദിതോ ചേവ, സചിത്തഞ്ച ക്രിയാക്രിയം.

ചോരിവുട്ഠാപനകഥാ.