സേഖിയകഥാ

൧൮൭൦. യോ അനാദരിയേനേവ, പുരതോ പച്ഛതോപി വാ;

ഓലമ്ബേത്വാ നിവാസേയ്യ, തസ്സ ചാപത്തി ദുക്കടം.

൧൮൭൧. ഹത്ഥിസോണ്ഡാദിതുല്യം തു, നിവാസേന്തസ്സ ദുക്കടം;

ആപത്തിഭീരുനാ നിച്ചം, വത്ഥബ്ബം പരിമണ്ഡലം.

൧൮൭൨. ജാണുമണ്ഡലതോ ഹേട്ഠാ, അട്ഠങ്ഗുലപ്പമാണകം;

ഓതാരേത്വാ നിവത്ഥബ്ബം, തതോ ഊനം ന വട്ടതി.

൧൮൭൩. അസഞ്ചിച്ചാസതിസ്സാപി, അജാനന്തസ്സ കേവലം;

അനാപത്തി ഗിലാനസ്സാ-പദാസുമ്മത്തകാദിനോ.

പരിമണ്ഡലകഥാ.

൧൮൭൪. ഉഭോ കോണേ സമം കത്വാ, സാദരം പരിമണ്ഡലം;

കത്വാ പാരുപിതബ്ബേവം, അകരോന്തസ്സ ദുക്കടം.

൧൮൭൫. അവിസേസേന വുത്തം തു, ഇദം സിക്ഖാപദദ്വയം;

തസ്മാ ഘരേ വിഹാരേ വാ, കത്തബ്ബം പരിമണ്ഡലം.

ദുതിയം.

൧൮൭൬. ഗണ്ഠികം പടിമുഞ്ചിത്വാ, കത്വാ കോണേ ഉഭോ സമം;

ഛാദേത്വാ മണിബന്ധഞ്ച, ഗന്തബ്ബം ഗീവമേവ ച.

൧൮൭൭. തഥാ അകത്വാ ഭിക്ഖുസ്സ, ജത്തൂനിപി ഉരമ്പി ച;

വിവരിത്വാ യഥാകാമം, ഗച്ഛതോ ഹോതി ദുക്കടം.

തതിയം.

൧൮൭൮. ഗലവാടകതോ ഉദ്ധം, സീസഞ്ച മണിബന്ധതോ;

ഹത്ഥേ പിണ്ഡികമംസമ്ഹാ, ഹേട്ഠാ പാദേ ഉഭോപി ച.

൧൮൭൯. വിവരിത്വാവസേസഞ്ച, ഛാദേത്വാ ചേ നിസീദതി;

ഹോതി സോ സുപ്പടിച്ഛന്നോ, ദോസോ വാസൂപഗസ്സ ന.

ചതുത്ഥം.

൧൮൮൦. ഹത്ഥം വാ പന പാദം വാ, അചാലേന്തേന ഭിക്ഖുനാ;

സുവിനീതേന ഗന്തബ്ബം, ഛട്ഠേ നത്ഥി വിസേസതാ.

പഞ്ചമഛട്ഠാനി.

൧൮൮൧. സതീമതാവികാരേന, യുഗമത്തഞ്ച പേക്ഖിനാ;

സുസംവുതേന ഗന്തബ്ബം, ഭിക്ഖുനോക്ഖിത്തചക്ഖുനാ.

൧൮൮൨. യത്ഥ കത്ഥചി ഹി ട്ഠാനേ, ഏകസ്മിം അന്തരേ ഘരേ;

ഠത്വാ പരിസ്സയാഭാവം, ഓലോകേതുമ്പി വട്ടതി.

൧൮൮൩. യോ അനാദരിയം കത്വാ, ഓലോകേന്തോ തഹിം തഹിം;

സചേന്തരഘരേ യാതി, ദുക്കടം അട്ഠമം തഥാ.

സത്തമട്ഠമാനി.

൧൮൮൪. ഏകതോ ഉഭതോ വാപി, ഹുത്വാ ഉക്ഖിത്തചീവരോ;

ഇന്ദഖീലകതോ അന്തോ, ഗച്ഛതോ ഹോതി ദുക്കടം.

നവമം.

൧൮൮൫. തഥാ നിസിന്നകാലേപി, നീഹരന്തേന കുണ്ഡികം;

അനുക്ഖിപിത്വാ ദാതബ്ബാ, ദോസോ വാസൂപഗസ്സ ന.

ദസമം.

പഠമോ വഗ്ഗോ.

൧൮൮൬. ന വട്ടതി ഹസന്തേന, ഗന്തുഞ്ചേവ നിസീദിതും;

വത്ഥുസ്മിം ഹസനീയസ്മിം, സിതമത്തം തു വട്ടതി.

പഠമദുതിയാനി.

൧൮൮൭. അപ്പസദ്ദേന ഗന്തബ്ബം, ചതുത്ഥേപി അയം നയോ;

മഹാസദ്ദം കരോന്തസ്സ, ഉഭയത്ഥാപി ദുക്കടം.

തതിയചതുത്ഥാനി.

൧൮൮൮. കായപ്പചാലകം കത്വാ, ബാഹുസീസപ്പചാലകം;

ഗച്ഛതോ ദുക്കടം ഹോതി, തഥേവ ച നിസീദതോ.

൧൮൮൯. കായം ബാഹുഞ്ച സീസഞ്ച, പഗ്ഗഹേത്വാ ഉജും പന;

ഗന്തബ്ബമാസിതബ്ബഞ്ച, സമേനിരിയാപഥേന തു.

൧൮൯൦. നിസീദനേന യുത്തേസു, തീസു വാസൂപഗസ്സ ഹി;

അനാപത്തീതി ഞാതബ്ബം, വിഞ്ഞുനാ വിനയഞ്ഞുനാ.

ദുതിയോ വഗ്ഗോ.

൧൮൯൧. ഖമ്ഭം കത്വാ സസീസം വാ, പാരുപിത്വാന ഗച്ഛതോ;

ദുക്കടം മുനിനാ വുത്തം, തഥാ ഉക്കുടികായ വാ.

൧൮൯൨. ഹത്ഥപല്ലത്ഥികായാപി, ദുസ്സപല്ലത്ഥികായ വാ;

തസ്സന്തരഘരേ ഹോതി, നിസീദന്തസ്സ ദുക്കടം.

൧൮൯൩. ദുതിയേ ച ചതുത്ഥേ ച, ഛട്ഠേ വാസൂപഗസ്സ തു;

അനാപത്തീതി സാരുപ്പാ, ഛബ്ബീസതി പകാസിതാ.

ഛട്ഠം.

൧൮൯൪. സക്കച്ചം സതിയുത്തേന, ഭിക്ഖുനാ പത്തസഞ്ഞിനാ;

പിണ്ഡപാതോ ഗഹേതബ്ബോ, സമസൂപോവ വിഞ്ഞുനാ.

൧൮൯൫. സൂപോ ഭത്തചതുബ്ഭാഗോ, ‘‘സമസൂപോ’’തി വുച്ചതി;

മുഗ്ഗമാസകുലത്ഥാനം, സൂപോ ‘‘സൂപോ’’തി വുച്ചതി.

൧൮൯൬. അനാപത്തി അസഞ്ചിച്ച, ഗിലാനസ്സ രസേരസേ;

തഥേവ ഞാതകാദീനം, അഞ്ഞത്ഥായ ധനേന വാ.

സത്തമട്ഠമനവമാനി.

൧൮൯൭. അന്തോലേഖാപമാണേന, പത്തസ്സ മുഖവട്ടിയാ;

പൂരിതോവ ഗഹേതബ്ബോ, അധിട്ഠാനൂപഗസ്സ തു.

൧൮൯൮. തത്ഥ ഥൂപീകതം കത്വാ, ഗണ്ഹതോ യാവകാലികം;

യം കിഞ്ചി പന ഭിക്ഖുസ്സ, ഹോതി ആപത്തി ദുക്കടം.

൧൮൯൯. അധിട്ഠാനൂപഗേ പത്തേ, കാലികത്തയമേവ ച;

സേസേ ഥൂപീകതം സബ്ബം, വട്ടതേവ ന സംസയോ.

൧൯൦൦. ദ്വീസു പത്തേസു ഭത്തം തു, ഗഹേത്വാ പത്തമേകകം;

പൂരേത്വാ യദി പേസേതി, ഭിക്ഖൂനം പന വട്ടതി.

൧൯൦൧. പത്തേ പക്ഖിപ്പമാനം യം, ഉച്ഛുഖണ്ഡഫലാദികം;

ഓരോഹതി സചേ ഹേട്ഠാ, ന തം ഥൂപീകതം സിയാ.

൧൯൦൨. പുപ്ഫതക്കോലകാദീനം, ഠപേത്വാ ചേ വടംസകം;

ദിന്നം അയാവകാലിത്താ, ന തം ഥൂപീകതം സിയാ.

൧൯൦൩. വടംസകം തു പൂവസ്സ, ഠപേത്വാ ഓദനോപരി;

പിണ്ഡപാതം സചേ ദേന്തി, ഇദം ഥൂപീകതം സിയാ.

൧൯൦൪. ഭത്തസ്സൂപരി പണ്ണം വാ, ഥാലകം വാപി കിഞ്ചിപി;

ഠപേത്വാ പരിപൂരേത്വാ, സചേ ഗണ്ഹാതി വട്ടതി.

൧൯൦൫. പടിഗ്ഗഹേതുമേവസ്സ, തം തു സബ്ബം ന വട്ടതി;

ഗഹിതം സുഗഹിതം, പച്ഛാ, ഭുഞ്ജിതബ്ബം യഥാസുഖം.

തതിയോ വഗ്ഗോ.

൧൯൦൬. പഠമം ദുതിയം വുത്ത-നയം തു തതിയേ പന;

ഉപരോധിമദസ്സേത്വാ, ഭോത്തബ്ബം പടിപാടിയാ.

൧൯൦൭. അഞ്ഞേസം അത്തനോ ഭത്തം, ആകിരം പന ഭാജനേ;

നത്ഥോമസതി ചേ ദോസോ, തഥാ ഉത്തരിഭങ്ഗകം.

തതിയം.

൧൯൦൮. ചതുത്ഥേ യം തു വത്തബ്ബം, വുത്തം പുബ്ബേ അസേസതോ;

പഞ്ചമേ മത്ഥകം ദോസോ, മദ്ദിത്വാ പരിഭുഞ്ജതോ.

൧൯൦൯. അനാപത്തി ഗിലാനസ്സ, പരിത്തേപി ച സേസകേ;

ഏകതോ പന മദ്ദിത്വാ, സംകഡ്ഢിത്വാന ഭുഞ്ജതോ.

ചതുത്ഥപഞ്ചമാനി.

൧൯൧൦. യോ ഭിയ്യോകമ്യതാഹേതു, സൂപം വാ ബ്യഞ്ജനമ്പി വാ;

പടിച്ഛാദേയ്യ ഭത്തേന, തസ്സ ചാപത്തി ദുക്കടം.

ഛട്ഠം.

൧൯൧൧. വിഞ്ഞത്തിയം തു വത്തബ്ബം, അപുബ്ബം നത്ഥി കിഞ്ചിപി;

അട്ഠമേ പന ഉജ്ഝാനേ, ഗിലാനോപി ന മുച്ചതി.

൧൯൧൨. ‘‘ദസ്സാമി ദാപേസ്സാമീ’’തി, ഓലോകേന്തസ്സ ഭിക്ഖുനോ;

അനാപത്തീതി ഞാതബ്ബം, ന ച ഉജ്ഝാനസഞ്ഞിനോ.

അട്ഠമം.

൧൯൧൩. മഹന്തം പന മോരണ്ഡം, കുക്കുടണ്ഡഞ്ച ഖുദ്ദകം;

തേസം മജ്ഝപ്പമാണേന, കത്തബ്ബോ കബളോ പന.

൧൯൧൪. ഖജ്ജകേ പന സബ്ബത്ഥ, മൂലഖാദനിയാദികേ;

ഫലാഫലേ അനാപത്തി, ഗിലാനുമ്മത്തകാദിനോ.

നവമം.

൧൯൧൫. അദീഘോ പന കാതബ്ബോ, ആലോപോ പരിമണ്ഡലോ;

ഖജ്ജതുത്തരിഭങ്ഗസ്മിം, അനാപത്തി ഫലാഫലേ.

ദസമം.

ചതുത്ഥോ വഗ്ഗോ.

൧൯൧൬. അനാഹടേ മുഖദ്വാരം, അപ്പത്തേ കബളേ പന;

അത്തനോ ച മുഖദ്വാരം, വിവരന്തസ്സ ദുക്കടം.

പഠമം.

൧൯൧൭. മുഖേ ച സകലം ഹത്ഥം, പക്ഖിപന്തസ്സ ദുക്കടം;

മുഖേ ച കബളം കത്വാ, കഥേതും ന ച വട്ടതി.

൧൯൧൮. വചനം യത്തകേനസ്സ, പരിപുണ്ണം ന ഹോതി ഹി;

മുഖസ്മിംതത്തകേ സന്തേ, ബ്യാഹരന്തസ്സ ദുക്കടം.

൧൯൧൯. മുഖേ ഹരീതകാദീനി, പക്ഖിപിത്വാ കഥേതി യോ;

വചനം പരിപുണ്ണം ചേ, കഥേതും പന വട്ടതി.

ദുതിയതതിയാനി.

൧൯൨൦. യോ പിണ്ഡുക്ഖേപകം ഭിക്ഖു, കബളച്ഛേദകമ്പി വാ;

മക്കടോ വിയ ഗണ്ഡേ വാ, കത്വാ ഭുഞ്ജേയ്യ ദുക്കടം.

ചതുത്ഥപഞ്ചമഛട്ഠാനി.

൧൯൨൧. നിദ്ധുനിത്വാന ഹത്ഥം വാ, ഭത്തം സിത്ഥാവകാരകം;

ജിവ്ഹാനിച്ഛാരകം വാപി, തഥാ ‘‘ചപു ചപൂ’’തി വാ.

൧൯൨൨. അനാദരവസേനേവ, ഭുഞ്ജതോ ഹോതി ദുക്കടം;

സത്തമേ അട്ഠമേ നത്ഥി, ദോസോ കചവരുജ്ഝനേ.

സത്തമദസമാനി.

പഞ്ചമോ വഗ്ഗോ.

൧൯൨൩. കത്വാ ഏവം ന ഭോത്തബ്ബം, സദ്ദം ‘‘സുരു സുരൂ’’തി ച;

ഹത്ഥനില്ലേഹകം വാപി, ന ച വട്ടതി ഭുഞ്ജിതും.

൧൯൨൪. ഫാണിതം ഘനയാഗും വാ, ഗഹേത്വാ അങ്ഗുലീഹി തം;

മുഖേ അങ്ഗുലിയോ ഭോത്തും, പവേസേത്വാപി വട്ടതി.

൧൯൨൫. ന പത്തോ ലേഹിതബ്ബോവ, ഏകായങ്ഗുലികായ വാ;

ഏകഓട്ഠോപി ജിവ്ഹായ, ന ച നില്ലേഹിതബ്ബകോ.

ചതുത്ഥം.

൧൯൨൬. സാമിസേന തു ഹത്ഥേന, ന ച പാനീയഥാലകം;

ഗഹേതബ്ബം, പടിക്ഖിത്തം, പടിക്കൂലവസേന ഹി.

൧൯൨൭. പുഗ്ഗലസ്സ ച സങ്ഘസ്സ, ഗഹട്ഠസ്സത്തനോപി ച;

സന്തകോ പന സങ്ഖോ വാ, സരാവം വാപി ഥാലകം.

൧൯൨൮. തസ്മാ ന ച ഗഹേതബ്ബം, ഗണ്ഹതോ ഹോതി ദുക്കടം;

അനാമിസേന ഹത്ഥേന, ഗഹണം പന വട്ടതി.

പഞ്ചമം.

൧൯൨൯. ഉദ്ധരിത്വാപി ഭിന്ദിത്വാ, ഗഹേത്വാ വാ പടിഗ്ഗഹേ;

നീഹരിത്വാ അനാപത്തി, ഛഡ്ഡേന്തസ്സ ഘരാ ബഹി.