പാടിദേസനീയകഥാ

൧൮൩൦. യോ ചന്തരഘരം ഭിക്ഖു, പവിട്ഠായ തു ഹത്ഥതോ;

അഞ്ഞാതികായ യം കിഞ്ചി, തസ്സ ഭിക്ഖുനിയാ പന.

൧൮൩൧. സഹത്ഥാ പടിഗ്ഗണ്ഹേയ്യ, ഖാദനം ഭോജനമ്പി വാ;

ഗഹണേ ദുക്കടം ഭോഗേ, പാടിദേസനിയം സിയാ.

൧൮൩൨. രഥികായപി വാ ബ്യൂഹേ, സന്ധിസിങ്ഘാടകേസു വാ;

ഹത്ഥിസാലാദികേ ഠത്വാ, ഗണ്ഹതോപി അയം നയോ.

൧൮൩൩. രഥികായ സചേ ഠത്വാ, ദേതി ഭിക്ഖുനി ഭോജനം;

ആപത്തി അന്തരാരാമേ, ഠത്വാ ഗണ്ഹാതി ഭിക്ഖു ചേ.

൧൮൩൪. ഏത്ഥന്തരഘരം തസ്സാ, പവിട്ഠായ ഹി വാക്യതോ;

ഭിക്ഖുസ്സ ച ഠിതട്ഠാനം, നപ്പമാണന്തി വണ്ണിതം.

൧൮൩൫. തസ്മാ ഭിക്ഖുനിയാ ഠത്വാ, ആരാമാദീസു ദേന്തിയാ;

വീഥിയാദീസു ചേ ഠത്വാ, ന ദോസോ പടിഗണ്ഹതോ.

൧൮൩൬. യാമകാലികസത്താഹ-കാലികം യാവജീവികം;

ആഹാരത്ഥായ ഗഹണേ, അജ്ഝോഹാരേ ച ദുക്കടം.

൧൮൩൭. ആമിസേന അസമ്ഭിന്ന-രസം സന്ധായ ഭാസിതം;

പാടിദേസനിയാപത്തി, സമ്ഭിന്നേകരസേ സിയാ.

൧൮൩൮. ഏകതോഉപസമ്പന്ന-ഹത്ഥതോ പടിഗണ്ഹതോ;

കാലികാനം ചതുന്നമ്പി, ആഹാരത്ഥായ ദുക്കടം.

൧൮൩൯. ഞാതികായപി അഞ്ഞാതി-സഞ്ഞിനോ വിമതിസ്സ വാ;

ദുക്കടം ഞാതിസഞ്ഞിസ്സ, തഥാ അഞ്ഞാതികായ വാ.

൧൮൪൦. ദാപേന്തിയാ അനാപത്തി, ദദമാനായ വാ പന;

നിക്ഖിപിത്വാന്തരാരാമാ-ദീസു ഠത്വാപി ദേന്തിയാ.

൧൮൪൧. ഗാമതോ നീഹരിത്വാ വാ, ദേതി ചേ ബഹി വട്ടതി;

‘‘പച്ചയേ സതി ഭുഞ്ജാ’’തി, ദേതി ചേ കാലികത്തയം.

൧൮൪൨. ഹത്ഥതോ സാമണേരീനം, സിക്ഖമാനായ വാ തഥാ;

ഇദം ഏളകലോമേന, സമുട്ഠാനം സമം മതം.

പഠമപാടിദേസനീയകഥാ.

൧൮൪൩. അവുത്തേ ‘‘അപസക്കാ’’തി, ഏകേനാപി ച ഭിക്ഖുനാ;

സചേജ്ഝോഹരണത്ഥായ, ആമിസം പടിഗണ്ഹതി.

൧൮൪൪. ഗഹണേ ദുക്കടം ഭോഗേ, പാടിദേസനിയം സിയാ;

ഏകതോഉപസമ്പന്നം, ന വാരേന്തസ്സ ദുക്കടം.

൧൮൪൫. തഥേവാനുപസമ്പന്നാ-യുപസമ്പന്നസഞ്ഞിനോ;

തത്ഥ വേമതികസ്സാപി, ഹോതി ആപത്തി ദുക്കടം.

൧൮൪൬. അനാപത്തിത്തനോ ഭത്തം, പദാപേതി ന ദേതി ചേ;

തഥാ അഞ്ഞസ്സ ഭത്തം വാ, ന ദാപേതി പദേതി ചേ.

൧൮൪൭. യം ന ദിന്നം തം ദാപേതി, ന ദിന്നം യത്ഥ വാപി ച;

തത്ഥ തമ്പി ച സബ്ബേസം, സമം ദാപേതി ഭിക്ഖുനീ.

൧൮൪൮. വോസാസന്തീ ഠിതാ സിക്ഖ-മാനാ വാ സാമണേരികാ;

ഭോജനാനി ച പഞ്ചേവ, വിനാ, ഉമ്മത്തകാദിനോ.

൧൮൪൯. കഥിനേന സമുട്ഠാനം, സമാനന്തി പകാസിതം;

ക്രിയാക്രിയമിദം വുത്തം, തിചിത്തഞ്ച തിവേദനം.

ദുതിയപാടിദേസനീയകഥാ.

൧൮൫൦. സേക്ഖന്തി സമ്മതേ ഭിക്ഖു, ലദ്ധസമ്മുതികേ കുലേ;

ഘരൂപചാരോക്കമനാ, പുബ്ബേവ അനിമന്തിതോ.

൧൮൫൧. അഗിലാനോ ഗഹേത്വാ ചേ, പരിഭുഞ്ജേയ്യ ആമിസം;

ഗഹണേ ദുക്കടം ഭോഗേ, പാടിദേസനിയം സിയാ.

൧൮൫൨. യാമകാലികസത്താഹ-കാലികേ യാവജീവികേ;

ഗഹണേ പരിഭോഗേ ച, ഹോതി ആപത്തി ദുക്കടം.

൧൮൫൩. അസേക്ഖസമ്മതേ സേക്ഖ-സമ്മതന്തി ച സഞ്ഞിനോ;

തത്ഥ വേമതികസ്സാപി, തഥേവ പരിദീപിതം.

൧൮൫൪. അനാപത്തി ഗിലാനസ്സ, ഗിലാനസ്സാവസേസകേ;

നിമന്തിതസ്സ വാ ഭിക്ഖാ, അഞ്ഞേസം തത്ഥ ദീയതി.

൧൮൫൫. ഘരതോ നീഹരിത്വാ വാ, ദേന്തി ചേ യത്ഥ കത്ഥചി;

നിച്ചഭത്താദികേ വാപി, തഥാ ഉമ്മത്തകാദിനോ.

൧൮൫൬. അനാഗതേ ഹി ഭിക്ഖുമ്ഹി, ഘരതോ പഠമം പന;

നീഹരിത്വാ സചേ ദ്വാരേ, സമ്പത്തേ ദേന്തി വട്ടതി.

൧൮൫൭. ഭിക്ഖും പന ച ദിസ്വാവ, നീഹരിത്വാന ഗേഹതോ;

ന വട്ടതി സചേ ദേന്തി, സമുട്ഠാനേളകൂപമം.

തതിയപാടിദേസനീയകഥാ.

൧൮൫൮. ഗഹട്ഠേനാഗഹട്ഠേന, ഇത്ഥിയാ പുരിസേന വാ;

ആരാമം ഉപചാരം വാ, പവിസിത്വാ സചേ പന.

൧൮൫൯. ‘‘ഇത്ഥന്നാമസ്സ തേ ഭത്തം, യാഗു വാ ആഹരീയതി’’;

ഏവമാരോചിതം വുത്തം, പടിസംവിദിതന്തി ഹി.

൧൮൬൦. ആഹരീയതു തം പച്ഛാ, യഥാരോചിതമേവ വാ;

തസ്സ വാ പരിവാരമ്പി, അഞ്ഞം കത്വാ ബഹും പന.

൧൮൬൧. യാഗുയാ വിദിതം കത്വാ, പൂവം ഭത്തം ഹരന്തി ചേ;

ഇദമ്പി വിദിതം വുത്തം, വട്ടതീതി കുരുന്ദിയം.

൧൮൬൨. കുലാനി പന അഞ്ഞാനി, ദേയ്യധമ്മം പനത്തനോ;

ഹരന്തി തേന സദ്ധിം ചേ, സബ്ബം വട്ടതി തമ്പി ച.

൧൮൬൩. അനാരോചിതമേവം യം, യം ആരാമമനാഭതം;

തം അസംവിദിതം നാമ, സഹധമ്മികഞാപിതം.

൧൮൬൪. യം അസംവിദിതം കത്വാ, ആഭതം പന തം ബഹി;

ആരാമം പന പേസേത്വാ, കാരാപേത്വാ തമാഹരേ.

൧൮൬൫. ഗന്ത്വാ വാ അന്തരാമഗ്ഗേ, ഗഹേതബ്ബം തു ഭിക്ഖുനാ;

സചേ ഏവമകത്വാ തം, ആരാമേ ഉപചാരതോ.

൧൮൬൬. ഗഹേത്വാജ്ഝോഹരന്തസ്സ, ഗഹണേ ദുക്കടം സിയാ;

അജ്ഝോഹാരപയോഗേസു, പാടിദേസനിയം മതം.

൧൮൬൭. പടിസംവിദിതേയേവ, അസംവിദിതസഞ്ഞിനോ;

തത്ഥ വേമതികസ്സാപി, ഹോതി ആപത്തി ദുക്കടം.

൧൮൬൮. പടിസംവിദിതേ തസ്സ, ഗിലാനസ്സാവസേസകേ;

ബഹാരാമേ ഗഹേത്വാ വാ, അന്തോയേവസ്സ ഭുഞ്ജതോ.

൧൮൬൯. തത്ഥജാതഫലാദീനി, അനാപത്തേവ ഖാദതോ;

സമുട്ഠാനാദയോ സബ്ബേ, കഥിനേന സമാ മതാ.

ചതുത്ഥപാടിദേസനീയകഥാ.

ഇതി വിനയവിനിച്ഛയേ പാടിദേസനീയകഥാ നിട്ഠിതാ.